Thursday, August 5, 2010

ကျေးဇူးဆပ်သည့် နွားမကြီး

စာရေးသူ၏ဖခင်မှာ သစ်တောဦးစီးဌာနမှ ၀န်ထမ်းတဦးဖြစ်၍ အမြို့မြို့အနယ်နယ်သို့ ပြောင်းရွှေ့အမှုထမ်းရ ပါသည်။ ဖခင်နှင့်အတူ မိသားစုသည် ဖခင်ပြောင်းရွှေရာမြို့သို့ လိုက်ပါနေထိုင်ရပါသည်။ ယင်းသို့ နေထိုင်ရစဉ် လွန်ခဲ့သော နှစ်ပေါင်း ခြောက်ဆယ်ကျော်လောက်က စာရေးသူ၏ဖခင်သည် ကရင်ပြည်နယ် ဖားအံမြို့တွင် တာဝန်ထမ်းဆောင်စဉ်အချိန်က စာရေးသူကိုယ်တိုင် တွေ့ကြုံခဲ့ရသော ဖြစ်ရပ်မှန်တခုကို တင်ပြချင်ပါသည်။

စာရေးသူတို့ မိသားစုသည် အစိုးရပိုင် နှစ်ထပ်အဆောက်အဦးတွင် နေထိုင်ရပါသည်။ အောက်ထပ်တွင် ဖခင်၏ရုံးခန်းဖြစ်ပြီး အပေါ်ထပ်တွင် မိသားစုနေထိုင်ပါသည်။
တနေ့သောနံနက်ပိုင်းတွင် စာရေးသူ၏ဖခင်သည် ဘုရားဝတ်ပြုပြီး၍ ရုံးခန်းရှေ့တွင် မတ်တတ်ရပ်နေစဉ် ကုလားလူမျိုးနှစ်ယောက်သည် လည်ပင်းတွင် ကြိုးချည်ထားသော နွားမကြီးတကောင်ကို ကုလားတယောက်က ဆွဲခေါ်ပြီး ကျန်ကုလားတယောက်က နွားမကြီး၏ တင်ပါးကို ကြိမ်လုံးဖြင့်ရိုက်၍လာနေကြသည်။ နွားမကြီးကလည်း သူတို့ခေါ်ရာသို့ မလိုက်ချင်ဘဲ အတင်းရုန်းကန်ပြီး မျက်နှာမသာမယာဖြင့် ဆုတ်ကန်၊ ဆုတ်ကန် လုပ်နေသည်။

သည်မြင်ကွင်းကို တွေ့မြင်ရသော စာရေးသူ၏ဖခင်သည် သူ၏တပည့်ကိုခေါ်၍ လမ်းမမှာ လူနှစ်ယောက်နှင့် နွားတကောင် ဘာဖြစ်နေတာလဲ သွားမေးပါ။ မေးပြီးလျှင် ဆရာ့ကို အကျိုးအကြောင်း အမြန်လာပြောပါ-ဟုဆိုပြီး ခိုင်းလိုက်ပါသည်။
ဖခင်၏တပည့်သည် ထိုကုလားနှစ်ယောက်နှင့်အတူ နွားမကြီးကိုပါ ဖခင်ထံ ခေါ်လာခဲ့ပါသည်။ သည်အခါမှာ နွားမကြီးသည် ရုန်းကန်ခြင်းမရှိဘဲ ခြေသွက်သွက်ဖြင့် ဆွဲခေါ်ရာသို့ လိုက်လာခဲ့ပါသည်။

နွားမကြီးသည် လူကဲ့သို့ စကားမပြောတတ်သော်လည်း စိတ်ထဲမှာတော့ ငါသေဘေးက လွတ်တော့မယ်။ ငါ့ကို ကယ်မဲ့သူပေါ်လာပြီ-ဆိုပြီး ၀မ်းသာအားရနှင့် မျက်နှာမညှိုးနွမ်းတော့ဘဲ ပြုံးရွှင်နေသောပုံသဏ္ဍာန် ပေါ်လွင် နေပါသည်။
စာရေးသူ၏ဖခင်က ထိုကုလားလူမျိုးနှစ်ယောက်ကို မင်းတို့ ဒီနွားမကြီးကို ဘယ်ကို ခေါ်သွားမလို့လဲ-ဟု မေးသည့်အခါ အသားပေါ်ရောင်းတဲ့ဆီကို သွားရောင်းမလို့ပါ။ ဒီနွားမကြီးဟာ သားလည်းမမွေးဘူး။ ဒီတော့ နွားနို့လည်း မရဘူး။ အသက်လည်း ကြီးနေပြီ။ သူ့ကိုအစာကျွေးရတာ ကြာလှပြီ။ ပိုက်ဆံကုန်တယ်။ ဘာမှလည်း ခိုင်းလို့မရဘူး။ ဒါကြောင့် ရောင်းလိုက်တော့မယ်-ဟု ပြန်ပြောပါသည်။

စာရေးသူ၏ဖခင်က ဘယ်လောက်နဲ့ ရောင်းမလဲ-မေးတော့ နှစ်ဆယ့်ငါးကျပ်နဲ့ ရောင်မယ်-ဟု ပြောပါသည်။ ဖခင်က ငါဝယ်မယ်၊ ငါ့ကိုပဲရောင်းပါ-ဟုဆိုပြီး ၀ယ်ယူလိုက်ပါသည်။ စာရေးသူ၏ဖခင်သည် နွားမကြီး၏ အသက်ကို ကယ်လိုက်ခြင်းဖြစ်ပါသည်။

စာရေးသူတို့နေထိုင်ရာရပ်ကွက်နှင့် မနီးမဝေးတွင် နွားများကို အငှါးထိန်းကျောင်းသော နွားကျောင်းသားထံတွင် အခကြေးငွေပေး၍ ထိုနွားမကြီးကို ထိန်းကျောင်းစေခဲ့ပါသည်။ လများကြာသည့်အခါ ထိုနွားမကြီးသည် နွားသားလေးတကောင်ကို မွေးဖွားခဲ့ပါသည်။
အဆိုပါ နွားမကြီးသည် သူ့အသက်ကို ကယ်လိုက်သော ကျေးဇူးရှင်အား နွားကလေးတကောင်နှင့် နွားနို့များကို ပေးဆပ်ခြင်း ဖြစ်ပါသည်။

သဲမြာအေး (ပုသိမ်)
(မြတ်မင်္ဂလာ ၂၀၀၉-ခု ဇူလိုင်လ)

No comments: