Tuesday, June 29, 2010

ဤမှန်သော သစ္စာစကားကြောင့်

စာရှုသူတို့အနေဖြင့် သစ္စာဆိုသည်ဟူသော စကားစုကို သိရှိကြလိမ့်မည် ထင်ပါသည်။ အခက်အခဲတခုနှင့် တွေ့ကြုံရသောအခါ ယင်းအခက်အခဲကို ကျော်လွှားသွားနိုင်ရန် သစ္စာဆိုသည့် သာဓကတို့ကို ဖတ်ဖူး နာဖူးကြပေလိမ့်မည်။ သို့တည်းမဟုတ်ပါကလည်း ကိုယ်တိုင် ဆိုဖူးကောင်း ဆိုဖူးကြပေလိမ့်မည်။ သစ္စာဆိုရာဝယ် မကောင်းသောအကြောင်းပေါ် အရင်းခံသည့် မှန်သောစကားဖြင့် သစ္စာပြုသည်လည်း ရှိသည်။ ကောင်းသော အကြောင်းပေါ် အရင်းခံသည့် မှန်သောစကားဖြင့် သစ္စာပြုသည်လည်း ရှိသည်။ မည်သို့ဆိုစေ မိမိတောင့်တသော အကျိုးကောင်းကို ရရှိနိုင်သည်ဟု ကျွန်တော်ထင်မြင်မိပါသည်။

လွန်ခဲ့သော ၁၀-နှစ် (၁၉၉၇-ခုနှစ်) ကျော်ကာလက အတွေ့အကြုံတခုကို တင်ပြပါမည်။
သဒ္ဓမ္မရံသီရိပ်သာ ဆရာတော်ဘုရားကြီးသည် အခါအားလျော်စွာ ပြည်ပသို့ ဓမ္မဒူတခရီး ထွက်လေ့ရှိပါသည်။ ထိုခရီးများတွင် အများအားဖြင့် ကျွန်တော်လိုက်ပါရပါသည်။ ကပ္ပိယအဖြစ်၎င်း၊ ဆရာတော်ဘုရားကြီး တရာဟော တရားပြရာတွင် မြန်မာဘာသာမှ အင်္ဂလိပ်ဘာသာသို့ ပြန်ဆိုပေးရန်အတွက်၎င်း လိုက်ပါရခြင်း ဖြစ်ပါသည်။ ၁၉၉၇-ခုနှစ် ဧပြီလက ဆရာတော်ဘုရားကြီးသည် ဥရောပတိုက်သို့ ခရီးထွက်ခဲ့ပါသည်။ အီတလီ၊ ဘယ်လ်ဂျီယမ်၊ နယ်သာလင် နိုင်ငံတို့ကို ခရီးထွက်ခဲ့ခြင်းပင် ဖြစ်ပါသည်။

ဆရာတော်ဘုရားကြီးနှင့် ကျွန်တော်တို့သည် ပြင်သစ်နိုင်ငံ ပါရီမြို့အနီး မြို့ငယ်လေးတမြို့တွင် တည်ရှိသော သကျမုနိရိပ်သာကျောင်း ဆရတော် ဦးဝိဇယ၏ ပင့်ဖိတ်ချက်အရ သွားရောက်ကြခြင်းဖြစ်ပါသည်။ ထိုရိပ်သာတွင် စခန်းချကြပါသည်။ ယင်းရိပ်သာတွင် ဆရာတော်ဘုရားကြီးက တရာဟော၊ တရားပြ ပြုရပါသည်။ ဆရာတော်ဘုရားကြီးနှင့် ယောဂီတို့ အပြန်အလှန်ပြောဆိုကြသည်ကို ကျွန်တော်က ယောဂီအတွက် မြန်မာဘာသာမှ အင်္ဂလိပ်ဘာသာသို့ ပြန်ဆိုပေးရပါသည်။ ဆရာတော်ဘုရားကြီးအတွက် အင်္ဂလိပ်ဘာသာမှ မြန်မာဘာသာသို့ ပြန်ဆိုပေးရပါသည်။

တရာဟောရာတွင်မူ မြန်မာဘာသာမှ အင်္ဂလိပ်ဘာသာသို့ ပြန်ဆိုပေးရပါသည်။ ယင်းနိုင်ငံများရှိ ယောဂီတို့အနက် အချို့သည် အင်္ဂလိပ်ဘာသာရပ်တွင် မကျွမ်းကျင်ကြသဖြင့် ထိုသူတို့ နားလည်းနိုင်သော ပြင်သစ်ဘာသာ၊ ဂျာမန်ဘာသာ၊ အီတလီဘာသာ၊ ဗီယက်နာမ်ဘာသာ၊ ကမ္ဘောဒီးယား ဘာသာတို့သို့ အခါအားလျော်စွာ အခြားဘာသာပြန်သူတဦးက ပြန်ဆိုပေးရပါသည်။ အင်္ဂလိပ်ဘာသာရပ်ဖြင့် ပြန်ဆိုရခြင်းမှာ အခရာဖြစ်နေသည့်သဘောပင် ဖြစ်ပါသည်။ ဟောကြားသောတရားများ ယောဂီတို့ထံ ရောက်ရှိရန်မှာ ဘာသာပြန်ဆိုရာတွင် ချိတ်ဆက်မပြတ်ဖို့ လိုအပ်လှပါသည်။ ထို့ကြောင့် ကျွန်တော်သည် မိမိ၏ လုပ်ငန်းမပျက်စေရန်အတွက် အထူးသတိပြုဂရုစိုက်၍ နေထိုင်ရပါသည်။

ထိုသို့ သတိပြု ဂရုစိုက်၍ နေထိုင်ပါသော်လည်း တချိန်တွင် ကျွန်တော်သည် အနည်းငယ် နေမကောင်း၊ ထိုင်မသာ ဖြစ်ခဲ့ပါသည်။ လုပ်ငန်းပျက်စေနိုင်သည့်အခြေသို့ မရောက်ရှိသော်လည်း လုပ်ငန်းဆောင်ရွက်ရာတွင် ကိုယ်စိတ်ပေါ့ပါးခြင်း မရှိလှပါ။ ကျန်းမာရေးချို့တဲ့သည့် အခါ ဆေးမှီဝဲပါသော်လည်း ရောဂါအကင်းသေသည် အထိ အနည်းဆုံး တရက်၊ သို့မဟုတ်-နှစ်ရက်ခန့် စောင့်ရတတ်သည်ကို ကျွန်တော် သိပါသည်။ ထိုစဉ်က ကျွန်တော့်ထံတွင် ဆေးဝါးလည်း မပါရှိပါ။ ထိုရိပ်သာမှ အိမ်ရှင်ဝေယျာဝစ္စ အဖွဲ့ကိုလည်း ၀န်မပိစေလို၍ အကူအညီ မတောင်းလိုပါ။ ထို့ကြောင့် ကျွန်တော်သည် ဆေးမှီဝဲခြင်း မပြုရပါဘဲ ခံစားနေရသော ရောဂါ ဆောလျင်စွာ ပျောက်ကင်းစေနိုင်မည့် နည်းလမ်းတို့ကို ဆင်ခြင်၍ ဖွေရှာမိပါသည်။ သစ္စာဆိုရလျှင် ဖြစ်နိုင်ကောင်းဟု အတွေးဝင်မိပါသဖြင့် ကျွန်တော်သည် သစ္စာဆိုခဲ့ပါသည်။ ဆိုပုံမှာ-

ကျွန်တော်သည် ဆရာတော်ဘုရားကြီး သာသနာပြုရာတွင် အထောက်အကူပြုနိုင်ရန် လိုက်ပါလာခြင်းဖြစ်ပါသည်။ အထောက်အကူပြုလိုသော ဆန္ဒလည်း ကောင်းစွာရှိပါသည်။ ဤမှန်သောသစ္စာ စကားကြောင့် ကိုယ်စိတ်နှစ်ဖြာ ချမ်းသာစွာဖြင့် အထောက်အကူပြုနိုင်ရန် ကျွန်တော်၏ သန္တာန်တွင် စွဲကပ်နေသော ရောဂါသည် ဆောလျင်စွာ ပျော်ကင်းသွားပါစေသတည်း-ဟူ၍ ဖြစ်ပါသည်။

ကျွန်တော်သည် သစ္စာဆိုပြီး ချက်ချင်းသတိမမူမိ၍ ရောဂါချက်ချင်း ပျောက်သည်-မပျောက်သည်ကိုတော့ မသိပါ။ ထိုနေ့တွင်ပင် သတိမူမိသောအခါ အလျင်းနေထိုင်ကောင်းနေပြီကို သိလိုက်ရပါသည်။ လုပ်ငန်းကိုလည်း ချမ်းသာစွာ ဆောင်ရွက်နိုင်ခဲ့ပါသည်။ နေ့မကူးပါဘဲ ဆောလျင်စွာ ရောဂါပျောက်ကင်းသွားသည်မှာ အံ့သြဖွယ်ရာ ကောင်းလှပါသည်။ သစ္စာဆိုခြင်း၏ အာနိသင်ကြောင့်သာ ဖြစ်ပေမည်။

ကျွန်တော်သည် ကောင်းသောအကြောင်းပေါ် အရင်းခံသည့် မှန်သောစကားဖြင့် သစ္စာပြုခဲ့ခြင်း ဖြစ်ပါသည်။ သည်အတွေ့အကြုံရရှိခဲ့သည်မှာ ၁၀-နှစ်ကျော်ခဲ့ပါပြီ။ သည်အတွေ့အကြုံကို တင်ပြရခြင်းအကြောင်းမှာ သစ္စာ တရား၏ အစွမ်းထက်ပုံကို တင်ပြလိုခြင်း ဖြစ်ပါသည်။

တင်ဦးလှိုင်
(မြတ်မင်္ဂလာ ၂၀၀၈-ခု ဖေဖော်ဝါရီလ)

No comments: