Wednesday, June 23, 2010

မေတ္တာရှေ့ထား အကောင်းဆုံးတရား

ကျွန်တော်၏မိဘများသည် နှစ်စဉ် အာလူး၊ ကြက်သွန်-နှစ်မျိုးကို စိုက်ပျိုးလေ့ရှိပါသည်။ အာလူးဖော်ချိန်တွင် အာလူးခင်းကို ကျွန်တော် စောင့်အိပ်ရပါသည်။
ထိုစဉ်က ကျွန်တော် ၉-တန်းကျောင်းသားဘ၀သာ ရှိပါသေးသည်။ ကောက်သင်းကောက်သူများသည် ဖော်ပြီးသား အာလူးအခင်းများသို့ လာ၍ ကောက်သင်းကောက်ကြသည်။ ထိုအချိန် ကျွန်တော်တို့အခင်း သည်လည်း အာလူးဖော်ပြီးစ ဖြစ်သည်။ သို့ရာတွင် မထွန်ရသေးသဖြင့် ကောက်သင်းကောက်များ မ၀င်စေရန် စောင့်နေရခြင်း ဖြစ်သည်။

ထိုစဉ် ကောက်သင်းကောက် မိန်းမကြီးတယောက် ၁၀-နှစ်အရွယ် ကလေးမလေးတယောက် ကျွန်တော်တို့ အခင်းစပ်သို့လာ၍ ယက်နေကြသည်။ ထိုအခြင်းအရာကို မြင်၍ အမကြီး၊ ဒီအခင်းက မထွန်ရသေးဘူးဆိုတာ မသိဘူးလား-ဟု ကျွန်တော် စိတ်တိုတိုဖြင့် မေးလိုက်သည်။

သိပါတယ် ငါ့တူရယ်၊ လူတယောက်ကို ထိုင်စောင့်ရင်းနဲ့ ယက်ကြည့်တာပါ။ ငါ့တူအခင်းကို မကောက်ပါဘူး-ဟု ပြောပါသည်။ ကျွန်တော်လည်း ကောက်သင်းကောက်များကို မုန်းတီးနေသဖြင့် အဲဒီနား မထိုင်နဲ့ဗျာ။ ကျွန်တော်က လေးခွနဲ့ ထုတတ်တယ်-ဟူ၍ ခြောက်လှန့်လိုက်သည်။ ထိုအခါ အမကြီးသည်လည်း တုတ်တုတ်မျှပင် မလှုပ်ဘဲ ငြိမ်နေသည်။ ထို့ကြောင့် ကျွန်တော်လည်း အမြင်ကတ်ကတ်ရှိသဖြင့် လေးခွနှင့် ထုလိုက်ရာ ကလေးမလေး၏ နဖူးကိုမှန်ပြီး သွေးများ စီးကျလာသည်။

ထိုစဉ် အမကြီးက ဘယ်လိုလုပ်လိုက်တာလည်း ငါ့တူရယ်။ မင်းလေးခွက ငါ့သမီးကို မှန်သွားပြီ။ သွေးတွေနဲ့ ဒုက္ခပါပဲ-ဟု ပြောပြီး သမီးလက်ဆွဲ၍ ပြန်သွားလေသည်။
ထိုကိစ္စဖြစ်ပြီး တလခန့်အကြာတွင် ကျွန်တော်တို့မြို့၏ ဘုရားပွဲ၌ ပွဲသွားကြည့်သောအခါ လူမှားပြီး ကျွန်တော်၏ခေါင်းကို ပုလင်းဖြင့် အရိုက်ခံလိုက်ရသည်။ သတိမေ့သွားသည်။ နောက်တနေ့ သတိရသောအခါ ဆေးရုံပေါ်တွင်ရှိနေပြီး ၅-ချက် ချုပ်ထားကြောင်း သိရသည်။ ဆေးရုံပေါ်တွင်ရှိနေစဉ် ကလေးမလေးကို လေးခွနဲ့ထုခဲ့ပုံကိုသာ ကျွန်တော် ပြန်လည်မြင်ယောင်နေမိသည်။

နောင်တွင် မည်သည့်ကိစ္စမဆို သူတပါးအပေါ် မေတ္တာရှေ့ထား၍ နေသွားမည်ဟု ဆုံးဖြတ်မိပါသည်။

ရာဇာအောင်(ပေါက်)
( မြတ်မင်္ဂလာ ၂၀၀၉-ခု ဖေဖော်ဝါရီလ)

No comments: