Tuesday, May 25, 2010

မေတ္တာအကျိုး ဆပွားတိုး

စာရေးသူသည် မေတ္တာတရား၏ အကျိုးကို လွန်ခဲ့သော လေးနှစ်ခန့်က ကိုယ်တွေ့သိခွင့်ရခဲ့ပါသည်။ ထိုအချိန်က စာရေးသူသည် တက္ကသိုလ်ဝင်တန်း ကျောင်းသူတဦး ဖြစ်ပါသည်။
စာရေးသူတို့ နေထိုင်ရာ ရပ်ကွက်လေးသည် ကိုယ့်ခြံကိုယ့်ဝင်းနှင့် အေးဆေးစွာနေထိုင်သော ရပ်ကွက်လေးတခု ဖြစ်ပါသည်။ စာရေးသူ၏ မိဘများသည်လည်း အေးဆေးသူများ ဖြစ်ပြီး ရတနာသုံးပါးကို မမေ့မလျော့နှင့် နေထိုင်ကြသူများ ဖြစ်သည့်အပြင် စာရေးသူကိုလည်း ရတနာသုံးပါးကို မမေ့မလျော့ရန် သတ္တ၀ါများအပေါ် မေတ္တာစိတ်ထားရှိရန် ငယ်စဉ်မှ စ၍ ဆုံးမသွန်သင်ခဲ့ကြပါသည်။

စာရေးသူကိုယ်တိုင်လည်း ရတနာသုံးပါးကို ယုံကြည်သက်ဝင်သူတဦး ဖြစ်ပါသည်။ ပရိတ်တော်များ၊ ဂါထာတော်များကို အမြဲအပြတ် ရွတ်ဆိုပွားများခဲ့ပါသည်။ ထိုအထဲမှ မေတ္တသုတ်တော်ကိုလည်း မမေ့မလျော့ ရွတ်ဆိုခဲ့ပါသည်။ ယနေ့တိုင်အောင်လည်း ရွတ်ဆိုပွားများမြဲ ဖြစ်ပါသည်။
တနေ့ စာရေးသူတို့လမ်းထဲတွင် စတိုင်းဆိုင်ဖွင့်ထားသော မထွေး-ဆိုသည့် အမကြီးတဦးသည် စာရေးသူအား ဘယ်အချိန်မှစ၍ ဘာကို မကျေနပ် ဖြစ်နေမှန်းမသိ၊ စာရေးသူ ကျောင်းမှအပြန် ထိုအမကြီး၏ ဆိုင်ရှေ့မှ ဖြတ်အသွား စာရေးသူအား အရှက်ရစေသော စကားများဖြင့် စောင်းမြောင်းပြောဆိုပါတော့သည်။

ထိုအချိန်တွင် စာရေးသူနှင့် သက်တူရွယ်တူ ယောက်ျားကလေးများလည်း အနီးတ၀ိုက်တွင် ရှိနေကြသည်။ စာရေးသူကိုယ်တိုင်လည်း ဘယ်သူ့ကို ပြောမှန်းမသိ၍ ဇဝေဇ၀ါဖြစ်နေသည်။ နောက်မှ စာရေးသူကိုကြည့်ပြီး ပြောဆိုနေခြင်းဖြစ်ကြောင်း သိရသောအခါမှ ရှက်စိတ်များဖြင့် အိမ်သို့ အမြန်ပြန်ခဲ့ရပါသည်။

ငယ်ရွယ်သူမို့ ရှက်စိတ်၊ ဒေါသစိတ်များဖြင့် ထိုအမကြီးအား ဘာကြောင့် ငါ့ကို ခုလိုပြောဆိုရပါလိမ့်-ဟု တွေးပြီး မုန်းတီးနေမိပါတော့သည်။ သို့သော် စာရေးသူသည် မိဘများ၏ အဆုံးအမများနှင့်တကွ မေတ္တာတရား၏ အကျိုးကျေးဇူးကြီးမားပုံကို သတိရမိသောအခါ နေ့စဉ် မြတ်စွာဘုရားကို အမှူးထား၍ ထိုအမကြီး၏ မျက်နှာကို မြင်ယောင်ကာ မေတ္တသုတ်တော်ကို ရွတ်ဖတ်ပွားများပြီး မေတ္တာစိတ်ဖြင့်သာ မေတ္တာပို့နေခဲ့ပါသည်။

သည်လိုနဲ့ တလခန့်ကြာသောအခါ လမ်းသွားရင်း ထိုအမကြီးနှင့် မျက်နှာချင်းဆိုင် ဆုံတွေ့ကြရာ ထိုအမကြီးက ပြုံးပြုံးရွှင်ရွှင်ဖြင့် နှုတ်ဆက်စကားပြောပြီး ခင်မင်ရင်းနှီးစွာ ဆက်ဆံလာသောကြောင့် အံ့သြမဆုံး ဖြစ်ခဲ့ရသည်။ လွန်ခဲ့သော လေးနှစ်မှစ၍ ယခုအချိန်အထိ တလမ်းထဲနေ မိတ်ဆွေများ ဖြစ်ခဲ့ရပါသည်။ ဟိုအလျင်ကလို စာရေးသူအပေါ် မကျေနပ်မှုများ ထိုအမကြီး၏ မျက်နှာတွင် လုံးဝ မတွေ့ရတော့ပါ။

စာရေးသူကို ခင်မင်ရင်းနှီးစွာ ပြောဆိုဆက်ဆံလာခြင်းသည် မေတ္တာတရား၏အကျိုး၊ မေတ္တသုတ်တော်၏ အကျိုးကျေးဇူးများပင်ဖြစ်ကြောင်း ယုံကြည်ယူဆမိပါသည်။ ထို့ကြောင့် စာဖတ်သူတို့လည်း အချိန်ရှိသရွေ့ လောက၌ ရှိကြကုန်သော လူ၊ နတ်၊ ဗြဟ္မာ သတ္တ၀ါအပေါင်းတို့အား မေတ္တာမပျက် အမုန်းမဖက်ဘဲ မေတ္တာစိတ်ဖြင့် မေတ္တာပို့ဆုတောင်းပါက တချိန်ချိန်တွင် အကျိုးထူးများ ရရှိလာမည်ဖြစ်ကြောင်း ကိုယ်တွေ့ကြုံ၍ ရေးသားတင်ပြအပ်ပါသည်။

ခင်လေး (ရန်ကုန်)
( မြတ်မင်္ဂလာ ၂၀၀၇-ခု နိုဝင်ဘာလ)

No comments: