Friday, July 9, 2010

မှတပါး အခြားမရှိပြီ

ကျွန်တော်နှင့် ကျွန်တော့်ဇနီးတို့သည် ဘာသာတရားကို ရိုသေကိုင်းရှိုင်းကြသူများ ဖြစ်ကြသည်။ ဒါန၊ သီလ၊ ဘာဝနာကိုလည်း နေ့စဉ်ပွားများကြသည်။ နံနက်အိပ်ရာထလျှင်၎င်း၊ အိပ်ရာဝင်ခါနီးတွင်၎င်း၊ ဘုရားရှိခိုး၊ ငါးပါးသီလခံယူ၊ ပရိတ်ရွတ်၊ မေတ္တာပို့၊ ဂုဏ်တော်ပုတီးစိပ်လေ့ရှိသည်။ ဘုရား သောက်တော်ရေ၊ ဆွမ်း၊ ပန်း၊ ဆီမီးပူဇော်ခြင်း စသည့် ဘုရားဝေယျာဝစ္စများကို နေ့စဉ်ဆောင်ရွက်သည်။ လပြည့် လကွယ်နေ့ရက်များ တွင်လည်း ဘုန်းကြီးကျောင်းသို့ သွားရောက် ရှစ်ပါးသီလ ခံယူဆောက်တည်၍ ကုသိုလ်ကောင်းမှု ပြုလုပ်ကြသည်။

ဘုရား တရား သံဃာ ယုံကြည်ကိုးကွယ်ကြသူဖြစ်၍ ဘ၀သည် အေးချမ်းတည်ငြိမ်မှုရှိပါသည်။ ပြင်းပြင်းထန်ထန် ကျရောက်တော့မည့် ဘေးအန္တရာယ်များမှလည်း သက်သာခွင့်ရခဲ့သည်ကို လက်တွေ့ကြုံတွေ့ခဲ့ရပါသည်။
၂၀၀၂-ခုနှစ် ဇန်န၀ါရီလ ၂၈-ရက်နေ့ နံနက် ၈-နာရီအချိန် အမျိုးသမီးက ဘုရားရှိခိုး ပရိတ်ရွတ်ပြီးနောက် စက်ဘီးစီး၍ ကျောင်းသွားခဲ့သည်။ မြစ်ကြီးနားမြို့ ဆေးရုံကြီးထောင့် လမ်းလေးခွဆုံသည့်နေရာတွင် ဆိုင်ကယ်အတိုက်ခံရပြီး စက်ဘီးရောလူပါလဲကာ သတိလစ်သွားပါသည်။ ဆိုင်ကယ်သမားနှင့်အနီးရှိ လူကြီးနှစ်ဦးက ဆေးရုံတင်လိုက်ပါသည်။ ခေါင်းနှင့် ကတ္တရာလမ်း ထိမိသည်။ နားရွက်က သွေးတွေ ထွက်နေသည်။ အရေးပေါ်ခန်းတွင် တာဝန်ကျဆရာဝန်ကြီးများက ချက်ချင်းစမ်းသပ်၍ ကုသပေးပါသည်။

အတန်ကြာမှ သတိရလာသည်။ ခေါင်းကိုထိမိသဖြင့် စိုးရိမ်ရပါသည်။ ခေါင်းကို ဓာတ်မှန်ရိုက်ထားသည်။ မနက်ဖြန်မှ အဖြေရမည်။
တည်ငြိမ်အေးချမ်းသော ကျွန်တော့မိသားစုဘ၀ထဲသို့ လောကဓံမုန်တိုင်း တိုက်ခတ်လာပါသည်။ ကျွန်တော်တို့မိသားစု ဒုက္ခရောက်ကြပြီ။ လူမမာမှာ ဝေဒနာကြောင့် အိပ်လိုက် နိုးလာလိုက်၊ ခေါင်းကိုက်သည် ပြောလိုက် ဖြစ်နေသဖြင့် သတင်းမေးလာသူများအဖို့ စိတ်မသက်သာကြပါ။

ညမိုးချုပ်တော့ သမီးနှစ်ယောက်က လူမမာစောင့်ရန် နေရစ်သည်။ ကျွန်တော်က တညလုံး အိပ်မပျော်၊ လူမမာအခြအနေ ပိုဆိုးလာမလား ဟူ၍ စိုးရိမ်သောက ရောက်ခဲ့ရသည်။ ညတွင် ဘုရားရှိခိုး ပုတီးစိပ်၊ ပရိတ်ရွတ်၊ မေတ္တာပို့သည်။ အမျိုးသမီး၏ ရောဂါဝေဒနာ သက်သာပျောက်ကင်းပါစေ-ဟု အကြိမ်ကြိမ် ဆုတောင်းသည်။

နောက်တနေ့နံနက် ကျွန်တော်ဆေးရုံရောက်သော် လူမမာ ညက မသက်သာကြောင်း၊ အိပ်မရကြောင်း သမီးကြီးက ပြောသည်။ ကျွန်တော်က ခွင့်တပတ်ခန့်ယူကြီး လူမမာကိုစောင့်ကြည့်သည်။ ဆရာဝန် ဆရာမများကလည်း အလှည့်ကျလာရောက် ကြည့်ရှုပြီး ဆေးထိုး၊ ဆေးတိုက်ကြသည်။ ဓာတ်မှန်တွင် ဒဏ်ရာမတွေ့ဟု ဆရာဝန်က ပြောသဖြင့် ကျွန်တော် စိတ်အေးသွားရသည်။ ဦးနှောက်အတွင်း ဒဏ်ရာမရသော်လည်း အပေါ်ယံ ထိခိုက်မိသဖြင့် နာနေခြင်းဖြစ်သည်။ ဆေးဖိုးကုန်ကျစရိတ်များကိုလည်း ဆိုင်ကယ်သမားက ပံ့ပိုးကူညီပေးပါသည်။ တပတ်ခန့်ကြာသော် ရောဂါသက်သာသဖြင့် ဆရာဝန်က ဆေးရုံမှ ဆင်းခွင့်ပြုသည်။

ဆရာဝန်ညွှန်ကြားသည့်ဆေးအပြင် ကချင်တိုင်းရင်း ဒဏ်ကျေဆေးကို စားသည်။ အာဟာရပြည့်ဝသည့် အစားအစာများကိုလည်း ချက်ပြုတ်ကျွေးမွေးသည်။ အထူးကုဆရာဝန်ထံလည်း သွားရောက်ကုသသည်။ ၄-လခန့်ကြာသော် လုံးဝသက်သာပျောက်ကင်းသွားပြီ ဖြစ်သဖြင့် အလုပ်ဝင်ရောက်နိုင်ပြီ ဖြစ်ပါသည်။ အမှန်အားဖြင့် ပို၍ ပြင်းထန်သော ဝေဒနာဖြင့် အသက်ဆုံးရှုံးနိုင်မည့် အခြေအနေရှိပါသည်။ သို့သော် ဘုရား တရားကို ထာဝစဉ် အာရုံပြုနေခြင်း၊ ဒါန သီလ ဘာဝနာများ ပွားများနေခြင်း၊ ပရိတ်ရွတ်ခြင်းတို့ကြောင့် အသက်အန္တရာယ်မှ ကင်းလွတ်ခဲ့ရပါသည်။ ထိုအချိန်မှစ၍ ကျွန်တော်တို့မိသားစုသည် ဘုရား တရားအလုပ်ကို ယခင်ကထက်ပို၍ ကြိုးစားအားထုတ်နေကြပါတော့သည်။

ကောက်ရိုးနွယ် (ရွှေကူ)
( မြတ်မင်္ဂလာ ၂၀၀၉-ခု မတ်လ)

No comments: