Sunday, July 18, 2010

သရဏဂုံ အကျိုး

စာရေးသူသည် ၁၉၉၀-ပြည့်နှစ် ရခိုင်ပြည်နယ် မြေပုံမြို့တွင် ဦးစီးအရာရှိအဖြစ် တာဝန်ထမ်းဆောင်ခဲ့စဉ်က ဖြစ်ပါသည်။ ထိုစဉ်က မင်းဘူး-အမ်း ကားလမ်း ဖွင့်လှစ်စအချိန်လည်းဖြစ်၊ ဈေးကွက်စီးပွားရေး စတင်ကာစ အခါလည်းဖြစ်၍ ပြည်နယ်မှူးက လမ်းကြောင်းလေ့လာရန်နှင့် ဈေးကွက်ရှာရန် တာဝန်ပေးသဖြင့် မြေပုံမြို့မှ အမ်းမြို့သို့ သင်္ဘောဖြင့်လည်းကောင်း၊ အမ်းမှ မင်းဘူးသို့ ( ၆-တန်ခွဲ) တန် TE ကား (လူစီးကုန်တင်) ဖြင့်လည်းကောင်း၊ မင်းဘူးမှ မကွေးသို့ စက်လှေဖြင့်လည်းကောင်း၊ မကွေးမှ မန္တလေးသို့ ဘတ်စ်ကားဖြင့် လည်းကောင်း၊ စမ်းသပ်သွားလာခဲ့ပါသည်။

အပြန်ခရီးတွင် လမ်းစရိတ် ကာမိရန်အတွက် မန္တလေးမှ တရုတ်ပစ္စည်းများဝယ်ပြီး အပြန်တွင် မကွေးကားဂိတ်မှ ဇက်ဆိပ်သို့ ဆိုက်ကားဖြင့် ဆင်းခဲ့ပါသည်။ မိမိနှင့်အတူပါလာသူ ဦးထွန်းဖြူမှာ လူဝကြီးတယောက်ဖြစ်ပြီး မိမိကတော့ ပိန်သဖြင့် ဆိုက်ကားကို နောက်ဘက်မှ စီးနင်းလိုက်ပါလာခဲ့သည်။ မကွေးပြည်တော်သာလမ်းအတိုင်း ဆင်းလာခဲ့ရာ မြို့မဈေးမြောက်ဘက်မှ အနောက်ဘက်သို့ အဆင်း (ဧရာဝတီမြစ်ဘက်သို့) ကမ်းနားလမ်းမရောက်မီ ကုန်းဆင်းတွင် ဆိုက်ကားနောက်ဘရိတ် ပြတ်သွားပါသည်။ ဤတွင် ခုန်ချ၍လည်း မရပါ။ အဘယ့်ကြောင့်ဆိုသော် ပေါင်ပေါ်တွင်ရော ခြေနင်းခုံပေါ်တွင်ပါ ပစ္စည်းများရှိနေ၍ ဖြစ်သည်။

ထို့နောက် အကြံရ၍ ဘုရားတရားကို အာရုံပြုကာ သရဏဂုံ ၃-ပါး ဂုဏ်တော်ကို တောက်လျှောက်ရွတ်ဆိုပြီး လိုက်ပါလာခဲ့သည်။ ပထမအဆင်းအပြီး ဒုတိယအဆင်းတွင် ရှေ့ဘရိတ်ပါ ပြတ်သွားသည်။ ထိုအခါတွင် ဆိုက်ကားသည် မြစ်ကမ်းပါးဘက်သို့ တဟုန်ထိုး လိမ့်ဆင်းသွားသည်။ ကမ်းပါးသို့ရောက်ရန် ၀ါးတပြန်ခန့် အလိုတွင် တစုံတခုက ၀င်ဆွဲလိုက်သကဲ့သို့ တုံ့ခနဲရပ်ပြီး ဆိုက်ကားမှောက်သွားသည်။

ဆိုက်ကားမှောက်သော်လည်း မိမိမှာ သရဏဂုံကို သတိမပျက် ရွတ်ဆိုနေဆဲဖြစ်သည်။ ထို့နောက် မျက်စိထဲတွင် ၀င်းခနဲ၊ ၀ါခနဲ အလင်းရောင်များ တွေ့လိုက်ပြီး ခေတ္တ သတိလစ်သွားသည်။ ၅-မိနစ်သာ ကြာမည်ထင်သည်။ သတိရသောအခါ မိမိနာမည်ကို အဝေးမှ ခေါ်သံလိုလိုကြားနေရာက ပို၍နီးလာပြီး ကြည်ကြည်လင်လင် ကြားရသောအခါ ပြန်လည်ထူးလိုက်ပါသည်။ ထိုအခါမှ ဦးထွန်းဖြူနှင့် ဆိုက်ကားဆရာအပါအ၀င် ဇက်ဆိပ် ဈေးဆိုင်နှင့် ကွမ်းယာဆိုင်မှ လူများကို တွေ့လိုက်ရသည်။

အသေအချာ ဆန်းစစ်လိုက်သောအခါ မိမိမှာ မှောက်နေသော ဆိုက်ကားနောက်ထိုင်ခုံအောက်တွင် လေးဘက်ထောက်အနေအထားဖြင့် ရောက်ရှိနေပါသည်။ ခန္ဓာကိုယ်တွင် ပွန်းရာ၊ ပဲ့ရာ လုံးဝမရှိပါ။ ဆိုက်ကားဆရာနှင့် ဦးထွန်းဖြူမှာမူ လွင့်စဉ်သွားသည့်အတွက် နဖူးကွဲ၊ ဒူးပြဲ၊ လက်ပြဲ ဖြစ်နေကြပါသည်။

မိမိသည် လွန်စွာ အံ့သြသွားမိ၏။ ကုန်းအဆင်းတွင် ရှေ့ရောနောက်ပါ ဘရိတ်ကြိုးပြတ်၍ တဟုန်ထိုးပြေးဆင်းသွားသော ဆိုက်ကားပေါ်တွင် လူသုံးယောက်ရှိသည့်အနက် သရဏဂုံရွတ်ဆိုလာသော မိမိမှာ ပွန်းရှရုံပင် မဖြစ်သောကြောင့်ဖြစ်သည်။
ဤသည်မှာ ပထမဆုံးအကြိမ် သရဏဂုံအကျိုးကို လက်တွေ့အဖြစ်မှ ကြုံခဲ့ရခြင်း ဖြစ်ပါသည်။

နော်လီကို (မကွေး)
( မြတ်မင်္ဂလာ ၂၀၀၉-ခု ဧပြီလ)

No comments: