Monday, September 27, 2010

လိပ်ခေါင်းရောဂါ

တနေ့သော နံနက်ပိုင်းတွင် အသက် ၄ဝ-ကျော် လူနာတယောက် ဆေးခန်းသို့ရောက်လာသည်။ ဝမ်းသွားလျှင် သွေးပါလာကြောင်း၊ စအိုဝ နာကျင်သည်မှာ ၃-ရက်ရှိပြီဖြစ်ကြောင်း ပြောပါသည်။ သူသည် လိပ်ခေါင်းရောဂါ ခံစားလာခဲ့သည်မှာ ၁ဝ-နှစ်ကျော်ရှိပြီ။ မကြာခဏ ရောဂါထလျှင် စအိုဝ နာကျင်တတ်သည်။ ဝမ်းသွားလျှင် သွေးပါတတ်သည်။ သွေးအရောင်သည် များသောအားဖြင့် နီမြန်းနေတတ်သည်။ ပြည်နှင့် အကျိ်အချွဲများတော့ မပါပေ။ ဝမ်းဗိုက်လည်း နာလေ့မရှိပေ။ ဝမ်းသွားသည့်အခါ စအိုဝမှ တစုံတရာကျလာပြီး နာကျင်မှုကို ခံစားရသည်။ တလလျှင် နှစ်ကြိမ်ခန့် ဖြစ်တတ်၍ စိတ်ညစ်ရသည်ဟု ဆိုပါသည်။

ကျွန်တော်သည် သူ့ရောဂါကို ဆေးစစ်ပြီးနောက် သူ၏ရောဂါသည် အခြေခံအားဖြင့် အတွင်းလိပ်ခေါင်း ဖြစ်နိုင်ကြောင်း ပြောပြလိုက်သည်။
သူက-ဟုတ်ကဲ့၊ ယခင်က ဆရာဝန်ပြတုန်းကလည်း ဆရာဝန်က အတွင်းလိပ်ခေါင်းလို့ ပြောပါတယ်။ ဒါကြောင့် ကျွန်တော်ကိုယ်တိုင်လည်း ကြိုးစားကုသနေပါတယ်။ လွန်ခဲ့သော ၃-နှစ်ခန့်က ခွဲစိတ်ကုသခဲ့ဖူးပါတယ်။ နေကောင်းသွားတာ နှစ်ဝက်သာရှိသေးတယ်။ အခု ရောဂါပြန်ဖြစ်လာပါတယ်။ ဝမ်းသွားလျှင် သွေးပါမြဲ ပါလာပါတယ်။ လိပ်ခေါင်းရောဂါဟာ ကုသလို့ မပျောက်နိုင်တော့ဘူးလား-ဟု ပြောသည်။

လူနာအား ထပ်မံစုံစမ်းသောအခါ ဝမ်းချုပ်တတ်သည်ကို သိရသည်။
ထို့ကြောင့် သူ့ကို-ရောဂါပြန်ဖြစ်တာ ခင်ဗျားကြောင့်ပဲ။ ရောဂါရဲ့ ဇစ်မြစ်ဖြစ်တဲ့ ဝမ်းချုပ်ခြင်းကိုမှ မဖြေရှင်း နိုင်ဘဲကိုး။ ကျွန်တော်က သူ၏အတွင်းလိပ်ခေါင်း ပျောက်ကင်းစေရန် အနောက်တိုင်း ဆေးနည်းပညာဖြင့် ဝမ်းသွားလျှင် သွေးမပါအောင် ကုသမည်။ တဖန် တရုတ်တိုင်းရင်းဆေးဖြင့် အတွင်းကိုယ်အင်္ဂါများ စွမ်းရည်ပြည့်အောင် ပြုလုပ်ပေးပြီး အမျှင်ဓာတ်များသော အသီး၊ အရွက်များကို စားစေခြင်းဖြင့်လည်း ဝမ်းချုပ်ခြင်းပြဿနာကို ဖြေရှင်းပေးရမည်။ ဝမ်းဗိုက်ကြွက်သားများ သန်မာစေရန်လည်း လေ့ကျင့်ခန်းများ လုပ်ပေးရမည်ဟု ညွှန်ကြားလိုက်ပါသည်။

လူနာ၏ ကြိုးစားဆောင်ရွက်မှုကြောင့် ၃-လခန့်အကြာတွင် ရောဂါပျောက်ကင်းသွားသည်။ အစားအသောက်၊ အနေအထိုင်၊ အလေ့အကျင့်များ ဂရုစိုက်လုပ်ဆောင်မှုကြောင့် ရောဂါထပ်မဖြစ်တော့ပေ။
လိပ်ခေါင်းရောဂါဆိုသည်မှာ အူအဖြောင့်အဆုံးပိုင်း စအိုလမ်းကြောင်းပြွန် အရေပြားအောက်ရှိ သွေးပြန်ကြော အုံသည် ချဲ့ကားပြီး ကွေးတွန့်ခြင်းကြောင့် ဖြစ်ပေါ်လာသော ပျော့ပျော့အိအိ အလုံးအခဲသာဖြစ်သည်။ ဖြစ်ပေါ်သောနေရာပေါ်မူတည်ပြီး အတွင်းလိပ်ခေါင်း၊ အပြင်လိပ်ခေါင်းနှင့် ရောထွေးသောလိပ်ခေါင်းဟူ၍ ကွဲပြားခေါ်ဝေါ်ကြခြင်းဖြစ်သည်။

လိပ်ခေါင်းရောဂါဖြစ်နှုန်း မြင့်မားသည်ကို အားလုံးအသိပင်။ ဆယ်ယောက်လျှင် ကိုးယောက် လိပ်ခေါင်းဖြစ်သည်ဟူသော အဆိုပင်ရှိသည်။ ရောဂါအပေါ့အလေး၊ အကြီးအသေးသာ ကွာခြားကြသည်။ အသက်အန္တရာယ်အတွက် မစိုးရိမ်ရသော်လည်း အပ်ရှိသောကော်ဇောပေါ် ထိုင်ရသကဲ့သို့ စိတ်အနှောင့်အယှက် အလွန်ဖြစ်စေသည်။

ခြေလေးချောင်း သတ္တဝါများသည် လိပ်ခေါင်းရောဂါ မရှိကြပေ။ လူသားများသည် မတ်တတ်ရပ်၍ လမ်းလျှောက်နိုင်သည်။ သို့သော် ကမ္ဘာမြေဆွဲအားကြောင့် သွေးပြန်ကြောမှ နှလုံးသို့ ပြန်စီးသော သွေးများသည် ကမ္ဘာမြေ၏ အလယ်ဗဟိုကို ဦးတည်ပြီး တဖန်အောက်သို့ သက်ရောက်သော အလေးချိန်ဖြစ်ပေါ်စေသည်။ လူ့ခန္ဓာကိုယ်အောက်ပိုင်းရှိ စအိုဝအူဖြောင့်ပိုင်းတွင် သွေးများ တင်ကျန်စုပုံလာတတ်သည်။ အူဖြောင့် အထက်အောက် သွေးပြန်ကြောများ၏ နံရံများသည် ပါးလွှာပြန့်ကားပြီး ကွေးကောက်လွယ်သဖြင့် တဖြည်းဖြည်း အတုံးအခဲဖြစ်လာစေနိုင်သည်။

ဒုတိယအနေဖြင့် ဝမ်းချုပ်ခြင်း၊ ဝမ်းသွားသည့်အချိန် ကြာလွန်းခြင်း၊ သို့မဟုတ်-တာရှည်စွာ ဝမ်းလျှောရောဂါ ဖြစ်ခြင်း၊ ဝမ်းသွားချိန် မမှန်ခြင်းတို့သည် လိပ်ခေါင်းရောဂါ ဖြစ်စေသော အကြောင်းရင်များပင်ဖြစ်သည်။
နောက်ဆုံးအချက်မှာ စအိုဝသည် မစင်များ၏ ထွက်ပေါက်ဖြစ်၍ ရောဂါရလွယ်သောနေရာဖြစ်သည့်အလျောက် ဝမ်းကိုက်ရောဂါ ရပါက စအိုဝ အူဖြောင့်ပိုင်း သွေးပြန်ကြောများ သွေးပြည့်ချဲ့ကားကာ လိပ်ခေါင်းရောဂါပါ ရလာနိုင်ပါသည်။

ထို့ပြင် စားသောက်ရာတွင် အစပ်ကြိုက်တတ်၍သော်၎င်း၊ ဂျုံနုနု ဆန်ဖြူဖြူများကို ကြိုက်နှစ်သက်၍သော်၎င်း၊ အသီးအရွက် အစားနည်း၍သော်၎င်း၊ အနေအထိုင် အစားအသောက် အချိန်မမှန်၍သော်၎င်း ထိုအချက်များကြောင့် ၀မ်းသွားရာတွင် ခက်ခဲစေသည်။ သို့မဟုတ် ဝမ်းနည်းနည်းသာ သွားစေသည်။ ထိုအခက်အခဲများ ကြာလာသောအခါ လိပ်ခေါင်းရောဂါ ဖြစ်စေနိုင်ပါသည်။

ထို့ပြင် ကားမောင်းသူများ၊ ရုံးအလုပ်လုပ်သူများနှင့် အလေးမသူများသည် လိပ်ခေါင်းရောဂါ အဖြစ်များသူများ ဖြစ်ကြသည်။ ကြာကြာထိုင် ကြာကြာရပ် ကြာကြာဆောင့်ကြောင့်ထိုင် ကြာကြာလမ်းလျှောက်နှင့် အလေးအပင် ထမ်းသူတို့သည် စအိုဝအူဖြောင့်ပိုင်းရှိ သွေးပြန်ကြောများ ချဲ့ကားတွန့်လိမ်၍ သွေးများအနယ်ထိုင်သောကြောင့် လိပ်ခေါင်းရောဂါ ဖြစ်စေနိုင်ပါသည်။ ရောဂါဖြစ်စေသော အကြောင်းရင်းများကို သိရှိပါက ကာကွယ်နိုင်သော ကုသ၍ ပျောက်ကင်းနိုင်သော ရောဂါဖြစ်ပါသည်။

လက်တွေ့ကုသမှုအတွေ့အကြုံအရ လိပ်ခေါင်းရောဂါ ကာကွယ်ကုသနည်း ၅-ရပ်ရှိပါသည်။
(၁) ဝမ်းမချုပ်စေရန်
(က) နံနက်အိပ်ရာထသည်နှင့် ရေများများ သောက်ရမည်။
(ခ) နံနက်တိုင်း အချိန်မှန် ဝမ်းသွားသည့်အကျင့်ကောင်း ရှိရမည်။
(ဂ) အပူအစပ် အစာများကို ရှောင်ရမည်။
(ဃ) အမျှင်ဓာတ်ကြွယ်ဝသည့် အစာများနှင့် လတ်ဆတ်သော အသီးအရွက်များကို များများစားရမည်။
(င) အိမ်သာထိုင်ချိန်သည်လည်း ၅-မိနစ်ထက် မကြာသင့်ပေ။ ဝမ်းသွားလိုစိတ်ဖြစ်တိုင်း အိမ်သာတက်ပြီး မြန်မြန်ဆန်ဆန်နှင့် ဝမ်းကို ကုန်စင်အောင် စွန့်ထုတ်နိုင်ရန် အာရုံစိုက်ရမည်။

(၂) စအိုဝ သန့်ရှင်းရေးကို ဂရုစိုက်ရမည်။
(၃) စအိုဝတွင် ထူးခြားချက်တွေ့ရှိလျှင် အချိန်မီ ဆေးကုသမှု ခံယူရမည်။
(၄) တမျိုးတည်းသော ကိုယ်ဟန်အနေအထားကို တာရှည်စွာ မထားပါနဲ့။
အထိုင်များသူများသည် နံနက် အပြေးကျင့်၊ ထမင်းစားပြီး လမ်းလျှောက်၊ အလုပ်နားချိန် ခဏရပ်ပြီး လှုပ်ရှားပေးပါ။
စအိုဝလေ့ကျင့်ခန်း (စအိုဝကို ၃-မိနစ်ခန့် ကျုံ့၍ ပြန်ဖြေလျှော့ခြင်း) ကို အခါ ၅ဝ-၁ဝဝ-ခန့် နံနက် ညနေ တကျော့စီ လုပ်နိုင်လျှင် လိပ်ခေါင်းရောဂါ ကာကွယ်နိုင်သည်။
(၅) ဝမ်းခေါင်းအတွင်း ဖိအားများစေသော ရောဂါများကို ကြိုးစားကုသရမည်။
ဥပမာ-နာတာရှည် အဆုတ်လေပြွန်ရောင်ရမ်းနာရှိသူများသည် နှစ်ရှည်လများ ချောင်းဆိုး၊ သလိပ်ဟတ်ခြင်း ပြုရသောကြောင့် ဝမ်းခေါင်းတွင်း ဖိအားကို များစေနိုင်ပါသည်။ ပရိုစတိတ်ဂလင်းခေါ် သုတ်ရည်အကျိတ် ရောင်ရမ်းနာ၊ အသည်းရောင်မာတောင့်ခြင်း စသည်တို့သည်လည်း ဝမ်းခေါင်းဖိအားကို များစေသည်။ ထိုရောဂါများ ပျောက်ကင်းအောင် ကုသမှသာ လိပ်ခေါင်းရောဂါသည် မကုသရဘဲ ပျောက်ကင်း နိုင်လေသည်။

သတိထားရန်အချက်မှာ လိပ်ခေါင်းနှင့် အူမကြီးကင်ဆာ ပထမဆင့်သည် ဆင်တူသည်။ ဝမ်းသွားစဉ် ထွက်သောသွေးသည် နီလွင်မနေဘဲ နီညိုရောင်ဖြစ်နေပြီး ပြည်များနှင့် ပျက်စီးသွားသော ဆဲလ်များပါလာလျှင် အူမကြီးကင်ဆာ ဖြစ်နိုင်၍ ဆေးရုံသို့ ချက်ချင်းသွားရောက် ပြသစစ်ဆေးသင့်ပါသည်။

ပါမောက္ခ ဒေါ်ခင်ဖြူ (မြင်းခြံ)
အကိုး။ ။ 2001. No,10 Family Doctor.
(မြတ်မင်္ဂလာ ၂ဝ၁ဝ-ခု ဇန်န၀ါရီလ)

No comments: