ကျွန်မသည် အမှတ် ၁-လယ်ယာသုံး စက်ပစ္စည်းထုတ်လုပ်မှုစက်ရုံမှ ၀န်ထမ်းတဦးဖြစ်ပါသည်။ စက်ရုံသို့ နေ့စဉ် စက်ဘီးဖြင့် အလုပ်တက်ပါသည်။ လမ်းတွင် ကျွန်းပင်များ၊ တောချုံများဘေးမှ ဖြတ်နင်းပြီး ၁၅-မိနစ်ခန့် အကြာတွင် စက်ရုံဂိတ်ဝသို့ ရောက်ရှိပါသည်။
တနေ့ နံနက်တွင် ထုံးစံအတိုင်း ကျွန်းပင်များရှေ့မှ ဖြတ်နင်းလာစဉ် တောအစပ် ချုံငယ်တခုကြားမှ အသံကြားရ၍ လှမ်းကြည့်လိုက်ရာ ခွေးအ၀ါတကောင် လူးလှိမ့်နေသည်ကို တွေ့ရပါသည်။ ကျွန်မသည် ထိုနေရာကို ကျော်ဖြတ်ပြီးမှ ထိုခွေး မည်သည့်ဝေဒနာကြောင့် အော်ညည်းနေသည်ကို သိလိုသဖြင့် စက်ဘီးပေါ်မှ ဆင်းကြည့်လိုက်သည်။ ခွေးအ၀ါမတကောင်သည် သားမပေါက်နိုင်၍ ဝေဒနာခံစားနေရသည်ာကို တွေ့မြင်ရသည်။
ထို့ကြောင့် ခွေးမအား နင် ငါ့ကို ရန်မမူဘူးဆိုရင် နင့်ကို ကူညီပေးမယ်-နော် ဟု ပြောရင်း ခွေးမ၏ဗိုက်ကို အသာအယာ ပွတ်ပေးပါသည်။ နှုတ်ကလည်း ဗောဇ္ဈင်သုတ်နှင့် အင်္ဂုလိမာလသုတ်ကို ၃-ခေါက်စီ ရွတ်ဆိုပြီး ဤခွေးမလေး ခံစားနေရသော ဝေဒနာသည် ချက်ချင်းသက်သာ ပျောက်ကင်းပါစေသတည်း-ဟု မေတ္တာပို့ ဆုတောင်းမိပါသည်။ ထို့နောက် ၁၀-မိနစ်ခန့်အကြာတွင် ခွေးမ၏ ၀မ်းတွင်းမှ ခွေးပေါက်စလေးနှစ်ကောင် ဆက်တိုက် မွေးဖွားလာပါတော့သည်။ ကျွန်မတတ်စွမ်းသရွေ့ ကူညီရကျိုးနပ်သဖြင့် ၀မ်းသာပီတိ ဖြစ်ရပါသည်။
ညနေ အလုပ်ဆင်း၍ ခွေးမသားအမိအား ရှာကြည့်ရာ မတွေ့တော့ပါ။ အိမ်ရောက်သောအခါ မိခင်အား ပြောပြရာ မိခင်က အသက်သုံးချောင်းကို ကယ်ခဲ့သည့်အတွက် မွန်မြတ်သော ကုသိုလ်ဖြစ်ကြောင်း ရှင်းပြပါသည်။
ခွေးမသားအမိကို ဖြူစင်သောစေတနာဖြင့် ကယ်တင်ခဲ့သောကြောင့် ကျွန်မအပေါ် ကျရောက်မည့် ဘေးအန္တရာယ်များလည်း လွတ်ကင်းခဲ့ပါသည်။ ငယ်စဉ်ကတည်းကပင် ပရိတ်တော်များကို ယုံယုံကြည်ကြည် စွဲစွဲမြဲမြဲ ရွတ်ဆိုခဲ့သောကြောင့် ကျွန်မလည်း ဘေးအန္တရာယ်ကင်း၍ ဒုက္ခတွေ့နေသော တိရစ္ဆာန်များကို ကယ်တင်သောအခါလည်း အောင်မြင်ခြင်းဖြစ်ကြောင်း ယုံကြည်ယူဆမိပါသည်။
မအေးအေးမွန်
(မြတ်မင်္ဂလာ ၂၀၀၉-ခု ဖေဖော်ဝါရှီလ)
Subscribe to:
Post Comments (Atom)
No comments:
Post a Comment