Wednesday, August 25, 2010

သေကံမရောက် သက်မပျောက်

ကိုသောင်းမြိုင်သည် မြစ်ငယ်စာတိုက်တွင် စာပို့သမားအဖြစ် စတင်တာဝန်ထမ်းဆောင်ရာမှ ရာထူးတိုး၍ ယခုအခါတွင် စာတိုက်စာရေးကလေးအဆင့်ဖြင့် ဆက်လက်ထမ်းဆောင်နေသည်။
သူသည် နေ့စဉ် ဂုဏ်တော်ပုတီးစိပ်ခြင်းကို အမြဲပြုလုပ်၍ အခါအားလျော်စွာ ဥပုသ်စောင့်လေ့ရှိသည်။ အချိန်အားသည်နှင့် ဂုဏ်တော်ကိုးပါးကို ရွတ်ဆိုခြင်း၊ မေတ္တာပွားများခြင်းတို့ကို ပြုလုပ်လေ့ရှိသည်။ ဂုဏ်တော်တန်ခိုး၊ မေတ္တာအကျိုးကြောင့် လူချစ်လူခင် ပေါများလျက်ရှိသည်။

ကိုသောင်းမြိုင်သည် နေ့စဉ် နေ့လယ် ၁၂-နာရီတွင် မြစ်ငယ်မြစ်၏ တောင်ဘက်ကမ်းရှိ သံတံတားရွာသစ်သို့ ထမင်းစားပြန်လေ့ရှိသည်။
၂၀၀၈-ခုနှစ်က ဖြစ်သည်။ တနေ့တွင် မြစ်ငယ်မြစ်ကူးတံတား (ကားများကူးသည့် သံတံတားဟောင်း) မှ ဖြတ်ကူးစဉ်တွင် ဇာတ်အဖွဲ့ ကားတကားလည်း ကူးလာသည်။ သံတံတားအဟောင်းဖြစ်သည့်အတွက် အပေါက်နေရာများကို သံပြားများဖြင့် ဖုံးအုပ်ထားပေသည်။

ကိုသောင်းမြိုင်သည် စက်ဘီးဖြင့် ထိုသံပြားနေရာသို့အရောက်တွင် ဇာတ်အဖွဲ့ကားသည်လည်း အရှိန်ဖြင့် မောင်းလာခဲ့သည်။ ကား၏အရှိန်ဖြင့် သံပြားအဖုံးကို နင်းမိလိုက်သည်နှင့် တပြိုင်နက် ကိုသောင်းမြိုင် စက်ဘီးသည် မြောက်တက်သွားပြီး ကားအောက်သို့ဝင်သွားခဲ့သည်။ ဘေးမှလူများကလည်း ဟာ-သွားပြီဟေ့-ဆိုသော အာမေဋိတ်ဖြင့် အော်နေကြသည်။

အရှိန်နှင့်မောင်းလာသော ကားသည်လည်း ဘရိတ်အုပ်၍ ရပ်လိုက်သည်။ ဘေးမှလူများသည်လည်း ကားအောက်မှ ကိုသောင်းမြိုင်ကို ဆွဲထုတ်ရန် ပြေးလာကြပေသည်။ ကိုသောင်းမြိုင်ကို ဆွဲထုတ်ရန် ပြေးလာကြပေသည်။ ကိုသောင်းမြိုင်မှာမူ လက်ကလေး အနည်းငယ်သာ နာကျင်သွားပြီး ကားအောက်တွင် ခွေခွေကလေး ကျနေခဲ့သည်။

ကားအောက်ဝင်သွားသော စက်ဘီးသည် ချိတ်ဖြင့် စက်ဘီးဘောင်ကို ချိတ်မိပြီး ကိုသောင်းမြိုင်အား ကားဘီး ကာထားပေးသလို ဖြစ်နေသည်။ သာမန်အားဖြင့် ကြည့်ပါက ကားအောက်ဝင်သွားသော စက်ဘီးနှင့်လူသည် ပြားချပ်သွားဖွယ်ရာရှိသော်လည်း ကိုသောင်းမြိုင်မှာမူ အသက်ဘေးမှ လွတ်ကင်းခဲ့ရသည်။

ကိုသောင်းမြိုင်၏ ပြောစကားအရမူ ဂုဏ်တော်တန်ခိုး၊ မေတ္တာသုတ်ကျေးဇူးကြောင့် ပုဂ္ဂိုလ်တဦးဦးက မ,ထားသလို ခံစားနေရတာပဲဟုပင် သိခဲ့ရသည်။ ကိုသောင်းမြိုင်သည် အသက်အန္တရာယ်မှ လွတ်ကင်းလာသည့်အတွက် ယခုအခါတွင် မိဘနှစ်ပါးကို ညစဉ်ကန်တော့ခြင်း၊ ပုတီးစိပ်ခြင်း၊ ဂုဏ်တော်ရွတ်ဖတ်ပူဇော်ခြင်း၊ မေတ္တာပွားများခြင်းများကို ပိုမိုဆောင်ရွက်နေပေသည်။ ထို့ပြင် သူတာဝန်ထမ်းဆောင်နေသော မြစ်ငယ်စာတိုက်သို့ ရဟန်းသံဃာများ၊ သီလရှင်များ စာလာထည့်ပါက မှတ်ပုံတင်ခ ကုသိုလ်ပြု လှူဒါန်းလျက်ရှိနေပေသည်။

နွေနဒီ (မြစ်ငယ်)
(မင်္ဂလာမောင်မယ် ၂၀၀၉-ခု စက်တင်ဘာလ)

No comments: