Friday, May 21, 2010

ဝဋ်

ဝန်းသိုမြို့ အရှေ့ဘက်တမိုင်အကွာတွင် မိဿလင်ဂျင်းရွာ တည်ရှိပါသည်။ ထိုရွာ၏ကျောင်းတိုင်ပုဂ္ဂိုလ်မှာ သက်တော်သုံးဆယ်ခန့်သာ ရှိသေး၏။ စာရေးသူပင် ဖြစ်ပါသည်။
မိဿလင်ဂျင်းရွာ၌ ၂-နှစ်ကျော် သီတင်းသုံးခဲ့သည်မှစ၍ နေ့စဉ် အာစိဏ္ဏကံ ပဋ္ဌာန်းပစ္စယနိဒ္ဒေသနှင့် ပရိတ်တရားတော်တို့ကို အမြဲမပြတ် ရွတ်ဖတ်ခဲ့သည်။ ကောင်းကျိုးအမျိုးမျိုးကိုလည်း ရရှိခံစားရ၏။

သို့သော် သတ္တ၀ါတို့အပေါ် မေတ္တာတရား အားနည်းလှသည်။ ခွေး၊ ကြောင်၊ ကြက်၊ ငှက်တို့ကို မြင်လျှင် ကြည့်မရ၊ ရိုက်ချင်၊ ပစ်ခတ်ချင်နေသည်။ ကျောင်းတွင် ကြောက်ကလေးနှစ်ကောင် မွေးထား၏။ ချစ်၍တော့မဟုတ်၊ ကြွက်အန္တရာယ်ကိုကြောက်၍ဖြစ်သည်။ ကြောင်တွေ ခုတင်ပေါ်၊ စောင်ပေါ် အိပ်သည်ကို လုံးဝမနှစ်သက်ပါ။ တွေ့ရာတုတ်နှင့် ရိုက်ပစ်သည်။ တခါတလေ ကြွက်တွေကို ဗိုက်ကားအောင်စားပြီး ကျောင်းပေါ်၌ အန်ထားသည့်အခါ တောက်-ကြွက်ကြောက်လို့သာပေါ့ကွာ၊ မင်းတို့ကို ချစ်လို့ မွေးထားတာ မထင်နဲ့-ဟု ပြောမြဲဖြစ်သည်။
တနေ့ ရွာထဲမှ ဒကာတယောက် ခွေးပေါက်စနှစ်ကောင် ပို့လာသည်။ ကျောင်းလုံအောင်လို့ အရှင်ဘုရား၊ အရှင်ဘုရားကျောင်းမှာက ကျောင်းသားမရှိ၊ ကိုရင်မရှိနဲ့ ခွေးက စိတ်ချရတယ်-ဟု လျှောက်ထားပြီး ပေးသွားသည်။ စာရေးသူလည်း လက်ခံထားလိုက်၏။

ထို့နောက် များမကြာပါ။ ခွေးနှစ်ကောင်၊ ကြောင်တွေပေါ် ဆက်ဆံတာ ကြည့်မရချင် ဖြစ်လာသည်။ အနိုင်ကျင့်လာကြသည်။ ကျောင်းလှေကားထိပ်ပေါ်ထားသည့် ကြောင်စာခွက်ကို ခွေးတကောင် တက်စားနေ၍ ကြောင်တွေ ဘေးနားထိုင်နေရသည်ကို မြင်ရပြီး ဒေါသထွက်လာသည်။

ဒီခွေးကွာ၊ ကိုယ့်နေရာ ကိုယ်စားတာမဟုတ်ဘူး-ဟု ပြောပြီး လှေကားထိပ်မှ ကန်ချလိုက်ရာ အောက်သမံတလင်း လှေကားခုံပေါ် ခေါင်းစိုက်ပြီး လက်ထောက်ကာ ကျသွားသည်။ ခွေးတကောင် လက်နာသွားပြီ။ တော်တော်နဲ့ မထနိုင်။ ပက်လက်လန်ပြီး တကိန်ကိန်အော်နေ၏။ လက်ကျိုးသွားပြီလား၊ မှတ်ထား သူများအပေါ် အနိုင်ကျင့်ဦး-ဟု ပြောပြီး မှတ်မိအောင် ဆုံးမရ၍ စိတ်ထဲ ကျေနပ်မိသည်။

ပြီးနောက်တနေ့ (၁၁-၃-၀၇) စာရေးသူ သဲချောင်းရွာသို့ အကြောင်းတခုဖြင့် ဆိုင်ကယ်မောင်သူခေါ်ပြီး ခရီးထွက်ခဲ့သည်။ ဆိုင်ကယ်စီးရတာ မငြိမ့်ပါ။ လှည်းလမ်းအလယ်မှ လူသွားလမ်းအတိုင်း ကွေ့ကောက်ကာ သဲဖုတ်တွေထဲ စီးရသည်။
တနေရာအရောက် ဆိုင်ကယ်လီဘာ အရှိန်ပြင်း၍ လှည်းလမ်းထဲကျသွားပြီး လူသွားလမ်းပေါ်သို့ အတက်မှာ ရှေ့ဘီးခွေပြီး ဆိုင်ကယ်ပစ်လဲတော့သည်။

စာရေးသူမှာ မောင်းသူ၏ ထိပ်ပေါ်ကျော်ပြီး ဆိုင်ကယ်နှင့် တလံကွာတွင် သဲဖုတ်ထဲ ခေါင်းစိုက်ကာ ကျသွား၏။ ဦးခေါင်း ဘာမှမဖြစ်။ အနွေးထည် ဦးခေါင်းအထိ ခြုံထား၍ တော်သေးသည်။
သို့သော် ဘယ်လက်လက်ကောက်ဝတ် နာသွားပြီး ဘယ်ဘက်တတောင်ဆစ်နှင့် ထောက်မိ၍ ဘယ်ဘက်နံရိုးတခြမ်း အတော်အောင့်သွားသည်။ ငါတော့ ၀ဋ်လည်ပြီ-ဟု နောင်တနှင့် အတူ ခံစားလိုက်ရသည်။

မကောင်းမှုဟူသည် ဆိတ်ကွယ်ရာမရှိ။ ၀ဋ်မှာအမြဲ ငရဲမှာ အပ-ဟု သူတော်ကောင်းများ မိန့်တော်မူကြသည်။ ၀ဋ်လည်ခြင်းဆိုသည်မှာ စာရေးသူအား နောင်တမလွန်ထိ မစောင့်၊ နောက်ဆုံးဘ၀ထိအောင် မနေ၊ မကောင်းမှုဟူသည် အရိပ်ပမာကဲ့သို့ ထက်ကြပ်မကွာ လိုက်တတ်ပေသည်တကား။
( ဖြစ်ရပ်မှန်)

အရှင်ဓမ္မာနန္ဒ (မိဿလင်ဂျင်း)

No comments: