Friday, January 7, 2011

တိုတဲ့လျှော်က တို - ရှည်တဲ့လျှော်က ရှည်

တောင်ပေါ်က ရှမ်းကလေး
လျှော်ထမ်းလို့ပြေး
တိုတဲ့လျှော်က တို
ရှည်တဲ့လျှော်က ရှည်
(ရှေးကဗျာ Tongue Twister)

Tongue Twister ဆိုတာက ပြောရဆိုရခက်တဲ့ စကားပါ။
ကျွန်တော် အမေရိကန်ပြည်ထောင်စုကို ရောက်နေတော့ ဒီကဗျာကို သတိရသွားတယ်။ ဒီအရပ်မှာ အင်မတန်တော်တဲ့သူလည်း ရှိတယ်။ အင်မတန်ညံ့တဲ့သူတွေလည်း ရှိတယ်။ ချမ်းသာသူတွေ အများကြီးပါ။ ဆင်းရဲသူကတော့ နည်းပါတယ်။ ရှိတယ်။ ဒါပေမဲ့ ကဗျာထဲမှာ ရှမ်းကလေးက လျှော်ထမ်းတဲ့အခါ တိုတာတွေလည်း ပါလာတယ်။ ရှည်တာတွေလည်း ပါလာတယ်။ လောကဓမ္မတာပါပဲ။ ဒီအထဲကနေ သူလိုချင်တဲ့ လျှော်တွေကို ရွေးထုတ်ယူရတာပါပဲ။

ကျွန်တော်လည်း ဒီအမေရိကန်ပြည်ထောင်စုက လူတွေ လျှော်ထမ်းတာကို အားကျတယ်။ ရှည်ချင်ရှည်မယ်၊ တိုချင်တိုမှာပဲ။ လျှော်တွေထဲမှာ အဖြူတွေလည်း ရှိတယ်။ အမည်းတွေလည်း ရှိတယ်။ မည်းချင်မည်းမယ်၊ ဖြူချင်ဖြူမယ်။ ကြည့်တတ်ရင် အဖြူလည်းလှတယ်။ အမည်းလည်း လှတာပါပဲ။

အလှအပတွေနဲ့ မလှမပတာတွေကြားက အလှအပတွေဖြစ်လာအောင် အတူတကွ ညီညီမျှမျှရှိစေတဲ့အခါ သာယာလှပမှုတွေ ပိုလာပါတယ်။
ဒီရောက်တော့ ကျွန်တော်တို့နိုင်ငံငယ်တွေ နမူနာယူစရာတွေကို ရေးဖို့ ကြံစည်ရတာပါပဲ။ ရောက်စဖြစ်လေတော့ ကြည့်ရှုစရာတွေကလည်း မကုန်နိုင်ဘူး။ ကျွန်တော်က အလှအပအတွက် Sightseeing တွေ သွားပြီး ကြည့်ဖြစ်တာတွေနည်းတယ်။ အဓိကကတော့ အိုင်တီကုမ္ပဏီတွေကို သွားရောက်လေ့လာတာပါပဲ။

ကျွန်တော်ရောက်နေတဲ့အရပ်က ဆီလီကွန်တောင်ကြား Silicon Valley ဖြစ်နေတယ်။ ကျွန်တော့်မိတ်ဆွေက အဲဒီမှာနေတယ်။ သူလည်း အိုင်တီလုပ်ငန်းလုပ်တယ်။ ဒါကြောင့် အိုင်တီနဲ့ ဆက်စပ်နေတဲ့နေရာတွေကို အဓိကသွားဖြစ်ခဲ့တယ်။

Google၊ Yahoo၊ Cisco၊ Oracle Intel တို့ဆိုတာ အများသိကြပါတယ်။ အဲဒီနေရာမှာ Apple လည်းရှိတယ်။ ဒီနေရာတွေကို လေ့လာခဲ့ရတယ်။ Microft လည်း ရှိတယ်။ IBM လည်းရှိတာပါပဲ။ အများစုကတော့ လူလျော့နေတယ်။ (Down Sizing) လုပ်တယ်လို့ ခေါ်တယ်။

ယနေ့ ကုမ္ပဏီအများစုဟာ တရုတ်ပြည်ကို ရွှေ့နေကြတယ်။
လူတွေဟာ ရေကြည်ရာ မြက်နုရာကိုရွှေ့တာ ကမ္ဘာဦးကာလကတည်းကပါ။
ကမ္ဘာ့အလယ်မှာ မီးခိုးမထွက်တဲ့ သူတို့ရဲ့ စက်ရုံတွေဟာ ဘီလျံပေါင်း များစွာရအောင် လုပ်နိုင်တာကို ချီးကျူးနေမိတယ်။ သူတို့ဟာ ပညာနဲ့ သွားကြတာပါ။
ကျွန်တော်တို့ မကြာခဏ ဆွေးနွေးဖူးပါတယ်။

လယ်(၁၀)ဧကလောက်ကို ထွန်ယက်ပြီးလုပ်ကိုင်တဲ့ လယ်သမားတယောက်ဟာ ဘယ်လောက်ပင်ပန်းသလဲ။ မိုးလေ၀သမှန်ပါမှ တနှစ်တာအတွက် အစားအသောက်အတွက် လုံလောက်ရုံကလေးကိုသာရတယ်။
ဒါပေမဲ့ ဒီမှာတော့ ဆီလီကွန်တောင်ကြားက လူတွေဟာ ပိုက်ဆံကို သက်သက်သာသာနဲ့ ရှာနိုင်ကြတယ်။

ဥပမာ-Google ၀န်ထမ်း တသောင်းကျော်အနက် လူပေါင်း(၁၅၀၀)ကျော်ဟာ သန်းကြွယ်သူဌေးတွေ ဖြစ်နေကြတယ်။ ဒေါ်လာတသန်းထက်ရှိ်သူကို သန်းကြွယ်သူဌေး ခေါ်တာပါပဲ။ ဒေါ်လာတသန်းဟာ တကယ်တော့ ထိုင်စားရင် တသက်လုံး စားလို့မကုန်တဲ့ ငွေကြေးပမာဏပါ။ အင်မတန်များပြားပါတယ်။

ဒီဝန်ထမ်းတွေဟာ ဘာတွေထူးထူးခြားခြားလုပ်ကြတာလဲ။ သူတို့ဟာ ပုံမှန်ပဲ အလုပ်ရတာပါ။
ဘာကြောင့် ဒီလိုရတာလဲ။ ပညာကြောင့်ပါ။ အင်နိုဗေးရှင်း လုပ်တာပါပဲ။
အင်နိုဗေးရှင်းအကြောင်း ရှေးကပြောခဲ့ဖူးပါတယ်။ အသစ်တီထွင်ထားတာတွေကို လူတွေရဲ့လက်ထဲကို အရောက်အသုံးချနိုင်အောင် စီမံပေးတာကို ခေါ်တာဖြစ်တယ်။ ဒီလိုလုပ်တတ်လာဖို့ အစီအမံတွေ အများကြီးပါတယ်။ ပညာကို ရှာရတာပါ။

ပညာကို ဘယ်လိုရှာကြတာလဲ။ တက္ကသိုလ်ကျောင်းတွေကနေ ရှာတယ်။ စာအုပ်တွေ (စာကြည့်တိုက်တွေ)ကနေ ရှာတယ်။
အဲဒီဒေသမှာ စာကြည့်တိုက်တွေ အများကြီးပါပဲ။ တရက်မှာ San jose မြို့က စာကြည့်တိုက်ကို ရောက်သွားတော့ တကယ့်အံ့ကြစရာပါပဲ။ ကျွန်တော်ရောက်တဲ့အချိန်မှာ (၅)နှစ်အတွင်း စာအုပ်ငှါးတဲ့အရေအတွက်ဟာ (၉၉)သန်းကျော်နေပြီဖြစ်တယ်။ စာကြည့်တိုက်မှာ အခမဲ့ကွန်ပျူတာတွေနဲ့ အခမဲ့ အင်တာနက်တွေကို သုံးလို့ရတယ်။ ကလေးစာကြည့်တိုက်လည်း ပါဝင်သေးတယ်။

ကလေးစာကြည့်တိုက်မှာ ထောင်ပေါင်းများစွာသော စာအုပ်တွေရှိတယ်။ ကလေးတွေက်ို စာကြည့်ပညာ သင်ပေးတယ်။ လူကြီးတွေကိုလည်း စာကြည့်တိုက်ကို လှည့်လည်ကြည့်ဖို့ Tour တွေကို လုပ်ပေးတယ်။ စာကြည့်တိုက်ဟာ ကျောင်းကနေ လောကထဲကိုဝင်တဲ့အခါ လိုအပ်တဲ့ပညာပေါင်းကူးပါ။ စာကြည့်တိုက်ဟာ အများစုရဲ့မျက်စိကို ဖွင့်ပေးတဲ့နေရာပါ။

မြန်မာပြည်မှာတုန်းက ကျွန်တော် စာကြည့်တိုက်များစွာကို ရောက်ခဲ့ဖူးပါတယ်။ စာအုပ်တွေကိုလည်း လှူခဲ့ဖူးပါတယ်။
မြန်မာပြည်က စာပေဟောပြောပွဲတွေဟာ စာကြည့်တိုက်ကို အမှီပြုကာ ပြုလုပ်တာများပါတယ်။ ကျွန်တော်လည်း စာကြည့် တိုက်နဲ့ ဆက်နွယ်တဲ့ စာပေဟောပြောပွဲများစွာကို ဟောပြောခဲ့ဖူးပါတယ်။ ဒီအထဲက မှတ်မှတ်ရရ ကြို့ပင်ကောက်စာကြည့်တိုက်အကြောင်း ပြောလိုပါတယ်။ ကြို့ပင်ကောက်ကို မောင်နေမျိုး၊ လယ်တွင်းသား စောချစ်တို့နဲ့အတူ သွားရတယ်။ အဲဒီရောက်တော့ သစ်စက်ထဲက စာကြည့်တိုက်ကို သတိသွားရတယ်။

အဲဒီစာကြည့်တိုက်မှာ စာအုပ်တွေစုံတယ်။ ဖတ်တဲ့သူလည်း များတယ်။ အထူးသဖြင့် စာဖတ်သူများကို ဆုတွေပေးတယ်။ တနိုင်တပိုင်လုပ်ကြတဲ့ စာကြည့်တိုက်တွေထဲမှာ ဥက္ကံက ကောင်းသန့် စာကြည့်တိုက် ကိုလည်း လေ့လာဖူးတယ်။ တိုးတက်တဲ့အမြင်ရှိတဲ့ စာရေးဆရာ၊ ကျောင်းဆရာ၊ ထုတ်ဝေသူတွေဖြစ်တဲ့ ကောင်းသန့်ဟာ သူအမျိုးသားစာပေဆုကရတဲ့ ငွေတသိန်းနဲ့ စာကြည့်တိုက်ကို မ,တည်ခဲ့တာဖြစ်တယ်။

ဒီငွေဟာ မဖြစ်စလောက်ပါ။ ဒါပေမဲ့ သူဟာ စာကြည့်တိုက်အတွက် အစီအမံတွေကို အစအဆုံး ဆောင်ရွက်တယ်။
အစီအမံတွေကတော့ -
(၁) စာကြည့်တိုက်မှူးကို လစာပေး ခန့်ထားခြင်း။ သူက အဲဒီမှာ လစာကို လုံလောက်အောင် ပေးထားပါတယ်။
(၂) စာကြည့်တိုက်မှူးကို စာကြည့်တိုက်ပညာ သင်စေကာ အရည်အသွေး မြှင့်တင်ပေးခြင်း။ စာကြည့်တိုက်မှူး အနေဖြင့် စနစ်တကျ စာကြည့်တိုက်ပညာတတ်စေရန် ရန်ကုန်တက္ကသိုလ် စာကြည့်တိုက်မှာ သွားရောက် သင်တန်းတက်စေတယ်။ သင်တန်းကာလ ခရီးစရိတ်၊ အသုံးစရိတ် ထောက်ပံ့တယ်။
(၃) စာကြည့်တိုက်မှာ လှုပ်ရှားမှုများ ဆောင်ရွက်ခြင်း။
ဥပမာ-စပေဟောပြောပွဲများ၊ အင်္ဂလိပ်စာ သင်တန်းများ၊ ဘာသာရေးကိစ္စများကို ဆောင်ရွက်တယ်။

ဆရာ့ပြောပြချက်အရ ဥက္ကံမြို့မှာ ဆိုက်ကားသမားများလည်း အားတဲ့အခါ စာဝင်ဖတ်တယ်။ ဒီအတွက် ရန်ဖြစ်တာတွေ နည်းသွားတယ်။ ဘာသာရေးဆောင်ရွက်ချက်တွေမှာ ပိုပြီးပါဝင်လာတယ်လို့ သိရတယ်။
ကျွန်တော်တို့ ဘာတွေရသလဲ။ ကဗျာကိုပြန်ကောက်ရင်တော့ လူတွေလျှော်ထမ်းတာကို တွေ့ရမှာပဲ။ လျှော်တွေက ရှည်ချင် ရှည်မယ်၊ တိုချင် တိုမှာပဲ။ လျှော်တွေထဲမှာ အဖြူတွေလည်း ရှိတယ်၊ အမည်းတွေလည်း ရှိတယ်။ အားလုံးကို အသုံးဝင်အောင် လုပ်လို့ရတယ်။
သူ့နေရာနဲ့သူပဲ။
မည်းချင်မည်းမယ်၊ ဖြူချင်ဖြူမယ်။
အရေးကြီးတာက လျှော်ထမ်းခဲ့ဖို့ပါပဲ။

ဒေါက်တာခင်မောင်ညို
(၂၀၁၀-ပြည့် မေလ ၁၅-ရက်နေ့ အက်လန်တာမြို့၊ အမေရိကန်ပြည်ထောင်စုမှ ပေးပို့တာပါ)
( Image 2010-November)

No comments: