Wednesday, June 9, 2010

အကောင်းဆုံး ယတြာ

မိန်ရာသီ တပေါင်းလ၏ နေ့တနေ့ဖြစ်သည်။ အချိန်အားဖြင့် နေ့လယ် ၁၂-နာရီခန့်ရှိပြီ။ ဘကြီးပုသည် ဧည်းခန်းတွင် စာထိုင်ဖတ်နေသည်။
ထိုစဉ် အဘ-နေကောင်းပါတယ် နော်-ဟု နှုတ်ဆက်သံကို ကြားရသဖြင့် ဘကြီးပုသည် အသံလာရာဖက်သို့ ကြည့်လိုက်ရာ ညောင်ကုန်းရွာမှ မောင်ဝင်း-ကို တွေ့ရသည်။

အေး၊ နေကောင်းပါတယ်ကွာ၊ ဆေးဝါးတော့ ကူနေရပြီကွ-ဟုပြောပြီး-
မင်းလဲ နေတောင် အတော်မြင့်နေပြီ၊ ဘယ်ကလှည့်ပြီး ၀င်လာသလဲ-ဟု ပြန်မေးသည်။
အိမ်က မအေး တယောက် တနှစ်လုံး တရှောင်ရှောင်နဲ့ နေကောင်းတယ်ရယ်လို့ မရှိပါဘူး။ အဲဒါနဲ့ ဗေဒင်လာမေးပြီးအပြန် အဘကို ၀င်နှုတ်ဆက်တာပါ-ဟု မောင်ဝင်းက ပြောပြီး ဘကြီးပု၏ ရှေ့တွင် ၀င်ထိုင်သည်။

ဘကြီးပုသည် မောင်ဝင်းအား ရေနွေးကြမ်းဖြင့် ဧည့်ခံရင်း ဆရာက ဘယ်လိုဟောလိုက်သလဲဟေ့-ဟု ဆက်မေးသည်။
မွေးလလွန်မှ ကောင်းမယ်၊ မွေးနေ့ရောက်တိုင်း ဘုရားမှာ ရာဟုထောင့်ကနေ ရှားမီး သက်စေ့ပူဇော်ရမယ်လို့ ပြောပါတယ်။
ဆရာက မင်းကို ဗုဒ္ဓယတြာ ချေနည်း ပေးလိုက်တာကိုး ကောင်းတယ်-ဟု ဘကြီးပုက ပြောသည်။

ဗုဒ္ဓယတြာချေနည်းအပြင် တခြားနည်းတွေ ရှိသေးသလား အဘ-ဟု မောင်ဝင်းက မေးပြန်သည်။
ဗေဒင်ကျမ်းစာတွေနဲ့ ဂမ္ဘီရဆောင်းပါးတွေမှာတော့ ယတြာမျိုးစုံကို တွေ့မိတယ်ကွ။ အဘစိတ်ဝင်စားတာကတော့ ဗုဒ္ဓယတြာ၊ ဓာတ်ယတြာနဲ့ နတ်ယတြာဆိုပြီး သုံးမျိုးပဲ-ဟုပြောပြီး ဘကြီးပုသည် သောက်လက်စ ရေနွေးကြမ်း ပန်းကန်ကို ဆက်သောက်သည်။

အဲဒီသုံးမျိုးအကြောင်းကို ဗဟုသုတအဖြစ် ပြောပြပါလား အဘ-ဟု မောင်ဝင်းက တောင်းပန်သည်။
ဘကြီးပုသည် သောက်နေသော အကြမ်းပန်းကန်ကို စားပွဲပေါ် ပြန်ချလိုက်ပြီး ယတြာဗဟုသုတများကို ဆက်ပြောသည်။
ဗုဒ္ဓယတြာဆိုတာကတော့ ဘုရား တရား သံဃာ ရတနာသုံးပါး ဦးထိပ်ထားပြီး ကုသိုလ်ကောင်းမှုကို ဦးစားပေးလုပ်တဲ့ ယတြာပဲကွ။ ယတြာချေတဲ့သူဟာ အနည်းဆုံး ငါးပါးသီလလုံအောင်စောင့်ပြီး လုပ်ရင် ပိုပြီးထိရောက်တယ်လို့ ပြောကြတယ်ကွ။
ဟုတ်ကဲ့ပါ အဘ။

ဓာတ်ယတြာကတော့ ကာယကံရှင်နဲ့ သင့်တော်မယ့် ဓာတ်ဖက်၊ ဓာတ်စွက် ပစ္စည်းတွေ၊ သစ်သီး၊ သစ်ဥ၊ အကိုင်း၊ အခက်၊ အရွက်၊ အညွန့်တွေကို သုံးပြီး ယတြာချေတဲ့နည်းပေါ့။ ဓာတ်ကို ဦးစားပေးလုပ်တဲ့ သဘောပဲ။
ဟုတ်ပါပြီ အဘ။

နတ်ယတြာကတော့ နတ်ကိစ္စကို ဦးစားပေးပြီး လုပ်ကြတာပေါ့ကွာ။ နတ်အုန်းဆွဲ၊ ရိုးရာနတ်တင်၊ နတ်ကနားပေး စတဲ့ ပရလောကသားတွေနဲ့ ပတ်သက်ပြီးလုပ်တဲ့ ယတြာပဲ-ဟု ဘကြီးပုက ရှင်းပြသည်။

ယတြာချေတာက အညံ့တွေ ပျောက်ပြီး ကောင်းတာတွေ ရောက်အောင် လုပ်တဲ့သဘောပေါ့နော် အဘ-ဟု မောင်ဝင်းက သူ၏အယူအဆကို ပြောပြသည်။

အေး မင်းပြောသလို ရည်ရွယ်ပြီးတော့ ယတြာချေနေကြတာပဲ။ ကံကိုကောင်းလာအောင် ပြုပြင်တယ်လို့ ဆိုကြတယ်ကွ။ လူအတော်များများဟာ ဘ၀မှာ ဒုက္ခနဲ့ရင်ဆိုင်တွေ့မှ၊ အလိုဆန္ဒတွေနဲ့ အလွဲလွဲအချော်ချော် ဖြစ်တဲ့အခါရောက်မှ ယတြာချေဖို့၊ ကံကိုပြုပြင်ဖို့ သတိရကြတာလားကွ-ဟု ဘကြီးပုက ပြောသည်။
ဟုတ်ပါတယ် အဘ-ဟု မောင်ဝင်းက အဖြေပေးသည်။

အဘရဲ့ သဘောကတော့ လူတိုင်းအတွက် ပြောရရင် နေ့တွေ နံတွေ နေရာဌာနတွေ ရွေးမနေပါနဲ့။ အချိန်အခါတွေကိုလည်း စောင့်ဆိုင်း မနေပါနဲ့။
မကောင်းမှုကို ရှောင်၊ ကောင်းမှုကို ဆောင်-ဆိုတဲ့ သူတော်ကောင်းများရဲ့ ဆိုစကားနဲ့အညီ အမြဲတမ်း မကောင်းမှု အကုသိုလ်အလုပ်တွေကို ရှောင်ပြီး ကောင်းမှုကုသိုလ်တွေကို လုပ်နေမယ်ဆိုရင် ဒီဘ၀အတွက်သာမကပါဘူး။ နောက်ဘ၀အတွက်ပါ ကံကောင်းအောင် ယတြာချေနေတာပါပဲကွာ-ဟု ဘကြီးပုက ပြောလေသည်။

အဘပြောတဲ့ယတြာက ရှောင်ရန်လည်း ပါတယ်၊ ဆောင်ရန်လည်း ပါတယ်၊ နောက်ဘ၀ထိ အကျိုးပေးဦးမယ်ဆိုတော့ အကောင်းဆုံးပါပဲ-ဟု မောင်ဝင်းက မှတ်ချက်ချသည်။
မှန်တာပေါ့ကွာ-ဟု ဘကြီးပုက ဆိုသည်။
အဘရဲ့ ယတြာကို ဒီနေ့ကစပြီး ကျွန်တော်လည်း လုပ်ပါမယ်။ အိမ်က မအေးကိုလည်း လုပ်ခိုင်းရမယ်-ဟု မောင်ဝင်းက အားရ၀မ်းသာ ပြောသည်။
အေး သာဓု သာဓု သာဓု။
ဘကြီးပုသည် မောင်ဝင်း၏ စကားအဆုံးတွင် လှိုက်လှဲစွာ သာဓုခေါ်ဆိုမိပါတော့သည်။

မောင်ဝနေ (လှည်းကူး)
( မြတ်မင်္ဂလာ ၂၀၀၈-ခု ဇန်န၀ါရီလ)

No comments: