Monday, August 23, 2010

ရယ်ရွှင်ခြင်းရောက် ရောဂါပျောက်

သမားတော်ကြီး ဇီဝကကဲ့သို့ တရုတ်ပြည်၏ သုံးနိုင်ငံခေတ် (သက္ကရာဇ် AD 220-280) ကာလတွင် ဆေးစွမ်းထက်သော သမားတော်ကြီး ၀ှထို-ဆိုသူ ပေါ်ပေါက်ခဲ့ဖူးသည်။ သူသည် အရပ်တကာ နယ်လှည့် ဆေးကုသွားရာ ရွာကလေးတရွာ အရောက်တွင် မျက်လုံးများ နီရဲရောင်ကိုင်းပြီး ၀ိုးတ၀ါးသာ မြင်ရတော့သည့် ညီအမနှစ်ဖော်ကို တွေ့သည်။ အကြောင်းရင်းကို မေးမြန်းစုံစမ်းရာ မိခင်ဆုံးပါး၍ သောကမီးလောင်မြိုက်၍ နေ့အောက်မေ့ ညငိုနှင့် ဤကဲ့သို့ မျက်လုံးအစုံ ပြင်းထန်စွာ ထိခိုက်ရခြင်းဖြစ်ကြောင်း သိရသည်။

သမားတော်ကြီး ၀ှထိုသည် ညီအမနှစ်ယောက်အား ကုသရန် နည်းလမ်းကို ဤသို့ပေးခဲ့သည်။

နေ့စဉ်နေ့တိုင်း နှစ်ယောက်အတူ တယောက်ကိုတယောက် အပြန်အလှန် ခြေဖ၀ါးကို ၄၉-ကြိမ်တိတိ ဆွဲကုတ်ရမည်။ (ယားအောင်လုပ်ရမည်)။ တချက်မျှ အပိုအလို မရှိစေရ။ ဤသို့ပြုလုပ်ခြင်းဖြင့် လ၀က်ခန့်တွင် မျက်စိများ ပြန်ကောင်းလာလိမ့်မည်-ဟူ၍ ဖြစ်သည်။

ဤညီအမနှစ်ဖော်သည် သမားတော်ကြီး ညွှန်ကြားသည့်အတိုင်း တသဝေမတိမ်း လိုက်နာဆောင်ရွက်ကြသည်။ သို့သော် တယောက်ခြေဖ၀ါးကို တယောက် ဆွဲကုတ်သောအခါ အောင့်မထားနိုင်ဘဲ အပြန်အလှန် ရယ်ကြရသည်။ သို့နှင့် လ၀က်မကြာမီ မျက်လုံးများ ပြန်လည်ကောင်းမွန်လာလေတော့သည်။

ယခုခေတ် လူတို့သည် ကိုယ်စိတ်နှစ်ဖြာ ရောဂါမျိုးစုံ ဖြစ်တတ်သည်မှာ အပြိုင်အဆိုင်များခြင်း၊
စိတ်ဖိစီးမှု ကြီးမားခြင်း၊ သာမန်ကိစ္စများကို ပေါ့ပေါ့ပါးပါး မတွေး မမြင်နိုင်ခြင်း စသော အကြောင်းရင်းလည်း ပါမည်။ ရယ်ရွှင်ခြင်းဖြင့် အရာခပ်သိမ်းကို ရှုမြင်သုံးသပ်နိုင်လျှင် အပြုံးဖြင့် သဘောထားကြီးစွာ ခွင့်လွှတ်နိုင်လျှင် ထိုထက်ပို၍ မကြာခဏ ရင်ဖွင့်ပြီး ရယ်မောပေးနိုင်လျှင် အသက်ရှည်ခြင်း၏ သော့ချက်ပင် မဟုတ်ပါလော။

ပါမောက္ခ ဒေါ်ခင်ဖြူ (မြင်းခြံ)
(မြတ်မင်္ဂလာ ၂၀၀၉-ခု စက်တင်ဘာလ)

No comments: