Thursday, November 11, 2010

သစ္စာစွမ်းအင်

စာရေးသူသည် ၁၃၆၁-ခုနှစ်မှစ၍ နေ့စဉ် ပရိတ်ကြီး ၁၁-သုတ် သုံးခေါက်နှင့် ပဋ္ဌာန်းပစ္စယနိဒ္ဒေသ သုံးခေါက် မှန်မှန်ရွတ်ဆိုပူဇော်ခဲ့ပါသည်။ ထိုကုသိုလ်အကျိုးကြောင့် အဆောက်အဦးနှင့် အစာအာဟာရ ပြည့်ဝစေလိုသော ရည်ရွယ်ချက်လည်း ပါခဲ့ပါသည်။

ပရိတ်၊ ပဋ္ဌာန်း မရွတ်ဆိုမီတွင် နတ်မြတ် နတ်ကောင်း နတ်အပေါင်းတို့ကို ပရိတ်ပဋ္ဌာန်း တရားနာယူရန် ဖိတ်ခေါ်၍ တကြိမ်ရွတ်ဆိုပြီးတိုင်းလည်း အမျှဝေ မေတ္တာပို့ခဲ့ပါသည်။
ထိုအကျိုးကြောင့် အစာအာဟာရနှင့် အဆောက်အဦးများ ဆန္ဒအလျောက် ဖြစ်ပေါ်ပြည့်စုံလာသည်ကို တွေ့ရပါသည်။ အထူးသဖြင့်ကား စာရေးသူကို ရုပ်ပျက်ဆင်းပျက် ဣနြေ္ဒပျက်စေနိုင်သည့် မိုးရေမမိခြင်း အကျိုးပင် ဖြစ်ပါသည်။

မိုးများသော အရပ်ဒေသတွင် စာရေးသူမှာ မိုးမမိဘဲ မိုးနည်းသောဒေသသို့ စာရေးသူ ရောက်သွားသောအခါ မိုးရွာလာခြင်းကို ထူးခြားစွာ ကြုံတွေ့ရတတ်ပြန်ပါသည်။
သို့သော်လည်း မိုးရွာမှု ရပ်စေလိုသောအခါတိုင်း မိုးရွာမှု မရပ်ခြင်း၊ မိုးရွာစေလိုသော အခါတိုင်း မိုးမရွာခြင်းတို့ကြောင့် တိုက်ဆိုင်မှု ဖြစ်တာပါဟု မယုံရဲ ယုံရဲ ဖြစ်နေပါသည်။

၁၃၇၁-ခုနှစ် တော်သလင်းလကုန် သီတင်းကျွတ်လဆန်းအခါ သမယ၌ စာရေးသူတို့ဒေသတွင် မိုးသည်းထန်စွာ ရွာသွန်းနေပါသည်။
စာရေးသူတို့၏ ကျောင်းတိုက်တွင် ပန်းရန်လုပ်ငန်း လုပ်ဆောင်မှုကိစ္စ ရှိနေ၏။ သီတင်ကျွတ်လဆန်း ၇-ရက် (၂၅-၉-၀၉) နေ့တွင် မိုးသည် လင်းလိုက် ရွာလိုက်နှင့် သူ့တာဝန်သူ ထမ်းဆောင်နေပါသည်။

စာရေးသူသည် မြတ်မင်္ဂလာစာအုပ် အဟောင်းများ ဖတ်ရှုနေရာ အတွဲ ၂၃-အမှတ် ၅-ပါ ဆရာစန္ဒြ၏ မြန်မာလူထုနှင့် ဗေဒင်ကျမ်းများ(၂) ဆောင်းပါးတွင်-
အကျွန်ုပ်သည် ကုသိုလ်ကောင်းမှုလုပ်တိုင်း၊ ဘုရားရှိခိုးတိုင်း၊ သီလဆောက်တည်တိုင်း၊ ဆွမ်းတော်တင်တိုင်း၊ ကြီးကျယ်သောအလှူများ လုပ်တိုင်း မိုးနတ်သား၊ လေနတ်သား၊ နေနတ်သား၊ လနတ်သားတို့ကို ထည့်၍ အမြဲတမ်း အမျှပေးဝေသည်။ မေတ္တာပို့သည်။ အကြောင်းရှိလျှင် တကယ်ကြီးကျယ်သော အခက်အခဲများ ကြုံလာပါက မိမိအမျှပေး၊ မေတ္တာပို့သောနတ်များကို အကူအညီ တောင်းကြည့်ရတတ်သည်-ဟု ဦးဝိဇ္ဇာဗလ ဆရာတော်က အမိန့်ရှိကြောင်း ပါရှိသည်။

တဖန် ဆောင်းပါးတွင်-နတ်များကို စကားပြောလျှင် နှုတ်ကဖွင့်၍ ဆိုရသည်မဟုတ်။ အသက်ကိုအောင့်ထားပြီးလျှင် စိတ်ဖြင့်ပြောရသည်-ဟု ပါရှိပြီး နေပူသက်သာအောင် နေနတ်သားအား တိုင်တည်သစ္စာဆိုပုံ၊ နေအေးသွားပုံတွေ ပါရှိ၏။
စာရေးသူ ထိုဆောင်းပါးကိုဖတ်ပြီးချိန် နေ့လယ် ၂-နာရီခွဲတွင် မိုးသည်းထန်စွာ ရွာသွန်းလာပါသည်။ ပန်းရန်လုပ်ငန်းလည်း ရပ်ဆိုင်းရပါပြီ။ မိုးကောင်းကင်တပြင်လုံးလည်း ညိုမှောင်လျက် မိုးရွာရပ်မည့် အနေအထား မရှိပါ။ သို့သော် ပန်းရန်လုပ်ငန်း အလုပ်ပျက်မှာကို အလိုမရှိပြန်ပါ။ သို့ဖြင့် ဖတ်ပြီးသော ဆောင်းပါးကို လက်တွေ့အသုံးချရန် မယုံရဲ ယုံရဲဖြင့် စာရေးသူ သစ္စာဆိုခဲ့ပါသည်။

ရှေးဦးစွာ အသင်မိုးနတ်မင်းကြီး ကိုယ်စိတ်နှစ်ဖြာ ကျန်းမာချမ်းသာပါစေ-ဟု မေတ္တာပို့ပြီး အသက်အောင့်ကာ-
အသင် မိုးနတ်မင်း၊ အကျွန်ုပ်သည် ပရိတ်ပဋ္ဌာန်း ရွတ်ဆိုပြီးတိုင်း အသင်နတ်မင်းအား အမျှပေးဝေ၊ မေတ္တာပို့သခဲ့ပါသည်။ ဤနေရာဌာနတွင် ပန်းရန်လုပ်ငန်း လုပ်ဆောင်နေပါသည်။ ဤမှန်ကန်သော သစ္စာစကားကြောင့် ဤနေရာ ဤဒေသတွင် မိုးများလင်းပေးပြီး မိုးအလိုရှိသောဒေသ၌ ရွာသွန်းဖြိုးပေးပါလော့-ဟု တိုင်တည်သစ္စာပြုလိုက်ပါသည်။

ထို့နောက် မိုးကောင်းကင်ကို ကြည့်လိုက်သောအခါ ရပ်ဆိုင်းမည့်အနေအထားမရှိ၊ ညှို့မှိုင်းလျက်သာ ရှိနေပါသည်။ မိုးလည်း ရွာသွန်းနေပါ၏။
စာရေးသူလည်း ၂-နာရီခွဲမှ ၃-နာရီခွဲထိ လုပ်ငန်းတာဝန်ချိန်ရှိသဖြင့် အလုပ်ထဲမှာပင် စိတ်ဝင်စာေးန၍ မိုးကို သတိမရ၊ စောင့်၍လည်း မကြည့်ဖြစ်တော့ပါ။ ၃-နာရီခွဲ လုပ်ငန်းတချိန်ပြီး၍ မိုးကိုသတိရသဖြင့် ကြည့်လိုက်သောအခါ မိုးမှာမရွာတော့ပါ။ ပန်းရန်ဆရာများလည်း ပန်းရန်အလုပ်လုပ်နေကြပါပြီ။

ထိုအခါကျမှ သစ္စာစွမ်းအင်ကို ယုံကြည်မိပါတော့သည်။ ဤသို့ သစ္စာစွမ်းအင်နှင့် တွေ့ကြုံခွင့်ရခြင်းမှာ မိမိကိုယ်တိုင် ၁၀-နှစ်ကြာ ပရိတ်ပဋ္ဌာန်း ရွတ်ဆို၍ နတ်မြတ်နတ်ကောင်းတို့အား အမျှပေးဝေခြင်း၊ မေတ္တာပို့ခြင်း၊ မြတ်မင်္ဂလာစာစောင်ဖတ်၍ နည်းလမ်းသိရှိခြင်းတို့ကြောင့်ဟု ယူဆမိပါသည်။

အရှင်ဉာဏ (ရတနာသုခ) မိုးကုတ်
(မြတ်မင်္ဂလာ ၂၀၁၀-ခု ဧပြီလ)

No comments: