Saturday, July 3, 2010

ဘယ်သူမပြု မိမိမှု

မောင်မဲသူသည် ငယ်စဉ်အခါက လိမ္မာ၏။ မိဘ၏ ဆိုဆုံးမမှုကို နာခံ၏။ အကို အမတို့၏ စကားကိုလည်း နားထောင်၏။ ကျောင်းမှန်မှန်တက်ပြီး စာကြိုးစား၏။ အားလုံးကလည်း မောင်မဲသူကို ချီးမွမ်းကြ၏။

မောင်မဲသူ အထက်တန်းကျောင်းသား ဖြစ်လာသောအခါ အပေါင်းအသင်း များလာ၏။ ကောင်းသည့် အပေါင်းအသင်းမဟုတ်၊ ဆရာ့စကား နားမထောင်သော ကျောင်းပြေးတတ်သောသူများနှင့် ပေါင်းမိ၏။ ထို့ကြောင့် မောင်မဲသူ၏ ကောင်းသောအကျင့်စရိုက်များ တဖြည်းဖြည်း နိမ့်ကျလာ၏။ ကျောင်းတက်ချိန် မမှန်၊ စာမအံဘဲ အကို အမတွေကို ပြန်၍ အာခံလာ၏။

တနေ့တွင် မောင်မဲသူသည် သူငယ်ချင်းတစုနှင့် အရက်သောက်၏။ အရက်မူးပြီး အိမ်သို့ပြန်လာသော မောင်မဲသူကို အကိုဖြစ်သူက ဆူပူကြိမ်းမောင်းပြီး လက်ဖြင့်ရိုက်၏။ မောင်မဲသူက ပြန်လည်တုံ့ပြန်၏။ သူတပြန် ကိုယ်တပြန် ထိုးကြ ကြိတ်ကြ၏။

မိခင်ဖြစ်သူက ၀င်ရောက်ဖျန်ဖြေသော်လည်း မရ၊ မောင်မဲသူ ပြန်လည်ထိုးလိုက်သော လက်သီးသည် အကို့ကိုမထိ၊ မိခင်ဖြစ်သူကို ထိလေ၏။ မိခင်ဖြစ်သူ၏ မျက်နှာနှင့်လက်မောင်းတို့တွင် အညိုကွက်များ ဖြစ်သွားလေ၏။ ညီအကိုမောင်နှမများအားလုံး ၀ိုင်းဆွဲကြမှ ပြဿနာက ပြီးဆုံးသွား၏။

နောက်တနေ့တွင် မောင်မဲသူ ကျောင်းသို့သွားရာ၌ လူငယ်အချို့နှင့် စကားများ ရန်ဖြစ်ကြ၏။ မောင်မဲသူ၏ မချေမငံ ရန်လိုသောစကားများကြောင့်ဖြစ်၏။ ထိုရန်ပွဲတွင် မောင်မဲသူ အတော်ပင် ခံလိုက်ရ၏။ မျက်နှာတပြင်လုံးတွင် ဖူးရောင်နေသော အညိုကွက်များဖြင့် ပြည့်နှက်နေလေ၏။ ထိုသို့ဖြစ်ရခြင်းမှာ ပြီးခဲ့သည့်ညက မိခင်ဖြစ်သူအား ဒဏ်ရာဒဏ်ချက်များ ရရှိအောင် တမင်ရည်ရွယ်၍ လုပ်ဆောင်ခဲ့ခြင်း မဟုတ်သော်ငြားလည်း မိခင်ဖြစ်သူကို အနာတရဖြစ်စေခဲ့သော သူ၏လုပ်ရပ်အတွက် ပြန်လည်ပေးဆပ် လိုက်ရသော အပြစ်များပင် ဖြစ်ပေသည်။

အကယ်၍ မိခင် ဖခင် ဆရာသမားတို့အပေါ်၌ တမင်ရည်ရွယ်၍ နာကျင်ထိခိုက်အောင် ပြုလုပ်ခဲ့မည်ဆိုလျှင်ကား ပြန်လည်ရရှိမည့် အကုသိုလ်ဆိုးများသည် မတွေးဝံ့အောင်ပင် ဖြစ်သည်။ ကြီးလေးသာ အပြစ်များ ဧကန်မုချ ခံရမည်သည် ဖြစ်သည်။

နေထွဏ်း (န၀ရတ်)
( မြတ်မင်္ဂလာ ၂၀၀၈-ခု ဖေဖော်ဝါရီလ)

No comments: