Friday, September 17, 2010

လက်ဖက်ရည်အဖန် သောက်ကြသူများ

အိန္ဒိယနိုင်ငံသည် ကမ္ဘာပေါ်တွင် လက်ဖက်အများဆုံး စိုက်ပျိုးသောနိုင်ငံဖြစ်ပြီး လက်ဖက်ရည် အသောက်ဆုံးနိုင်ငံလည်း ဖြစ်ပေသည်။ အိန္ဒိယနိုင်ငံသည် နှစ်စဉ် လက်ဖက်ခြောက် ကီလိုဂရမ် သန်းပေါင်း ၈၃၀-ထွက်ရှိသည့်အနက် ပြည်တွင်းလက်ဖက် ခြောက်ဈေးကွက်က ၇၅-ရာခိုင်နှုန်း ပြန်လည်သောက်သုံးလေသည်။

အိန္ဒိယနှင့်အပြိုင် လက်ဖက်ခြောက်စိုက်ပျိုးထုတ်လုပ်သည့် နိုင်ငံတို့မှာ သီရိလင်္ကာ၊ ကင်ညာ၊ ဗီယက်နမ်၊ အင်ဒိုနီးယား၊ ဘင်္ဂလားဒေ့ရ်နှင့် တရုတ်ပြည်သူ့သမ္မတနိုင်ငံတို့ ဖြစ်ကြလေသည်။
ဤယှဉ်ပြိုင်ထုတ်လုပ်သည့် နိုင်ငံများထက် အရည်အသွေး ပိုမိုထက်မြက်စေရန် လက်ဖက်စိုက်ခြင်းကို ပြန်လည်ပြုပြင်ရန် လိုအပ်နေပြီဖြစ်လေသည်။ အိန္ဒိယ လက်ဖက်စိုက်ခင်းများရှိ လက်ဖက်ပင်တို့၏ ၄၈-ရာခိုင်နှုန်းသည် သက်တမ်းအားဖြင့် ၅၀-ကျော် ရှိနေကြပြီဖြစ်သည်။ လက်ဖက်ပင်ပျိုများ အစားထိုးရန် လိုအပ်နေပေပြီ။ ထုတ်လုပ်အားနှင့် အရည်အသွေးကောင်းရရန်အတွက် အပင်သစ်၊ အပင်ပျိုးများကို အပင်အိုများနေရာတွင် အစားထိုးရန် လိုအပ်ပြီဖြစ်လေသည်။

အိန္ဒိယနိုင်ငံကို ဗြိတိသျှများ အုပ်စိုးခဲ့စဉ်ကပင် လက်ဖက်စိုက်ပျိုး ထုတ်လုပ်ခြင်းလုပ်ငန်းကို လုပ်ကိုင်ခဲ့လေသည်။ တက်တလေအုပ်စု (Tetley Group) မှ လက်ဖက်ခြောက်လုပ်ငန်းကို လုပ်ကိုင်ရာတွင် လက်ဖက်ခင်း တည်ထောင်စိုက်ပျိုးခြင်း မဟုတ်ဘဲ လက်ဖက်ခင်းပြုလုပ်သူ၊ လက်ဖက်ခြောက်ထုတ်လုပ်သူတို့ထံမှ လက်ဖက်ခြောက်တို့ကို ဝယ်ယူကာ ပြုပြင်၍ ကမ္ဘာ့လက်ဖက်ခြောက် ဈေးကွက်သို့ဝင်အောင် ဖြန့်ဖြူးရောင်းချဖြင်းဖြစ်လေသည်။ ထို့ကြောင့် တက်တလေ လက်ဖက်ခြောက် ကုမ္ပဏီတွင် ကိုယ်ပိုင်လက်ဖက်ခြံ၊ လက်ဖက်စိုက်ခင်းဟူ၍ မရှိချေ၊ တက်တလေကုမ္ပဏီ၏ ပိုင်ရှင်မှာလည်း နိုင်ငံခြားသားများ ဖြစ်သည့် ဗြိတိသျှပိုင်ကုမ္ပဏီ ဖြစ်လေသည်။

အိန္ဒိယနိုင်ငံသားများ လုပ်ကိုင်သည့် တာတာတီးလက်ဖက်ခြောက် ကုမ္ပဏီ (Tata tea) ကမူ ကိုယ်ပိုင်လက်ဖက်စိုက်ခင်းများ ရှိသည်။ လက်ဖက်ခြောက် ခူးခြင်း၊ နေလှန်းခြင်း၊ ပေါင်းတင်ခြင်း စသည်တို့ကိုပါ လုပ်ကိုင်လေသည်။ တာတာတီး လက်ဖက်ခြောက်ကုမ္ပဏီပိုင် လက်ဖက်စိုက်ခင်းပေါင်း ၅၄-ခုရှိလေသည်။

လက်ဖက်ရည်အဖန် သောက်ကြသူချင်း မတူကြချေ။ အင်္ဂလန်နိုင်ငံ လန်ဒန်မြို့နေသူတဦးအဖို့ လက်ဖက်ရည်သောက်လိုလျှင် တချိန်သောကာလက ဗြိတိန်နိုင်ငံ၏ လက်အောက်ကျရောက်ခဲ့သော နိုင်ငံများ၌ လက်ဖက်ခြောက် လုပ်ကိုင်တင်ပို့မှုမှ တဆင့် ကုန်တိုက်ကြီးများ၌ ဝယ်ယူသောက်သုံးကြရလေသည်။ လက်ဖက်ခြောက်ရည်ကျကျကို နို့ထည့်လိုလျှင် ထည့်မည်၊ သကြားခဲ ထည့်လိုလျှင် ထည့်မည်။

အိန္ဒိယနိုင်ငံ ကာလကတ္တားမြို့တွင် လက်ဖက်ခြောက်ဝယ်ယူ၍ ပြည်တွင်းပြည်ပ ဖြန့်ဖြူးရာနေရာဖြစ်လေသည်။ ကာလကတ္တား မြို့နေ လူတဦးအဖို့ လက်ဖက်ခြောက်တင်ပို့သောနိုင်ငံဖြစ်၍ လက်ဖက်ခြောက်ကို လမ်းဘေးဆိုင်များ၌ပင် လွယ်လင့်တကူ ဝယ်ယူရရှိနိုင်ပေသည်။

လက်ဖက်ခြောက်ကို ကျအောင်ပြုတ်ထားသည့် လက်ဖက်ရည်တွင် စမုန်စပါးထည့်သည့်အခါ ထည့်မည်။ ချင်းတက်ကို ပါးပါးလှီး၍ အနံ့အရသာတမျိုး သက်ဝင်အောင် ရောစပ်သောက်သုံးလိုက သောက်သုံးမည်ဖြစ်လေသည်။
အိန္ဒိယနိုင်ငံသည် ဗြိတိသျှကိုလိုနီလေက်အောက်မှ လွတ်လပ်ရေးရလာသည်မှာ နှစ်ပေါင်း ၅၀-ကျော်ခဲ့ပြီဖြစ်လေသည်။ ဗြိတိသျှတို့၏ လက်ငုတ် လက်ဖက်ခြောက်လုပ်ငန်းဖြစ်သည့် တက်တလေကုမ္ပဏီကို အိန္ဒိယ တာတာတီး ကုမ္ပဏီက ဒေါ်လာ သန်း-၃၉၀-ကျော်ဖြင့် ဝယ်ယူသိမ်းသွင်းလိုက်ပြီ ဖြစ်ပေသည်။

တာတာတီးလက်ဖက်ခြောက် ကုမ္ပဏီက တက်တလေကုမ္ပဏီကိုပါ ဝယ်ယူသိမ်းသွင်းလိုက်နိုင်ပြီဖြစ်သဖြင့် ကမ္ဘာ့လက်ဖက်ခြောက် ဈေးကွက်တွင် ဈေးကစားနိုင်၊ ဈေးဖြတ်နိုင်သော အနေအထားသို့ ရောက်သွားပြီဖြစ်ပေသည်။ အဘယ့်ကြောင့်ဆိုသော် တာတာတီးကုမ္ပဏီ၏ ဈေးကွက်သည် ပြည်တွင်းသောက်သုံးမှုကို အားထားသော ကုမ္ပဏီဖြစ်၏။

တက်တလေကုမ္ပဏီကမူ အဓိက လက်ဖက်ခြောက်ဈေးကွက်များအဖြစ် ဗြိတိန်၊ ကနေဒါ၊ သြစတြေးလျ နှင့် အမေရိကန် ပြည်ထောင်စုတို့၌ ဈေးကွင်ဝင် လူကြိုက်များပြီး အနေအထား၌ရှိနေ၏။ တက်တလေကုမ္ပဏီကို အလုံးစုံအပြီးတိုင် ဝယ်ယူပူးပေါင်းလိုက်သော်လည်း ကမ္ဘာ့ဈေးကွက်အတွက် တက်တလေကုမ္ပဏီက အသုံးပြုဆဲ အမှတ်တံဆိပ်များအတိုင်းပင် ဆက်လက်တပ်ဆင်ထုတ်လုပ်မည် ဖြစ်ပေသည်။

တာတာတီးလက်ဖက်ခြောက် ကုမ္ပဏီက တက်တလေ လက်ဖက်ခြောက် တင်ပို့ရေးကုမ္ပဏီကို ယခုမှ ဝယ်ယူပူးပေါင်းလိုက်သော် လည်း ဤကုမ္ပဏီနှစ်ခုသည် ရင်ချင်းဆက် အမြွှာကဲ့သို့ ဖြစ်နေလေသည်။
အထက်တွင် တင်ပြသည့်အတိုင်း တက်တလေကုမ္ပဏီသည် လက်ဖက်ခြောက် ပြည်ပသို့တင်ပို့သော ကုမ္ပဏီဖြစ်၍ လက်ဖက်စိုက်ခြင်းဟူ၍ မရှိချေ။ ထို့ကြောင့်ပင် နှစ်ပေါင်းများစွာကတည်းကပင် တာတာတီးကုမ္ပဏီ၏ လက်ဖက်စိုက်ခင်းများမှ လက်ဖက်စိုတို့ကို ဝယ်ယူကာ ပြန်လည်ပြုပြင်၍ ကမ္ဘာ့ဈေးကွက်သို့ ပို့ခဲ့ခြင်းဖြစ်လေသည်။

ယခင်က တက်တလေလက်ဖက်ခြောက် ကုမ္ပဏီတွင် ဥက္ကဋ္ဌဖြစ်ခဲ့ပြီး ယခု တာတာတီးလက်ဖက်ခြောက် ကုမ္ပဏီမှ ဝယ်ယူပူးပေါင်းပြီးသည့်နောက်တွင် ဒုတိယဥက္ကဋ္ဌဖြစ်လာသူ ကရစ်ရှနာကူမာ-က ယခုအခါတွင် လက်ဖက်ခြောက် ကမ္ဘာ့ဈေးကွက်တွင် အရှေ့ဥရောပနိုင်ငံများ ဈေးကွက်နှင့် အရှေ့အလယ်ပိုင်းဒေသ ဈေးကွက်များသို့ ထိုးဖောက်ဝင်ရောက်ရန် ကြိုးပမ်းနေပြီဖြစ်ကြောင်း ပြောပြလေသည်။

လေလှိုင်း
ကျမ်းကိုး။ ။ Far Eastern Economic Peview, May 17, 2001.
A Partnership Brewing ကို ပြန်ဆိုပါသည်။
(မြဝတီမဂ္ဂဇင်း ၂၀၀၁-သြဂုတ်လ)

No comments: