Tuesday, June 22, 2010

လက်ဖက်ရည် အဖန် သောက်လျှင်ဖြင့်

ဆောင်းရာသီ တနံနက်ခင်း။
ကျွန်တော်သည် အိမ်ရှေ့ဧည့်ခန်း၌ လက်ဖက်ရည်ကြမ်းတအိုး၊ အမြည်းအဖြစ် မတ်ပဲဗယာကြော်၊ လက်တဖက်က ပုံပြအဘိဓာန် စာအုပ်ကြီးကို ဖန်ရှုနေစဉ်။
အသက်အားဖြင့် ၇၅-နှစ်ခန့်ရှိပြီဖြစ်သော ပင်စင်စား ဦးလေးကြီးတယောက် ရောက်ရှိလာပါသည်။ ထိုဦးလေးကြီးသည် တိုင်းအဆင့် ဌာနဆိုင်ရာ အကြီးအကဲတဦးအဖြစ်မှ ပင်စင်ယူခဲ့သူပီပီ စည်းကမ်းတကျ နေတတ်၊ ထိုင်တတ်၊ စားတတ်၊ သောက်တတ်သူတဦးလည်း ဖြစ်ပါသည်။ ထိုဦးလေးကြီးသည် ကျန်းမာရေးအတွက် နံနက်တိုင်း လမ်းလျှောက်ထွက်လေ့ရှိပါသည်။ လမ်းလျှောက်ရာမှအပြန် ကျွန်တော့အိမ်သို့ တထောက်တနား ၀င်ရောက်လေ့ရှိ၏။

ယခုလည်း ထိုဦးလေးကြီးသည် လမ်းလျှောက်ရာမှအပြန် ကျွန်တော့အိမ်ဧည့်ခန်းထဲသို့ ၀င်ရောက်လာသည်ကို မြင်လိုက်ရသောအခါ-
မင်္ဂလာပါခင်ဗျား၊ ထိုင်ပါဦး၊ အမောပြေ အဆာပြေ ရေနွေးကြမ်းနဲ့ မတ်ပဲဗယာကြော် သုံးဆောင်ပါဦး။
ကျွန်တော်က ရေနွေးကြန်းတပန်းကန် ငှဲ့ကာ ဦးလေးကြီးလက်ထဲသို့ တရိုတသေ ပေးလိုက်ပါသည်။ ဦးလေးကြီးသည် ချမ်းအေးလှသော ဆောင်းရာဦဖြစ်သောကြောင့် အငွေ့တထောင်းထောင်း ထနေသော လက်ဖက်ရည်ကြမ်းကို မှုတ်၍ သောက်လိုက်ပြီး-


အရသာရှိလိုက်တာ မောင်ရယ်၊ လက်ဖက်ခြောက်အနံ့ကလေးကလည်း သင်းနေတာပဲ။ ကျုပ်ဖြင့် အမောကိုပြေသွားတာပဲ။ အင်း ဒါကြောင့် ရှေးက စာဆိုပညာရှင်တွေက ( လက်ဖက်ရည် အဖန်သောက်လျှင်ဖြင့် ကျက်သရေအမှန် ရောက်ပေလိမ့်၊ ကြံသလောက်ပြီးတဲ့ ရေ)-လို့ ရေးသားစပ်ဆိုသွားတာ သတိရမိသေး တော့တယ်။

လက်ဖက်ရည်ကြမ်း သောက်သုံးတဲ့ မြန်မာ့ရိုးရာဓလေ့ကလေးက အလွန်လှပတာပဲနော်။
လှရုံတင် ဘယ်ကမလဲမောင်ရယ်၊ လက်ဖက်ရည်ကြမ်းဟာ လူမှုရေး၊ ကျန်းမာရေး၊ သားရေး၊ သမီးရေး၊ စီးပွားရေး နယ်ပယ်တွေမှာ လက်ဖက်ရည်ကြမ်းဝိုင်းဖွဲ့ပြီး ဆွေးနွေးကြ၊ တိုင်ပင်ကြနဲ့ အခုကိုပဲကြည့်လေ။ မောင်နဲ့ကျုပ်တို့ ရေနွေးကြမ်းကလေးနဲ့ အမောပြေ၊ အဆာပြေ သောက်လိုက်ကြ၊ ကျန်းမာရေး၊ အသက်ရှည်ရေး၊ အနာကင်းရေး၊ ဆွေးနွေးလိုက်ကြနဲ့ အားသစ်အင်သစ်တွေလည်း ပြည့်ဖြိုးလာသလို အာလည်းရွှင်၊ ဉာဏ်လည်းရွှင် ဆိုသလိုပေါ့ မောင်ရယ်။ ဒါကြောင့် ဆရာဇော်ဂျီက လက်ဖက်ရည်ကြမ်းဝိုင်းမှာ စကားကောင်း စာကောင်း ပေါ်ထွက်လာနိုင် သည်။ ကွယ်ဝှက်နေသည်ကို အလင်းသို့ ရောက်နိုင်၏။ ဖုထစ်နေသည်ကို ပြေပြစ်သွားနိုင်၏။ ရှုပ်နေသည်ကို ရှင်းသွားစေနိုင်၏-လို့ ဆရာဇော်ဂျီက ကဗျာဝိုင်း စာဝိုင်းနှင့် ကျွန်တော်-မှာ ရေးထားတာ တွေ့တယ်မဟုတ်လား။

ဟုတ်ကဲ့ တွေ့ပါတယ်ခင်ဗျ။
ဒါနဲ့ မောင်တို့ တိုင်းရင်းဆေးပညာကကော ဘယ်လိုမြင်တုန်း ပြောပါဦး။
လက်ဖက်၊ လက်ဖက်ခြောက်၊ လက်ဖက်ရည်ကြမ်းနဲ့ ပတ်သက်ပြီး သိမ်ဖြူဆေးသိပ္ပံ ဆရာတော် အရှင်နာဂသိန်က ပုံပြဆေးအဘိဓာန် တတိယတွဲ စာမျက်နှာ ၁၉၅-မှာ အခုလို ရေးသားဖော်ပြထား ပါတယ်ခင်ဗျ။

ကျွန်တော်သည် စာကြည့်စားပွဲပေါ်၌ အဆင်သင့်ရှိနေသော ပုံပြ ဆေးအဘိဓာန်စာအုပ်ကို ယူ၍ အောက်ပါအတိုင်း ဖတ်ပြလိုက်ပါသည်။
လက်ဖက်ခြောက်သည် ၀မ်းမီးကို တောက်စေ၏။ ကြေကျက်လွယ်၏။ သလိပ်သည်းခြေတို့ကို နိုင်၏။ လေကို ပျက်စေ၏။ နှုတ်ကို မြိန်စေ၏။ ကောင်းသော အနံ့အရသာရှိ၏။ ကိုယ်သား ကိုယ်ရေကို ပွားများစေတတ်၏။ ဦးနှောက်ကို အားပေး၏။ ချွေးနှင့်ဆီးကို များစွာအားပေး၏။ ခေါင်းကိုက်ခြင်းကို ပျောက်ကင်းစေ၏။ အဆီဓာတ် အပူလောင်ခြင်းကို ငြိမ်းစေ၏။-လို့ ဖော်ပြထားပါတယ်ခင်ဗျ။

ကဲ ကောင်းပေ့ဗျာ။ ဦးနှောက်ကို အားပေး၏။ ချွေးနှင့်ဆီးကို များစွာ အားပေး၏ ဆိုတာနဲ့တင် ကျုပ်သဘောကျ လှပါပြီ-မောင်က လက်ဖက်ရည်ကြမ်းကို အသက် ၂၀-လောက်ကတိုင် စွဲစွဲမြဲမြဲ သောက်သုံးလာသူဆိုတော့ မောင့်ကိုယ်တွေ့ လက်ဖက်ရည်ကြမ်း အာနိသင် ပြောပြပါဦး

ရေနွေးကြမ်းသောက်တာကြောင့် ချွေးကလေး တစိုစိုနဲ့ အမြဲကောင်းပါတယ်။ ဆီးလမ်းကြောင်း ကောင်းတာကြောင့် ခါးနာခါးကိုက်တာ ကင်းရှင်းပါတယ်။ အဆီကျစေပါတယ်။ အစာအိမ် လမ်းကြောင်း တလျှောက် အနာရောဂါ အာသီးရောင်တာ မရှိပါဘူးခင်ဗျ။ ခန္ဓာကိုယ် ပေါ့ပါးစေတဲ့အကျိုး ခံစားရပါတယ်။ အဲ ဟိုတလောက မှတ်မှတ်ရရ ပြောရရင် (၂၁-၂-၂၀၀၅) နေ့ထုတ် သတင်းစာမှာ ရေနွေးကြမ်းသောက်ခြင်းသည် ဆီးအိမ်ကင်ဆာ ဖြစ်ခြင်းကို ကာကွယ်နိုင်-ဆိုတဲ့ ခေါင်းစဉ်နဲ့ သတင်းတပုဒ် ပါလာတယ်။ ကျွန်တော် သဘောကျလွန်းလို့ ဖြတ်ညှပ်ပြီး အမှတ်တရ ကျွန်တော့ဒိုင်ယာရီ စာအုပ်ထဲ ကပ်ထားပါတယ်။ ဟောဒီမှာ ဖတ်ကြည့်ပါဦးခင်ဗျ။

(ရေနွေးကြမ်း သောက်ခြင်းသည် ဆီးအိမ်ကင်ဆာ ဖြစ်ပွားမှုကို ကာကွယ်နိုင်)
လောစ်အိန်ဂျလိစ် ဖေဖော်ဝါရီ ၁၇။
ဆီးအိမ်ကင်ဆာဆဲလ်များကို လေ့လာရာမှ ရေနွေးကြမ်း သောက်သုံးခြင်းသည် ကင်ဆာရောဂါဖြစ်ပွားမှုကို တိုက်ဖျက်နိုင်ကြောင်း အမေရိကန်သိပ္ပံပညာရှင်များက အင်္ဂါနေ့တွင် ပြောကြားလိုက်သည်။ ရေနွေးကြမ်းမှထွက်ရှိသော အာနိသင်သည် ကင်ဆာဆဲလ်များ ရှင်သန်မှုကို ဟန့်ထားပေးနိုင်ကြောင်း ဖေဖော်ဝါရီလ ၁၅-ရက်က ထုတ်ဝေသော ကင်ဆာသုတေသနဆိုင်ရာ ဆေးပညာဂျာနယ်တခုတွင် ဖော်ပြထားသည်။ ကင်ဆာရောဂါဖြစ်ပွားမှုကို အဆိုပါ ရေနွေးကြမ်းမှရရှ်ိသော အာနိသင်က မည်သို့မည်ပုံ တိုက်ဖျက်ကြောင်း ဖော်ထုတ်နိုင်သည်ကိုလည်း လော့စ်အိန်ဂျလိစ်မြို့ရှိ ကယ်လီဖိုးနီးယားတက္ကသိုလ်မှ သုတေသန ပညာရှင်များက ပြောကြားသည်။

ထိုအတူ တရုတ်လူမျိုးတို့၏ ရိုးရာဖြစ်သော ရေနွေးကြမ်းကို နေ့စဉ်တခွက်ကျ သောက်သုံးပါကလည်း ကင်ဆာရောဂါဖြစ်ပွားမှုကို အကာအကွယ်ပေးနိုင်ကြောင်း အဆိုပါတက္ကသိုလ်မှ ပါမောက္ခ ကျင်ယုရိုက ပြောကြားသည်။ သူသည် ကင်ဆာရောဂါ သုတေသနပြုအဖွဲ့ကို ခေါင်းဆောင်နေသူတဦး ဖြစ်သည်။

ရေနွေးကြမ်းကို နေ့စဉ်သောက်သုံးပါက သွေးလေလည်ပတ်မှု ကောင်းမွန်ပြီး ကင်ဆာရောဂါဖြစ်ပွားမှုကို အကာအကွယ်ပေးနိုင်ကြောင်း၊ ဆီးအိမ် ကင်ဆာဖြစ်ပွားသူ ရောဂါသည်များကို အထက်ပါအတိုင်း စမ်းသပ်ကြည့်ခဲ့ရာမှ ယင်းကဲ့သို့ တွေ့ရှိရခြင်းဖြစ်ကြောင်း၊ လူသားများတွင် ဖြစ်ပွားသော ဆီးအိမ်ကင်ဆာ အပါအ၀င် အခြားကင်ဆာရောဂါများကို ရေနွေးကြမ်းတွင်ပါဝင်သော-.....(၂၁-၂-၂၀၀၅) နေ့ထုတ် သတင်းစာမှ

အင်း ဟုတ်လိုက်လေ မောင်ရယ်၊ ကောင်းပေ့ဗျာ၊ မင်္ဂလာရှိတဲ့ သတင်းကောင်းကလေးတခု ပါပဲ။
အဲ မင်္ဂလာဆိုလို့ ဆရာမင်းယုဝေ-စီစဉ်တဲ့ မင်္ဂလာမောင်မယ် လစဉ်ထုတ်စာစောင်ကလေးကို ကျွန်တော် လစဉ်ဝယ်ပါတယ်။ ဘာပြုလို့ ၀ယ်လဲဆိုတော့ ကျွန်တော်တို့အိမ်မှာ ငါးတန်း၊ ခြောက်တန်း မြေးမလေးတွေ ရှိပါတယ်။ သူတို့ လိမ္မာရေးခြားရှိအောင် ကလေးတွေ ဖတ်ဖို့ ၀ယ်တာပါ။ ၂၀၀၆-ခု နိုင်ဝင်ဘာလထုတ် မင်္ဂလာမောင်မယ် စာစောင်မှာ ဆရာမင်းယုဝေ-ရေးတဲ့ လက်ဖက်ရည်ကြမ်း-ဆိုတဲ့ ကဗျာကလေး ပါလာပါတယ်ခင်ဗျ။ ကျွန်တော် သဘောကျလွန်းလို့ ကူးယူထားပါတယ်။ ဟောဒီမှာ ဖတ်ကြည့်ပါဦး။

( လက်ဖက်ရည်ကြမ်း)
* ဘိုးဘွားစဉ်ဆက်၊ တို့လက်ထက်ထိ
လက်ဖက်ရည်ကြမ်း၊ ရေနွေးကြမ်းကို
လက်ကမ်း၍သာ၊ သောက်သုံးလာသည်
မြန်မာဓလေ့ တို့ကြည်မွေ့။

* ခေတ်သစ်ကမ္ဘာ၊ ဆေးပညာက
ကျန်းမာရေးတွက်၊ ဆေးတလက်ဟု
လက်ဖက်ရည်ကြမ်း၊ ရေနွေးကြမ်းကို
ဖော်ညွှန်းထုတ်ပြ၊ သုတေသန။

* ထိုရောအခါ၊ စာဆိုငါလျှင်
ဝမ်းသာအားတက်၊ လွန်နှစ်သက်၍
လက်ဖက်ရည်ကြမ်း၊ ရေနွေးကြမ်းကို
ဝမ်းမြောက်ဝမ်းသာ၊ သောက်သုံးရာမှ
မြေမှာလျောင်းသွား၊ တို့ဘိုးဘွား၏
ကြီးမားကျေးဇူး၊ ဂုဏ်ရည်ထူးကို
ချီးကျူးမ၀နိုင်ပါတကား။
မင်းယုဝေ
(၂၀၀၆-ခု နိုဝင်ဘာလထုတ် မင်္ဂလာမောင်မယ် စာစောင်မှ)

စာဆိုကဗျာဆရာကြီး မင်းယုဝေ-က ခေတ်သစ်ဆေးသိပ္ပံ ပညာရှင်တွေ လက်ဖက်ရည်ကြမ်းဟာ ကျန်းမာရေးအတွက် ဆေးတလက်ဖြစ်ကြောင်း ခိုင်လုံစွာ သိကုန်ကြပြီ။ ဒါကြောင့် လက်ဖက်ရည်ကြမ်းကို သောက်ကြစို့လို့ ဆော်သြလိုက်တဲ့ကဗျာလေးပေါ့နော်။

မှန်ပါတယ်ခင်ဗျ။ လွန်ခဲ့တဲ့ ခြောက်လပိုင်းလောက်က ကိုစိုးဆိုတဲ့ ကျွန်တော့်မိတ်ဆွေတယောက် ဂျပန်က ပြန်လာပါတယ်။ သူပြောပြတာက ဂျပန်နိုင်ငံမှာ ကျောင်းသူ၊ ကျောင်းသားတွေ နံနက် ကျောင်းရောက်တာနဲ့ တပြိုင်နက် ပထမဆုံး လက်ဖက်ရည်ကြမ်းတခွက်စီ သောက်ကြရသတဲ့။ ဆရာမတွေကလည်း လက်ဖက်ရည်ကြမ်းရဲ့ အာနိသင် ပြောပြကြသတဲ့။ ပြီးတော့ ခရီးသည် ပို့ဆောင်ရေး ကမ္ဘာ့လေကြောင်း လေယာဉ်ကြီးတွေပေါ်မှာ လေယာဉ်မယ်တွေက Green Tea (လက်ဖက်ရည်ကြမ်း) ကို အမွန်အမြတ်ထားပြီး ဧည့်ဝတ်ပြုကြသတဲ့။

လက်ဖက်ရည်ကြမ်းကတော့ ကျုပ်တို့မြန်မာပြည်မှာ ဘယ်နေရာ၊ ဘယ်ဒေသသွားသွား လက်ဖက်ရည်ဆိုင်တွေ ပေါပေ့ဗျာ။ ရေနွေးကြမ်း သောက်ချင်လို့ကတော့ တနေကုန်ထိုင်သောက် ပိုက်ဆံတပြားမှ မကုန်စေရဘူး။ မြန်မာ့သဘာဝ မြန်မာ့အလှ ကမ္ဘာက သိစေချင်လှသဗျာ။

ကမ္ဘာက သိဖို့ထက် ကျွန်တော်တို့ မြန်မာအမျိုးသမီးတွေ သိစေချင်ပါသေးတယ်။ အမျိုးသမီး အတော်များများဟာ ရေနွေးကြမ်းသောက်ရင် ချွေးထွက်တယ်၊ အလှပျက်တယ်ဆိုပြီး အအေးနဲ့ ခုကာလပေါ်တဲ့ အချိုရည်တွေပဲ သောက်နေကြပါတယ်။
ပြီးတော့ ရေနွေးကြမ်းဆိုတာ အမျိုးသားတွေ သောက်တာလို့ ထင်နေကြသေးတယ်။ အမျိုးသမီးတွေ ရေနွေးကြမ်း သောက်ကြည့်စမ်းပါ။ အဆီတိုးပြီး အ၀လွန်နေတဲ့ အမျိုးသမီးတွေ အဆီကျပါစေ့မယ်။ သွားကိုက်၊ သွားနာ၊ သွားဖုံးနာတာတွေလည်း ပျောက်စေရပါမယ်။ ပြီးတော့ အစာအိမ်လမ်းကြောင်းတလျှောက် အနာရောဂါ မဖြစ်စေရပါဘူး။ သားအိမ်နဲ့ ဆီးအိမ် ကင်ဆာဝေဒနာ ကင်းဝေးစေပါတယ်ဆိုတာ ကျွန်တော် ရဲရဲကြီး ပြောဝံ့ပါတယ်ခင်ဗျ။

ဟုတ်လိုက်လေ မောင်ရယ်၊ ဒီနေ့ အိမ်အပြန် ကျုပ်အိမ်က အဘွားကြီးကို ရေနွေးကြမ်းသောက်ပေးဖို့ တိုက်တွန်းရဦးမယ်။ သူက သွား ခဏခဏ နာတတ်လွန်းလို့ ကဲ ပြန်တော့မယ် မောင်။
ကောင်းပါပြီ ခင်ဗျာ။

မကွေး ၀င်းမြင့်
( မြတ်မင်္ဂလာ ၂၀၀၉-ခု ဖေဖော်ဝါရီလ)

No comments: