Friday, May 7, 2010

တူမျှကောင်းကျိုး

ရန်ကုန်မြို့မှ လုပ်ငန်းတူ သူငယ်ချင်းသည် မိမိတို့ဇာတိဒေသဖြစ်သော ပခုက္ကူခရိုင်၊ မြိုင်မြို့နယ်၊ လက်ယက်မရွာသို့ အလုပ်အားရက်ဖြစ်၍ အလည်အပတ် လိုက်လာသည်။ စာရေးသူတို့ရွာသည် မုံရွာမြို့ရှိ ချင်းတွင်းမြစ် အနောက်ဘက်ကမ်းကို စက်လှေဖြင့်ကူး၍ ညောင်ပင်ကြီးဆိပ်မှ ကားစီးသွားရသည်။ စက်လှေတိုင်း လူအတက်အဆင်း များလှသဖြင့် တိုးဝှေ့တက်ကာ နေရာယူ စီးရသည်။ ကားဂိတ်မှာ ရေကျချိန်ဖြစ်၍ ညေင်ပင်ကြီးရွာ အောက်ဆိပ်ကို ပြောင်းရွှေ့ထားသဖြင့် အတန်ဝေးဝေး သွားရသည်။

သူငယ်ချင်းနှစ်ယောက်သား စကားတပြောပြောနှင့် လာကြရင်း ကားဂိတ်နားမရောက်ခင် ခြေစုံကို ရပ်ခါ သတိတခုရလိုက်သည်။
လက်ဆွဲခြင်း စက်လှေပေါ်မှာ မေ့ကျန်နေခဲ့ပြီ။
ဟင် ဒါဆို တို့လာခဲ့တာ အဝေးကြီးပဲ၊ ပြန်မှရပါတော့မလား၊ ခုချိန်ဆို တို့စီးခဲ့တဲ့ စက်လှေ ပြန်ထွက်လောက်ပြီ။
သူငယ်ချင်းဖြစ်သူ၏ စကားကြောင့် စိုးရိမ်စိတ်ပိုများလာတော့သည်။ ပခုံးတွင် လွယ်ထားသောအိတ်ကို သူငယ်ချင်းထံပေးပြီး ပုဆိုးတိုတို ပြင်ဝတ်ကာ စက်လှေဆိပ်သို့ သုတ်ခြေတင်ခဲ့လေသည်။ လက်ဆွဲခြင်းမှာ ကားပေါ်မှာချပြီး စက်လှေပေါ်တင်သည်အထိ အလုပ်သမားကို ငှါးရမ်းခဲ့ရသောကြောင့် ကိုယ်နှင့်ကင်းကွာပြီး အမှတ်သတိ လွတ်နေခဲ့ခြင်းပင်။ သတိမေ့လျော့တတ်သော မိမိ၏စိတ်ကိုလည်း အခါခါ အပြစ်တင်မိသည်။

တပေါင်းလ အညာနွေနေပူဒဏ်ကို ရင်ထဲမှ စိုးရိမ်ပူပန်ခြင်းဒဏ်က စိုးမိုးဖုံးအုပ်ထားသဖြင့် နေပူဒဏ်အစွမ်းမပြသာ။ လမ်းတလျှောက်လုံး ခြင်းထဲမှာရှိသော ပစ္စည်းများကိုသာ စိတ်ဖြင့် ရေတွက်ကြည့်မိသည်။ မန္တလေးမှ ၀ယ်လာသော ပစ္စည်းများ၊ အဓိကအရေးကြီးဆုံးမှာ အဘွားအတွက် ရန်ကုန်ကနေ ရှားရှားပါးပါး ၀ယ်ခဲ့ရသော ဆေးပုလင်းနှင့် ဆေးကဒ်တွေ။ ပူပန်စိတ်ကြောင့် သိပ်မမှတ်မိတော့။ မနက်ပိုင်းက ကားပေါ်တွင် ချမ်း၍ ၀တ်ခဲ့သော အသစ်စက်စက် ဆွယ်တာအင်္ကျီကို ခြင်းအပေါ်ဆုံးကနေ ပစ္စည်းများ ဘေးမကျအောင် ဖုံးထားသည်ကိုသာ အမှတ်ရတော့သည်။ လမ်းအကွေ့ကို ချိုးလိုက်လျှင် ဆိပ်ကမ်းကို အဝေးမှ လှမ်းမြင်နေရသည်။ ရင်ခုန်သံတို့သည်လည်း ပို၍ မြန်လာလေသည်။ ထိုစဉ် လွန်ခဲ့သော လပိုင်းက ဖြစ်ရပ်တခု ခေါင်းထဲဝင်လာသည်။

ရန်ကုန်မြို့၌ လိုင်းကားမောင်းစဉ်က ဖြစ်သည်။ ကားသိမ်းချိန်တွင် ထိုင်ခုံအောက်မှ အိတ်တလုံးကို တွေ့ရသည်။ ပိုင်ရှင်မဲ့ဖြစ်နေသော ပစ္စည်းကို စပယ်ယာနှစ်ယောက်က ခွဲဝေယူလိုကြသည်။ မိမိက သူတပါးမေ့ကျန်နေခဲ့သော ပစ္စည်းဖြစ်၍ ပိုင်ရှင်ပေါ်ပေါက်လာပါက ပြန်ပေးရန် အတင်းအကြပ်ပြောဆိုကာ အိမ်မပြန်သေးဘဲ ပိုင်ရှင်ကို ကားပေါ်မှ စောင့်မျှော်နေသည်။ မကြာမီအချိန်တွင် တက္ကစီကားတစ်စီးဖြင့် ပိုင်ရှင်ဖြစ်သူ အမောတကော ရောက်ရှိလာလေသည်။ ပိုင်ရှင်ဖြစ်သူ၏ အမူအရာကိုကြည့်ပြီး စိုးရိမ်ပူပန်မှု လွန်ကဲနေကြောင်း သိသာလှသည်။

ပိုင်ရှင်ဖြစ်သူက မိမိအား ကျေးဇူးတင်ကြောင်း ထပ်တလဲလဲ ပြောကြားသည်။ သူမေ့ကျန်နေခဲ့သော ပစ္စည်းမှာ နိုင်ငံခြားက တင်ပို့လိုက်သော စက်ပစ္စည်းဖြစ်၍ သူ့ကိုယ်ပိုင်မဟုတ်ဘဲ အလုပ်ရှင်သူဌေး၏ ပစ္စည်းသာဖြစ်သည်။ ပျောက်ဆုံးသွားပါက အဖိုးတန်ပစ္စည်းဖြစ်၍ မလျော်နိုင်ဘဲ ထောင်ကျခံရုံသာ ရှိကြောင်း ပြောပြသည်။ ထို့ပြင် ကားပေါ်တွင် လူကျပ်၍ ပစ္စည်းကို ထိုင်ခုံအောက်တွင် ချထားကြောင်း လူအတက်အဆင်းများသည့်နေရာ၌ ကားပေါ်က အဆင်းမှာ ပစ္စည်းမချနိုင်သေးဘဲ လူသာအရင်ဆင်းလိုက်ရကြောင်း၊ စပယ်ယာကို အချခိုင်းရန် စောင့်နေစဉ် ကားက ထွက်သွားခြင်း ဖြစ်ကြောင်းလည်း ပြောပြသည်။ ထိုစဉ်က ပစ္စည်းပြန်ရသူထက် မိမိတို့လည်း ပြန်ပေးရသည်ကို ၀မ်းသာကြည်နူးမှု ဖြစ်ရလေသည်။

ယခုအချိန် ပြန်တွေးမိရင်း ခံစားမိသဖြင့် မေ့ကျန်ရစ်သော လက်ဆွဲခြင်းအပေါ်မှာ စိုးရိမ်စိတ် ပေါ့ပါးသွားသည်။
စိတ်ကလည်း ငါသည် သူတပါး၏ ပစ္စညိးကို တပ်မက်ခြင်းကင်းစွာ ပြန်လည်ပေးအပ်ခဲ့ဖူးသည်။ ငါ့ပစ္စည်းလည်း မလွဲမသွေ ပြန်ရမှာပဲ-ဟု နှလုံးသွင်းကာ ဆိပ်ကမ်းတာရိုးပေါင်ပေါ် တက်လိုက်သည်။

ကမ်းစပ်တွင် ရပ်ထားသော စက်လှေမှာ မိမိတို့ဆင်းလာစဉ်ကအတိုင်းပင် ဖြစ်သည်။ စက်လှေ၏ရှေ့ပိုင်းဝမ်းထဲ လှမ်းကြည့်လိုက်ရာ ဘယ်ဘက်စောင်းတွင် ချထားသည့် ကြိမ်လက်ဆွဲခြင်းမှာ ဣနြေ္ဒကြီးစွ။ သို့ဖြင့် ကျွန်တော်သည် စက်လှေပေါ်တက်၍ ဆွဲခြင်းကို ယူလိုက်၏။ ထိုစဉ် စက်လှေဆရာက မေ့ကျန်ခဲ့တာဖြစ်မယ်။ ပြန်လာယူမှာပဲ ဆိုပြီးစောင့်နေတာ။ ကျုပ် ထမင်းတောင် သွားမစားသေးဘူး။ စက်လှေက စက်ပျက်သွားလို့ ဟိုဘက်ကမ်း မသွားနိုင်ဘူး။ ဒီဆိပ်ကမ်းက လူရှုပ်တယ်ဗျ။ ပစ္စည်းတွေ ပျောက်တယ်။ အခု နောင်ကြီးဆွဲခြင်းပြန်ရတာ သိပ်ကံကောင်းတယ်။ ကျုပ်နဲ့တွေ့လို့သာပေါ့။

ဟုတ်တာပေါ့ဗျာ၊ တခါက ကျွန်တော်လည်း ခင်ဗျားလို စေတနာထားခဲ့ပါတယ်။ အခု ကျွန်တော် တူမျှသောအကျိုး ခံစားရတာပဲဗျာ-ဟု ပြန်လည်ပြောလိုက်မိပါသည်။

ဘုန်းဆွေနွယ် (မုံရွေး)
( မြတ်မင်္ဂလာ ၂၀၀၇-ခု ဇူလိုင်လ)

No comments: