Friday, May 7, 2010

ယဉ်ကျေးလိမ္မာ ဤကမ္ဘာ

အမေ သားအ၀တ်တွေ လျှော်လှန်းနေတာလား၊ မလျှော်ပါနဲ့ အမေရယ်၊ ငယ်ငယ်တုန်းက သား မလျှော်တတ်သေးလို့ ကျောင်းတက်နေရတုန်းကလည်း သားစာကျက်ချိန် လျော့မှာမို့ လျှော်ပေးတာထားပါတော့။ အခု သား လူကြီးဖြစ်ပြီ။ ၀န်ထမ်းတောင် ဖြစ်နေပြီပဲ။ အမေ့ကိုတောင် သားက အိမ်မှုကိစ္စတွေ ကူလုပ်ပေးရမှာ ဟုတ်တယ်ဟုတ်။

အေးပါ၊ အမေ နောက်ကို မလျှော်ပေးတော့ပါဘူး။ သားရဲ့ ရိပ်သာလုပ်အားပေးက နေမြင့်လိုက်တာ။ ထမင်းစားချိန်တောင် လွန်နေပြီ။
သား ထမင်းစားခဲ့ပြီးပြီ အမေ၊ သားတို့ လုပ်အားပေးတွေအတွက် ထမင်း၊ ဟင်းနဲ့ မုန့်တွေလာပို့တဲ့ ကုသိုလ်ရှင်တွေ ရှိတယ် အမေရဲ့။

ဟုတ်လား၊ သားတို့လုပ်အားပေးက နောက်တပတ်လည်း ရှိသေးတယ်မဟုတ်လား။ အမေ စားစရာမုန့်တမျိုးမျိုး ကုသိုလ်လုပ်ချင်ပါတယ်ကွယ်။
ကောင်းတာပေါ့ အမေရာ၊ ရိပ်သာလုပ်အားပေးက စနေ၊ တနင်္ဂနွေတိုင်း ရှိနေဦးမှာပါ။ နောက် အပတ်တွေလည်း အမေ လှူချင်တာလှူ။ အချိုရည် တိုက်ချင်လည်း တိုက်၊ ရတယ်လေ။

အေး အအမေလည်း အလှူငွေ ထည့်ထားပေမယ့် အိမ်မှုကိစ္စတွေနဲ့ ရိပ်သာကို မရောက်ဖြစ်ပါဘူး သားရယ်။ ရိပ်သာရော ဘယ်အခြေအနေ ရောက်နေပြီလဲ။ အမေ့မိတ်ဆွေတွေကော လုပ်အားပေး လာကြလား။ ပြောပြစမ်းပါဦး။
သားတို့ မဂ္ဂင်ရိပ်သာမှာ အရင်က ရှေ့မျက်နှာစာပဲ အုတ်တံတိုင်းရှိတာလေ။ ကျန်တဲ့ သုံးဘက်က သဘာဝခြံစည်းရိုးပဲဆိုတော့ တင့်တယ်သပ်ရပ်ပြီး လုံခြုံမှုလည်း ရှိအောင် ဆက်ပြီး အုတ်တံတိုင်းကာတာ အမေရဲ့။ သားတို့လို ဒေသခံတွေနဲ့ ရပ်ဝေးကို ပြောင်းရွှေ့သွားတဲ့လူတွေကလည်း အလှူငွေ ပေးပို့ပါဝင်ကြလို့ (၈-ပေ x ၅-ပေ) တခန်းကို ၃၅၅၀၀-ကျပ်နဲ့ အခန်းပေါင်း ၆၀-အတွက် အလှူငွေရထားပြီ အမေရဲ့။ အခန်း ၄၀-စာလောက်ပဲ လိုတော့တယ်။ အမေ့မိတ်ဆွေတွေထဲက အမေစိန်၊ ဒေါ်ဒေါ်ရင်၊ ဒေါ်ဒေါ်ခင်၊ ဒေါ်ဒေါ်မေ၊ ဒေါ်လေးဒေါ်စန်း၊ ဒေါ်ကြည်အေး၊ ဒေါ်ခင်ညိုတို့လည်း လာကြတယ်။ လုပ်အားပေးတွေ အများကြီး ပျော်စရာကြီးပါအမေရာ။ ဘဘရွှေ၊ ဘဘဦးသန်းထွန်း၊ ဦးတင်ထွန်းတို့လည်း အပတ်စဉ်လာတယ်။ ဦးလေးဦးကြည်၊ ဦးကျော်ရွှေ၊ ဦးစောလွင်တို့ကတော့ အစစအရာရာ စီမံရတာပေါ့။ သားတို့လူငယ်တွေက အုတ်၊ ကျောက်၊ သဲတွေ သယ်ရတယ်။ ပန်းရံဆရာတွေ လိုတာကို သားတို့က အဆင်သင့်လုပ်ပေးထားတာ အလုပ်တွင်ကျယ် မြန်ဆန်တာပေါ့ အမေရာ။

တဖက်ခြံမှ မောင်ဦးတို့ သားအမိ အပြန်အလှန် ပြောနေတာကို ခြံထဲမှာစာဖတ်နေရင်း ကျွန်မ ကြားနေရပါတယ်။ ကျွန်မ၏အိမ်နီးချင်း ဦးအောင်ထွန်း၊ ဒေါ်မြရီတို့မှာ သားသမီး ၃-ယောက်ရှိပြီး အကြီးဆုံးဖြစ်တဲ့ မောင်ဦးက ကွန်ပြူတာတက္ကသိုလ်က ဘွဲ့ရပြီး ရုံးဝန်ထမ်း ၀င်ရောက်လုပ်ကိုင်နေပါတယ်။ အငယ် ၂-ယောက်က အထက်တန်းကျောင်းသူများ ဖြစ်ပါတယ်။ ဦးအောင်ထွန်းမှာ ရုံးဝန်ထမ်းဖြစ်ပြီး သားသမီးများ ပညာရေးနှင့် မိသားစုစားဝတ်နေရေး ဖူလှုံမှုအတွက် ဒေါ်မြရီက အိမ်ရှေ့မှာ မနက်ပိုင်း မုန့်ဟင်းခါးဆိုင်ဖွင့် ရောင်းပါတယ်။ မောင်ဦးမှာ ငယ်စဉ်ကတည်းက မိဘကို ကူညီလုပ်ကိုင်ပေးပြီးမှ သူငယ်ချင်းများနဲ့ ကစားပါတယ်။ သူနဲ့အတူ ကစားချင်တဲ့ သူငယ်ချင်းတွေက သူ့အလုပ်တွေကို ၀ိုင်းကူလုပ်ပေးလေ့ ရှိပါတယ်။

မောင်ဦး ဘွဲ့ရချိန်မှာ သူငယ်ချင်းအချို့က နိုင်ငံခြားသွား အလုပ်လုပ်ကြပေမယ့် မောင်ဦးကတော့ သွေးတိုးရောဂါရှိတဲ့ ဖခင်ကိုငဲ့ညှာပြီး မိသားစုကို စောင့်ရှောက်ပေးဖို့ မိမိဒေသမှာပဲ ၀န်ထမ်းဝင်ရောက်လုပ်ကိုင် ပါတယ်။ မောင်ဦးဟာ အချိန်အအား မထားတတ်သူပီပီ ရပ်ကွက်ထဲက ဆယ်တန်းကလေးတွေကို နှစ်စကတည်းက သူ့အိမ်မှာ ညစဉ် စာကျက်ဝိုင်းလုပ်ပေးပါတယ်။ ဒေါ်လေးရယ် ကျွန်တော် ဆယ်တန်း အသက် ၁၆-နှစ်အရွယ် သိခဲ့တဲ့အသိနဲ့ အခု ကျွန်တော့်အသက် ၂၅-နှစ် အရွယ် အသိချင်းက တော်တော်ကွားသွားပြီ။ ငယ်ငယ်တုန်းက မလုပ်သင့်တာတွေ လုပ်ခဲ့၊ လုပ်သင့်တာတွေ မလုပ်ခဲ့တဲ့ ကိစ္စတွေ ရှိခဲ့တယ်။ ကျွန်တော့အသက်အရွယ်နဲ့ ရင်းပြီး ရခဲ့တဲ့ အတွေ့အကြုံကနေ ကောင်းမွန်မှန်ကန်တဲ့ တည့်မတ်မှုလေးတွေ လုပ်ပေးချင်လို့ ဒီစာကျက်ဝိုင်းလေး လုပ်တာပါလို့-ကျွန်မကို ပြောခဲ့ပါတယ်။ ဆယ်တန်းအောင်စာရင်းထွက်လာတော့ မောင်ဦးရဲ့ စာကျက်ဝိုင်းက ရာနှုန်းပြည့် စာမေးပွဲအောင်တဲ့အပြင် ဂုဏ်ထူးများပါ ရရှိကြပါတယ်။ ကလေးများရော၊ မိဘများပါ ၀မ်းသာပီတိဖြစ်ကြပြီး မောင်ဦးကို ကျေးဇူးတင်ကြပါတယ်။

မောင်ဦးအကြောင်း တွေးနေမိရာက မြက်ခင်းစိမ်းနှင့် အိမ်ကလေး-ကိုရီးယားဇာတ်လမ်းတွဲမှ ဇာတ်လိုက်လူငယ် ချားထယ်အွန်းဆီကို စိတ်ရောက်သွားပါတယ်။ ဆင်းရဲဒဏ်မခံနိုင်လို့ သားသမီးတွေကို ပစ်သွားပြီး ကြီးမှ ပြန်လာတဲ့ မိခင်ရဲ့ အားနည်းချက်နဲ့ သိမ်ငယ်မှုတွေကို ချားထယ်အွန်ဟာ အားပေးနှစ်သိမ့်ပြီး ပြုစုလုပ်ကျွေးတယ်။ ယောက္ခမကိုလည်း ရိုသေတယ်။ သည်းခံတယ်၊ ဇနီးကိုလည်း စိတ်ချမ်းသာစေတယ်။ ညီ၊ ညီမတွေကိုလည်း ဂရုစိုက်တယ်။ မိမိနဲ့တွေ့တဲ့ အကူအညီလိုအပ်နေသူ မှန်သမျှကို ကိုယ်ကျိုးစွန့်ပြီး ကူညီတယ်။ ကုမ္ပဏီက လုပ်ဖော်ကိုင်ဖက်တွေအပေါ်မှာလည်း အနစ်နာခံတယ်။ နောက်ဆုံး ချားထယ်အွန်းဟာ အလုပ်မှာ အောင်မြင်မှုတွေရပြီး အဆုတ်ကင်ဆာရောဂါကို တွန်းလှန်ကျော်လွှားနိုင်ခဲ့တယ်။

ဒါကြောင့် လူငယ်လူရွယ်ဘ၀မှာ ထူးချွန်ထက်မြက်ဖို့သလိုသလို လိမ္မာယဉ်ကျေးတဲ့ အသိစိတ်ဓာတ်ရှိဖို့လည်း အရေးကြီးပါတယ်။ မောင်ဦးတို့၊ ချားထယ်အွန်းတို့လို လူငယ်လူရွယ်လေးတွေရဲ့ ကောင်းမြတ်တဲ့ စိတ်ဓာတ်တွေဟာ ကမ္ဘာလောကကြီးကို သာယာလှပအောင် အလှဆင်နေတဲ့ အရာများပဲ ဖြစ်ပါတယ်။

မစန်းစန်းနု (ပုဂံ)
( မြတ်မင်္ဂလာ ၂၀၀၇-ခု ဇူလိုင်လ)

No comments: