Wednesday, February 16, 2011

စေတနာမှန်သော ကံတရား

၂၀၀၉-ခုနှစ် ဇွန်လ၏ တရက်သော တနင်္ဂနွေနေ့တွင်ဖြစ်သည်။ စာရေးသူမှာ ဘာသာရေး လိုက်စားသူတဦီး ဖြစ်ပြီး အပေါင်းအသင်းတော့ နည်းပါသည်။ ရှားရှားပါးပါး ညီရင်းအကိုပမာ ရင်းနှီးသော သူငယ်ချင်းတယောက်တော့ ရှိသည်။ သူ့အမည်က ရဲဇော်ဟု ခေါ်ပြီး သူသည် ဘာသာရေးလိုက်စားသူ ဖြစ်သည်။ ၀ါသနာတူသူမို့ ကျောင်းပိတ်ရက်ဖြစ်သည့် စနေနေ့နှင့် တနင်္ဂနွေနေ့၏ ညနေခင်းတိုင်းတွင် မြို့စွန်ရှိ တန်ခိုးကြီးဘုရားတဆူ၏ ရင်ပြင်တော်တွင် စာရေးသူတို့ ဘုရားဖူးသွားရင်း စကားလက်ဆုံကျလေ့ရှိသည်။
 
တနေ့တွင် စာရေးသူတို့နှစ်ဦး ဘုးဖူးပြီးနောက် ရင်ပြင်တော်၏ အရိပ်အာဝါသကောင်းသော တနေရာတွင် စကားလက်ဆုံကျနေကြသည်။
ဤတွင် ရဲဇော်က လွန်ခဲ့သည့် နှစ်ရက်လောက်က ၀ါဆိုသင်္ကန်းကပ် လှူရခြင်းအကျိုးနှင့် ပတ်သက်၍ တရားခွေတခွေ နာကြားရကြောင်း၊ နာကြားပြီးနောက် ၀ါဆိုသင်္ကန်း လှူချင်စိတ် တဖွားဖွား ဖြစ်ပေါ်နေကြောင်း၊ သို့သော် သာမန် သင်္ကန်းတစုံပင်လျှင် ကျပ်တသောင်းခန့် ရှိနေသည်မို့ မတတ်နိုင်ကြောင်း၊ အိမ်က မိဘတွေဆီတောင်းလျှင် ငွေတသောင်းခန့် ရနိုင်ကြောင်း သို့ပေမယ့် ကျောင်းစရိတ် အကုန်အကျတွေများနေ၍ မတောင်းရက်ကြောင်း စသည်ဖြင့် ပြောပါသည်။

စာရေးသူလည်း ရဲဇော်ပြောနေသည့် စကားများကို နာေးထာင်ရင်း သူ့ကို ဘယ်လိုနှစ်သိမ့်ရမှန်းမသိ ဖြစ်နေ၏။ ထို့နောက် ရဲဇော်သည် ညှိုးငယ်သောသောမျက်နှာထားနှင့် ငါ ပရိတ်ရွတ်လိုက်ဦးမယ်-ဟုဆိုကာ မလှမ်းမကမ်းရှိ ဆီးဖြူပင်ကြီးအောက်သို့ ထွက်သွားပါသည်။

ထိုဆီးဖြူပင်ကြီးနှင့် မနီးမဝေး တနေရာတွင် ခွေးတကောင်သည် မြက်ပင်တွေကို စားလိုက်၊ အန်လိုက် လုပ်နေ၏။ ရဲဇော်သည် ထိုအန်နေသောခွေးကို သနားကြင်နာစွာကြည့်လိုက်ပြီး ခွေးနားသို့ သွားလိုက်သည်။ ခွေးသည် အန်ဖတ်များအနီးတွင် မှိန်း၍နေ၏။ ခွေးအနားတွင်ထိုင်ပြီး ခွေးကို သနားကြင်နာစွာ ကြည့်လိုက်ရာ အန်ဖတ်ထဲ၌ ခေါက်ထားသော ငွေစက္ကူတရွက်ကို တွေ့လိုက်ရသည်။
အန်ဖတ်ထဲမှ ငွေစက္ကူကို တုတ်နှင့်ကော်ကြည့်လိုက်သည်တွင် တထောင်ကျပ်တန် ဖြစ်နေသည်ကို သိရ၏။ ထို့နောက် အနီးအနားရှိ အုတ်ကန်တွင် ရေဆေးပြီး တထောင်ကျပ်တန် ရေစိုကြီးကိုကိုင်ကာ စာရေးသူအနား ရောက်လာသည်။ စာရေးသူက ရဲဇော်ရေ ခွေးအန်ဖတ်ထဲကရတဲ့ငွေ ဆိုတော့ ထူးခြားတယ်၊ ထီထိုးကွာ၊ မင်းလည်း ၀ါဆိုသင်္ကန်းကပ်ချင်နေတာ မဟုတ်လား-ဟု ပြောလိုက်ပါသည်။

ဘုရားမှအပြန်တွင် ရဲဇော်သည် ခွေးအန်ဖတ်ထဲမှ ရသော ငွေတထောင်ဖြင့် ထီဆိုင်တွင် ထီ သုံးစောင်ထိုးပါသည်။ အံ့သြဖွယ်ကောင်းလေစွ၊ ၂၄၆-ကြိမ်မြောက် အောင်ဘာလေ ထီဖွင့်ပွဲတွင် ရဲဇော်ထိုးထားသော ထီသုံးစောင်အနက်မှ ထီတစောင်ပေါက်ပြီး ဆုငွေကျပ် တသိန်းရခဲ့သည်။ စာရေးသူလည်း အံ့သြ၀မ်းသာရပါသည်။ ၀ါဆိုသင်္ကန်း ကပ်ချင်သည့် ရဲဇော်၏ ဆန္ဒလည်း ပြည်ဝသွားခဲ့ပါသည်။ ကံ ကံ၏အကျိုးပါတကား။
မှတ်ချက်။ ။ ကိုယ်တွေ့ဖြစ်ရပ်မှန် ဖြစ်ပါသည်။

ရာဇာသိန်းထွန်း (၀မ်းတွင်း)
(မြတ်မင်္ဂလာ ၂၀၁၀-ခု ဇူလိုင်လ)

No comments: