Friday, August 6, 2010

ကင်ဆာရောဂါနှင့် လက်ဖက်ရည်ကြမ်း

လက်ဖက်ရည်ကြမ်းသည် လူတိုင်းအတွက် ဆေးတလက်ပမာ အစွမ်းထက်သည်ကိုတော့ဖြင့် အားလုံးအသိပင် ဖြစ်သည်။ တရုတ်ပြည်တွင် လက်ဖက်ရည်ကြမ်း ယဉ်ကျေးမှုသည် ကမ္ဘာနှင့်အ၀န်း နာမည်ကျော်ခဲ့သည်။
တရုတ်ပြည် အနောက်တောင်ပိုင်း၊ ယူနန်ပြည်နယ်၊ ၀ီမော်မြို့တွင် လက်ဖက်ရည်ကြမ်း သောက်သုံးမှုပွဲတော်ကို ၂၀၀၃-ခုနှစ် ဧပြီလ ၈-ရက်နေ့တွင် ကျင်းပပြုလုပ်ခဲ့ပြီး ဤပွဲတော်သို့ တရုတ်တနိုင်ငံလုံးမှ အဖွဲ့ ၂၁-ဖွဲ့ ပါဝင် ခဲ့ကြောင်း သိရပါသည်။

လက်ဖက်ရည်ကြမ်းသောက်ပါ၊ အမြဲတမ်း သောက်ကြပါ၊ လက်ဖက်ရည်ကြမ်း အမြဲသောက်သူသည် အစာပြွန်ကင်ဆာတည်းဟူသော ရောဂါဆိုး စွဲကပ်သည့်ဘေးမှ ကင်းဝေးနိုင်ဖွယ် ရှိသည်-ဟု တရုတ်ပြည် ဆေးပညာ အကယ်ဒမီလက်အောက်ရှိ အာဟာရနှင့် ကျန်းမာရေး သုတေသနဌာနမှ ဆေးသိပ္ပံပညာရှင်တစုက ထုတ်ဖော်ပြောဆိုကြသည်။

ကင်ဆာကာကွယ်ရေးအတွက် လက်ဖက်ရဲ့ တန်ဖိုးသစ်ကို ရှာဖွေတွေ့ရှိခဲ့ပါတယ်။ လက်ဖက်မှာပါတဲ့ ပေါ်လီဖီနော-က ဒီလိုအံ့ဖွယ် အစွမ်းထက်တယ်ဆိုတာ ကျွန်တော်တို့ရဲ့ ၃-နှစ်ကြာ သုတေသနလုပ်ငန်းက လက်တွေ့ပြသခဲ့ပါပြီ-ဟု အဆိုပါ သုတေသနမှူး ပါမောက္ခ ၀မ်ဝိုင်ကြိုက ပြောကြားခဲ့ပါသည်။

ကင်ဆာရောဂါ ဖြစ်စေသည့်ပစ္စည်းမှာ နိုက်ထရိုဆိုဒြပ်ပေါင်း ဖြစ်ကြောင်း၊ ယေဘုယျအားဖြင့် အသိအမှတ်ပြုထားကြသည်။ လက်ဖက်တွင် ယင်းသို့သော သေမင်းတမန် ဒြပ်ပေါင်းမျိုး ဖြစ်ပေါ်မှုကို ဟန့်တားနိုင်စွမ်း ရှိ-မရှိ စမ်းသပ်သိရှိနိုင်ရန် ၁၉၈၆-ခုနှစ်တွင် သုတေသီတို့သည် လက်ဖက် ၁၇-မျိုးကို ဦးစွာအားဖြင့် လေ့လာခဲ့ကြသည်။

နိုက်ထရိုဆို ဒြပ်ပေါင်း ပေါင်းစပ်ဖြစ်ပေါ်မှုကို ဟန့်တားရာတွင် လက်ဖက်ခြောက်သည် အာနိသင် အထက်မြက်ဆုံးဟု သုတေသီများ တွေ့ရှိခဲ့ကြသည်။ လက်ဖက်အရွက်များတွင် အယ်လကာလွိုက်ကက်ဖီဒင်း၊ တန်နင်း၊ အငွေ့ပြန်လွယ်ဆီ စသည်တို့ပါဝင်၍ ရေနွေးဆူဆူလောင်းပြီး ဖျော်လိုက်သောအခါ အပျော့စား နှိုးဆွဆေးနှင့် အားဆေးဂုဏ်သတ္တိများ ရှိလာကြောင်း တွေ့ရှိခဲ့ကြသည်။

၁၉၈၈-ခုနှစ်တွင် တရုတ်ပြည်ရှိ အဓိကလက်ဖက်ထွက်ရာ ဒေသများဖြစ်သော ကျဲ့ကျန်းပြည်နယ်၊ အန်းဟွေးပြည်နယ်၊ ဖူကျန်ပြည်နယ်နှင့် ကျန်းရှီးပြည်နယ်တို့မှ စုဆောင်းရရှိခဲ့သော လက်ဖက် ၁၄၅-မျိုးကို သူတို့ စမ်းသပ်တွေ့ရှိခဲ့ကြသည်။

ကင်ဆာဖြစ်စေနိုင်တဲ့ ဒြပ်ပေါင်းတွေ ဖြစ်ပေါ်ဖို့ ဟန့်တားတဲ့ လက်ဖက်ရဲ့ လုပ်ဆောင်နိုင်စွမ်းဟာ အချောကိုင်ထုတ်လုပ်ပုံနှင့်ရော၊ လက်ဖက်ခြောက် သိုလှောင်ထားရှိတဲ့ ကာလပိုင်းနှင့်ပါ အများကြီး ဆက်နွယ်နေကြောင်းလည်း ကျွန်တော်တို့ တွေ့ရှိကြရပါတယ်-ဟု သုတေသနမှူး ၀မ်ဝိုင်ကြိုကပင် ပြောခဲ့သည်ဟု ဆိုပါသည်။

ဥပမာ-သံဘူးထဲတွင် တနှစ်သိမ်းထားသော လက်ဖက်ခြောက်သည် ဟန့်တားနှုန်း ၁၀-ရာနှုန်း ကျဆင်းသွားနိုင်သလို လက်ဖက်ရည်ကြမ်းကို ဖျော်ပြီးနောက် မသောက်ဘဲ အချိန်တွေအကြာကြီး ထားလေလေ ယင်း၏ နိုက်ထရိုဆိုဒြပ်ပေါင်း ဖြစ်ပေါ်မှုနှုန်း ဟန့်တားနိုင်သည့် အာနိသင်လည်း နည်းပါးလေလေ ဖြစ်သည်ဟု ဆိုပါသည်။

ဆက်လက်ပြီး တရုတ်ဆေးပညာသုတေသီများသည် လက်ဖက်၏ လူ့ခန္ဓာကိုယ်တွင်း နိုက်ထရိုဆို ဒြပ်ပြုမှုအစဉ်ကို ဟန့်တားနိုင်စွမ်း ရှိ-မရှိ ဂဃနဏ သိရှိနိုင်ရေးအတွက် ဆေးလိပ်မသောက်သော အရွယ်ရောက်ပြီး လူငယ်ယောက်ျားလေးများကိုလည်း စမ်းသပ်ခဲ့ကြသည်။ သူတို့ကို အုပ်စု ၂-စုခွဲပြီး စမ်းသပ်၏။ တအုပ်စုက နံနက်စာ မစားခင် လက်ဖက်ရည်ကြမ်း သောက်၏။ ကျန်အုပ်စုတစုက စားပြီးမှသောက်သည်။ ပြီးနောက် သူတို့၏ ဆီးကို ဓာတ်ခွဲစမ်းသပ်ကြည့်ရာ အုပ်စု ၂-စုလုံးပင် နိုက်ထရိုဆို ပရိုလင်းထွက်ရှိမှု ထူးထူးခြားခြား ကျဆင်းလျော့နည်းကြောင်း တွေ့ရလေသည်။

နောက်တမျိုး စမ်းသပ်မှုက တိရစ္ဆာန်များကို စမ်းသပ်မှုဖြစ်သည်။ ကြွက်အကောင်ရေ ၂၈၀-ကို အုပ်စုခွဲပြီး စမ်းသပ်သည်။ အုပ်စုတစုကို ရိုးရိုးရေဖြစ်သော ဘုံဘိုင်ရေ တိုက်စေပြီး ကျန်တအုပ်စုကိုတော့ လက်ဖက်ရည်ကြမ်း သောက်စေသည်။ ရက်သတ္တ ၁၂-ပတ်ကြာပြီးနောက် ဘုံဘိုင်ရေ သောက်သောကြွက်များ ၉၅% -မှာ အစာပြွန် ကင်ဆာရောဂါ ဖြစ်လာသည်ကို တွေ့ရသည်။ ကျန်လက်ဖက်ရည်ကြမ်း သောက်သော ကြွက်အုပ်စုများမှာ ရောဂါဖြစ်ပွားမှု မရှိကြောင်း စမ်းသပ်တွေ့ရှိရသည်ဟု သိရပါသည်။

အစာလည်းဆေး၊ ဆေးလည်း အစာ-ဆိုသလို လက်ဖက်ရည်ကြမ်းတခွက်ကတော့ ကင်ဆာရောဂါအတွက် ငွေကုန်ကြေးကျနည်းပြီး လူများကို သက်သက်သာသာ တန်ဖိုးမဖြတ်နိုင်သည့် ဆေးရတနာအဖြစ် အကျိုးပြုနေပါတော့သည်။
အကိုး။ ။ ယနေ့ တရုတ်ပြည်စာစောင် ၁၉၉၀-စက်တင်ဘာလ။

စွဲ့ကြူကြူအေး
(မြတ်မင်္ဂလာ ၂၀၀၉-ခု ဇူလိုင်လ)

No comments: