Friday, May 21, 2010

ဓာရဏပရိတ်တော် အကျိုး

ဗုဒ္ဓမြတ်စွာဘုရား၏ အဆုံးအမ တရားဒေသနာတော်ကို လိုက်နာကျင့်သုံးသူတိုင်း ဘေးအန္တရာယ် အသွယ်သွယ်မှ ကင်းဝေးကြရသည်။ ယခင်ကတည်းက အန္တရာယ်မှ ကင်းဝေးသူများ ရှိသကဲ့သို့ ယနေ့တိုင်လည်း ရှိနေဆဲပါ။ မြတ်စွာဘုရားရှင်၏ ဓာရဏပရိတ်တော်ကို အမြဲမပြတ်ရွတ်ဆိုသောကြောင့် အသက်ဘေးမှ ကင်းဝေးခဲ့သူတဦး ရှိပါသည်။ ထိုသူမှာ ဦးမြင့်ကျော် ဖြစ်သည်။

ဦးမြင့်ကျော်သည် မကွေးတိုင်း မြို့သစ်မြို့နယ် ဒန့်သလွန်ပင်ရွာမှ အလယ်တန်းပြ ဆရာတဦးဖြစ်သည်။ ဆရာသည် စိတ်စေတနာ အလွန်ကောင်းသူဖြစ်၍ တပည့်များအပေါ်တွင် စေတနာအပြည့်ထားသူ ဖြစ်သည်။ ဗုဒ္ဓဘာသာကို ကြည်ညိုလေးစားကာ ဓာရဏပရိတ်တော်ကို အမြဲမပြတ် ရွတ်ဆိုပူဇော်သူ ဖြစ်ပါသည်။

တနေ့တွင် ဆရာသည် ကျောင်းမှ ကျောင်းအုပ်ဆရာကြီးကို မကွေးသွားရန် လိုက်ပို့အပြီး ဆိုင်ကယ်စီးလျက် ပြန်လာရာ တောင်တွင်းကြီးမြို့အနီး ပြည်လမ်းပေါ်တွင် ရှေ့မှမောင်းနှင်လာသော ကုန်ကားကြီးတစီးကို မရှောင်သာဘဲ ရင်ဆိုင်တိုက်မိပါတော့သည်။

အနီးက မြင်ရသူများ ထိတ်လန့်သွားသည်။ အဒေါ်ကြီးတဦးမှာ မူးမေ့ပြီး လဲသွားပါသည်။ တိုက်ပြီးပြီးချင်း ဆရာသည် ကားအောက်ရောက်နေရာမှ ပြန်ထွက်လာသည်။ ရပ်နေသောကားအောက်မှ ထွက်လာသည့် ဆရာကိုမြင်တော့ အနီးရှိလူအများ အံ့သြသွားကြသည်။ ဆရာစီးလာသော ဆိုင်ကယ်မှာ ကားရှေ့ ကိုက် ၃၀-အကွာတွင် မီးသီးကွဲ၊ ဘရိတ်ပြုတ်၊ ခြင်းပိန်လျက် ပျက်စီးနေပြီ။ ဆရာ့မှာတော့ ဒူးပွန်းရုံ၊ ရှရုံလေးနှင့် သတိပင်လစ်မသွားဘဲ ထွက်လာခြင်းသည် အလွန်အံ့သြစရာပင် ဖြစ်သည်။

မေတ္တာအကျိုး၊ စေတနာအကျိုးနှင့် ဓာရဏပရိတ်တော်အစွမ်းတို့ပေါင်းကာ အသက်ချမ်းသာရာရခဲ့သည့် ဆရာဦးမြင့်ကျော်သည် ဇနီးဒေါ်ကြည်ကြည်ဆွေ၊ သားနှစ်ယောက်နှင့်အတူ ချမ်းမြေ့စွာနေထိုင်လျက် ပညာရေးတာဝန်များကို ထမ်းဆောင်လျက်ရှိပါသည်။

ချူးနွယ်
(မြတ်မင်္ဂလာ ၂၀၀၇-ခု အောက်တိုဘာလ)

No comments: