Friday, August 20, 2010

ဆေးကုတတ်ပါက ကုသိုလ် ၅-မျိုးရ

ယနေ့ ဆေးပညာလောက၌ အနောက်တိုင်းဆေးပညာအတတ်ဖြင့် ဆေးကုသော ဆရာဝန်၊ တိုင်းရင်းဆေးပညာ အတတ်ဖြင့် ဆေးကုသော ဆေးဆရာ-ဟူ၍ အကျဉ်းချုပ်အားဖြင့် နှစ်မျိုးရှိလေသည်။ ထိုဆေးကုသော ဆရာနှစ်မျိုးလုံးပင် စိတ်ထားမြင့်မြတ်စွာ ထားနိုင်ပါက ကုသိုလ် ၅-မျိုး ရနိုင်ပေသည်။ ထိုအကြောင်းကို ကျွန်ုပ်တို့ မြတ်မင်္ဂလာစာစောင်က အားထားသော ပင်တိုင်ဓမ္မဆောင်းပါးရှင် သဒ္ဓမ္မရံသီရိပ်သာ ဆရာတော်ကြီးက ဆေးကုတတ်ပါက ကုသိုလ် ၅-မျုိးရ-ဟူ၍ တရားဆောင်းပါး ရေးသားဖူးသည်။

သဒ္ဓမ္မရံသီရိပ်သာ ဆရာတော်ကြီးသည် အဘိဓဇမဟာရဋ္ဌဂုရု အ၈္ဂမဟာပဏ္ဍိတ၊ အဂ္ဂမဟာကမ္မဋ္ဌာနာစရိယ ဘွဲ့တံဆိပ်တော်များရ ဆရာတော်ကြီးဖြစ်သည်။ သီလ၊ သမာဓိ၊ ပညာ နှင့် အထူးပြည့်စုံသည်။ သက်တော် ၈၈-နှစ်ရှိ၍ မကျန်းမာသော်လည်း မြတ်မင်္ဂလာစာဖတ် ပရိသတ်များအတွက် စေတနာမေတ္တာထား၍ တရားဆောင်းပါးများကို လစဉ်ရေးသားချီးမြှင့်နေဆဲဖြစ်သည်။

ဆေးကုတတ်ပါက ကုသိုလ် ၅-မျိုးရ-ဆောင်းပါးတွင် ဆရာတော်ကြီးက စိတ်ထားမြင့်မြတ်ကြသော ဆေးကုဆရာများမှာ ကုသိုလ် ၅-မျိုး ရရှိနေကြသည်မှာ ထင်ရှားသည်။
စိတ်ထားမြင့်မြတ်ကြသော ဆေးကုဆရာတို့သည် မိမိထံရောက်ရှိလာသော မကျန်းမာသူများကို မြင်ရသောအခါ ကျန်းမာချမ်းသာသွားအောင် ဆေးကုသပေးမည်။ ဆေးကုသပေးမည်ဟု စိတ်တွင် မကြာခဏ ဖြစ်နေတတ်ကြသည်။ ဤသို့ ဖြစ်နေခြင်းသည် မေတ္တာဘာဝနာပွားများနေခြင်း ဖြစ်သည်။ ထို့ကြောင့် မေတ္တာဘာဝနာကိုသုလ်ကို ရရှိ်နေကြပေသည်။

တဖန် စိတ်ထားမြင့်မြတ်ကြသော ဆေးကုဆရာတို့သည် ဝေဒနာခံစားနေကြရသော မကျန်းမာသူများကို မြင်ရသောအခါ ထိုဝေဒနာများ ကင်းပျောက်သွားစေလိုသော သနားကရုဏာများ စိတ်တွင် မကြာခဏ ဖြစ်နေတတ်ကြသည်။ ဤကဲ့သို့ဖြစ်နေခြင်းသည် ကရုဏာဘာဝနာ ပွားများနေခြင်းဖြစ်သည်။ ထို့ကြောင့် ကရုဏာဘာဝနာကုသိုလ်ကိုလည်း ရရှိနေကြပေသည်။

ထို့ပြင် စိတ်ထားမြင့်မြတ်ကြသော ဆေးကုဆရာတို့သည် ရောဂါဝေဒနာ ခံစားနေရသော မကျန်းမာသူများမှာ မိမိဆေးကုသပေးလိုက်သဖြင့် ရောဂါဝေဒနာပျောက်ကင်းချမ်းသာသည်ကို မြင်ရသောအခါ အလွန်ပင် ၀မ်းမြောက်ဝမ်းသာ ဖြစ်ကြရပေသည်။ ဤကဲ့သို့ ၀မ်းမြောက်ဝမ်းသာ ဖြစ်နေခြင်းသည် မုဒိတာဘာဝနာကို ပွားများနေခြင်း ဖြစ်ပေသည်။ ထို့ကြောင့် မုဒိတာဘာဝနာ ကုသိုလ်ကိုလည်း ရရှိနေကြပေသည်။

ထိုမှတပါး အချို့သော မကျန်းမာသူတို့သည် ဆေးကုဆရာများက ညွှန်ကြားသည့်အတိုင်း မလိုက်နာကြပေ။ ဆေးမှန်မှန်မစား၊ ရှောင်ကြဉ်ရမည့် အရာများကို မရှောင်ကြဉ်၊ ချိန်းချက်ထားသော အချိန်များတွင် မလာရောက်၊ ထိုထိုအကြောင်းများကြောင့် ရောဂါဝေဒနာများ မပျောက်ကင်းကြပေ၊ ထိုရောဂါဝေဒနာရှင်များကို ဆေးကုဆရာများ တွေ့မြင်ရသောအခါ ဒေါသ၊ ဒေါမနဿများ ဖြစ်မနေဘဲ မိမိဖြစ်စေချင်သလို မဖြစ်သည်မှာ ဝေဒနာရှင်၏ကံပဲဟု လျစ်လျူရှုလိုက်ရပေသည်။ ဤကဲ့သို့ လျစ်လျူရှုလိုက်ခြင်းသည် ဥပေက္ခာဘာဝနာကို ပွားများခြင်းပင် ဖြစ်သည်။ ထို့ကြောင့် ဥပေက္ခာဘာဝနာကုသိုလ်ကိုလည်း ရရှိနေကြပေသည်။

ထို့ပြင် အချို့သော မကျန်းမာသူတို့သည် ဆေးကုဆရာများက ညွှန်ကြားသည့်အတိုင်း လိုက်နာကြသည်။ ဆေးမှန်မှန်စားကြသည်။ ရှောင်ကြဉ်ဖွယ်များကို ရှောင်ကြဉ်ကြသည်။ ချိန်းချက်ထားသော အချိန်များ၌ ရောက်အောင်လည်းလာကြသည်။ သို့သော် ထိုမကျန်းမာသူတို့၏ ရောဂါဝေဒနာတို့သည် ပျောက်ကင်းခြင်း မရှိကြပေ။ ခံစားနေရလျက်ပင် ရှိသည်။ ထိုအခါမျိုးတွင် စိတ်ထားမြင့်မြတ်သော ဆေးကုဆရာများသည် ထိုရောဂါဝေဒနာရှင်တို့အတွက် စိတ်နှလုံးပူပန်သောက မဖြစ်ကြမူလျက် ဝေဒနာရှင်၏ အတိတ်ကကံ ကြောင့်သာဟု လျစ်လျူရှုကြရပေသည်။ ဤကဲ့သို့ လျစ်လျူရှုလိုက်ခြင်းသည် ဥပေက္ခာဘာဝနာကို ပွားများခြင်းဖြစ်ပေသည်။ ထို့ကြောင့် ဥပေက္ခာဘာဝနာကုသိုလ်ကိုလည်း ရရှိနေကြပေသည်။

ထို့ပြင် အချို့သော မကျန်းမာသူတို့သည် အလွန်ပင် ဆင်းရဲနွမ်းပါးရှာကြသည်။ ဆေးကုဆရာများက ညွှန်ကြားသည့် ဆေးများကိုပင် မ၀ယ်ယူနိုင်ကြရှာ။ စားဖွယ်၊ သောက်ဖွယ်များကလည်း မပြည့်စုံကြ၊ ဤကဲ့သို့ ချို့တဲ့နွမ်းပါးနေကြသော ဝေဒနာရှင်များကို စိတ်ထားမြင့်မြတ်ကြသော ဆေးကုဆရာများက တွေ့သိကြသော အခါ ဆေးဝယ်ဖို့ရန် ငွေကြေးများ ထောက်ပံ့ကြသည်။ သင့်လျော်သော ဆေးဝါးများကို ကိုယ်တိုင်လည်း ၀ယ်ပေးလှူဒါန်းကြသည်။ စားဖွယ်၊ သောက်ဖွယ်များကိုလည်း ပေးကမ်းလှူဒါန်းကြသည်။ ဤကဲ့သို့ လှူဒါန်းခြင်းကြောင့် ဒါနကုသိုလ်ကိုလည်း ရရှိနေကြပေသည်-ဟူ၍ ဆရတော်ကြီးက စူးရှထက်မြက်စွာ ဖွင့်ဆိုရေးသားထားသည်။

အလွန်ပင် တန်ဖိုးရှိလှသည်။ ထို့ကြောင့် ဆေးကုဆရာဝန်ဖြစ်သော ဆရာဝန်များနှင့် တိုင်းရင်ဆေးဆရာများ တို့သည် ကုသိုလ် ၅-မျိုး ရနိုင်ကြရန် စိတ်ထားမြင့်မြတ်စွာ ထားသင့်ကြောင်း ကျွန်ုပ်တို့ နှိုးဆော်တိုက်တွန်း အပ်ပါသည်။ ဆေးကုခြင်းဖြင့် ကုသိုလ် ၅-မျိုး ရကြပါစေ။

No comments: