Sunday, September 26, 2010

မွန်မြတ်သော ကူညီစောင့်ရှောက်မှုများ

တခါသော် ဗုဒ္ဓဘုရားရှင်သည် အာဠ၀ီပြည်သို့ ကြွတော်မူစဉ် ဆာလောင်မွတ်သိပ်နေသော ဆင်းရဲသားပုဏ္ဏား တယောက်ကို တွေ့မြင်တော်မူသည်။ ဤတွင် ဘုရားရှင်သည် ထိုဆင်းရဲသားပုဏ္ဏားအား မိမိဆွမ်းခံ၍ ရရှိခဲ့သော ထမင်းဟင်းများကို ကျွေးမွေးတော်မူသည်။ ထို့နောက်မှ တရားဟောတော်မူသည်။

ထိုအခါ ရဟန်းအချို့က ကဲ့ရဲ့ကြကုန်သဖြင့် ဘုရားရှင်က- ချစ်သားတို့၊ ဆာလောင်မွတ်သိပ်နေသူအား တရား ဟောသော်လည်း အချည်းနှီးပင်။ ထို့ကြောင့် ငါသည် မွတ်သိပ်သူကို အစာကျွေး၍ တရားဟောခြင်း ဖြစ်သည်။ လောက၌ ဆာလောင်ခြင်း၊ မွတ်သိပ်ခြင်းနှင့်တူသော ရောဂါသည် မရှိ-ဟူ၍ ဆိုဆုံးမတော်မူသည်။

ဤဖြစ်ရပ်ကိုထောက်၍ ကျွန်ုပ်တို့သည် ဆာလောင်မွတ်သိပ်သူများ၊ ဆင်းရဲနွမ်းပါးသူများကို တတ်စွမ်းသမျှ ထောက်ပံ့လှူဒါန်းသင့်ပေသည်။ ဗုဒ္ဓဘုရားရှင်က မျက်မှောက်ဘ၀မှာပင် အကျိုးပေးသော ကာလဒါန ၅-မျိုးကို ဟောကြားတော်မူခဲ့သည်။ ထိုကာလဒါန ၅-မျိုးတွင် နာမကျန်း၍ ရောဂါကပ်ရောက်သူများကို လှူဒါန်းခြင်း။ ဆင်းရဲသူများကို ပေးကမ်းလှူဒါန်းခြင်း-ဟူသော အကျိုးထူးနှစ်ရပ်ကိုလည်း ထည့်သွင်းဖော်ပြထားသည်။ ဤအချက်နှစ်ရပ်သည် ဗုဒ္ဓက အားပေးသော အချက်နှစ်ရပ်ပင် ဖြစ်သည်။

ထိုအဆုံးအမတို့ကို နှလုံးသွင်းလျက် မြန်မာဗုဒ္ဓဘာသာဝင် အချို့ပုဂ္ဂိုလ်များသည် ကုသိုလ်ဖြစ် ဆေးရုံများ ဆောက်လုပ်လှူဒါန်းခြင်း၊ ကုသိုလ်ဖြစ် ဆေးခန်းများ ဖွင့်လှစ်၍ ဆေးဝါးများ ကုသပေးခြင်း၊ နာရေးကူညီမှုအသင်များ ဖွဲ့စည်း၍ ကူညီစောင့်ရှောက်ခြင်း၊ မိဘမဲ့ဂေဟာများ စသည်တို့ ထူထောင်၍ မိဘမဲ့ကလေးများအား စောင့်ရှောက်ခြင်း၊ ဘုန်းတော်ကြီးသင် သီလရှင်သင် ကျောင်းများတွင် ကလေးငယ်များကို အစားအစာကျွေးမွေး၍ ပညာသင်ကြားပေးခြင်း၊ မီးဘေး၊ ရေဘေး၊ လေဘေး ကြုံတွေ့သူများကို ထောက်ပံ့ကူညီ ကျွေးမွေးစောင့်ရှောက်ခြင်း၊ အထူးသဖြင့် နာဂစ်မုန်တိုင်းဒဏ် ခံရသူများကို အစားအစာများ ကျွေးမွေးခြင်း၊ နေအိမ်များ၊ ကျောင်းများ ဆောက်လုပ်လှူဒါန်းပေးခြင်း၊ အခြားအခြားသော ပရဟိတအဖွဲ့များ ထူထောင်၍ ဆင်းရဲဒုက္ခရောက်သူများအား ကူညီခြင်း စသည်တို့ကို မြင်ရ၊ တွေ့ရ၊ ကြားရသည်မှာ အလွန်ဝမ်းသာကြည်နူးဖွယ် ကောင်းလှပေသည်။

သို့ရာတွင် ဤသို့ စောင့်ရှောက်လှူဒါန်းမှုများမှာ ဆင်းရဲသူဦးရေနှင့် စာလျှင် နည်းပါးနေပါသေးသည်။ မြန်မာနိုင်ငံတွင် ကြွယ်ဝချမ်းသာသူများ အသင့်အတင့်ရှိနေကြပါသည်။ ထိုပုဂ္ဂိုလ်များသည် ဗုဒ္ဓဘုရားရှင်၏ အဆုံးအမကို နှလုံးသွင်းကာ ဆင်းရဲဒုက္ခရောက်နေကြသူများအား အားဖြည့်ကူညီကြမည်ဆိုလျှင် ကျွန်ုပ်တို့ သာဓုခေါ်မဆုံး ရှိရပါမည်။

ကမ္ဘာပေါ်တွင် ဒေါ်လာဘီလျံနာသူဌေးကြီးများ ၉၀၀-ကျော်ရှိကြောင်း ကြားသိရပါသည်။ ယင်းတို့ထဲမှ ဘီလျံနာသူဌေးကြီး ဘီလ်ဂိတ် ဇနီးမောင်နှံဆိုလျှင် ဒေါ်လာ ၃၇.၃-ဘီလျံ မတည်ကာ ဆင်းရဲဒုက္ခရောက်နေသူ များအား လူမျိုးဘာသာမရွေး ထောက်ပံ့လှူဒါန်းနေကြသည်။ ထို့ပြင် ဘီလျံနာသူဌေးကြီး တဦးဖြစ်သူ နယူးယောက်မြို့တော်ဝန် မိုက်ကယ်ဘလွန်းဘာ့ဂ်ျကလည်း နှစ်စဉ် ဒေါ်လာ သန်း-၈၀၀ ဖိုးမျှ ဆင်းရဲဒုက္ခ ရောက်သူများကို လှူဒါန်းရှိရှိပါသည်။ အားရကြည်နူးဖွယ် ကောင်းလှပေသည်။ အလားတူပင် ဘင်္ဂလားဒေ့ရှ် နိုင်ငံသား ငြိမ်းချမ်းရေးနိုဗယ်ဆုရ မိုဟာမက်ယူနွတ်ဆိုလျှင် ဆင်းရဲသားပြည်သူများအား လုပ်ငန်းအရင်းအနှီး အတွက် အတိုးမဲ့ ငွေထုတ်ချေးကာ သူ့နည်းသူ့ဟန်ဖြင့် ကူညီစောင့်ရှောက်လျက်ရှိသည်မှာ အထူးအောင်မြင် လျက်ရှိသည်။

မကြာမီက ငြိမ်းချမ်းရေးနိုဗယ်ဆုရ အမေရိကန်သမ္မတ အိုဘားမားသည် မိမိရရှိသော ဆုငွေ ၁-ဒသမ ၄-သန်းကို လှူဒါန်းပစ်မည်ဖြစ်ကြောင်း ကြားသိရသည်။ ကျွန်ုပ်တို့ လေးစားမြတ်နိုးမဆုံး ရှိမိပါသည်။
ကြွယ်ဝချမ်းသာသူများသည် မွတ်သိပ်ဆာလောင်သူများကို ကယ်တင်နိုင်ကြပါစေ။

No comments: