ထူးဆန်းသော အိပ်မက်နှင့် မြေငလျင်

ကျွန်မနေထိုင်သော မြို့ကလေးမှာ ဆတ်သွားမြို့ ဖြစ်သည်။ မြို့ဟုဆိုသော်လည်း အခြားမြို့များကဲ့သို့ လူစည်ကားမှု မရှိပေ။ လူဦးရေ ၃၅၀၀-ခန့်နှင့် အိမ်ခြေ ၈၀၀-သာရှိသည်။ သို့သော် စေတီပုထိုးတို့မှာ ဟိုမှာတဆူ၊ သည်မှာတဆူ နှင့် လက်ညှိုးထိုးမလွဲ ပေါများလှသည်။ မြို့သူမြို့သားတို့သည် ဘုရားတရား ကြည်ညိုပြီး ငြိမ်းချမ်းစွာ နေထိုင်ခဲ့သည်မှာ နှစ်ပေါင်းအတော်ပင် ကြာမြင့်ခဲ့သည်။

သို့သော် မမျှော်လင့်ဘဲ သဘာဝဘေးအန္တရာယ်တခုကြောင့် ကျွန်မတို့မြို့ကလေးမှာ ပျက်စီးယိုယွင်းမှု များပြားခဲ့သည်။ မှတ်မိပါသေးသည်။ သဘာဝဘေးအန္တရာယ် ကျရောက်သည့်နေ့မှာ ၂၂-၉-၂၀၀၃ ဖြစ်သည်။ ထိုနေ့ကား ကျွန်မတို့မြို့ကလေး ကံကြမ္မာဆိုး ကျရောက်သည့်နေ့ပင် ဖြစ်သည်။

ဆောင်းကာလဖြစ်သည့်အတွက် မိုးသားတိမ်လိပ်တို့မှာ ကင်းစင်ကြသည်။ သို့သော် ထိုနေ့ညနေစောင်းတွင် တိမ်မဲ တိမ်တိုက်အချို့ အမှတ်မထင် ပေါ်လာသည်။ လေကလည်း ငြိမ်လှသည်။ ကျွန်မကား ပုံမှန်အတိုင်း ည ၇-နာရီတွင် ရုပ်မြင်သံကြားမှ ထုတ်လွှင့်ပြသသော ကိုးရီးယားဇာတ်ကားကို စောင့်ကြည့်သည်။ ထို့နောက် ၁၁-နာရီထိ စာကြည့်သည်။ စာကြည့်ပြီးသည့်အခါ ဘုရားဂုဏ်တော် ၉-ပါးနှင့် ရတနာ ၃-ပါးကို ရှိခိုးပူဇော်ပြီး အိပ်စက်သည်။ အိမ်အပေါ်ထပ်တွင် မိဘများက တခန်း၊ ကျွန်မက တခန်း အိပ်သည်။

အိပ်ပျော်သွားချိန်တွင် ထူးဆန်းသော အိပ်မက်တခုကို ကျွန်မ မြင်မက်သည်။ အိပ်မက်ထဲတွင် ကျွန်မသည် တောကြီးတခုထဲသို့ ရောက်နေသည်။ ထိုတောကြီးထဲသို့ ရောက်နေချိန်မှာ ညသန်းခေါင်ယံအချိန် ဖြစ်သည်။ လမင်းကြီးက ထိန်ထိန်သာနေသည်။ အသံဟူ၍ကား တိရစ္ဆာန်တကောင်၏ အသံကိုမျှပင် မကြားရပါ။ လူမရှိသည့် တောကြီးထဲသို့ ကျွန်မ မည်သို့မည်ပုံ ရောက်လာသည်ကိုပင် စဉ်းစား၍မရပါ။ ကြောက်မက်ဖွယ်ကောင်းသော်လည်း ခြေလှမ်းတို့က ဦးတည်ရာမဲ့ သွားနေသည်။

တော်ကြီးထဲရှိ သစ်ပင်ကြီးများမှာ ဧရာမသစ်ပင်ကြီးများ ဖြစ်သည်။ အကိုင်းအခက်များတွင် သစ်ရွက်များက စိုစိုပြည်ပြည်နှင့် အသီးများ ပြွတ်သိပ်အောင် သီးနေသည်။ ရှေ့ဆက်သွားရင်း တနေရာသို့အရောက်တွင် ကျွန်မ အလွန်ပျော်သွားသည်။ လူနှစ်ယောက်က မြေတူးနေသည်။ ကျွန်မ အဖော်ရပြီဟု သိလိုက်ရသည်။ သို့သော် ထိုလူ ၂-ဦးက ကျွန်မကို စိမ်းစိမ်းကားကားနှင့် ကြည့်နေသည်။ ပါးစပ်ကလည်း ပွစိပွစိနှင့် ပြောနေသည်။ မကျေနပ်ပုံများဖြစ်သည်။ ကျွန်မလည်း ထိုသူ ၂-ဦးကို ဥပေက္ခာပြုကာ ရှေ့ဆက်သွားသည်။

တနေရာတွင် ကျွန်မရှေ့သို့ ရသေ့တပါးပေါ်လာသည်။ သူက တနေရာသို့ လက်ညှိုးထိုးပြသည်။ ကျွန်မလည်း လက်ညှိုးထိုးသည့်နေရာကို ကြည့်လိုက်ရာ ထုံးဖြူဖွေးဖွေးနှင့် စေတီပုထိုးများကို ဖူးမြော်ရသည်။ ကျွန်မလည်း အလွန်ကြည်ညိုစွာဖြင့် ရှိခိုးကန်တော့သည်။ သုံးကြိမ်မြောက် ဦးချပြီး၍ ခေါင်းထောင်လိုက်ချိန်တွင် မြေကြီးမှာ ပုခက်လွဲသည့်အလား တုန်ခါသွားသည်။ ကျွန်မ အလွန်ကြောက်လန့်သွားသည်။ ထိုအခိုက်တွင် ဧရာမ သစ်ပင်ကြီး ကျွန်မအပေါ်သို့ ကျလာမည့်ဆဲဆဲတွင် ရသေ့ကြီးက ကျွန်မကို တွန်းလိုက်သည်။

ကျွန်မ၏အိပ်နေသော ကိုယ်ခန္ဓာလည်း အိပ်ရာအပြင်ဘက်သို့ သုံးပတ်၊ လေးပတ်လောက် လိမ့်ထွက်သွားပြီး အမေ့-ဟူသော အသံနှင့်အတူ လန့်နိုးလာသည်။ ထိုအခိုက် ကျွန်မ၏ အခန်းထက်က ပျဉ်ပြားကြီးမှာလည်း အိပ်ရာပေါ်သို့ ဗုန်းခနဲ ပြုတ်ကျလာသည်။ အမေတို့ကလည်း အိပ်ရာမှ ပြေးထွက်လာကာ သမီး ငလျင်လှုပ်နေတယ်။ အပြင်ထွက်ရအောင်-ဟူသော စကားသံကြောင့် ပို၍ပင် တုန်လှုပ်ကြောက်လန့် သွားပါသည်။ ထိုအချိန်ကား ၁၂-နာရီ ၄၅-မိနစ် ရှိနေသည်။

ထိုနေ့က ငလျင်ဒဏ်ကြောင့် ကျွန်မတို့မြို့ရှိ တိုက်တာအဆောက်အအုံများ၊ ကျောင်းကန်၊ ဇရပ်များ၊ စေတီပုထိုးများ ပြိုကျပျက်စီးသွားခဲ့ရသည်။ ထို့ထက် ပိုဆိုးသည်မှာ တိုက်တာအဆောက်အအုံများကြောင့် ပိ၍ သေဆုံးသည့်လူများ၊ ရဟန်းသံဃာတော်များအတွက် ၀မ်းနည်းကြေကွဲစရာပင် ဖြစ်လေသည်။ ကျွန်မသည်လည်း သေဘေးမှ လွတ်မြောက်သူတဦးပင် ဖြစ်လေသည်။

အမှန်တကယ်ဆိုလျှင် ပျဉ်ပြားကြီးမှာ ကျွန်မအိပ်နေသည့်အပေါ်သို့ တည့်တည့်ပြုတ်ကျလာခြင်း ဖြစ်သည်။ ထူးဆန်းသော အိပ်မက်ထဲမှ ရသေ့ကြီး၏ တွန်းလိုက်မှုကြောင့်သာ တဖက်သို့ လိမ့်ထွက်သွားပြီး အသက်ချမ်းသာ ရခဲ့ရပေပြီ။ အထူးသဖြင့် ညမအိပ်မီ ရတနာသုံးပါးနှင့် ဘုရားဂုဏ်တော်ကိုးပါးကို အာရုံပြု၍ ရှိခိုး ပူဇော်ကန်တော့သောကြောင့် အသက်ဘေးမှ လွတ်ခဲ့ရခြင်းဖြစ်သည်ဟု ယုံကြည်မိပါတော့သည်။

မမေဖူးဝေ (န၀မတန်း-ဆတ်သွား)
( မြတ်မင်္ဂလာ ၂၀၀၇-ခု သြဂုတ်လ)