Tuesday, May 25, 2010

အကျိုးပေးမတူသူ နှစ်ဦး

ကျွန်တော်သည် အကျိုးပေးမတူသူ လူနှစ်ဦးနှင့် ကြုံခဲ့ရပါသည်။ တဦးမှာ ကုသိုလ်အကျိုးပေး ခံရသူဖြစ်ပြီး တဦးမှာ အကုသိုလ်အကျိုးပေး ခံရသူ ဖြစ်ပါသည်။

(ကိုရင်ကလေး)
ကုသိုလ်အကျိုးပေး ခံရသူမှာ ရဟန်းလူထွက် အငြိမ်းစားကျောင်းဆရာတဦး ဖြစ်သည်။ ထိုပုဂ္ဂိုလ်သည် ငယ်စဉ်က ကိုရင်ဘ၀ဖြင့် တောရပ်ကျောင်းတကျောင်းတွင် နေထိုင်ခဲ့ပါသည်။ တနေ့တွင် အကို ဦးပဉ္ဖင်းနှင့်အတူ ဝေးလံခေါင်းပါးသော တောအရပ်ရှိ တောရကျောင်းတကျောင်းသို့ ပြောင်းရွှေ့နေထိုင်ရန် စီစဉ်ကြသည်။

ဗေဒင်တတ်ကျွမ်းသော ရွာမှ ဗေဒင်ဆရာကြီးက မပြောင်းရွှေ့ရန် တားသည်။ ဗေဒင်ကိန်းခန်းအရ သွားမဲ့အရပ်မှာ အရပ်မတော်ကြောင်း၊ မသွားသင့်ကြောင်း၊ အလွန်ခိုက်ပြီး ပြန်လမ်းမရှိကြောင်းဖြင့်-အတန်တန် တားပါသည်။ သို့သော် အယုံအကြည်နည်းကာ နားမထောင်ဘဲ ထွက်ခွာသွားကြသည်။

ခရီးအတန်ပေါက်၍ ချောင်းတချောင်းအနီး ရောက်သောအခါ ငါးရောင်းသူမိန်းမတဦးနှင့် ဆုံတွေ့ကြသည်။ ငါးတောင်းထဲတွင် ငါးအရှင်လတ်လတ် ငါးဘဲဖြူ-လေးများ ဆွေ့ဆွေ့ခုန်နေကြသည်ကို တွေ့ကြသည်။ သူတို့နှစ်ဦး ပါသမျှငွေဖြင့် အကုန်ဝယ်ပြီး ချောင်းထဲ့သို့ လွှတ်လိုက်ကြသည်။ သေအံ့မူးမူး ငါးလေးများကို အသက်ကယ်ပေးကာ လွှတ်လိုက်ရသဖြင့် ၀မ်းသာကြည်နူးကြသည်။ အတန်ကြာသည်အထိ မျက်စိထဲက မထွက်ဘဲ ပီတိဖြစ်နေကြသည်။

သူတို့ သီတင်းသုံးမည့်ရွာအနီးရောက်ချိန်တွင် ကိုရင်ဖြစ်သူ၏ တင်ပါးမှ စပ်ဖျင်းဖျင်းဝေဒနာ ခံစားလာရသည်။ ရွာဘုန်းကြီးကျောင်းရောက်ပြီး ညအိပ်ကျိန်းစက်ချိန်တွင် တင်ပါးက ပိုမိုနာလာပါသည်။ နံနက်မိုးလင်းချိန်တွင် တင်ပါး၌ အနာစိမ်းများပေါက်နေသည်ကို တွေ့ရသည်။ ဆေးမရှိ၊ ဆရာမရှိသော တောရပ်တောကျောင်း၌ နေရ သဖြင့် အနာများမှာ ပို၍ပို၍ ရင်းလာကာ အဖျားပင် ၀င်လာသည်။ မိန်းမော၍သာ နေရသောအခြေအနေသို့ ရောက်သွားသည်။

အားလုံးက မရတော့ဘူးဟု ထင်မှတ်နေချိန်တွင် မိန်းမောနေသော ကိုရင်၏အာရုံ၌ သူလွှတ်ခဲ့သော ငါးဘဲဖြူ-ငါးလေးများကိုသာ မြင်ယောင်နေသည်။ သူ့ကိုယ်သူ မသေဘူးဟုလည်း ယုံကြည်နေသည်။ ရွာနီးချုပ်စပ်မှ ဓာတ်စာအနည်းငယ်တတ်ကျွမ်းသော ရွာလူကြီးတယောက်က ဓာတ်စာအဖြစ် ကြံရိုးနှင့် မာလကာသီးကို စားခိုင်းသည်။ ယဲ့ယဲ့လေးသာရှိပြီး မိန်းမောနေသော ကိုရင်အဖို့ စားနိုင်ရန်ဝေးစွ အရည်တဇွန်းလောက်ကိုပင် မနည်းမြိုချနေရသည်။ သို့သော် ပေးလာသောကြံရိုးနှင့် မာလကာသီးတို့၏ အနံ့ကိုမူ ရှုရသည်။ ကိုရင်၏ အာရုံ၌ကား သူလွှတ်ခဲ့သော ခုန်ဆွခုန်ဆွ ငါးဘဲဖြူငါးကလေးများကိုသာ မြင်ယောင်နေမိသည်။ တရက်တွင် ရင်ထဲက ပူသလိုလိုရှိပြီး ရေဆာလာသဖြင့် ရေတောင်းသောက်ပါသည်။ ရေကို ထင်သည်ထက် ပိုသောက်နိုင်ပြီး ပူနေသောရင်မှာလည်း အေးသွားသည်။ ယင်းနောက် ထမင်းရည်များ၊ ဆန်ပြုတ်များ တစတစ ၀င်လာကာ အဆုံးတွင် အံ့သြလောက်အောင်ပင် အလိုအလျောက် ရောဂါသက်သာပျောက်ကင်းသွားသည်။ ငါးလွှတ်သော ကုသိုလ်အကျိုးပေးဖြင့် အသက်ရှင်သန်ခဲ့ရသော ကိုရင်လေးမှာ ယခုအခါ အငြိမ်းစားကျောင်းဆရာကြီးဘ၀ဖြင့် အသက် ၇၉-နှစ်ကျော်အရွယ်ရောက်ရှိကာ ပကတိကျန်းမာလျက် ရှိသည်။

( ငခွေးကြီး)
အကျိုးပေးမတူသူ နောက်တဦးမှာ ငခွေးကြီး-ဆိုသူဖြစ်သည်။ ငခွေးကြီးသည် အရက်မူးပြီး ရမ်းကားနေသဖြင့် ဖခင်ဖြစ်သူက ရိုက်၍ ဆုံးမလိုက်မိသည်ကို မိုက်ရိုင်းလှသော ခငွေးကြီးက အနားရှိ သံတုတ်ဖြင့် ဖခင်ကို ပြန်ရိုက်ခဲ့သည်။ ဖခင် ပြင်းထန်စွာ ဒဏ်ရာရခဲ့သည်။

ထို့ကြောင့် ငခွေးကြီးအား လူတိုင်းက ရွံမုန်းကြသည်။ အင်မတန် လူစိတ်နည်းလှသည်။ အိမ်ထောင်ကျသောအခါတွင်လည်း အကုသိုလ်ဖြင့် အသက်မွေးသည်။ တောကောင်မျိုးစုံကို နည်းမျိုးစုံဖြင့် ရအောင်ဖမ်းပြီး မိန်းမက ဈေးတွင်ပြန်ရောင်းသည်။

မိုးဦးကျကာလတွင် ပုတတ်နှင့် ဖားကလေးတွေကို ရေနွေးပွက်ပွက်ဆူထဲသို့ အရှင်လတ်လတ်ထည့်ပြီးသတ်ကာ ရင်ကိုခွဲ၍ အသဲအူနုတ်ပြီး ၀ါးနှင့်သီလျက် ကင်၍ရောင်းလျက်ရှိသည်။ မိုးဦးကျကာလ ပုတတ်ကင်၊ ဖားကင် ဖောဖောသီသီ ရနိုင်သောနေရာမှာ ငခွေးကြီးအိမ်သာ ဖြစ်သည်။ ငခွေးကြီးသည် ရှာဖွေရသမျှ အခြားတောကောင်ငယ်မှန်သမျှကိုလည်း ရင်ကိုခွဲကာ အူအသဲနုတ်ပြီး ကင်ရောင်းလေ့ရှိသည်။ အကောင်ကြီးအချို့ကိုသာ တိုက်ရိုက်ခွဲစိတ်ရောင်းချသည်။

တနေ့တွင် ငခွေးကြီးအား သူ့သား ဂျိုးနီက ၀ါးရင်းတုတ်ဖြင့်ရိုက်ပြီး ထွက်ပြေးကြောင်း၊ ဂျိုးနီ ဘယ်ထွက်ပြေးသည် မသိကြောင်း ကြားရသည်။
အကုသိုလ်တို့မည်သည် တခုတည်း လာလေ့မရှိ-ဟူသော ဆိုရိုးစကားအတိုင်း ငခွေးကြီးမှာ အကုသိုလ်ထပ်ဝင်လာသည်။။ တရက်တွင် ငခွေးကြီးတယောက် ရုတ်တရက် အသည်းအသန်ဖြစ်ပြီး ဆေးရုံတင်လိုက်ရကြောင်း ကြားရပြန်သည်။ နောက်ဆက်တွဲသတင်းအနေဖြင့် ငခွေးကြီး ဗိုက်ခွဲရကြောင်း ကြားရပြန်သည်။

ကျွန်တော်တို့ခေတ်က ဆေးရုံတွင် ဗိုက်ခွဲရသတဲ့ဟေ့ ဆိုလျှင် အထိတ်တလန့် ရှိကြသည်။ ယခုလည်း ငခွေးကြီး အရေးပေါ်ဆေးရုံတင်လိုက်ရကြောင်းနှင့် ဗိုက်ခွဲရကြောင်း သတင်းစကားမှာ ရပ်ကွက်ထဲတွင် ပြောမဆုံး ဖြစ်နေသည်။
တရပ်ထဲ အတူနေဖြစ်၍ မကောင်းတတ်သောကြောင့် ဆေးရုံသို့ ကျွန်တော်သွားခဲ့သည်။ နယ်ဓလေ့ထုံးစံအတိုင်း လူနာမေးရန်ဖြစ်သည်။ ငခွေးကြီးကို မြင်ရသည်မှာ စိတ်မသက်သာစရာ ဖြစ်သည်။

ငခွေးကြီးသည် ခွဲထားသောဒဏ်ရာက နာလွန်းသောကြောင့် ဖြစ်ဟန်တူပါသည်။
အမယ်လေး၊ အမယ်လေး၊ တပြီး အော်ဟစ်ညည်းညူနေသည်။ ယခုခေတ်လောက် ဆေးဝါးပြည့်စုံမှု မရှိသည့်အပြင် နယ်ဆေးရုံဖြစ်၍ သက်သာရာ သက်သာကြောင်း ဆေးဝါးတို့ဖြင့် လုပ်ပေးနိုင်ခြင်း မရှိပေ။ ငခွေးကြီး၏ ရင်ဘတ်တလျှောက် ခွဲထားသည်မှာလည်း နည်းနည်းနောနော မဟုတ်ပါ။ ရင်ခွဲခံရပြီး အော်ဟစ်ညည်းညူနေသော ငခွေးကြီးအား ကျွန်တော်ကြည့်၍ စိတ်မသက်သာဖြစ်ကာ သံဝေဂရမိသည်။

ငခွေးကြီး၏ အခြေအနေသည် တနေ့တခြား ဆိုးရွားလာပြီး နောက်ဆုံးတွင် အိမ်သို့ပြန်သယ်လာသည်။ မသေမီ နှစ်ရက်သုံးရက်အလိုတွင် ငခွေးကြီးသည် ကျွဲအော်၊ နွားအော် အော်ကာ ဆောက်တည်ရာမရ ချာလပတ် လည်လျက်ရှိနေသည်။ အသံနက်ကြီးဖြင့် ကျွဲအော် နွားအော် အော်နေသည်မှာလည်း မကြားဝံ့ မနာသာပင် ဖြစ်တော့သည်။
ဖခင်ကို သံတုတ်ဖြင့် ရိုက်ခဲ့မိသော အကုသိုလ်နှင့် ဖားလေးတွေ၊ ပုတတ်လေးတွေ၊ တောကောင်လေးတွေ၏ ရင်ကိုခွဲကာ ၀ါးဖြင့် သီကင်ရောင်းခဲ့သော ကံတို့ကြောင့် ငခွေးကြီး၏ အကုသိုလ်သည် ဘ၀မကူးမီပင် အကျိုးပေးနေပါသည်တကားဟု ဆင်ခြင်မိသည်။
တချိန်တည်းမှာပင် မြတ်စွာဘုရားဟောကြားထားသော မိမိပြုသောကံသည် တူသောအကျိုးကိုပေးသည်-ကံ၏အကျိုးပေးကို ငါ ဘုရားကဖြစ်စေ၊ အခြားတဦးကဖြစ်စေ တားမြစ်ခြင်းငှါ မတတ်ကောင်း-ဟူသော ဟောကြားချက်သည် စိတ်အစဉ်တွင် စွဲထင်နေမိပါတော့သည်။

စိုးဝင်း (ချောက်)
(မြတ်မင်္ဂလာ ၂၀၀၇-ခု နိုဝင်ဘာလ)

No comments: