Wednesday, February 16, 2011

သက်တမ်း ၂၅-နှစ် ပိုရှည်စေသော ဗီတာမင် အီး

စကော့တလန်ရှိ ရောဝတ်သုတေသန သိပ္ပံတွင် ဗီတာမင် အီး-ကို မကြာမီက စမ်းသပ်လေ့လာခဲ့သည်။ ဗီတာမင် အီး-သည် ကလာပ်စည်းများ ယိုယွင်းပျက်စီးမှုကို ဖယ်ရှားကာကွယ်ရာ၌ အလွန်အစွမ်းထက်မြက် ထိရောက်မှုရှိသည်။

ဆေးလိပ်သောက်လျှင် အဆုတ်ကလာပ်စည်းများကို အန္တရာယ်ပေးသော ဓာတ်များ ဆေးလိပ်အခိုးများတွင် ပါဝည်။ ယင်းဓာတ်များကို ဗီတာမင် အီးက ယှဉ်ပြိုင်သုတ်သင်ပြီး ကင်ဆာရောဂါဖြစ်မည့်ဘေးမှ ကာကွယ်ပေးနိုင်သည်ဟု သိပ္ပံပညာရှင်များက ဆိုသည်။

ဗီတာမင် အီးဟာ ငယ်ရွယ်နုပျိုစေပြီး အသက်ရှင်သန်စွမ်းစေတဲ့ ဗီတာမင်ဖြစ်တယ်-ဟု လော့စ်အိန်ဂျယ်လိ(စ်)မှ အာဟာရပညာရှင် ဒေါက်တာအား(လ်)မင်းဒယ်(လ်)က ဆိုသည်။ ရောဂါဒဏ် ခံနိုင်ရန်၊ ခွန်အားရှိနိုင်ရန်၊ အမောခံနိုင်ရန်၊ ဒဏ်ရာအနာများ ကျက်လွယ်စေရန်နှင့် ရုပ်ရည်လှပချောမော တင့်တယ်သူ ဖြစ်စေရန်အတွက် ဗီတာမင် အီး အလုံအလောက် ရရှိရန်လိုသည်-ဟု သူက ဆက်လက် ပြောကြားသွားသည်။

သုတေသီတို့က ဗီတာမင် အီး၏ အကျိုးကျေးဇူးများကို အောက်ပါအတိုင်း ထုတ်ဖော်ပြောကြားသည်။
(၁)သွေးလည်ပတ်မှု သွက်လက်ကောင်းမွန်ပြီး သွေးတိုးကျစေသည်။
(၂) ခန္ဓာကိ်ုယ်၏ ကိုယ်ခံစွမ်းအား စနစ်ကို လှုံ့ဆော်အားပေးသည်။
(၃) သွေးကြောတွင်း အန္တရာယ်ကြီးသော သွေးခဲတတ်ခြင်းမျိုးကို ကာကွယ်ဖျက်ဆီးပစ်သည်။
(၄) ဗက်တီးရီးယား ရောဂါပိုးများ၊ ဗိုင်းရပ်(စ်)ရောဂါပိုးများနှင့် ကင်ဆာရောဂါ ကလာပ်စည်းများကို 
     ဖယ်ရှားရာတွင် အကူအညီပေးသည်။
(၅) ညစ်ညမ်းသောလေနှင့် ဆေးလိပ်အခိုးအငွေ့များကြောင့် အဆုတ်ကို ထိခိုက်ခြင်းမရှိအောင် 
     ကာကွယ်ပေးသည်။
(၆) နာတာရှည် အမောအပန်းနာကို သက်သာပျောက်ကင်းစေသည်။
(၇) မီးလောင်သောဒဏ်ရာ၊ ရှသောဒဏ်ရာ၊ ပွန်းပဲ့သောဒဏ်ရာတို့ကို ကျက်လွယ်စေသည်။
(၈) မီးယပ်ပေါ်ခါနီးတွင် ဖြစ်တတ်သော ရောဂါလက္ခဏာများ၊ သို့မဟုတ်-မီးယပ်အကြိုနာများ 
     သက်သာစေသည်။
(၉) ဖိုမသဘာဝစွမ်းအားကို မြှင့်တင်ပေးသည်။

ဗီတာမင် အီး ကြွယ်ဝသော မုန်လာဥ၀ါ၊ လိမ္မော်သီး၊ ကြက်ဥနှစ်၊ ဘဲဥနှစ်၊ အခွံမာသီး၊ ဟင်းသီးဟင်းရွက် စသည်တို့ကို နေ့စဉ်စာပြီး ဗီတာမင် အီး ၁၀-မီလီဂရမ်ကို နေ့စဉ်ဖြည့်စွက်စားလျှင် ကျန်းမာရေးကို ထိခိုက်ဖီလာပြုသော အလေ့အထများ ရှိစေကာမူ မည်သူမဆို သူနေရမည့် သက်တမ်းထက် ၂၅-နှစ်မျှ ပိုရှည်လာမည်ဟု ပြင်သစ်အာဟာရဓာတ် လေ့လာရေးသိပ္ပံမှ ဒေါက်တာဘယ်လက်(စ်)ထရာက ပြောကြားသည်။

No comments: