Friday, May 7, 2010

စေတနာရောင်ပြန်

ဦးလှကြည် (မှုခင်းသတင်းထောက်၊ စာရေးဆရာ ပုသိမ်-လှကြည်) သည် ပုသိမ်မြို့၊ တာဝတိံသာလမ်းတွင် နေထိုင်သူဖြစ်သည်။ စာပေကိစ္စဖြင့် ရန်ကုန်သို့ မကြာမကြာ လာရောက်တတ်သည်။ တနေ့ (၁၀-၂-၂၀၀၇)တွင် ဦးလှကြည်သည် ပုသိမ်မြို့ နှစ်ကျိပ်ရှစ်ဆူလမ်းပေါ်၌ လျှောက်လှမ်းလာစဉ် အထုပ်တထုပ် ကျနေသည်ကို တွေ့ရှိရသည်။ ကောက်ယူကြည့်လိုက်ရာ ငွေထုပ်ဖြစ်နေကြောင်း သိလိုက်ရသည်။ ငွေများမှာ ၁၅၀၀၀၀-တသိန်းငါးသောင်းကျပ်) တိတိ ဖြစ်သည်။ ဦးလှကြည်သည် ငွေထုပ်ကိုကိုင်၍ ဟိုဟိုသည်သည် ကြည့်မိသည်။ ပိုင်ရှင်ကို တွေ့လိုတွေ့ငြား ကြည့်နေမိခြင်းဖြစ်သည်။ ကျကျန်ခဲ့သော ပိုင်ရှင်ကို ကိုယ်ချင်းစာမိသည်။ ထို့ကြောင့် ပိုင်ရှင်တွေ့ပါက ပြန်ပေးရန် ဆုံးဖြတ်၍ ထိုနေရာမှာပင် ငွေထုပ်ကိုကိုင်ကာ စောင့်နေမိသည်။

အတန်ကြာသော် ထိုလမ်းပေါ်မှ လူတယောက် လျှောက်လှမ်းလာသည်ကို တွေ့ရသည်။ ထိုသူသည် ပစ္စည်းတခုခုပျောက်၍ ရှာနေသည့်ပုံဖြင့် ဟိုဟိုသည်သည်ကြည့်၍ လာနေခြင်းဖြစ်သည်။ ထိုတွင် ဦးလှကြည်က ထိုသူကို အကျိုးအကြောင်း မေးမြန်းကြည့်ရာ ငွေထုပ်ပျောက်၍ ရှာနေခြင်းဖြစ်ကြောင်း သိရသည်။ ဦးလှကြည်က ထိုသူအား မေးသင့်သည်တို့ကို မေးကြည့်သည်။ ထိုသူသည် ငွေထုပ်ပိုင်ရှင် အမှန်တကယ်ဖြစ်ကြောင်း သိရှိလိုက်သည်။

ထိုသူ၏အမည်မှာ ဦးရေအေး ဖြစ်သည်။ ပုသိမ်မြို့ ဥမ္မာဒန္တီလမ်းတွင် နေထိုင်သည်။ ကောင်းမွန် ဟာလ၀ါ လုပ်ငန်းပိုင်ရှင် ဖြစ်သည်။ ပစ္စည်းဝယ်ယူရန်သွားရင်း ငွေထုပ်ကျကျန်ခဲ့ခြင်း ဖြစ်သည်။ ဦးလှကြည်သည် ဦးရေအေးကို ပစ္ဆိမာရုံကျောာင်းတိုက်သို့ ခေါ်ဆောင်သွားသည်။ ပစ္ဆိမာရုံဆရာတော် ဦးခေမိန္ဒ ရှေ့မှောက်တွင် ဦးလှကြည်က ဦးရေအေး-အား ငွေထုပ်ကို ပြန်ပေးလိုက်သည်။ ဦးရေအေး-က ၀မ်းသာလှသဖြင့် ငွေတသိန်းခွဲအနက်မှ ငွေငါးသောင်းကို ဦးလှကြည်အား ပြန်ပေးသည်။ ဦးလှကြည်၏ စိတ်ဓာတ်ကို လေးစားဂုဏ်ပြုသောအနေဖြင့် ပေးခြင်းဖြစ်သည်။ သို့ရာတွင် ဦးလှကြည်က ထိုငွေကို လုံးဝလက်မခံခဲ့ပေ။ ထိုအခါ ဦးရေအေး-က ဘောလ်ပင်တချောင်း လက်ဆောင်ဝယ်ပေးသည်။ ဤသည်ကိုတော့ ဦးလှကြည် မငြင်းသာတော့ လက်ခံလိုက်ရသည်။

ထိုသို့ဖြစ်ပြီး တလခန့်အကြာတွင် ဦးလှကြည်သည် ကိစ္စတခုဖြင့်သွားရင်း မိမိ၏အင်္ကျီကော်လံတွင် တပ်ဆင်ထားသည့် ကြယ်သီးကလေး (ပတ္တမြား+ဥဿဖယား ရွှေဖြင့်ကွပ်ထား) ပြုတ်ကျပျောက်ဆုံးသွားသည်။ ဦးလှကြည်-က အတန်ကြာ လိုက်လံရှာဖွေသေးသည်။ မတွေ့သဖြင့် စိတ်လျှော့၍ ပြန်လာခဲ့သည်။ ဆုံးပြီဟုသာ မှတ်ထင်ထားလိုက်သည်။ ထိုကြယ်သီးမှာ ကာလတန်ဖိုး ၅၀၀၀၀ (ငါးသောင်းကျပ်) ခန့် တန်သည်။

ထိုသို့ရှိရာမှ ၄-ရက်ခန့်အကြာ ၁၂-၃-၂၀၀၇ နေ့တွင် ထိုကြယ်သီးကို ပြန်ပေးမည့်သူတဦး ဦးလှကြည်အိမ်သို့ မမျှော်လင့်ဘဲ ရောက်ရှိလာသည်။ ထိုသူမှာ ဦးအုန်း (ပုသိမ်မြို့၊ အမှတ် ၅-ရပ်ကွက်၊ ရပ်ကွက်အေးချမ်း သာယာရေးနှင့် ဖွံ့ဖြိုးရေးကောင်စီ အဖွဲ့ဝင်-၁) ဖြစ်သည်။ ကြယ်သီးကလေးကို လမ်းပေါ်ရှိ သဲများကြားတွင် တွေ့ရှိရကြောင်း။ ဦးလှကြည် ကျပျောက်ခဲ့သည့် ပစ္စည်းဖြစ်သည်ဟု သိရ၍ လာပေးခြင်းဖြစ်ကြောင်း ဦးအုန်းက ပြောကာ ကြယ်သီးကလေးကို ဦးလှကြည်အား ပြန်ပေးလိုက်သည်။

ဦးလှကြည် များစွာ အံ့သြမိပေသည်။ ထို့ပြင် မိမိက ဆုံးပြီဟု ထင်ထားသော မိမိမြတ်နိုးလှသော ပစ္စည်းကလေးကို အမှတ်မထင် ပြန်ရလိုက်သဖြင့် အလွန်လည်း ၀မ်းသာမိပေသစည်။ ထိုတွင် ဦးလှကြည်သည် မိမိငွေထုပ်ကောက်ရခဲ့စဉ်က အဖြစ်ကို ပြန်သတိရလိုက်သည်။ ကောက်ရသည့်ငွေထုပ်ကို ပိုင်ရှင်အား ပြန်ပေးလိုက်သည့် ကံအကြောင်းကြောင့် ယခု မိမိပစ္စည်း ကျပျောက်ရာတွင်လည်း ပြန်ပေးမည့်သူ ပေါ်လာခြင်းအကျိုးကို ရရှိခြင်းဖြစ်ပေသည်-ဟု ဦးလှကြည် ခံယူလိုက်မိပေသည်။ စေတနာကံ၏ ရောင်ပြန်ဟပ်မှုပင် ဖြစ်ပေသည်တကား။

မောင်အောင်ဝင်း (ထူးကြီး)
( မြတ်မင်္ဂလာ ၂၀၀၇-ခု ဇူလိုင်လ)

No comments: