Monday, October 25, 2010

တောင်တန်းသာသနာပြု ဆရာတော် ဦးဥတ္တမသာရ

ဆရာတော်ကြီးကို ခမည်းတော် ဦးဘိုညို+မယ်တော် ဒေါ်သေးတာ-တို့က ၁၂၇၂-ခု ပြာသိုလပြည့်ကျော် ၁-ရက်နေ့တွင် စစ်ကိုင်းတိုင်း၊ ဒီပဲယင်းမြို့နယ် ငွေတွင်းကုန်းကျေးရွာတွင် ဖွားမြင်တော်မူသည်။ ၁၂၈၄-ခု ရွာကျောင်းဆရာတော် ဘဒ္ဒန္တ၀ိလာသကို ဥပဇ္ဈာယ်ပြု၍ မိဘနှစ်ပါးတို့၏ ပစ္စယာနုဂ္ဂဟကိုဖြင့် ရှင်သာမဏေအဖြစ် ရောက်တော်မူသည်။ ၁၂၉၂-ခုနှစ်တွင် ငွေတွင်းကုန်းဆရာတော် ဘဒ္ဒန္တ၀ိလာသကို ဥပဇ္ဈာယ်ပြု၍ ရဟန်းအဖြစ်သို့ ရောက်တော်မူသည်။

ဆရာတော်သည် မုံရွာမြို့၊ ရွှေသိမ်တော်တိုက်၊ မဟာလယ်တီတိုက်၊ စစ်ကိုင်းတောင် မဟာသမယချောင်၊ မန္တလေးမြို့၊ ချမ်းသာကြီးမြောက်တိုက်၊ အမရပူရမြို့ တူးမောင်းတိုက်၊ ပခုက္ကူမြို့ မဟာဝိသုတာရာမတိုက်တို့ရှိ ဆရာတော်ကြီး များထံတွင် ပရိယတ္တိစာပေများကို သင်ယူတော်မူခဲ့သည်။ ပရိယတ္တိစာပေများ သင်ယူပြီး ဝေးလံခေါင်းပါးသော တောင်တန်းဒေသတွင် နှစ်ပေါင်း ၅၀-တိုင် သီတင်းသုံးနေထိုင်လျက် ဒေသခံ တိုင်းရင်းသားတို့အား ဗုဒ္ဓတရားတော်များ၊ ကျင့်ကြံပွားများနိုင်ရန် သာသနာပြုတော်မူခဲ့သည်။

ဆရာတော်သည် အိန္ဒိယနိုင်ငံ၊ နီပေါနိုင်ငံ၊ ဟိမ၀န္တာတခိုသို့၎င်း၊ အာသံ၊ မဏိပူရ၊ နာဂတောင်တန်းသို့၎င်း၊ တောအနှံ့၊ တောင်အနှံ့ ခြေကျင်ကြွတော်မူပြီး သာသနာပြုတော်မူသည်။ ဆရာတော်သည် ဗြဟ္မ၀ိဟာရတရား လေးပါးကို လက်ကိုင်ထား၍ သီတင်းသုံးနေတော်မူခြင်းဖြစ်သည်။

ဆရာတော်ကြီး သီတင်းသုံးတော်မူသော ခန္တိန်တောင်ခေါ် ကျောက်တောင်ကြီးကမ်းပါး၌ လှည်းဘီးပမာဏရှိသော ပျားအုံကြီးများ နှစ်စဉ်လာစွဲလေ့ရှိသည်။ အကောင်ကြီး၍ အဆိပ်ပြင်းသည်။ တနှစ်သောဆောင်းရာသီတွင် ခြံအလုပ်သမားများက မီးရှို့ပြီး ပျားအုံယူရန် ကြိုးစားရာ ပျားကောင်အများ မီးခိုးမွှန်၍ အုံကြွကာ တွေ့မြင်ရာလူကို လိုက်တုပ်ကြသည်။ ထိုအချိန်တွင် ဆရာတော်ကြီးသည် ပျားကောင်များ ပျံသန်းသည့်ကြားမှ သွားလာလှုပ်ရှားသော်လည်း ပျားတကောင်မျှပင် မတုပ်ပေ။

ဆရာတော်သည် မေတ္တာဘာဝနာတရားကို ထာဝစဉ်ပွားများနေသဖြင့် နတ်များ ချစ်ခင်ကြည်ညိုကြသည်ဟု သိရှိရပါသည်။ ဆရာတော်သည် ညနေပိုင်း နေ၀င်ချိန်တွင် တော၊ တောင်၌ရှိသော နတ်များ၊ စကြာဝဠာအနန္တ၌ ရှိသော နတ်များကို ဖိတ်ခေါ်ပြီး ပရိတ်ပဋ္ဌာန်းဒေသနာတော်များကို ရွတ်ဆိုသည်။ နတ်များအတွက် သတသဟဿာရဟ ဂါထာများကိုလည်း ရွတ်ဆိုပြီး အမျှပေးဝေသည်။ ထို့နောက် တရားထိုင်သည်။ စာရေးသည်။ အိပ်ရာဝင်ပြီးနောက် သတ္တလောကကြီးကို ခြုံငုံ၍ မေတ္တာဖြန့်ကြက်သည်။ ထို့နောက် ကိုယ်ခန္ဓာ ဣရိယာပုထ်ကို ပြင်ဆင်ကာ လက်ယာဘက်စောင်းအိပ်ပြီး အာနာပါနကမ္မဋ္ဌာန်း အာရုံယူတော်မူသည်။

ဆရာတော်ကြီးသည် ချင်းတောင်တန်း၌ မိုးခေါင်စဉ် မိုးရွာအောင် ဆောင်ရွက်ပေးခဲ့သည်။ ဆရာတော်ကြီး၏ မေတ္တာစွမ်းအားကြောင့် ပရိတ်ရေများ ဆူဝေလျှံကျသည်။ ယင်းပရိတ်ရေသောက်သုံးခြင်းဖြင့် မီးမဖွားနိုင်သော မွေးလူနာများ လွယ်ကူစွာ မီးဖွားနိုင်သည်။ ဆရာတော်ကြီး၏ ပရိတ်ရေ အာနိသင်ကြောင့် ကပ်ရောဂါဘေး၊ မီးဘေးမှ ကင်းဝေးရပါသည်။

ဆရာတော်သည် ချင်းပြည်နယ်၊ ဖလမ်းမြို့နယ်၊ လုံပီးကျေးရွာတွင် သီတင်းသုံးတော်မူခိုက် သက်တော် ၈၆-နှစ်၊ သိက္ခာတော် ၆၆-၀ါအရတွင် ရန်ကုန်မြို့သို့ ကျန်းမာရေးအတွက် ဆေးကုသမှုခံယူရန် ကြွရောက်စဉ် ၁၃၅၇-ခုနှစ် ပြာသိုလဆန်း ၇-ရက် (၂၇-၁၂-၉၅) နေ့၊ ညနေ ၆-နာရီခွဲအချိန်တွင် မန္တလေးလေဆိပ်၌ ဘ၀နတ်ထံ ပျံလွန်တော်မူပါသည်။

ဤဆောင်းပါး၌ အလျဉ်းသင့်၍ တောင်တန်းသာသနာပြု ဆရာတော်ကြီး ရွတ်ဆိုသော အဖိုးတန် နတ်ချစ်ဂါထာများကို ဖော်ပြလိုက်ပါသည်။

(ပါဠိဂါထာ)
(၁) သကိံဒေ၀ မဟာရာဇ၊ သဗ္ဘိ ဟောတိ သမာဂမော။
သာနံ ပါလေတိ သင်္ဂတိ၊ နာသဗ္ဘိ ဗဟုသင်္ဂမော။

(၂) သဗ္ဘိရေ၀ သမာသေထ၊ သဗ္ဘိ ကုဗ္ဗေထ သန္ထ၀ံ။
သတံ သဒ္ဓမ္မ မညာယ၊ သေယျော ဟောတိ န ပါပိယော။

(၃) ဇိရန္တိ ဝေ ရာဇရထာ သုစိတ္တာ၊ အထော သရီရမ္ပိ ဇရံ ဥပေတိ။
သတဉ္စ ဓမ္မော နဇရံ ဥပေတိ၊ သန္တော ဟဝေ သဗ္ဘိ ပဝေဒယန္တိ။

(၄) န ဘိံစ ဒူရေ ပထ၀ီ စ ဒူရေ၊ ပါရံ သမုဒ္ဒဿ တဒါဟု ဒူရေ။
တတော ဟဝေ ဒူရတရံ ၀ဒန္တိ၊ သတဉ္စ ဓမ္မော အသတဉ္စ ရာဇ။

(မှန်ကန်တိကျစွာ အသံထွက်နည်း)
(၁) သကိန်ဒေ၀ မဟာရာဇ၊ သတ်ဘိ ဟောတိ သမာဂမော။
သာနံ ပါလေတိ သင်ဂတိ၊ နာသတ်ဘိ ဗဟုသင်ဂမော။

(၂) သတ်ဘိရေ၀ သမာသေထ၊ သတ်ဘိ ကုတ်ဗေထ သန်ထ၀ံ။
သတံ သတ်ဓမ်မ မင်ညာယ၊ သေယျော ဟောတိ န ပါပိယော။

(၃) ဇိရန်တိ ဝေ ရာဇရထာ သုစိတ်တာ၊ အထော သရီရမ်ပိ ဇရံ ဥပေတိ။
သတင်စ ဓမ်မော နဇရံ ဥပေတိ၊ သန်တော ဟဝေ သတ်ဘိ ပဝေဒယန်တိ။

(၄) န ဘိံစ ဒူရေ ပထ၀ီ စ ဒူရေ၊ ပါရံ သမုတ်ဒတ်သ တဒါဟု ဒူရေ။
တတော ဟဝေ ဒူရတရံ ၀ဒန်တိ၊ သတင်စ ဓမ်မော အသတင်စ ရာဇ။

( အနက်မြန်မာပြန်)
(၁) မင်းမြတ်၊ သူတော်ကောင်းတို့နှင့် တကြိမ်မျှသာ ပေါင်းဆုံမှီဝဲဘိ၏။ ထိုတကြိမ်မျှ ပေါင်းဆုံမှီဝဲခြင်းကြောင့် ထိုသူ့ကို သူတော်ကောင်းတို့က ဘေးရန်မနှောင့် ချမ်းသာရောက်အောင် စောင့်ရှောက်၏။

(၂) မင်းမြတ်၊ သူယုတ်မာတို့နှင့် အကြိမ်များစွာ ပေါင်းဆုံမှီဝဲသော်လည်း သူယုတ်မာတို့က ချမ်းသာအောင် မစောင့်ရှောက်နိုင်။ ထို့ကြောင့် သူတော်ကောင်းတို့နှင့်သာ ပေါင်းဆုံမှီဝဲရာ၏။ သူတော်ကောင်းတို့နှင့်သာ အကျွမ်းတ၀င် ချဉ်းကပ်မှုပြုရာ၏။ ဘုရားအစရှိသော သူတော်ကောင်းတို့၏ နိဗ္ဗာန်ရောက်ကြေင်း ဗောဓိက္ခိယတရားကို တလုံးတပါဒမျှ သိမြင်ရသည်ရှိသော် တနေ့တခြား ကြီးပွားမြင့်မြတ်နိုင်ပေ၏။ မဆုတ်ယုတ်နိုင်ပေ။

(၃) မင်းမြတ်၊ အဆန်းတကြယ် လှပခိုင်ခံ့ကုန်သော မင်းစီးရထားတို့သည် တနေ့နေ့တွင် ဟောင်းနွမ်းပျက်စီး၍ သွားကြရကုန်၏။ ထို့အပြင် ခန္ဓာကိုယ်ကြီးသည်လည်း အိုမင်းပျက်စီး၍ သွားရမြဲသာတည်း။ သူတော်ကောင်း တို့၏ နိဗ္ဗာန်တရားသည်ကား ပျက်စီးယိုယွင်းခြင်းသို့ ဘယ်သောအခါမှ မရောက်နိုင်။ ထို့ကြောင့် သူတော်ကောင်းတို့သည် နိဗ္ဗာန်ချမ်းသာကို စင်စစ်ဧကန် ထုတ်ဖော်ချီးကျူးကြကုန်၏။

(၄) ကောင်းကင်မှ မြေပြင်၊ မြေပြင်မှ ကောင်းကင် တစပ်တည်းဟု ထင်ရစေကာမူ အလွန်ပင် ဝေးကွာ၏။ သမုဒ္ဒရာ၏ ဟိုမှာဘက်ကမ်းနှင့် သည်မှာဘက်ကမ်းသည်လည်း အလွန်ပင် ဝေးကွာ၏။ ထို့အတူ သူတော်ကောင်းတို့၏ သူတော်ကောင်းတရားနှင့် မသူတော်တို့၏ မသူတော်တရားသည်လည်း အလွန်ပင် ဝေးကွာလှချေ၏-ဟု သူတော်ကောင်းတို့ မိန့်ဆိုကြကုန်၏။

ကောက်ရိုးနွယ်(ရွှေကူ)
(မြတ်မင်္ဂလာ ၂၀၁၀-မတ်လ)

No comments: