Sunday, July 25, 2010

ပရိတ်စွမ်းအင် သိစေချင်

မကြာမီက စာရေးသူသည် ညောင်တုန်းမြို့၊ ဝေဠုဝန်ကျောင်းတိုက်ဆရာတော် ဘဒ္ဒန္တအဂ္ဂဓမ္မထံသို့ ကိစ္စတခုဖြင့် ရောက်ခဲ့ပါသည်။ ထိုစဉ် ဆရာတော်က ဖြစ်ရပ်တခုကို ပြောပြပါသည်။
အတိအကျပြောရလျှင် ၁၃၇၀-ပြည့် သီတင်းကျွတ်လဆန်း ၆-ရက် နေ့လယ် ၁-နာရီ ၁၅-မိနစ်အချိန် ဖြစ်သည်။ ဆရာတော်သည် နေ့ဆွမ်းဘုဉ်းပေးပြီးသည့်အခါတိုင်း မိမိ၏အခန်းထဲသို့ ၀င်ပြီး အနားယူလေ့ရှိပါသည်။ ယခုလို အချင်းဖြစ်ပွားမည့်နေ့တွင် ဆရာတော်သည် အခန်းထဲဝင် အနားယူချင်စိတ် မရှိဘဲ အပြင်ဘက်ခုတင်ပေါ်တွင် အနားယူနေလေသည်။ ဆရာတော် အနားယူစဉ် မည်သည့်အရာကိုမျှ အာရုံမပြုဘဲ မိမိ၏စိတ်မှာ ပရိတ်မေတ္တာ ကိုသာ အာရုံပြုရင်း အနားယူလေ့ရှိသည်။

ဆရာတော်အနားယူစဉ် သူခိုးနှစ်ယောက်သည် ကျောင်းပေါ်သို့တက်လာပြီး ဂန္ဓကုဋီဘုရား ကျောင်းဆောင်ခန်း ထဲသို့ဝင်ကာ နှစ်ပေါင်းတရာဝန်းကျင်ရှိ ရဟန္တာရုပ်တုတော်နှစ်ဆူကို ခိုးယူပြီး ဆင်းသွားကြသည်။ သူခိုးတယောက်က အနီးရှိ ဓာတ်ဘူးကိုပါ လှမ်းယူစဉ် ဆရာတော်မြင်တွေ့၍ ဟေ့ကောင်၊ ဟေ့ကောင် မင်းဘယ်သူလဲ-ဟု မေးလိုက်သည်။ မေးမရသည့်အခါ ထထိုင်ပြီး သူခိုး သူခိုး-ဟု အော်လေသည်။

ဆရာတော်သည် ၀ိနည်းတော်ကို မသိ၍ မဟုတ်၊ သိပင်သိငြားသော်လည်း ရှေးဟောင်းရဟန္တာနှစ်ဆူ ပါသွားမည်ကို စိုးရိမ်စိတ်ဖြင့် သူခိုးဟု အော်မိကြောင်းကိုလည်း ပြောပြပါသည်။
သူခိုးများသည် ရပ်ကွက်ထဲသို့ ထွက်ပြေးလေသည်။ ဆရာတော့်အသံကို ကြားသည့် ကျောင်းသားကိုရင်များက သူခိုးများကို ထွက်လိုက်လေ၏။ ရပ်ကွက်လူများကလည်း ၀ိုင်းဝန်းလိုက်ဖမ်းကြရာ သူခိုးနှစ်ယောက်ကို မကြာမီ ဖမ်းမိကြလေသည်။

တာဝန်ရှိရဲများက ကျောင်းသို့ရောက်လာပြီး သူခိုးဖမ်းမိကြောင်းကို ဆရာတော်အား လျှောက်ထားပါသည်။ ဆရာတော်ဖြစ်စေ၊ ဂေါပကဖြစ်စေ သူခိုးများကို အရေးယူ တရားစွဲနိုင်ကြောင်း လျှောက်ပါသည်။ ဆရာတော်က ၀ိနည်းတော်နှင့် မငြိစွန်းရန် ဂေါပကဖြစ်စေ၊ ငါကိုယ်တိုင်ဖြစ်စေ ဘာမှအမှုမလုပ်ပါ။ တရားလည်းစွဲချက်တွေ မတင်လိုပါ။ ထိုပစ္စည်းများမှာ ဆရာတော်ပစ္စည်းမဟုတ်တော့ဘဲ သူခိုးပိုင်ပစ္စည်းများ ဖြစ်သွားပြီ။ ဒါကြောင့် ဒကာတို့အလုပ်နဲ့ ဒကာတို့လုပ်ချင်တယ်ဆိုရင် လုပ်ပါ။ ဆရာတော်နဲ့တော့ မည်သို့မျှ မသက်ဆိုင်တော့ပါ-ဟု ပြန်လည်မိန့်ကြားပါသည်။

ရဲများပြန်သွားကြပြီး ဆက်လက်ဖော်ထုတ်စစ်ဆေးကြရာ ညောင်တုန်းမြို့ပေါ်ရှိ မဟာဝိသုတာရာမတိုက်သစ် ကျောင်းရှိ ကြေးကမ္မ၀ါ၊ ရွှေဟင်္သာတောရတိုက်ရှိ ရဟန္တာရုပ်တု၊ နိဂြောဓာရုံကျောင်းရှိ အရှင်မောဂ္ဂလာန်၊ အရှင်သာရိပုတ္တရာရုပ်တုတို့ ပျောက်ဆုံးနေသည်ကိုပါ ဖော်ထုတ်နိုင်ခဲ့လေသည်။ ထို့ကြောင့် ထိုရုပ်တုတော်နှင့် ပစ္စည်းအားလုံး ပြန်လည်ရရှိကြလေသည်။ ဆရာတော်၏ ရဟန္တာရုပ်တု နှစ်ဆူကိုလည်း ရဲများက ပြန်လည် လာရောက်လှူဒါန်းကြပါသည်။

ဆရာတော်၏ ရဟန္တာရုပ်တုနှစ်ဆူကို ယခုလို ပြန်လည်ရရှ်ိခြင်းမှာ ဘယ်အစွမ်းသတ္တိကြောင့် ယူဆပါသလဲ-ဟု စရေးသူက မေးလျှောက်ကြည့်သည့်အခါ ဆရာတော်က ငါက-အမြဲ ပရိတ်ကြီး ၁၁-သုတ်နဲ့ မဟာသမယ သုတ်ကိုပါ ရွတ်တော့ နတ်ကောင်းနတ်မြတ်တွေက ငါ့ကို စောင့်ရှောက်သတိပေးတယ်လို့ ငါယုံကြည်တယ်-ဟု ပြန်လည် မိန့်ကြားပါသည်။

နန္ဒာထွန်းဝင်း (ပန်းတနော်)
(မြတ်မင်္ဂလာ ၂၀၀၉-ခု မေလ)

No comments: