Tuesday, July 27, 2010

မောင်လူခန့်၏ ဆွမ်းတနပ်

၂၀၀၅-ခုနှစ် ဇန်န၀ါရီလတွင် မြို့နယ်ရုံးများသို့ သွားရောက်တာဝန်ထမ်းဆောင်ရသည့်မြို့မှာ မြန်မာနိုင်ငံ၏ အနောက်မြောက်ဘက် နယ်စပ်တွင်ရှိသော မြို့တမြို့ ဖြစ်ပါသည်။ ယင်းအချိန်တွင် မောင်လူခန့်၏ အစာအိမ်ရောဂါမှာ အပြင်းထန်ဆုံးအဆင့်သို့ ရောက်ရှိနေပြီး နံနက်စာထမင်းကို ကြက်ဥကြော်၊ ငါးကြော်နှင့်သာ စားသောက်ရပါသည်။ ညနေစာဆိုလျှင် အစာအိမ်သည် ကြာဆံပြုတ်ကိုသာ လက်ခံပါသည်။ အစားအစာကို အထူးသတိပြုပြီး စားသောက်နေရပါသည်။

မောင်လူခန့် စခန်းမှာ ကလေးမြို့နှင့် တမူးမြို့သွား မော်တော်ကားလမ်းဘေးတွင် တည်ရှိပါသည်။ ယင်းမြို့ကလေးမှာ ခရစ်ယာန်ဘာသာဝင်ဦးရေ ပိုမိုများပြားသည့်အတွက် တနင်္ဂနွေနေ့တိုင်း ဈေးပိတ်ပါသည်။ ယင်းနေ့ အသားငါး အထူးသဖြင့် ငါး (လုံးဝ) ၀ယ်ယူ၍မရပါ။

မတ်လဆန်းပိုင်း စနေနေ့ကျသော ရက်တရက်ကို မောင်လူခန့် ဘယ်သောအခါမှ မေ့မရနိုင်ပါ။
ထိုနေ့ ၁၁-နာရီခန့်တွင် မောင်လူခန့်ရုံးခန်းရှေ့၌ ခရီးသည်တင်ကားတစီးပျက်၍ ပြင်နေပါသည်။ ယင်းကားပေါ်တွင် ဘုန်းကြီးတပါးလည်း လိုက်ပါလာခဲ့ပါသည်။ မောင်လူခန့်က- ကားဆရာ၊ ဘယ်အချိန် ကားပြင်ပြီးမှာလဲ-ဟု မေးလိုက်ရာ ၁၂-နာရီကျော်မှ ပြီးပါမည်-ဟု ပြန်ဖြေပါသည်။ ထိုအခါ မောင်လူခန့်က ဘုန်းတော်ကြီးကို မြန်မြန်ဆန်ဆန် ရုံးခန်းထဲသို့ ပင့်ဖိတ်ပြီး မိမိအတွက် မနက်စာချက်ပြုတ်ထားသည့် ကြက်ဥကြော်၊ ငါးကြော်အပြင် နောက်နေ့ ဈေးပိတ်၍ ကြိုတင်ဝယ်ယူထားသော ငါးကြော်များကိုပါ ထည့်ပြီး ဆွမ်းကပ်လှူခဲ့ပါသည်။ ဆရာတော်မှာ မနေ့က ရထားပျက်၍ နေ့ဆွမ်းမဘုဉ်းပေးခဲ့ရကြောင်း မိန့်ကြားပါသည်။ ဤအခါ မောင်လူခန့်မှာ မိမိလှူဒါန်းရသော ဆွမ်းတနပ်အတွက် အလွန်ပင် ပီတိဖြစ်ခဲ့ရပါသည်။

နောက်တနေ့ တနင်္ဂနွေနေ့တွင် မောင်လူခန့်၏ စခန်းရှေ့၌ နံနက် ၈-နာရီခန့် ငါးများလာရောက်ရောင်းချ နေသည်ကို ထူးဆန်းစွာ တွေ့မြင်ခဲ့ရပါသည်။
သို့ဖြင့် မောင်လူခန့်က သူ၏တပည့်ကိုခေါ်၍ နံနက်စာအတွက် ငါးများဝယ်ယူချက်ပြုတ်စေခဲ့ပါသည်။

မောင်လူခန့်သည် အစိုးရဌာနတခုတွင် တာဝန်ထမ်းဆောင်နေသည့် အရာရှိတယောက် ဖြစ်ပါသည်။ တခါတရံ မြို့နယ်ရုံးများတွင် တနှစ်ခွဲမှ နှစ်နှစ်နီးပါးအထိ ထာဝန်ထမ်းဆောင်ခဲ့ရသည့် အချိန်ကာလများလည်း ကြုံတွေ့ခဲ့ ရပါသည်။
မောင်လူခန့်တွင် အလယ်တန်းကျောင်းသားဘ၀က အခြေခံအစပျိုးခဲ့သည့် အစာအိမ်ရောဂါ အမြဲစွဲကပ်လျက် ရှိပေသည်။ သို့သော် နယ်ရုံးများသို့ တာဝန်ထမ်းဆောင်ရသည့်အခါတိုင်း သူ၏မိသားစုများကို ခေါ်သွားလေ့ မရှိပါ။ သူ၏အစာအိမ်ရောဂါမှာ ပြင်ပစားသောက်ဆိုင်များမှ အစားအစာများနှင့် လုံးဝမတည့်ပေ။ ကိုယ်တိုင် ချက်ပြုတ်၍ စားရသည်။

ထို့ကြောင့် ကုသိုလ်ဒါနပြုတိုင်းပြုတိုင်း မိမိနှင့် မတည့်သောအစားအစာများ မိမိကြိုက်နှစ်သက်ပြီး စားသောက်၍မရသော အစားအစာများကို အထူးဦးစားပေးလှူဒါန်းခဲ့ပါသည်။ သူ့မိဘများကလည်း ခုနစ်နှစ်သား အရွယ်တွင် ရှင်ပြုပေးခဲ့သည့်အချိန်မှစ၍ ၀ါတွင်းသုံးလ ဥပုသ်နေ့များတွင် ဘုန်းကြီးကျောင်းဝေယျာဝစ္စ လုပ်ပေးရန် အဖိတ်နေ့တွင် ဘုန်းကြီးကျောင်းသို့ သွားရောက်ညအိပ်စေခဲ့ပါသည်။ ထို့အပြင် ဥပုသ်နေ့တိုင်း ရှစ်ပါးသီလကိုလည်း ခံယူဆောက်တည်စေခဲ့ပါသည်။ ထို့ကြောင့် ၀န်ထမ်းဖြစ်လာသည့်အခါမှာလည်း ၀ါတွင်းသုံးလဥပုသ်ရက်များတွင် ဥပုသ်သီလကို မဖြစ်မနေ စောင့်ထိန်းခဲ့သည့် အလေ့အကျင့်များလည်း ရရှိခဲ့ပါသည်။

ကျန်းမာရေးအလွန်ညံ့ပြီး ဆေးရုံကို မကြာခဏ တက်ရောက်ကုသမှု ခံယူခဲ့ရသဖြင့် အသက်ရှည် ကျန်းမာသည့် အောက်ဖော်ပြပါ ကုသိုလ်များကိုလည်း စွမ်းနိုင်သမျှ လှူဒါန်းပူဇော်ခဲ့ပါသည်။ ယင်းကုသိုလ်များ-
(၁) ရေစစ်လှူဒါန်းခြင်း။
(၂) ဆေးဝါးလှူဒါန်းခြင်း။
(၃) ကျောင်း၊ ဘုရား၊ တံတားပျက်တို့ကို ပြုပြင်ခြင်း။
(၄) ငါးပါးသီလကို အမြဲစောင့်ထိန်းခြင်း။
(၅) သီတင်းနေ့တိုင်း ရှစ်ပါးသီလကို စောင့်ထိန်းခြင်း။
(၆) ကျောင်းသစ်၊ ဇရပ်သစ် ဆောက်လုပ်လှူဒါန်းခြင်းတို့ ဖြစ်ပါသည်။

ယခုအခါ မောင်လူခန့်မှာ အချဉ်မှလွဲ၍ အသီး၊ အရွက်နှင့် အပူအစပ် အနည်းငယ်ကိုပါ စားသုံး၍ရသော အခြေအနေသို့ ရောက်ရှိခဲ့ပါသည်။ မိမိပြုခဲ့သော ကုသိုလ်ကောင်းမှုအကျိုးကား မိမိပင် ပြန်လည်ခံစား ခဲ့ရကြောင်း မောင်လူခန့် စဉ်းစားမိတိုင်း ၀မ်းသာပီတိဖြစ်လျက် ရှိပါတော့သည်။

ဆင်တဲဝမောင်မောင်ကြည်
(မြတ်မင်္ဂလာ ၂၀၀၉-ခု မေလ)

No comments: