Tuesday, August 3, 2010

လက်တွေ့သရဏဂုံ အကျိုး

၂၀၀၂-ခုနှစ် အောက်တိုဘာလ (မကွေး-မင်းဘူး တံတားမဖွင့်မီ တလခန့်အလိုက) ဖြစ်ပါသည်။ ရုံးကိစ္စဖြင့် မိမိတာဝန်ကျရာမြို့မှ မင်းဘူးသို့ ဆိုင်ကယ်ဖြင့်၎င်း၊ မင်းဘူးမှ မကွေးသို့ ဧရာဝတီမြစ်ကို စက်လှေဖြင့်ကူး၍၄င်း၊ သွားပြီး မကွေးတိုင်းရုံးသို့ ရောက်ခဲ့ပါသည်။ အပြန်ခရီးတွင်လည်း ထိုနည်းအတိုင်း ပြန်လာခဲ့ရာ တာဝန်ကျရာ မြို့သို့ ညနေ ၆-နာရီခန့်တွင် ပြန်ရောက်ပါသည်။

ရောက်လျှင်ရောက်ချင်း မြို့အ၀င်ရှိ စုပေါင်းရုံးသို့ ၀င်ရောက်ပြီး မြို့နယ်အေးချမ်းသာယာရေးနှင့် ဖွံ့ဖြိုးရေးကောင်စီ ဥက္ကဋ္ဌထံသို့ သတင်းပို့ပါသည်။ ထိုအခါ ဥက္ကဋ္ဌက ဆက်သွယ်ရေးတာဝန်ကျသူ မောင်စိုးခိုင်မင်းကိုခေါ်ပြီး ဌာနမှူးကြီး ခရီးပန်းလာတယ်။ မင်းသူ့ကို အိမ်အရောက်ပို့လိုက်-ဟု တာဝန်ပေးပါသည်။

မိမိသည် သူ့ကို ဆိုင်ကယ်မောင်းနှင်းစေပြီး နောက်မှထိုင်၍ လိုက်ခဲ့သည်။ ထုံးစံအတိုင်းပင် မိမိသည် ဆိုင်ကယ်ကိုမောင်းသည်ဖြစ်စေ၊ နောက်မှစီးသည်ဖြစ်စေ သရဏဂုံသုံးပါးကို ရွတ်ဆို၍ အမြဲလိုက်ပါလေ့ရှိသည်။ မြို့မဈေးအလွန်တွင် မိမိ၏မျက်စိထဲ၌ ရုတ်တရက် မှောင်ကျသွားသည်ကိုသာ သိလိုက်သည်။ ဘာဖြစ်သွားမှန်းမသိပါ။ သတိရ၍ ချက်ချင်း မျက်စိကို အတင်းဖွင့်ကြည့်လိုက်သောအခါ ဆိုင်ကယ်မှောက် နေသည်ကို တွေ့ရသည်။ မိမိသည်လည်း ရှေ့းကမောင်းသော စိုးခိုင်မင်း၏ ရှေ့သို့ ၅-ပေခန့်ကျော်ပြီး ရောက်နေသည်။

ထိုအချိန်တွင် ရင်သပ်ရှုမော တွေ့မြင်လိုက်ကြရသော လူများက အနီးသို့ ရောက်လာပြီး ဘာဖြစ်သွားသေးသလဲ-ဟုမေးကာ ဒဏ်ရာရ-မရ ရှာဖွေကြသည်။ ကျွန်ုပ်တွင် ပွန်းပဲ့ရုံမှတပါး အခြား ဘာဒဏ်ရာမှ မရရှိပေ။ ဆိုင်ကယ်မောင်းသူမှာ ဒူးနှင့် တံတောင်ဆစ် အနည်းငယ်ပွန်းပဲ့သွားသည်။ ဟယ် လွင့်ထွက်သွားတဲ့ ဌာနမှူးက ဘာမှမဖြစ်လို့ တော်သေးတာပေါ့-ဟု ပြောနေသော အသံတချို့ကိုလည်း ကြားလိုက်ရသည်။ သာမန်အားဖြင့်ဆိုလျှင် ခေါင်းကွဲ (သို့) ခြေလက်တခုခု ကျိုးနိုင်ဖွယ်ရာ ရှိသည်။ သို့သော် ယခု ဘာမျှမဖြစ်ပေ။ မိမိသည် ဆိုင်ကယ်မမှောက်မီ စက္ကန့်ပိုင်းအတွင်းတွင် သတိမေ့သကဲ့သို့ ဖြစ်သွားပြီး မျက်လုံးဖွင့်ကြည့် လိုက်သောအခါ လူတယောက်ယောက်က ပွေ့ချီလိုက်သလို ခံစားရသည်။

ဤသည်မှာ မိမိ၏ တတိယအကြိမ်မြောက် လက်တွေ့ သရဏဂုံအကျိုးပင် ဖြစ်သည်ဟု ယုံကြည်ယူဆမိပါသည်။

နော်လီကို (မကွေး)
( မြတ်မင်္ဂလာ ၂၀၀၉-ခု ဇွန်လ)

No comments: