Monday, August 23, 2010

မှန်ကန်သောသစ္စာ၏ အကျိုးထူး

ကျွန်မသည် ရန်ကုန်မြို့ရှိ ရုံးတရုံးမှ ၀န်ထမ်းတဦး ဖြစ်ပါသည်။ အစိုးရ၀န်ထမ်းဖြစ်သောကြောင့် တာဝန်အရ နယ်များတွင် သွား၍ တာဝန်ထမ်းဆောင်ရပါသည်။ ယခင်နှစ်များက နယ်များတွင် သွားရောက်နေထိုင်၍ တာဝန်ထမ်းဆောင်ခဲ့ရပါသည်။ ယခုနှစ်တွင်မူ နယ်သွား၍ တာဝန်ထမ်းဆောင်ရန် အခက်အခဲရှိနေသည်။ အဘယ့်ကြောင့်ဆိုသော် မိဘနှစ်ပါးမှာ အသက်အရွယ်အားဖြင့် ၇၅-နှစ်ကျော်ရှိနေပြီး ကျန်းမာရေးလည်း ချို့တဲ့လျက်ရှိပါသည်။ ကျွန်မတို့အိမ်တွင် လူပိုမရှိပါ။ ညီမဖြစ်သူကလည်း အစိုးရ၀န်ထမ်း ဖြစ်သောကြောင့် တရပ်တကျေးတွင် တာဝန်ထမ်းဆောင်နေရပါသည်။ မိဘနှစ်ပါးမှာ ကျွန်မတို့နှင့် လိုက်နေရန်လည်း မဖြစ်နိုင်၊ ရန်ကုန်တွင် ထားခဲ့ရအောင်လည်း ကြည့်ရှုစောင့်ရှောက်ပေးမည့်သူ မရှိသောကြောင့် နယ်တွင် တာဝန် ထမ်းဆောင်ရန် အခက်တွေ့နေပါသည်။

ထိုစဉ် ကျွန်မတို့ဌာနမှ အမကြီးတဦးက ညီမလေး နယ်သွားဖို့ နှစ်ပတ်တောင် လိုသေးတာပဲ။ ဘုရားမှာ အဓိဋ္ဌာန်ပြုပြီး သစ္စာဆိုကြည့်ပါလား။ ညီမပြုလုပ်ခဲ့တဲ့ ကုသိုလ်ကောင်းမှုတခုခုအပေါ် သစ္စာဆိုပြီး ဆုတောင်းကြည့်ပါ။ သစ္စာမှန်ကန်ရင် အကျိုးထူးပါလိမ့်မယ်။

ထိုအမ၏ အားပေးတိုက်တွန်းမှုကြောင့် ကျွန်မသည် ညအချိန်တွင် မြတ်စွာဘုရားကို ပန်း၊ ရေချမ်း၊ ဆီမီးများ ကပ်လှူပူဇော်ပြီး ဤသို့ သစ္စာဆိုခဲ့မိပါသည်။ သစ္စာစကားမှာ-
အရှင်ဘုရား၊ တပည့်တော်မသည် ၀န်ထမ်းအလုပ် လုပ်ကိုင်သည်မှစ၍ တပည့်တော်မ၏ လုပ်အားခလစာငွေဖြင့် မိဘနှစ်ပါးကို တတ်နိုင်သမျှ ကျွေးမွေးစောင့်ရှောက်ခဲ့ပါသည်။ ယခုအခါ မိဘနှစ်ပါးမှာ အသက်အရွယ်လည်း ကြီး၍ ကျန်းမာရေးလည်း ချို့တဲ့နေကြပါသည်။ ထို့ကြောင့် မိဘနှစ်ပါးအား အနီးကပ် ပြုစုလုပ်ကျွေးလိုပါသည်။ ဤမှန်ကန်သော သစ္စာစကားကြောင့် မိဘနှစ်ပါးနှင့် မခွဲခွါရဘဲ ကောင်းစွာလုပ်ကျွေးပြုစုရလိုပါ၏-ဟူ၍ ဖြစ်ပါသည်။

မြတ်စွာဘုရားထံ အဓိဋ္ဌာန်ပြုပြီးနောက် မိဘနှစ်ပါးကိုလည်း ညအိပ်ရာဝင်ရာ၌ ရှိခိုးကန်တော့ပါသည်။ မိဘနှစ်ပါးကလည်း မှန်ကန်သောသစ္စာ၏ အကျိုးထူးကိုခံစားရပါစေ-ဟု ဆုတောင်းပေးပါသည်။

ကျွန်မ နယ်သို့သွားရမည့်ရက်ကလည်း တဖြည်းဖြည်း နီးကပ်လာသောကြောင့် လိုအပ်သည့်ပစ္စည်းပစ္စယ များကိုပင် ပြင်ဆင်နေပြီးဖြစ်နေသည်။ အိမ်နီးချင်းအမကြီးကိုလည်း ကျွန်မ တပတ်တခါ ပြန်လာပါမည်။ ဒီကြားထဲ လိုအပ်တာများရှိရင် ကူညီပါဟု အကူအညီတောင်းခံမိပါသည်။

ထို့နောက် မိဘများ စားသောက်ရန် တပတ်စာကြော်လှော်ချက်ပြုတ်ပေးခြင်း၊ ဆေးဝါးများ ၀ယ်ထားပေးခြင်း တို့ကိုလည်း ပြုလုပ်ပြီးဖြစ်သည်။ ရပ်ကွက်ထဲရှိ ဆရာဝန်မကိုလည်း နှစ်ရက်တခါ အဖေ အမေတို့ထံကြွရောက်ပြီး ကျန်းမာရေးအတွက် စောင့်ရှောက်ပေးပါရန် အကူအညီ တောင်းခံခဲ့ပါသည်။

ကျွန်မ နယ်သို့သွားရောက်ရမည့်ရက်ကလည်း တဖြည်းဖြည်း နီးကပ်လာပြီ။ စိတ်ထဲတွင် မိမိ၏ သစ္စာစကား မှန်ကန်သော်လည်း ကံနိမ့်နေသောကြောင့် အကျိုးမပေးတာလား၊ လိုချင်စိတ်အားကြီးသောကြောင့် အလိုမပြည့်တာလား-ဟု ထင်မြင်နေမိသည်။ သို့သော်လည်း သဗ္ဗညုတမြတ်စွာဘုရားရှင်ကိုတော့ လေးနက်စွာကြည်ညိုသည်။ ယုံကြည်သည်။ ထို့ကြောင့် တနေ့နေ့တော့ ခံစားရမှာပါ-ဟု မိမိကိုယ်ကို အားပေးမိသည်။

ထို့နောက် မနက်ပိုင်းတွင် ဘုရားကို ရေသက်စေ့ကပ်လှူပြီး ရုံးသို့ထွက်လာခဲ့ပါသည်။ ရုံးရောက်၍ အလုပ်များ လုပ်ကိုင်နေစဉ် ကျွန်မထံ ဖုန်းဝင်လာပါသည်။ ဖုန်းပြောသောအခါ ကျွန်မတို့အထက်အရာရှိက ယခု လောလောဆယ် နယ်သို့မသွားသေးဘဲ ရန်ကုန်တွင်သာ တာဝန်ထမ်းဆောင်ရန် ပြောကြားပါသည်။

ဤတွင် ကျွန်မမှာ အံ့သြလွန်း၍ စကားပင် ပြန်မပြောနိုင်ပါ။ သစ္စာ၏အကျိုးထူးကို လျင်မြန်စွာ ခံစားလိုက်ရသောကြောင့် ဘုရားရှင်ကို လက်အုပ်ချီမိုး ရှိခိုးကန်တော့လိုက်ပါသည်။ ဤကဲ့သို့ သစ္စာ၏အကျိုးကိုခံစားရသည်မှာ မိဘနှစ်ပါးကို ကြင်နာယုယစွာ လုပ်ကျွေးပြုစုသောကြောင့်ဟု ယုံကြည်ယူဆမိပါသည်။

ဝမ်းဝမ်း
(မြတ်မင်္ဂလာ ၂၀၀၉-ခု စက်တင်ဘာလ)

No comments: