Friday, January 14, 2011

သွေး မြင်းသရိုက်အတွက် ဆေးပင်

ယောက်ျားမှာ ဒူလာ၊ မိန်းမမှာ မီးယပ်-ဟု ကျန်းမာရေး ဆိုရိုးစကားရှိသည်နှင့်အညီ ယောက်ျားတို့မှာ အများအားဖြင့် ဒူလာဟုခေါ်သည့် မြင်းသရိုက်နာများကို ဂရုစိုက်ရသကဲ့သို့ မိန်းမများမှာလည်း မီးယပ်(၁၅)ပါးကို ဂရုစိုက်ကြရပါသည်။

ဒူလာ (၁၃)ပါး ရှိပါသည်။
၁။ မြင်းသရိုက်လိပ်ခေါင်း။
၂။ မြင်းသရိုက်ကြက်ဥနာ။
၃။ မြင်းသရိုက်ကြက်ဆူ။
၎။ လေမြင်းသရိုက် လေသာခ။
၅။ ချောင်းဆိုးမြင်းသရိုက်။
၆။ အတွင်းမြင်းသရိုက်။
၇။ သွေးမြင်းသရိုက် သွေးသာခ။
၈။ ဒေါသမြင်းသရိုက်။
၉။ မြေမြင်းသရိုက်။
၁၀။ ဆိတ်ချီးမြင်းသရိုက်။
၁၁။ ခေါင်းသွေးမြင်းသရိုက်။
၁၂။ အကြောမြင်းသရိုက်။
၁၃။ အရေမြင်းသရိုက်-ဟူ၍ ရှိသကဲ့သို့ မိန်းမများမှာလည်း

မီးယပ် (၁၅)ပါးရှိသည်။ ယင်းတို့မှာ---
၁။ မီးယပ်သွေးထ။
၂။ မီးယပ်သွေးပျက်။
၃။ မီးယပ်သွေးရည်နက်။
၎။ မီးယပ်သွေးပုပ်။
၅။ မီးယပ်လေပုပ်။
၆။ မီးယပ်သွေးသနပတ်။
၇။ မီးယပ်လေသနပတ်။
၈။ မီးယပ်မေထုန်သနပတ်။
၉။ မီးယပ်ဖက်သကတ်။
၁၀။ မီးယပ်ဖက်သချာ။
၁၁။ မီးယပ်ပါဒရက်။
၁၂။ မီးယပ်ကိုယ်လုံးရှန်။
၁၃။ မီးယပ်သွေးပုပ် နှလုံးဝင်။
၁၄။ မီးယပ်အာပေါမြင်းသရိုက်။
၁၅။ မီးယပ်လေမြင်းသရိုက်။
စသည်တို့ ရှိကြောင်း ဆေးကျမ်းများတွင် တွေ့ရှိရပါသည်။

မြန်မာတိုင်းရင်း သမားတော်များကလည်း ထိုအခြင်းအရာများထဲမှ မည်သည့်ဒူလာ၊ မည်သည့်မီးယပ်နှင့် ဆက်စပ်မှုရှိသည်ကို ကြည့်၍ ဆေးနည်း ပေးကြရပါသည်။
ယောက်ျားများတွင် ဖြစ်တတ်သော မြင်းသရိုက်ဒူလာများထဲမှ သွေးမြင်းသရိုက်ဆန်သည်နှင့် ပတ်သက်၍ ကုသမှု ပျောက်ကင်းသော ဆေးပင်အကြောင်းကို တင်ပြလိုပါသည်။

သွေးမြင်းသရိုက်ရောဂါ ဖြစ်လာလျှင် တင်ပါးဆုံများ ကိုက်ခြင်း၊ နားထင်နှင့် ဇက်များ ကိုက်ခြင်း၊ ၀မ်းဗိုက်နာကျင်၍ နောက်ဖေးသွားလျှင်လည်း သွေးသာလျှင် အလျင်ပန်းထွက်ခြင်း၊ ပြီးမှ မစင် လိုက်လာခြင်း၊ မစင်တွင်လည်း သွေးစသွေးနများဖြင့် တရဲရဲဖြစ်နေသည်ကို တွေ့ရှိရပြီး ဒုက္ခဝေဒနာများစွာ ခံစားရကြောင်း ဥမှင်ရွာသား ဦးတင်ဦးမှ ပြောပြပါသည်။

ဦးတင်ဦးမှာ သွေးမြင်းသရိုက်ရောဂါအတွက် မိမိတတ်ကျွမ်းနားလည်သော ဆေးနည်းများဖြင့် သုံးစွဲ ကုသသော်လည်း သက်သာပျောက်ကင်းခြင်း အလျှင်းမရှိ၊ ဆေးမတွေ့ဘဲ သွေးမြင်းသရိုက်ရောဂါ မပျောက်တတ်အောင် ဖြစ်နေစဉ် ကျောင်းဆရာ အငြိမ်းစား ဦးစိုးသိန်းနှင့် တွေ့ကာ အောက်ပါဆေးနည်းကို ပေး၍ ဆရာကြီး၏ ညွှန်ကြားသည့်အတိုင်း သုံးစွဲခဲ့ရာ သွေးမြင်းသရိုက်ရောဂါမှာ သက်သာပျောက်ကင်း သွားကြောင်း စာရေးသူအား ပြောပြခဲ့သဖြင့် ထိုဆေးနည်းအား စာဖတ်ပရိသတ်များအား ဆေးနည်းဒါန ဝေငှပေးလိုက်ပါသည်။

သွေးမြင်းသရိုက်ရောဂါဖြစ်လျှင် တောထဲ၌ မအူရွှေဝါပင်ကို ရှာပါ။ မအူအမျိုးမျိုး ရှိပါသည်။ မအူရွှေဝါ၊ မအူလက်ထန်း၊ မအူဖြူ-ဟူ၍ ရှိတတ်ပါသည်။
မအူရွှေဝါပင်သည် အပင်ကြီးဖြစ်ပြီး အရွက်မှာ အစိမ်းရောင်နှင့် (၅)လက်မ၊ (၆)လက်မခန့် ၀ိုင်းဝိုင်းသဏ္ဌာန် ရှိသည်။ အပင်ကို ဓားနှင့် ခုတ်လိုက်လျှင် အခေါက်နှင့်အသားမှာ အ၀ါရောင် ထွက်လာပြီး အရသာမှာ ခါးသည့်အရသာရှိသည်။

သုံးစွဲပုံ နည်းစနစ်မှာ---
မအူရွှေဝါ အရွက် (၇)ရွက် အလျား အနံ ခေါက်ပြီး နှီး(သို့မဟုတ်) ကြိုးဖြင့် ချည်၍ ရေထည့်ထားသည့် မြေအိုးဖြင့် သုံးခွက်တခွက်တင် ပြုတ်သောက်ခြင်းဖြင့် သွေးမြင်းသရိုက်ရောဂါ သက်သာပျောက်ကင်းကြောင်း သိရသည်။

ဦးတင်ဦးမှာ ဆေးပြုတ်ရည် တအိုးတည်းနှင့် သက်သာပျောက်ကင်းသွားသည်ဟု သိရှိရသဖြင့် ဤဆေးနည်းကို အသုံးပြု၍ သွေးမြင်းသရိုက်ရောဂါ ဖြစ်လာပါက ကုသနိုင်ရန် စေတနာဖြင့် ရေးသားလိုက်ရပါသည်။

(ညိုမင်းထက်-မြန်မာစာ၊ မော်လူး)
နက္ခတ္တရောင်ခြည်-၂၀၁၀-ဒီဇင်္ဘာလ

No comments: