Wednesday, November 10, 2010

တမလွန်ဘ၀ ပြဿနာ

ယခုအခါ ရုပ်ဝါဒီတို့၏ သြဇာကြောင့် ခေတ်ပညာတတ်အချို့သည် တမလွန်ဘ၀ မရှိ-ဟူ၍ ခံယူနေကြသည်။ အချို့ကလည်း အတိတ်ဘ၀၊ ပစ္စုပ္ပန်ဘ၀၊ အနာဂတ်ဘ၀ဟူ၍ ဘ၀သုံးမျိုးရှိသည်ဟူသော ခံယူချက်ကို ပစ်ပယ်ကြသည်။ ပစ္စုပ္ပန်ဘ၀ကိုသာ အဓိကယုံကြည်ကြသည်။

၁၉၅၇-ခုနှစ်တွင် ဆရာဝန်ကြီး ဒေါက်တာ ဦးမြင့်ဆွေသည် မဟာစည်ဆရာတော်ဘုရားကြီးအား တမလွန်ဘ၀ ရှိ-မရှိ ပြဿနာကို မေးမြန်းလျှောက်ထားဖူးသည်။ ဒေါက်တာ ဦးမြင့်ဆွေက ဆေးပညာအရ တမလွန်ဘ၀ ရှိကြောင်းကို ဘယ်နည်းနှင့်မျှ သက်သေထုတ်ပြီး မဖော်ပြနိုင်ပါ။ မိဘနှစ်ပါးတို့ ပေါင်းစပ်သံဝါသပြု၍ ဖြစ်ပေါ်လာသော လူသားသည် အိုမင်း၍ သေသောအခါ ၄င်း၏ဘ၀ ကုန်ဆုံးပါတော့သည်-ဟူ၍ ဆိုကာ မေးမြန်းလျှောက်ထားခဲ့သည်။

ထိုအခါ မဟာစည်ဆရာတော်ဘုရားကြီးက ဆေးပညာဖြင့် မတွေ့ရသောကြောင့် တမလွန်ဘ၀ မရှိဟု ယူဆလျှင် ထိုအယူမှာ မျက်စိဖြင့် မမြင်ရသောကြောင့် အသံကို မရှိဟု ယူသကဲ့သို့၎င်း၊ နားဖြင့် မကြားရသောကြောင့် အဆင်းကို မရှိဟု ယူသကဲ့သို့၎င်း၊ အမှားသာ ဖြစ်မည်။ ပကတိ မျက်စိဖြင့် မမြင်နိုင်သော ပိုးမွှားကလေးများ၊ မြူမှုန်ကလေးများကို မြင်လိုလျှင် ၄င်းတို့ကို မြင်စေနိုင်သော မှန်ဘီလူးများဖြင့် ကြည့်ရသကဲ့သို့ တမလွန်ဘ၀အကြောင်းကို သိလိုလျှင် ၄င်းကိုသိစေနိုင်သော အဘိညာဉ် အသိညာဏ်ထူး၊ ၀ိပဿနာဉာဏ်ထူးတို့ကို ဖြစ်ပေါ်အောင် အားထုတ်၍ကြည့်ရ၏။

ထိုဉာဏ်ထူးကလေးများကိုရအောင် အားမထုတ်နိုင်လျှင် ဗုဒ္ဓတရားတော်များက ညွှန်ပြထားသည့်အတိုင်း အကြောင်းအကျိုးဆက်သွယ်ပုံကို ဆင်ခြင်သိရ၏။ ထိုသို့ မဆင်ခြင်နိုင်လျှင် ဘ၀ဟောင်းက အကြောင်းများကို ပြန်ပြောနိုင်သော ဇာတိဿရခေါ် လူဝင်စားတို့၏ ဖြစ်ပုံကို စုံစမ်းဆင်ခြင်၍ ယုံကြည်ယူဆသင့်၏-ဟူ၍ ဖြေကြားတော်မူခဲ့သည်။

ထို့နောက် ဆရာတော်ကြီးက-ဘ၀ဟောင်းအကြောင်းကို ပြောသူတိုင်း အမှန်ချည်းဟူ၍ကား မဆိုနိုင်ပါ။ လူကြီးမိဘများက သင်ပေးသောကြောင့် ပြောသူများလည်း ရှိပေလိမ့်မည်။ ပညာဖြင့် ချင့်ချိန်၍ ယုံသင့်သည်ကိုသာ ယုံရမည်။ ယုံသင့်သော ဖြစ်ရပ် အနည်းငယ်ကို မိမိ ထုတ်ဖော်ပြပါမည်-ဟု မိန့်တော်မူကာ ၁၉၅၆-ခုနှစ်တွင် စာမသင်ရသေးဘဲ ပိဋကတ်တော် ပါဠိစာပေများကို ကျနစွာ ဖတ်ပြနိုင်သူ ဖျာပုံမှ ၃-နှစ် သမီးကလေးအကြောင်း ပြောပြခဲ့သည်။
ထို့ပြင် ကျွန်းလှနယ်၊ ပုတီးရွာနေ ဘ၀ဟောင်းက မျောက်ဖြစ်ပြီး ယခုဘ၀တွင် လူဖြစ်၍ ရဟန်းတော်ဖြစ် နေသော ဦးဒီပကိုလည်း မိမိကိုယ်တိုင် မြင်တွေ့ရကြောင်း ပြောပြသည်။
ထိုမှတပါး ခွေးဘ၀ကသေဆုံးပြီး လူဖြစ်လာသော မြင်းခြံခရိုင် မိဖုရားရွာမှ မောင်တိုက်စိုး-အကြောင်း၊ လယ်ပုစွန်လုံးဘ၀မှ လူဖြစ်လာသော မီးလောင်ကျွန်းရွာသူ မယ်တင်အကြောင်း စသည့် ဖြစ်ရပ်မှန်တို့ကိုလည်း သက်သေပြု၍ မိန့်တော်မူခဲ့သည်။ ထိုအကြောင်းတို့ကို ဒေါက်တာ ဦးမြင့်ဆွေ မေး၍ မဟာစည်ဆရာတော်ကြီး ဖြေကြားတော်မူသော ဘ၀ပြဿနာ-စာအုပ်တွင် အသေးစိပ် ဖော်ပြထားသည်။

ထို့ပြင် ကမ္ဘာ့ဗုဒ္ဓဘာသာလောကတွင် ထင်ရှားသော ဂျာမန်ဘုန်းတော်ကြီး အရှင်ဉာဏိတိလောက (၁၈၇၈-၁၉၅၇) သည် သူရေးသားပြုစုသော ပြန်လည်မွေးဖွားခြင်းကျမ်း-၌ တမလွန်ဘ၀ ရှိကြောင်းကို အခိုင်အမာ ရေးသားထားသည်။

ဤသို့ရေးသားရာ၌ အရှင်ဉာဏတိလောကက သတ္တ၀ါတစုံတဦးအဖို့ သေဆုံးပြီးနောက် ဘ၀သည် မပြတ်၊ နောင်တမလွန်ဘ၀သို့ ဆက်ရသည်သာ ဖြစ်သည်။ ယင်းသို့ ဘ၀ဆက်ကြောင်းကို လူဝင်စားများကို လေ့လာခြင်းဖြင့် ကောင်းစွာသိနိုင်သည်။ မိမိသည် မြန်မာနိုင်ငံနှင့် အခြားဒေသများ၌ လူဝင်စားများကို စူးစမ်းလေ့လာရာတွင် ဘ၀ဟောင်းကို မှတ်မိကြကြောင်း ခိုင်လုံစွာ သိရသည်-ဟူ၍ ဖော်ပြထားသည်။

ထို့နောက် ဆရာတော်ကြီးက-ယခင်ဘ၀များ၏ အထုံပါရမီကြောင့် ဘင်သန် (အင်္ဂလိပ်) သည် အသက် လေးနှစ်အရွယ်တွင် ဂရိဘာသာနှင့် လက်တင်ဘာသာတို့ကို ကောင်းစွာရေးတတ်ခဲ့သည်။
စတူးမီးလ် (အင်္ဂလိပ်) သည် သုံးနှစ်သားအရွယ်မှာပင် ဂရိဘာသာစာကို ဖတ်တတ်၍ ခြောက်နှစ်အရွယ်တွင် ရောမရာဇ၀င်ကို ရေးနိုင်ခဲ့သည်။
မက်ကောလေး (အင်္ဂလိပ်) သည် အသက်ခြောက်နှစ်အရွယ်တွင် ကမ္ဘာ့သမိုင်းကို ရေးနိုင်ခဲ့သည်။
ဘီသိုဘင် (ဂျာမန်) သည် ခုနစ်နှစ်အရွယ်တွင် လူထုပရိသတ်ရှေ့မှောက်၌ ဂီတကို တီးမှုတ်ပြခဲ့သည်။
မိုးဇက် (သြဇထရီးယန်း) သည် ခြောက်နှစ်မပြည့်မီကပင် သီးချင်းများ ရေးစပ်နိုင်ခဲ့သည်။
ဘော်လတဲယား (ပြင်သစ်) သည် သုံးနှစ်သားအရွယ်ကပင် လာဖောင်တိန်၏ ဒဏ္ဍာရီများကို ဖတ်ရှုနိုင်ခဲ့သည်။
ထိုသို့ စွမ်းဆောင်နိုင်မှုများမှာ ဉာဏ်ကောင်းမှုနှင့် မဆိုင်၊ ဉာဏ်ထက်မြက်မှုနှင့် မပတ်သက်။ ဉာဏ်ကောင်းသူ၊ ဉာဏ်ထက်မြက်သူ အများအပြား ရှိသော်လည်း ထိုသို့ မစွမ်းဆောင်နိုင်။ ယခင်ဘ၀၏ အထုံပါရမီကြောင့်သာ ထိုသို့ စွမ်းဆောင်နိုင်ခြင်းဖြစ်ပေသည်-ဟူ၍ စိတ်ဝင်စားဖွယ် ရှင်းလင်းတင်ပြထားသည်။

ဤကား တမလွန်ဘ၀ ရှိကြောင်းကို ဖော်ပြချက်များအနက် ထင်ရှားသော ဆရာတော်ကြီးနှစ်ပါး၏ ခိုင်မာစွာ မိန့်ဆိုချက်များပင် ဖြစ်ပေသည်။ တမလွန်ဘ၀သည် ဧကန်မုချရှိသည်။ ထို့ကြောင့် တမလွန်ဘ၀ရှိသည်ဟု ယုံကြည်သူတို့သာလျှင် ဗုဒ္ဓဘာသာဝင် ဖြစ်လာနိုင်ပေသည်။

No comments: