Sunday, August 15, 2010

အသက်သတ်လွတ် ဘုဉ်းပေးသော ဆရာတော်ကြီးများ

မြန်မာဗုဒ္ဓဘာသာ သာသနာရေးလောကတွင် အသက်သတ်လွတ် ဘုဉ်းပေးတော်မူကြသော ဆရာတော်ကြီး အချို့ ရှိသည်။ ယင်းတို့တွင် မျက်မှောက်ခေတ်၌ ညောင်ရမ်းဆရာတော်ဘုရားကြီး၊ မဟာစည် ဆရာတော်ဘုရား ကြီး၊ မဟာဂန္ဓာရုံ ဆရာတော်ဘုရားကြီး (အရှင်ဇနကာဘိဝံသ)၊ ကုံလုံ ဆရာတော်ဘုရားကြီး၊ သာမညတောင် ဆရာတော်ဘုရားကြီး စသော အရှင်မြတ်ကြီးတို့သည် ထိပ်တန်းက ပါဝင်သည်။

ညောင်ရမ်းဆရာတော်ဘုရားကြီးသည် ဆဋ္ဌသင်္ဂါယနာတင်ခြင်းကို အောင်မြင်စွာ ဦးဆောင်တော်မူခဲ့သော အရှင်မြတ်ကြီးဖြစ်သည်။
မဟာစည်ဆရာတော်ဘုရားကြီးသည် ပျိုရွယ်စဉ်က အသက်သတ်လွတ် ဘုဉ်းပေးခြင်း မပြုသော်လည်း သက်တော် ၅၀-ကျော်မှစ၍ အသက်သတ်လွတ် ဘုဉ်းပေးတော်မူခဲ့သည်။
မဟာဂန္ဓာရုံဆရာတော်ဘုရားကြီးသည် သက်တော် ၇၂-နှစ်မှစ၍ အသက်သတ်လွတ် ဘုဉ်းပေးတော်မူခဲ့သည်။ ဆရာတော်ကြီးသည် မေတ္တာဘာဝနာပွားများရာတွင် ပိုမိုထိရောက်စေရန် အသက်သတ်လွတ် ဘုဉ်းပေးသည် ဟူ၍ ဆိုကြသည်။ အောက်နတ်များက အသားစား မရှောင်ကြသော်လည်း အထက်နတ်များက အသားစား ရှောင်ကြသည်။ ထိုအထက်နတ်များသည် သာသနာတော်ကို ပိုမိုကြည်ညိုကြသည်-ဟူသော ကျမ်းဂန်အဆိုကို ဆရာတော်ကြီးက ခံယူသည်။

ဆရာတော်သည် မိမိကျောင်းတိုက်ရှိ သံဃာတော် ၄၀၀-ကျော်၏ စားဝတ်နေရေး ဖူလုံမှုအတွက်၎င်း၊ သာသနာတော်ကို ပြုပြင်ရာ၌ အောင်မြင်ရန်အတွက်၎င်း၊ အထက်နတ်ကြီးများ၏ အကူအညီ လိုအပ်သည်။ မေတ္တာကို လေးလေးနက်နက် ပို့ခြင်းဖြင့် အထက်နတ်များနှင့် ဒကာ ဒကာမများ၏ မေတ္တာကို ခံယူရရှိမည်၊ အကူအညီ ရရှိမည်ဟု ယုံကြည်သည်။ ထို့ကြောင့် အသက်သတ်လွတ်စား၍ မေတ္တာပို့ကြောင်း ဆရာတော်ကြီး အရှင်ဃောသိတ ရေးသားပြုစုသော တဘ၀သာသနာ ထေရုပ္ပတ္တိကျမ်းစာအုပ်ကြီးတွင် ဖော်ပြထားသည်ကို တွေ့ရသည်။

ရှမ်းပြည်နယ်မှ ကုံလုံဆရာတော်ဘုရားကြီး (၉၆-နှစ်) က အသက်သတ်လွတ် ဘုဉ်းပေးရာတွင် သစ်သီးသစ်ဥ များကိုသာ ဦးစားပေး၍ ဘုဉ်းပေးတော်မူသည်။ သီလ၊ သမာဓိ၊ ပညာနှင့်လည်း အထူးပြည့်စုံအောင် ကျင့်ကြံ အားထုတ်သည်။ ထို့ကြောင့် ဆရာတော်ဘုရားကြီး၏ ကိုယ်နံ့သည် ကြာညိုနံ့သင်းလျက်ရှိကြောင်း အနီးကပ် ဖူးတွေ့ရသူများက အခိုင်အမာပြောဆိုကြသည်။

သာမည်တောင် ဆရာတော်ဘုရားကြီး (၉၃-နှစ်တွင် ပျံလွန်တော်မူ) က အသက်သတ်လွတ် ဘုဉ်းပေးရုံသာမက အသက်သတ်လွတ်ခေတ်ကိုလည်း ထူထောင်တော်မူခဲ့သည်။ ဆရာတော်ကြီးသည် သက်တော် ၆၀-မှစ၍ အသက်သတ်လွတ် ဘုဉ်းပေးတော်မူခဲ့သည်။ မိမိကို လာရောက်ဖူးတွေ့ကြသော ရာထောင်မက များပြားလှသည့် ရှင်လူအပေါင်းအား သက်သတ်လွတ် ထမင်းဟင်းများကို နေ့စဉ်နေ့တိုင်း ဒါနပြုခဲ့သည်။ ကမ္ဘာပေါ်တွင် လူရာထောင်ပေါင်းများစွာတို့အား သက်သတ်လွတ် ထမင်းဟင်းများ လှူဒါန်းကျွေးနိုင်သူဟူ၍ ဆရာတော် ဘုရားကြီး တပါးသာ ရှိမည်ထင်သည်။

ဆရာတော်ကြီးသည် ဤသို့ ရဟန်းရှင်လူပေါင်းများစွာကို သက်သတ်လွတ်ထမင်းဟင်းများ ကျွေးမွေးရုံသာမက သာမညတောင်ခြေရွာများရှိ လူပေါင်းများစွာကိုလည်း သက်သတ်လွတ်စားရန် အောင်မြင်စွာ နှိုးဆော်တိုက်တွန်း နိုင်ခဲ့သည်။ ဆရာတော်ကြီးသည် မေတ္တာဘာဝနာ ပွားများရာ၌ ပိုမိုထိရောက်အောင်မြင်ရန် အသက်သတ်လွတ် စားခြင်းဖြစ်ကြောင်း သိရသည်။

တိပိဋကဓရ ယောဆရာတော် (အရှင်သိရိန္ဒာဘိဝံသ) သည်လည်း သက်သတ်လွတ်ကို ဘုဉ်းပေးတော်မူသော ဆရာတော်ကြီးတပါးဖြစ်သည်။ ဆရာတော်သည် ၁၃၃၇-ခုနှစ် သက်တော် ၃၃-နှစ်အရွယ်မှစ၍ ကျန်းမာရေးကို အကြောင်းပြုကာ အသက်သတ်လွတ် ဘုဉ်းပေးတော်မူခဲ့သည်။ ယနေ့ သက်တော် ၆၀-ကျော်အရွယ်တိုင် သက်သတ်လွတ်ကို ဘုဉ်းပေးတော်မူဆဲဖြစ်သည်။
အကိုး။ ။ တိပိဋကဓရ ယောဆရာတော်၊(မင်းယုဝေ)

မင်းစောထက်
(မြတ်မင်္ဂလာ ၂၀၀၉-ခု ဇူလိုင်လ)

No comments: