Saturday, July 17, 2010

ရှင်းသန့်သွေးရည် ကျန်းမာသည်

သွေးရည်သန့်ရှင်းခြင်းနှင့် ညစ်ပျစ်ခြင်းဆိုင်ရာ စမ်းသပ်ချက်တရပ်ကို ဂျပန်နိုင်ငံ နှလုံးနှင့် ဦးနှောက်သွေးကြော ရောဂါကု ပါရဂူကြီးများက ငှက် ၁၀-ကောင်ဖြင့် စမ်းသပ်ခဲ့သည်။ ငှက်အိမ်နှစ်ခုတွင် ငှက်ငါးကောင်စီ ခွဲ၍ မွေးထားသည်။ တအုပ်စုကို ဆီများသော အစားအစာများ ကျွေးပြီး ကျန်တအုပ်စုကို ရိုးရိုးကောက်နှံများကိုသာ ကျွေးသည်။

တနှစ်ကြာပြီးနောက် ငှက်များကို သိသာထင်ရှား ခွဲခြားထားသော အမှတ်အသားများကို တပ်ဆင်၍ ပင်လယ် ကမ်းခြေတွင် ဘေးမဲ့လွှတ်ပေးသည်။ ဤပင်လယ်ကမ်းခြေတွင် သစ်ပင်မရှိ၊ ပင်လယ်ကို ဖြတ်ကျော်မှသာ နေရန်သစ်ပင် ရှာတွေ့နိုင်မည်။

ရိုးရိုးကောက်နှံသာစားသော ငှက်ငါးကောင်သည် ပေါ့ပါးသွက်လက်စွာ ပင်လယ်ကိုဖြတ်ကျော်၍ သစ်တောဆီသို့ ပျံသန်းသွားနိုင်သည်။ ဆီများသော အစားအစာများ စားရသော ငှက်ငါးကောင်မှ ၂-ကောင်သည် ပင်လယ်ကို ဖြတ်ကျော်သော အခါ လမ်းခုလတ်၌ ရေထဲပြုတ်ကျ သေဆုံးသည်။ ကျန်သုံးကောင်သည် လေးလံသော အတောင်ပံများကို လုံးဝ မလှုပ်ခတ်နိုင်တော့ပေ။

ထိုငှက်သုံးကောင်ကို ချက်ချင်း ဓာတ်ခွဲခန်းသို့ ပြန်သယ်ပြီး သွေးသုတေသနလုပ်ကြည့်သည်။ တွေ့ရှိချက်မှာ ထိုငှက်သုံးကောင်၏ သွေးသည် စေးပျစ်ပြီး သွေးကြောများ အလွန်ကျဉ်းမြောင်းနေလေသည်။ ထို့ကြောင့် ဂျပန်ဆေးလောကတွင် သွေးရည်ကို စမ်းရေကဲ့သို့ ကြည်စေ-ဟူသော နှိုးဆော်ချက်သည် ရေပန်းစားခဲ့သည်။

ဂျပန်လူမျိုးသည် အစားအသောက်ကို ဆီနည်းနည်း၊ ဆားပေါ့ပေါ့ စားခဲ့သည့်အတွက် ယနေ့ ဂျပန်လူမျိုး၏ သွေးပျစ်ခြင်းကြောင့်ဖြစ်သော ရောဂါနှုန်းထားသည် ကမ္ဘာတွင် အနိမ့်ဆုံးဖြစ်သည်မှာ အများအသိပင်။

ဦးနှောက်နှင့် နှလုံးသွေးကြောရောဂါများ ကင်းရှင်းလိုလျှင် ဦးစွာ မိမိကိုယ်တိုင် မိမိ၏သွေး စေးပျစ်ခြင်းကို ကုသအောင်နိုင်ရမည်။ သွေးရည်၏ သန့်ရှင်းကြည်လင်မှုကို အောက်ပါကာကွယ်နည်း သုံးနည်းဖြင့် အစပြုနိုင်လျှင် အကျိုးရှိမည်။ အသက်ရှည်နိုင်မည်ဟု သမားတော်ကြီးများက တိုက်တွန်းထားပါသည်။

(၁) သွေးမစေးပျစ်စေရန် နံနက်၊ နေ့လယ်၊ ညနေ ရေမှန်မှန်သောက်သည့် အကျင့်ကောင်း မွေးရမည်။ အထူးသဖြင့် နံနက်အိပ်ရာထချိန်တွင် ရေကို ခွက်ကြီးတခွက် သောက်ခြင်းဖြင့် သွေးရည်ကို အင်နှင့်အားနှင့် ဆေးကြောသန့်စင်ကျဲစေရာ ရောက်လေသည်။ ထို့ကြောင့် အခါအခွင့်ကြုံတိုင်းလည်း ရေသောက်ပေးပါ။

(၂) သွေးမချဉ်စေရန် လတ်ဆတ်သော ဟင်းသီးဟင်းရွက် သစ်သီးသစ်ဖုတို့ကို ပိုမိုစားသုံးရမည်။ အက်စစ်ဓာတ်နှင့် ဘေ့ဆစ်ဓာတ်နှစ်မျိုး မျှတစွာ ပါဝင်ဖွဲ့စည်းထားသော လူ့ခန္ဓာကိုယ်ရှိ သွေးရည်သည် ဘေ့ဆစ်ဓာတ်အနည်းငယ်ကဲသော အခြေအနေ (pH 7.35 မှ 7.45) တွင် ကျန်းမာပျော်ရွှင်စွာ လှုပ်ရှားနိုင်သည်။ (pH 7.0 မှ 7.2) အက်စစ်ဓာတ်ကဲသောအခါ ကင်ဆာရောဂါကို လျင်မြန်စွာ ပွားစေနိုင်သည်။ pH 6.8 ဖြစ်လျှင် သေနိုင်လေသည်။

အက်စစ်ဓာတ်ကဲသော ခန္ဓာကိုယ်သည် ၀ဖြိုးသည်။ ဗိုက်ထွက်သည်။ မောလွယ်သည်။ လှေကားတက်ဆင်းလျှင် ဟိုက်သည်။ ညဥ့်နက်မှအိပ်ခြင်းသည်လည်း ခန္ဓာကိုယ်ကို အက်စစ်ဓာတ် ကဲစေသည်။ ဤအကျင့်ဆိုးသည် ဆေးလိပ် အရက် သောက်ခြင်းထက် ဆိုးသည်။

အက်စစ်ဓာတ်အစားအစာဟူသည် အရသာချဉ်သော အစားအစာမဟုတ်ပါ။ အစားအစာများ လူ့ခန္ဓာကိုယ်ထဲ ရောက်ပြီး ချေချက်ပြီး နောက်ဆုံး ဖြစ်ပေါ်လာသော ပစ္စည်းသည် အက်စစ် သို့မဟုတ်-ဘေ့ဆစ်ဖြစ်မှုပေါ်တွင် မူတည်ပြီး အက်စစ်ဓာတ် အစားအစာ၊ သို့မဟုတ်-ဘေ့ဆစ်ဓာတ် အစားအစာ ဟူ၍ ခွဲခြားထားခြင်း ဖြစ်သည်။
(၁) ပိုတက်စီယမ်။
(၂) ဆိုဒီယမ်။
(၃) ကယ်စီယမ်။
(၄) မဂ္ဂနီဆီယမ်။
(၅) သံ။
(၆) ဖော့စ်ဖောရပ်မီးစုန်းဓာတ်။
(၇) ကလိုရင်း။
(၈) ဆာလဖာ ကန့်ဓာတ်-ဟူ၍ အစားအစာတွင် ပါဝင်သော ပစ္စည်း ၈-မျိုးအနက် ပထမ ၅-မျိုးသည် ဘေ့ဆစ်ဓာတ်ဖြစ်သွားပြီး နောက် ၃-မျိုးသည် အက်စစ်ဓာတ် ဖြစ်သွားသည်။

ဥပမာ-အသားမျိုးစုံ၊ ဆန်၊ ဂျုံ၊ ဆီ၊ ဆားတို့သည် အက်စစ်ဓာတ်အစားအစာ ဖြစ်ပြီး ကယ်လ်စီယမ်၊ ပိုတက်စီယမ်၊ သံဓာတ် စသည့် သတ္ထုဓာတ်များ ပေါကြွယ်ဝသော နွားနို့၊ ဟင်းသီးဟင်းရွက်၊ သစ်သီးဝလံ တို့သည် ချဉ်သောအရသာရှိသော်လည်း ဘေ့ဆစ်ဓာတ်အစားအစာများ ဖြစ်သည်။

(၃) သွေးညစ်ညမ်းခြင်း မဖြစ်စေရန် အောက်ပါ အဆိပ်အတောက် ဖယ်ရှားနည်းသုံးရပ်ကို ကျင့်သုံးနိုင်သည်။

(က) ချောင်းဆိုးလေ့ကျင့်ခန်း။
နေ့စဉ်နံနက် (သို့မဟုတ်) ညနေပိုင်းတွင် လေကောင်းလေသန့်ရသောနေရာတွင် ချောင်းဆိုးလေ့ကျင့်ခန်း-လုပ်နိုင်သည်။
လုပ်နည်းကား-ဦးစွာ အသက်ပြင်းပြင်း ရှူသွင်းပါ။ အသက်ရှူသွင်းစဉ် လက်အစုံကို ဖြည်းဖြည်း မ,ပါ။ ထို့နောက် ရုတ်တရက် ချောင်းဆိုးလိုက်ပါ။ လက်အစုံကိုလည်း ချက်ချင်းချလိုက်ပါ။ ပါးစပ်၊ နှာခေါင်း၊ အဆုတ်တို့မှ အညစ်အကြေးကို သလိပ်၊ နှာရည်များနှင့်အတူ ထွက်သွားစေနိုင်သည်။ ဆယ်ကြိမ်ခန့်လုပ်နိုင်သည်။ တကြိမ်နှင့် တကြိမ်ကြား ပုံမှန်အသက်ရှူမှု ၄-၅ ကြိမ်ခန့် ပြုနိုင်သည်။

(ခ) ၀မ်းမှန်မှန်သွားကျင့်။
အူလမ်းကြောင်းမှ အဆိပ်အတောက်ပစ္စည်းများ သွေးရည်ထဲသို့ ရောက်သွားနိုင်သော အခွင့်အလမ်းကို တားဆီးရမည်။ အချိန်မှန်မှန် ၀မ်းသွားသောအကျင့်ကောင်းကို မွေးရမည်။ ၀မ်းချုပ်တတ်သူများသည် တလတွင် တရက် နံနက်စာနှင့် နေ့လယ်စာမစားဘဲ ရေနွေးနွေး သုံးပုလင်း (2000 မှ 3000 ml) ခန့်ကို ၄-၅ ကြိမ်ခွဲ၍ သောက်နိုင်သည်။ အဆိပ်အတောက်များကို အူလမ်းကြောင်းမှ အလျင်အမြန်စွန့်ထုတ်စေနိုင်သည်။

(ဂ) ဟင်းသီးဟင်းရွက်နှင့် သစ်သီးဝလံတို့၏ အဆိပ်အတောက်ဖယ်ရှားနိုင်သော စွမ်းအား။
မုန်လာဥနီသည် (Pectose) ပက်တိုစ် သကြားဓာတ် မြောက်မြားစွာ ပါဝင်သဖြင့် ပြဒါးနှင့်ပေါင်းစပ်ပြီး ဒြပ်ပေါင်းအသစ်တမျိုးအဖြစ် ပြောင်းလဲကာ ခန္ဓာကိုယ်ပြင်ပသို့ စွန်ပထုတ်နိုင်သည်။ ကြက်သွန်ဖြူသည် ထူးခြားသောဓာတ်တမျိုး ပါဝင်မှုကြောင့် ခဲဓာတ်ကို စွန့်ထုတ်စေနိုင်သည်။ အစိမ်းရောင်အရွက်များသည် ဘေ့ဆစ်ဓာတ်ပါဝင်မှု ပိုများသဖြင့် ခန္ဓာကိုယ်ဆဲလ်တွင် အနည်ထိုင်နေသော အဆိပ်အတောက်များကို ပျော်ဝင်စေနိုင်ပြီး ဆီးလမ်းကြောင်းမှ စွန့်ထုတ်စေနိုင်သည်။ ထို့ကြောင့် အစိမ်းရောင်ဟင်းရွက်များကို ခန္ဓာကိုယ်သွေးရည်၏ အကောင်းဆုံးဆပ်ပြာဟု ခေါ်ဆိုင်နိုင်သည်။ ထို့ပြင် သစ်သီးကို လတ်လတ်ဆတ်ဆတ် စားနိုင်လျှင် အကောင်းဆုံးဖြစ်သည်။

ပင်လယ်ကျောက်ခက်၊ ရေညှိနှင့် ကြွက်နားရွက်တို့တွင်ပါဝင်သော ကော်ဓာတ်တမျိုးသည် ခန္ဓာကိုယ်ထဲ ရောက်နေသော ရေဒီယိုသတ္တိကြွပစ္စည်းကို စွန့်ထုတ်ပေးနိုင်သည်။ ပိုလျှံသောအဆီများကိုလည်း စွန့်ပယ်စေ နိုင်သည်။

အထူးတိုက်တွန်းလိုသော အစားအစာတမျိုးမှာ ၀က်သွေးဖြစ်သည်။ ယင်းတွင်ပါဝင်သော မြောက်မြားစွာသော သွေးရည် ပရိုတင်းဓာတ်သည် အစာချေအင်ဇိုင်း၏ ဖြိုခွဲမှုကြောင့် ဇီဝဓာတ်ပစ္စည်းနှစ်မျိုး ပြိုကွက်ထွက်ကာ အူလမ်းကြောင်းတွင်ရှိသော ဖုန်မှုန့်၊ အဆိပ်အတောက်ဖြစ်စေသော သတ္တုဓာတ်များနှင့် ဓာတ်ပြုပြီး ပျော်ဝင်ရခက်သော ပစ္စည်းအဖြစ် ပြောင်းလဲကာ ခန္ဓာကိုယ်ပြင်ပသို့ စွန့်ထုတ်လေသည်။

ဤသို့ သွေးရည်သန့်စင်စေသော အစားအစာများကို စားပေးခြင်းသည် ဆေးဝါးမှီဝဲခြင်းထက် အဆပေါင်းများစွာ ထိရောက်အကျိုးပြုလေသည်။
ကျမ်းကိုး။ ။ ၂၀၀၂-ခုနှစ် အမှတ်-၅၊ Women's Friend တရုတ်ဘာသာမဂ္ဂဇင်းမှ ထုတ်နုတ်ဘာသာပြန်ပါသည်။

ပါမောက္ခဒေါ်ခင်ဖြူ (မြင်းခြံ)
( မြတ်မင်္ဂလာ ၂၀၀၉-ခု ဧပြီလ)

No comments: