Tuesday, December 28, 2010

ကျောက်ကပ်ရောင်ရောဂါ

မြို့စွန်တနေရာတွင် ကြီးမားလှသော ညောင်ပင်ကြီးတပင်ရှိ၏။ ထိုညောင်ပင်ကြီးနှင့် မလှမ်းမကမ်းတွင် လမ်းပြကြယ်-အမည်ရှိ ကိုယ်ပိုင် ဆေးကုဂေဟာတခု တည်ရှိ၏။ ထိုဂေဟာပိုင်ရှင် ဒေါက်တာ ဇင်မင်းမောင်သည် လွန်စွာသဘောကောင်းသူ ဖြစ်၏။ ချို့တဲ့သူများအား မေတ္တာဖြင့် ကူညီတတ်၏။ ထိုဂေဟာအား အများပြည်သူက ရွှေညောင်ပင် ဆေးခန်း-ဟု အမည်ပေးထားသကဲ့သို့ ဒေါက်တာဇင်မင်းမောင်အား ရုက္ခစိုးကြီး-ဟု ကွယ်ရာတွင် ခေါ်ဝေါ်ကြ၏။

ချို့တဲ့သူများအဖို့ ဒေါက်တာဇင်မင်းမောင်သည် ကယ်တင်ရှင်ရုက္ခစိုးကြီးပင် ဖြစ်၏။ အသက်အန္တရာယ်နှင့် လက်တကမ်းနီးကပ်နေသူ လူနာတဦးအဖို့ အနီးရှိ ဒေါက်တာဇင်မင်းမောင်ကိုသာ အားကိုးရ၏။ အရေးပေါ် ကုသပေးမှုများပြုလုပ်၍ ကယ်ခဲ့ရသော အသက်ပေါင်း မနည်းတော့ပြီ ဖြစ်၏။

တပည့်ကလေး မောင်စိန်ဝင်းကလည်း လွန်စွာသွက်လက် ဖျတ်လတ်၏။ အလိုက်သိကာ အကင်းပါးသူဖြစ်၏။ ဆရာဖြစ်သူက အားနည်းနေသူကို စမ်းသပ်နေချိန်တွင် မောင်စိန်ဝင်းက ထိုးဆေးပုလင်းဖောက်၍ တခါသုံးဆေးထိုးပြွန်ဖြင့် စုပ်ပြီးသားဖြစ်နေ၏။

ယခုလည်း ဆိုက်ကားတစီးဝင်လာသည်နှင့် ဆေးခန်းဝသို့ အပြေးအလွှားရောက်သွားကာ လူနာကလေးနှင့် မိခင်ဖြစ်သူအား ဆီးကြိုလိုက်၏။
ကလေးအး ပွေ့ချီ၍ ခုတင်ပေါ် တင်ပေးလိုက်၏။
ခြေများအမ်းကာ မျက်နှာကလေးက ပြည့်တင်းဖောင်းကားနေသော ထိုကလေး၏ အမည်မှာ မောင်ကြွက်နီဖြစ်၏။ လက်လုပ်လက်စား လူတန်းစားမိဘများသည် ကလေးငယ်များအား ကြွက်နီ၊ ၀က်သိုး၊ ဆင်ပေါက် စသော အမည်များလို လွယ်လင့်တကူပေးထားတတ်၏။

ထိုကလေးသည် တကိုယ်လုံး ၀ဲတွေနှင့် ဖြစ်၏။ မိခင်ဖြစ်သူက နွမ်းပါးဟန်တူ၏။ ကလေး နေမကောင်းသည်မှာ ကြာပြီဖြစ်သော်လည်း ဆေးမြီးတိုများဖြင့်သာ ကုသနေဟန်တူ၏။
ဒေါက်တာဇင်မင်းမောင်၏ ကြိုတင်မှန်းဆချက်များ ဒဏ်ထိ မှန်ကန်နေကြောင်း ရောဂါရာဇ၀င် မေးမြန်းရာမှ သိရှိလိုက်ရ၏။
ကလေးငယ်သည် ဆီးသွားပါက သွေးပါ၏။ သွေးပါနေသော်လည်း မိခင်က ကြောက်ရလန့်ရမှန်း မသိသေးပေ။ ကျန်မာရေးဗဟုသုတ ခေါင်းပါးလှ၏။

ကျောက်ကပ်ရောင်ရောဂါ၏ နောက်ဆက်တွဲရောဂါအနေဖြင့် သွေးပေါင်လွန်စွာတက်သွားရာမှ ကလေး သတိလစ်သွားမှပဲ လန့်ဖျပ်ကာ ဆေးရုံရောက်လာခြင်းဖြစ်၏။
ခင်မင်းရင်းစွဲရှိသူ ဆိုက်ကားဆရာ ကိုငှက်ရိုးသာ မကူညီပါက ကလေးမိခင်အဖို့ ဆိုက်ကားခပေးရန် ချေးရငှားရဦးမည် ဖြစ်၏။
ကိုငှက်ရိုး၏ အားပေးစကားကြောင့် ကယ်တင်ရှင် ရုက္ခစိုးကြီးထံသို့ ဆိုက်ဆိုက်မြိုက်မြိုက် ရောက်လာခြင်းဖြစ်၏။

သွေးပေါင်တအားတက်နေခြင်းသည် စိုးရိမ်စရာ အခြေအနေ ဖြစ်၏။
ဒေါက်တာဇင်မင်းမောင်သည် အရေးပေါ်ကုသမှုကို တပည့်ကလေး မောင်စိန်ဝင်း၏ အကူအညီဖြင့် လျင်မြန်သွက်လက်စွာ လုပ်ဆောင်ပေးလိုက်၏။ ၄င်းနောက် အငှားယာဉ်မောင်းသမား ကိုမြသာအား အကူအညီတောင်းကာ ဆေးရုံသို့ ဆောလျင်စွာ ပို့်လိုက်၏။

လူနာနှင့် ကလေးမိခင် ထွက်ခွါသွားပြီးနောက် မူလတန်းကျောင်းဆရာ ကိုလှအေးရောက်ရှိလာ၏။ ကိုလှအေးသည် ကျန်းမာရေး ဗဟုသုတ ရှာမှီးလေ့ရှိ၏။ ဒေါက်တာဇင်မင်းမောင်ကို အားမနာတမ်း မေးမြန်းတတ်၏။
ဟား---ကိုလှအေးပါလား။ ထိုင်ဗျာ ဘယ်က လှည့်လာတာလဲ။
ဒီနေ့ ကျောင်းမှာ အမျိုးသားအောင်ပွဲနေ့ အခမ်းအနားလုပ်တယ်ဆရာ။ အဲဒီကပြီးလို့ ဆရာ့ဆီလှည့်လာတာ။
အမျိုးသားအောင်ပွဲနေ့ဆိုတော့ ရုံးပိတ်ရက်ပဲ။
ဟုတ်ပါတယ် ဆရာ၊ ရုံပိတ်ရက်ပါဆရာ၊
ကျွန်တော့်မှာတော့ ဆေးခန်းပိတ်ရက် မရှိပါဘူးဗျာ။ နားမနေရပါဘူး။ တနေ့ ၂၄-နာရီ ဆိုပါတော့ဗျာ။

ရောဂါဆိုတာက အချိန်မရွေး ထဖြစ်နိုင်တာပဲမဟုတ်လားဆရာ၊ ဆရာတို့ ရှိနေမှပဲ တောင်ဘက်ရပ်ကွက်က လူနာတွေ အဆင်ပြေမှာပါဆရာ၊
လမ်းပြကြယ်-ဆေးခန်းတောင်ဘက်ရှိ ရပ်ကွက်က လက်လုပ်လက်စား ရပ်ကွက်ဖြစ်၏။ တရပ်ကွက်လုံး ဒေါက်တာဇင်မင်းမောင်ကို အားကိုးနေကြရ၏။ အထူးသဖြင့် အရေးပေါ် အခြေအနေတွင် ကိုငှက်ရိုးနှင့် အတူ ရောက်လာတတ်၏။
ဟုတ်ပါတယ်ဗျာ၊ ဒါကြောင့်လည်း ကျွန်တော်မနားဘဲ ဖွင့်နေရတာဗျ။ အဲဒီရပ်ကွက်က လူနာတွေက မေတ္တာနဲ့ ကူညီရတာများပါတယ်။

ကုသိုလ်ရတာပေါ့ဆရာ၊ စောစောက ကိုမြသာ တက္ကစီ ထွက်သွားတာ တွေ့တယ်။ လူနာ ဆေးရုံပို့တာ ထင်တယ်။
ဟုတ်တယ်၊ ကျောက်ကပ်ရောင်ပြီး သွေးပေါင်တွေ တအားတက်နေလို့ ဆေးရုံပို့လိုက်တာဗျ။ အရေးပေါ် အခြေအနေပဲဗျ။
လူနာ နာမည်က ဘယ်သူတဲ့လဲဆရာ၊
မောင်ကြွက်နီတဲ့ဗျ။ ရှစ်နစ်ပဲရှိသေးတယ်။
ဟာ---ကျွန်တော့ တပည့်ကလေးပဲ။ သူက အဖေမရှိဘူး။ အမေက ဈေးရောင်ရတယ်။ ချို့တဲ့တော့ ကျောင်းဆက်မနေနိုင်ရှာဘူး။ တတန်း နှစ်တန်းပဲ နေလိုက်ရတယ်။ ကျောင်းစရိတ် မတတ်နိုင်လို့ ကျောင်းထွက်လိုက်ရတယ်။

အေးဗျာ--သနားစရာပါလား။
ဟုတ်တယ်ဆရာ၊ တကယ့်ကို ဆင်းရဲတာပါ။ ကျန်းမာရေး ဗဟုသုတကလည်း နည်းတော့ တကိုယ်ရေ သန့်ရှင်းရေးလည်း မရှိဘူး။ တကိုယ်လုံး ၀ဲတွေချည်းပဲ။
ဖွံ့ဖြိုးပြီးနိုင်ငံက ဆရာဝန်တွေဆိုရင် ၀ဲမြင်ဖူးပါ့မလား ဆရာ။
ဘယ်မြင်ဖူးမလဲ ကိုလှအေးရယ်၊ စာတွေ့ပဲ ရှိမှာပေါ့၊
စောစောက ကလေးလူနာက ၀ဲတွေကုပ်တော့ အနာတွေဖြစ်၊ အနာတွေကို ပိုးဝင်၊ ပိုးဝင်ရာက နောက်ဆက်တွဲအနေနဲ့ ကျောက်ကပ်ရောင်လာရော၊

မူလတရားခံက ၀ဲပါလား ဆရာရယ်၊
ဟုတ်ပါတယ် ကိုလှအေး၊ ဒီရောဂါကို ဆေးပညာဝေါဟာရ အနေနဲ့ ACUTE POSTSTRPTOCOCCAL GLUMERULO NEPHRITIS လို့ခေါ်တယ်။ ကျောက်ကပ်ရောင်လာရင် ခြေခုံတွေ အန်းတယ်။ မျက်နှာဖောရောင်လာတယ်။ ဆီးမည်းမည်းတွေ သွားမယ်။ တချို့ကျတော့ ဆီးထဲမှာ သွေးအတိုင်း တွေ့တယ်။ ဆီးထဲမှာ အနည်တွေပါတယ်။ ဆေးပညာမှာတော့ ဆီးထဲမှာ သွေးပါတာကို HAEMATURIA လို့ခေါ်တယ်။ ဆီးထဲမှာ အသားဓာတ်ပါတာကို PROTEINURIA လို့ ခေါ်တယ်။
ဟုတ်ကဲ့ဆရာ

ဒီရောဂါက သွေးပေါင်တက်တတ်တယ်။ စောစောက မောင်ကြွက်နီလို သွေးပေါင်တအားတက်ရင် အရေးကြီးတယ်။ အသက်အန္တရာယ်ရှိတယ်။ အရေးပေါ် ကုသဖို့လိုတယ်။ ကုတာနောက်ကျရင် ရေတိမ်နစ်သွားနိုင်တယ်။
စောစောက ဆရာပြောသွားတဲ့ လက္ခဏာတွေနဲ့လာရင် ကျောက်ကပ်ရောင်တယ်လို့ မသင်္ကာဘူးပေါ့နော်။ ဒါဆို သေချာအောင် ဘာတွေ စစ်သင့်လဲဆရာ။

ပထမဆုံး ဆီးစစ်ကြည့်ရမယ်။ URINE FPR ROUTINE EXAMINATION လို့ ခေါ်တာပေါ့ဗျာ။ ဆီးသွားတဲ့အကြိမ်အရေအတွက်တို့ ဆီးနည်း မနည်း စတာတွေကတော့ ပါးစပ်နဲ့ မေးလို့ရတယ်။ ဆီးအရောင်၊ အနံ့၊ သွေးပါ မပါ၊ အသားဓာတ် ပါ-မပါ၊ သကြား ပါ-မပါ၊ SPECIFIC GRAVITY ဒါတွေကြည့်ရမယ်။ ပြီးရင် အဏုကြည့် မှန်ဘီလူးနဲ့ ကြည့်ရမယ်။ PUS CELL, EPITUELIAL CELL, CAST, RED CELL. CRYSTAL စတာတွေကို ကြည့်ရမယ်။ လိုအပ်ရင် တခြားစမ်းသပ်ချက်တွေပါ လုပ်နိုင်တယ်။
ဟုတ်ကဲ့ဆရာ

အာသီးရောင်ပြီးမှဖြစ်တဲ့ ကျောက်ကပ်ရောင်ရောဂါဆိုရင် A-S-O တိုင်းရမယ်။ ပြီးတော့ ကျောက်ကပ်ရောင်တာက ကိုယ်ခံစွမ်းအားစနစ်က ပဋိပစ္စည်းတွေနဲ့ ပြင်ပက ပဋိလှုံ့ပစ္စည်းတွေ ထိတွေ့ ဓာတ်ပြုတာကြောင့် ဖြစ်တာ။ ဆေးပညာမှာတော့ IMMUNE MECHANISM လို့ ခေါ်တယ်။ ဒါကြောင့် သွေးရည်ကြည်ထဲက COMPLEMENT လို့ခေါ်တဲ့ ဓာတုဒြပ်ပေါင်းတွေကိုတိုင်းတာ ကြည့်တယ်။ SERUM C3 နဲ့ C4 လို့ ခေါ်တယ်။
ကျောက်ကပ်ရောင်ရောဂါမှာ SERUM C3 နဲ့ C4 က ပုံမှန်ထက် နည်းနေတယ်။ အရေပြားက အရည်ကြည်ကိုယူပြီး ၀ဲအတွက် စစ်ကြည့်နိုင်တယ်။

ရောဂါအလားအလာက ဘယ်လိုနေလဲဆရာ-
ရောဂါအလားအလာကို PROGNOSIS လို့ခေါ်တယ်။ ကလေးငယ်တွေမှာ Prognosis ကောင်းတယ်။ ဖိဖိစီးစီးကုလိုက်ရင် နှစ်ပတ်လောက်ဆိုရင် ပျောက်သွားတာပါပဲ။ လူနာအနည်းစုမှာ နောက်ဆက်တွဲရောဂါတွေ ဖြစ်တတ်တယ်။ တချို့က Rapidly Progressive Glomerulo Nephritis လို့ခေါ်တဲ့ ပြင်းထန်တဲ့ ကျောက်ကပ်ရောဂါဘ၀ကို ကူးပြောင်းသွားတတ်တယ်။ အဲဒီကနေ အခြေအနေပိုဆိုးလာရင် Acute renal failure လို့ခေါ်တဲ့ ရုတ်တရက်ကျောက်ကပ်စွမ်းဆောင်ရည် ကျဆင်းတဲ့ ရောဂါဘ၀ကို ရောက်သွားတတ်တယ်။ အတိုကောက် ARF ခေါ်တာပေါ့၊ ARF ဖြစ်ရင် အဖိတ်အစဉ်ရှိတတ်တယ်။
ဟုတ်ကဲ့ဆရာ

ဒီရောဂါကို ကြိုတင်ကာကွယ်ချင်ရင် ကလေးငယ်တွေမှာ ၀ဲရောဂါရယ်၊ အာသီးရောင်ရောဂါရယ် မဖြစ်အောင် ကြိုတင်ကာကွယ်ရမယ်။ ၀ဲ ရောဂါကတော့ တကိုယ်ရေသန့်ရှင်းရေး အားနည်းလို့ ဖြစ်တာ။ မိဘတွေက ကလေးငယ်တွေရဲ့ တကိုယ်ရေ သန့်ရှင်းရေးကို ဂရုစိုက်ရမယ်။ အာသီးရောင်ရောဂါအတွက်ကတော့ မနက်စောစော ဆားရည်နဲ့ အာလုတ်ကျင်းပေးရင် ရပါတယ်။

အာသီးရောင်တာက တယောက်နဲ့တယောက် ကူးစက်တတ်တယ် မဟုတ်လားဆရာ-
တိုက်ရိုက်တော့ မကူးစက်ဘူးဗျ။ ပိုးတွေက လေထုထဲကနေ ကူးစက်တာ။ အဲဒီတော့ ချောင်းဆိုးရင်၊ နှာချေရင် လက်ကိုင်ပုဝါ သုံးရမယ်။ ဖုန်ထူတဲ့အရပ်၊ လူထူတဲ့အရပ်တွေ ရှောင်ရမယ်။ ပွဲလမ်းသဘင်တွေ မသွားနဲ့ပေါ့ဗျာ။
ဟုတ်ကဲ့ပါဆရာ။

ကိုလှအေးက ကျောင်းဆရာဆိုတော့ ကလေးငယ်တွေနဲ့ရော၊ မိဘတွေနဲ့ရော ထိတွေ့နေရတာပဲ။ တတ်နိုင်သလောက် ပညာပေးပေါ့ဗျာ၊
ဟုတ်ကဲ့ဆရာ၊ ကျွန်တော် ကြိုးစားပါ့မယ်၊
ထိုစဉ် ဆိုက်ကားဆရာ ကိုငှက်ရိုးက လက်ဖက်ရည်နှစ်ခွက် ယူလာ၏။
သုံးဆောင်ပါ ဆရာ၊ အရင်အပတ်က ဆရာဆေးရုံတင်ပေးလိုက်တဲ့ လေဖြတ်သွားတဲ့ အဘိုးကြီးရဲ့သားက ၀ယ်ပေးလိုက်တာပါဆရာ။
အေး--အေး--ထားခဲ့ကွာ၊
ကိုငှက်ရိုး ပြန်ထွက်သွား၏။
ကဲ ကိုလှအေး သောက်ဗျာ၊ ဖွံ့ဖြိုးပြီးနိုင်ငံတွေက လူနာတွေဟာ ဆရာဝန်ကို တရားစွဲဖို့ချောင်းနေကြတာ၊ ခုလို လက်ဖက်ရည် တိုက်ဖို့ သတိရမှာ မဟုတ်ဘူး။
ဒါပေါ့ ဆရာရယ်၊ မြန်မာပြည်က မြန်မာလူနာတွေက ချစ်ဖို့ကောင်းတယ်။ ကျေးဇူးသိတတ်တယ်။ လက်ဖက်ရည်က လမ်းဘေးလက်ဖက်ရည်ဆိုင်ကဆိုတော့ သိပ်တော့ မကောင်းဘူး ဆရာ။ ဒါပေမယ့် စေတနာကတော့ တန်ဖိုးဖြတ်လို့ကို မရပါဘူး ဆရာရယ်။
သိပ်မှန်တာပေါ့ ကိုလှအေးရာ၊
ဒေါက်တာ ဇင်မင်းမောင်၏ လျှာပေါ်က လက်ဖက်ရည်သည် ချိုမြိန်လွန်းလှ၏။

ပါမောက္ခ ဒေါက်တာအောင်ကြီး။
( မဟေသီ ၂၀၀၉-ဖေဖေါ်ဝါရီလ)

No comments: