Tuesday, August 3, 2010

ကျောင်းကန်ပစ္စည်း သုံးစွဲသူ၏ ကံ

ကျွန်ုပ်သီတင်းသုံး၍ သာသနာပြုရာ ရခိုင်ပြည်နယ် သံတွဲမြို့၏ . . . . ကျေးရွာအုပ်စု . . . . ရွာတွင် ယနေ့တိုင် သီလ၊ သမာဓိသိက္ခာ အကျင့်စရဏနှင့် ပြည့်စုံသော သက်တော်ရှည် ဆရာတော်ကြီးတပါး သီတင်းသုံးလျက် ရှိသည်။ ဆရာတော်ကြီးမှာ သက်တော် ၀ါတော် ရလာသည်နှင့်အမျှ နေ့ညမပြတ်လည်း တရားဘာဝနာရှုမှတ်နေ သောကြောင့် ပြင်ပလူပုဂ္ဂိုလ်များနှင့် အကြောင်းကိစ္စရှိသည်မှလွဲ၍ တွေ့ဆုံခြင်းမပြုချေ။ ပလိဗောဓနည်းပါးစေရန် ကျောင်းတွင် ကိုရင် ဦးပဉ္ဇင်းများပင် မထားရှိဘဲ ကပ္ပိယဒကာတယောက်သာ အနီးကပ်ဝေယျာဝစ္စ ဆောင်ရွက် နိုင်ရန် ထားရှိလေသည်။

ဆရာတော်ကြီးကျောင်းသို့ နေ့စဉ် ရွာသူ ရွာသားများက ဆွမ်းရှစ်ပွဲ အလှည့်ကျပို့ဆောင်ကြရသည်။ သို့သော် ဆရာတော်ကြီူးတပါးအနေဖြင့် ဆွမ်းရှစ်ပွဲကို ကပ္ပိယဒကာတယောက်နှင့် ဘယ်လိုပင် ဘုဉ်းပေးစားသောက် သော်လည်း မကုန်ပေ။ ထို့ကြောင့် ကျန်ရှိသော ဆွမ်းဘောဇဉ်အားလုံးကို ကျောင်းနောက်ဘက်တွင် ကျင်းကြီးတူးစေပြီး ထိုတွင်းထဲသို့ စွန့်ပစ်စေသည်။

စွန့်ပစ်ခိုင်းသော ဆွမ်းဘောဇဉ်များထဲမှ ကပ္ပိယဒကာကြီးသည် ကောင်းမွန်သော စားသောက်စရာများကို ဆရာတော်ကြီး မသိစေရအောင် အိမ်သို့တိတ်တဆိတ် နေ့စဉ်ပေးပို့သည်။ နောက် မကြာမီပင် ထိုကပ္ပိယဒကာကြီးသည် လူကြီးရောဂါဖြင့် သေဆုံးသွားသည်။ သေဆုံးပြီး ထိုဘုန်းတော်ကြီးကျောင်း၌ပင် သူယောင်အဖြစ် နေထိုင်ခြောက်လှန့်လျက်ရှိသည်။

ကျောင်းဆောင်ကြီးမှာ နှစ်ထပ်ကျောင်းဆောင် ဖြစ်သည်။ အပေါ်ထပ်တွင် ဆရာတော်ကြီး သီးသန့် တရားရှုမှတ်သည်။ ညဘက်၌ ဆရာတော်ဘုရားကြီး တရားဘာဝနာ ရှုမှတ်နေစဉ် ကျောင်းဆောင်ကြီး၏ မျက်နှာကြက်ပေါ်မှ အောက်ကြမ်းခင်းသို့ တဗုန်းဗုန်း၊ တဒိုင်းဒိုင်းဖြင့် တက်လိုက်၊ ဆင်းလိုက် ဆူညံစွာ ပြုလုပ်လေ့ရှိသည်။

ဆရာတော်ကြီးက ထိုသူယောင်အား ခေါ်ယူမေးမြန်းပြောဆိုသည့်အခါ ယခင်က သူသည် ဆရာတော်ကြီးထံ ဝေယျာဝစ္စအ၀၀ကို ရိုကျိုးစွာ လုပ်ကိုင်ခဲ့သော ကပ္ပိယဒကာကြီး ဖြစ်ကြောင်း လျှောက်ထားလေသည်။
ထိုအခါ ဆရာတော်ကြီးက ဘာအတွက်ကြောင့် သူယောင်တစ္ဆေဘ၀ ရောက်နေရသလဲ-ဟု မေးမြန်းသောအခါ သူယောင်တစ္ဆေက မှန်လှပါဆရာတော်ကြီးဘုရား၊ တပည့်တော်သည် ဆရာတော်ကြီးထံ ကပ္ပိယဒကာအဖြစ် နေစဉ်ကာလ ဆရာတော်ကြီး စွန့်ပစ်ခိုင်းသော ဆွမ်းဘောဇဉ်ကို သွားရောက်စွန့်ပစ်ရာတွင် ကောင်းမွန်သော ဆွမ်း၊ ဆွမ်းဟင်းများကို သားမယား စားသောက်ရန် အိမ်သို့ သွားရောက်ပို့ဆောင်ခဲ့ပါသည်။ သွားရောက်ပို့ဆောင်ရာတွင်လည်း ဆွမ်း၊ ဆွမ်းဟင်းများကို သံဃိကပိုင် အိုးခွက်များဖြင့် ထည့်ယူသွားပြီး ထိုအိုးခွက်များကိုလည်း အိမ်မှာ မေ့ကျန်ရစ်ပါသည်။ ထိုအပြစ်တွေကြောင့် သူယောင်တစ္ဆေဘ၀ ရောက်နေရပါ သည်ဘုရား။ ဆရာတော်ကြီး ကယ်ချွတ်မှ ကျွတ်နိုင်မှာပါ။ တပည့်တော် အမိုက်အမဲကို ကယ်ချွတ်ပေးတော်မူပါ ဘုရား-ဟု လျှောက်ထားပြောဆိုလေသည်။

ထိုအခါ ဆရာတော်ကြီးသည် အိမ်တွင်ကျန်ရစ်သော အိုးခွက်ပန်ကန်အရေအတွက် အမျိုးအစားများကို မေးမြန်းပြီး ကျန်ရစ်သူမိသားစုကို ခေါ်၍ ကျောင်းပိုင်ပစ္စည်းအားလုံး ကျောင်းသို့ ပြန်လည်ပို့ဆောင်စေသည်။ ထို့နောက် မေတ္တာပို့ အမျှပေးဝေရာ ကပ္ပိယကြီး သူယောင်တစ္ဆေဘ၀မှ လွတ်မြောက်သွားခဲ့လေသည်။

သဒ္ဓါကျောက်ဆရာတော် (သံတွဲမြို့)
(မြတ်မင်္ဂလာ ၂၀၀၉-ခု ဇွန်လ)

No comments: