Monday, February 21, 2011

မေတ္တာရောင်ပြန်


လွန်ခဲ့သော ၁၅-နှစ်ခန့်က ဖြစ်သည်။ ကျောက်ပန်းတောင်းမြို့နယ် လက်ပန်ကျင်းညောင်ရွာ၌ အဘိုးဦးထွန်းရှင်နှင့် အဘွားဒေါ်အုံးမြတို့ နေထိုင်ကြသည်။
အဘိုးအဘွားတို့သည် သမီးသုံးဦးရှိရာတွင် အငယ်ဆုံးသမီးဖြစ်သူ မကြည်ဌေးနှင့်သာ နေထိုင်၏။ မကြည်ဌေးသည် အလယ်တန်းပြ ဆရာမဖြစ်၍ ရွာနှင့် ၂-မိုင်ကျော်ခန့်ဝေးသော ကျောင်းသို့ နေ့စဉ်လိုလို သွားရ၏။ အဘိုးဦးထွန်းရှင်သည် အသက်အရွယ်ကြီးလာ၍ လယ်ယာလုပ်ငန်းများကို ကိုယ်တိုင်မလုပ်နိုင်၊ အလုပ်သမားများကိုသာ ငှါးရမ်းပြီး ကြီးကြပ် စေခိုင်းနေရ၏။ 
တနေ့ အဘိုး ဦးထွန်းရှင်သည် ပျိုးကြဲထားသော ယာခင်းများကို ကြည့်ရှုရန် တံစဉ်တချောင်ှးင့် ခြင်းတောင်းတလုံးကိုယူကာ အိမ်မှထွက်လာခဲ့သည်။
အဘိုး ဦးထွန်းရှင်သည် ယာခင်းထဲသို့ ရောက်သောအခါ ပေါင်းမြက်များကို နုတ်ယူရှင်းလင်းနေစဉ် မိမိယာခင်းနှင့် မလှမ်းမကမ်းတွင် လူအများ စုရုံးနေပြီး နွားသံ၊ လူသံ ရောယှက်နေသော အသံစုံကို ကြားရသောကြောင့် သွားရောက်ကြည့်ရှုသည်။ ထိုအခါ နွားမတကောင်ကို သတ်ဖြတ်ရန် ပြင်ဆင်နေသော အနိဋ္ဌာရုံကို မြင်တွေ့ရသဖြင့် စိတ်မကောင်းကြီးစွာဖြစ်ရသည်။

နွားသတ်သမားများသည် နွားမကို သတ်ဖြတ်ရန် နှာခေါင်းကြိုးနှင့် လည်ပင်းကြိုးကို သစ်ပင်နှင့်တွဲပြီး တင်းကျပ်စွာ ချည်နှောင်နေကြသည်။
အခြားသောသူများကလည်း နွားမကို ရုန်းထွက်မပြေးနိုင်အောင် ရှေ့ခြေထောက်နှင့် နောက်ခြေထောက် တို့ကို သစ်လုံးတပ်လျက် ကြိုးဖြင့်ချည်နှောင်နေကြသည်။ နွားသတ်ခေါင်းဆောင်ကလည်း နွားမ၏ ဦးခေါင်းကုပ်ဆက်ကို ထုသတ်ရန် ပုဆိန်ဖြင့် အဆင်သင့် ချိန်ရွယ်ထားသည်။

နွားမငယ်သည် သေရမည်ကို ကြောက်လန့်၍ မျက်စိနှစ်ဖက် နီရဲလျက် မျက်ရည်များ ဖြိုင်ဖြိုင်စီးကြကာ အသံကုန်ဟစ်၍ အော်နေရှာသည်။ အဘိုးဖြစ်သူ ဦးထွန်းရှင်သည် အမှတ်တမဲ့ နွားမငယ်အနီးသို့ ချဉ်းကပ်မိရာ အန္တရာယ်ပြုမည့် လက္ခဏာမပြ၊ အဘိုးဦးထွန်းရှင်၏ လက်ကိုလျှာဖြင့် ပွတ်သပ်လျက် အသက်ဘေးမှ ကယ်တင်ပေးပါဟူသော အမူအရာဖြင့် အော်၍ တောင်းပန်နေသယောင်ဖြစ်သည်။

အဘိုးဦးထွန်းရှင်သည် ငါရှိလျက်နှင့် ငါ့ရှေ့မှာ ဒီနွားမလေး မသေစေရ၊ အသက်ဘေးမှ မရရအောင် ကယ်တင်ပေးမည်-ဟု ဆုံးဖြတ်လိုက်သည်။ နွားသတ်သမားများအား ဒီနွားမကို မသတ်ကြရန်နှင့် ကြိုက်သည့်ဈေးဖြင့် ရောင်းချပေးရန် ပြောဆိုပြီး ဈေးမဆစ်ဘဲ ၀ယ်ယူခဲ့သည်။ အိမ်ရောက်သောအခါ မြက်ကို ကိုယ်တိုင်ခုတ်စဉ်းလျက် နှမ်းဖတ်နှင့်ရောကာ နွားမလေးကို ကောင်းမွန်စွာ ကျွေးမွေးလေသည်။

အဘိုး ဦးထွန်းရှင်သည် နွားမလေးကို ကယ်တင်လိုက်ချိန်မှစ၍ ယနေ့အထိ အမဲသားကို လုံးဝမစား တော့ပေ။ အသက်ရှင်နေသရွေ့ ဘယ်သောအခါမှ မစားတော့-ဟု ယတိပြတ် ဆုံးဖြတ်လိုက်သည်။
အဘိုးဦးထွန်းရှင် ၀ယ်ယူသည့်အချိန်မှစ၍ ယနေ့အချိန်အထိ နွားမလေးက နွားသားပေါက် ၁၃-ကောင် တိတိ မွေးဖွားပေးခဲ့သည်။ မွေးဖွားပေးခဲ့သောနွားများအားလုံး နွားမတကောင်မျှမပါဘဲ လယ်ယာလုပ်ငန်းတွင် အသုံးပြု၍ရသော နွားလား (နွားထီး)များကိုသာ မွေးဖွား၍ ကျေးဇူးဆပ်ခဲ့သည်။ အရွယ်ရောက်ပြီးသော နွားထီး(ခိုင်းနွား)တကောင်၏ တန်ဖိုးမှာလည်း ကျပ်ငါးသိန်းကျော်ခန့်ဖြစ်သည်။

အဘိုးဦးထွန်းရှင်သည် အသက်အရွယ်ကြီးလာ၍ နွားစာကို ကိုယ်တိုင် ရှာဖွေမကျွေးနိုင်သောအခါ နွားကျောင်းသားများကို အခကြေးငွေပေး၍ ထိန်းကျောင်းစေခဲ့သည်။ နွားမလေးသည်လည်း အသက်အရွယ်အိုမင်းလာ၍ အခြားနွားများနှင့် အတူ နွားစားကျက်သို့လိုက်ပါ၍ မစားသောက်နိုင်။ ဤသောအခါ ကျေးရွာရှိ လူအများက ရောင်းချပစ်ရန် အမျိုးမျိုးတိုက်တွန်း ပြောကြားကြသည်။ သို့သော် အဘိုးဦးထွန်းရှင်က လုံးဝမရောင်းပေ။

ဘာမျှ မျှော်လင့်ချက်မထားဘဲ နွားမ၏ အသက်ချမ်းသာရေးဟူသော မေတ္တာနှင့် စိတ်ထားသန့်သန့်ဖြင့် မွေးမြူခဲ့သော စေတနာတို့ကြောင့် ဘ၀မခြားဘဲ တူသောအကျိုးကို မုချခံစားရသည်ဟု ဦးထွန်းရှင် ယုံကြည်မိပါတော့သည်။( ကိုယ်တွေ့ဖြစ်ရပ်မှန် ဖြစ်သည်)

ဆရာငယ် (မြိတ်-သဇင်)
(မြတ်မင်္ဂလာ ၂၀၁၀-သြဂုတ်လ) 

No comments: