Friday, July 2, 2010

နေ့စဉ် ဆွမ်းပို့သူ

ကျွန်မတို့ဒေသ ကျေးရွာလေးမှာ အမြဲမပြတ် နေ့စဉ်ဆွမ်းပို့သည့် မုဆိုးမတဦး ရှိပါသည်။ သူသည် စားမှု၊ နေမှု ၀တ်ရေး ခြုံရေးကအစ အရာရာအားလုံး ပြီးပြည့်စုံသူတယောက် မဟုတ်ပေ။ သူ၏ အမျိုးသား ဆုံးပါးသွား ပြီးနောက် သားသမီးများလည်း အသီးသီး အိမ်ထောင်ရက်သားကျ၍ တနယ်တကျေးသို့ လိုက်ပါသွားခဲ့ကြသည်။ သူ့ဘ၀ ၀မ်းရေး သူ့ဟာသူ ရုန်းကန်ရှာဖွေစားသောက်ခဲ့ရသည်။

သို့ပါသော်လည်း သူသည် နေ့စဉ်ဆွမ်းပို့ခြင်းဟူသော အလုပ်ကို မပျက်ကွက်ခဲ့။ သူသည် ကျန်းမာရေး အလွန်ကောင်းသူဖြစ်သည်။ အလုပ်ကြမ်းတွေ အမြဲလုပ်နေရသော်လည်း တော်ရုံနှင့် ဖျားနာသည်ဟူ၍ မရှိခဲ့ချေ။

သူ့အကြောင်း လေ့လာကြည့်တော့ သူ၏အသက် ၁၀-နှစ် သမီးကတည်းကစ၍ သူ့အဘွားနှင့် ဘုန်းကြီး ကျောင်းသို့ ဆွမ်းပို့လိုက်လေ့ရှိသည်ဟု သိရသည်။ သီတင်းသီလ ဥပုသ်နေ့တွေတိုင်းလည်း အဘွားနှင့်အတူ ဥပုသ်စောင့်လေ့ရှိသည်။

သူ အခုလို ဆွမ်းပို့နိုင်အောင် သူ၏စိတ်ကို အဘွားက ငယ်စဉ်ကတည်းက ပြုပြင်ပေးခဲ့၍ ဖြစ်သည်ဟု ဆိုသည်။ သူသည် အသက် ၅၀-ကျော်သည်အထိ ငယ်စဉ်ကတည်းကစ၍ သူများအသက်ကို မစားချေ။ ဟင်းသီးဟင်းရွက် အကြော်အလှော်လေးတွေနှင့်သာ ထမင်းစားသည်။ သူက ပြောပါသည်။ သတ္တ၀ါတွေရဲ့ သင်္ချိုင်းသည် လူတွေရဲ့ ပါးစပ်-တဲ့။ အမှန်ပင် ဖြစ်တော့သည်။

သူမသည် တကိုယ်ရေ တယောက်ထဲမို့ လွတ်လပ်ပြီး ဘာသာရေး အလွန်လိုက်စားသည်။ ခရီးသွားလာခြင်းမရှိ၍ အိမ်တွင်အနေများသည်။ ဆွမ်းမပြတ်ပို့သည်။ အခုခေတ်ကြီးမှာ နိုင်ငံစုံလုပ် စတီးချိုင့်တွေ အလွန်ခေတ်စားလာ သည်နှင့်အမျှ လူတိုင်းလူတိုင်း စတီးချိုင်းတွေနှင့် ဆွမ်းပို့ကြသည်။ ဆင်းရဲရှာသူခမျာကတော့ စတီးချိုင့်နှင့် ဆွမ်းမပို့နိုင်။ ခေတ်နှောင်း မိဘဘိုးဘွားများ အသုံးပြုခဲ့သည့် ဒန်ချိုင့်လေးနှင့်သာ ဆွမ်းပို့နိုင်ပါသည်။ သို့ပါသော်လည်း တခါတခေါက်သာ ကျောင်းသို့ ဆွမ်းပို့ရောက်သည့် စတီးချိုင့်တွေထက် သူကတော့ နေ့စဉ်ကျောင်းသို့ ဒန်ချိုင့်ဖြင့် ဆွမ်းသွားပို့သည်။ အမ၏ ဒန်ချိုင့်လေးက ပိုပြီး ၀င်းလက်တောက်ပ တန်ဖိုးရှိလှပါ တော့သည်။ သူသည် ထိုသို့ ဆွမ်းပို့ရသဖြင့် အလွန်ကျေနပ်ကာ စိတ်ချမ်းသာနေပုံရသည်။ နေ့စဉ် ကုသိုလ်ပြု နေရသဖြင့် ကောင်းရာသုဂတိသို့ မုချရောက်ရမည်ဟူ၍လည်း ခံယူယုံကြည်နေပါသည်။

အလှူအမျိုးမျိုးပြု၍ ကုသိုလ်ယူခဲ့ကြသည့်အထဲမှာမှ ဤသို့ နေ့စဉ် ဘုန်းကြီးကျောင်းသို့ ဆွမ်းပို့ခြင်းဟူသော အလှူဒါနကုသိုလ်သည် ပိုပြီးလွယ်ကူ၍ သန့်စင်မွန်မြတ်လှပါသည်။ တတ်နိုင်သည့်ဟင်းဖြင့် သန့်ရှင်းစင်ကြယ်စွာ စေတနာပါပါ နေ့စဉ်ချက်ပြုတ်ပြီး ဆွမ်းပို့ကြမည်ဆိုလျှင် အလှူရေစက် လက်နှင့်မကွာဆိုသလို တနေ့လျှင် သံဃာတပါး ဆွမ်းကပ်ရသည်နှင့် တူလှသည်။ ဆွမ်းချိုင့်လေးကိုကိုင်ပြီး နံနက်စောစော ဘုန်းကြီးကျောင်းသို့ ဆွမ်းပို့သွားသူ၏ ခြေလှမ်းများသည် ရုပ်ရှင်သွားကြည့်သူများ၊ ပျော်ပွဲရွှင်ပွဲ၊ အငြိမ့်ပွဲ၊ ဇာတ်ပွဲ သွားကြည့်သူများ၏ ခြေလှမ်းများထက် ကုဋေတသန်းမက တန်ဖိုးရှိလှပါတော့သည်။

စွဲကြူကြူအေး
(မြတ်မင်္ဂလာ ၂၀၀၈-ခု ဖေဖော်ဝါရီလ)

No comments: