Monday, March 7, 2011

မြတ်ဂုဏ်တော် အကျိုး


ဘုရားရှင်၏ ဂုဏ်တော်တို့သည် လွန်စွာပင် တန်ခိုးထက်လှသည်။ ကျွန်မ၏ အဘိုးသည် အသက် ၈၆-နှစ်ရှိပြီ ဖြစ်သည်။ အဘိုးသည် နေ့စဉ် မနက်တိုင်း ပရိတ်ကြီး ၁၁-သုတ်၊ ပဋ္ဌာန်း ၂၄-ပစ္စည်းနှင့် ဓမ္မစကြာတို့ကို ရွတ်ဆိုသရာဇ္ဈာယ်လေ့ရှိသည်။ တနေ့ ကျွန်မတို့ မိသားစု ခရီးတခုမှ ပြန်လာချိန်တွင် အဘိုးသည် ခါးနာသည်ဟု ပြောသည်။ ထိုသို့နေလာရာမှ မထနိုင်သည့် အခြေအနေသို့ ရောက်ရှိခဲ့ရသည်။ 

ထို့ကြောင့် မိသားစုအားလုံး တိုင်ပင်ကာ ရန်ကုန်ရှိ အထူးကုဆေးခန်းတခုတွင် ပြသခဲ့သည်။ ဓာတ်မှန်ရိုက်ကြည့်ရာ ရောဂါမှာ သာမန်ခါးနာခြင်း မဟုတ်၊ အရိုးကင်ဆာ ဖြစ်ပြီး နံရိုး ၂-ချောင်းမရှိတော့ဟု သိရသည်။ ထိုအခါ ကျွန်မတို့ မယုံနိုင်လောက်အောင် ဖြစ်ခဲ့ရသည်။ အဘိုးကိုလည်း စိတ်ဓာတ်မကျအောင် အကြောညပ်သည်ဟုသာ ပြောထားသည်။

အဘိုးသည် ထမင်းကို ထိုင်၍ပင် မစားနိုင်။ ဘေးစောင်း၍သာ စားရသည်။ ဆီး၊ ၀မ်းသွားရာတွင်လည်း ခုတင်ပေါ်သာ အညစ်အကြေးသွားသည့် ခွက်ဖြင့် သွားရသည်။ သို့သော် အဘိုးသည် အားမလျှော့။ တခါတရံ ကြိုးစား၍ ထိုင်သည်။ သို့သော်လည်း ပရိတ်၊ ပဋ္ဌာန်း ၂၄-ပစ္စည်းနှင့် အနတ္တလက္ခဏသုတ် တို့ကိုတော့ ပုံမှန် ရွတ်ဆိုသည်။ ၀ိပဿနာတရားစာအုပ်များကိုလည်း အဘိုး ဖတ်သည်။ ကျွန်မတို့က မင်္ဂလာမောင်မယ်၊ မြတ်မင်္ဂလာ၊ ဓမ္မဗျူဟာ စာအုပ်များကို လစဉ် ယူသောကြောင့် ထိုစာအုပ်များကိုလည်း ဖတ်သည်။

အဘိုး၏ အရိုးကင်ဆာဟူသော ရောဂါဆိုးကြီးသည် ၆-လ သက်တမ်းသာ ခံမည်ဟု ပြောခဲ့သော်လည်း အဘိုးမှာ မထနိုင်၊ လမ်းမလျှောက်နိုင်သည်မှအပ နာကျင်ခြင်း၊ တစုံတရာ မရှိဘဲ နေလာခဲ့သည်မှာ ၁-နှစ်ပင် ကျော်ခဲ့ပြီ။ ဤသည်မှာ ဘုရားရှင်၏ ဂုဏ်တော်၊ ပရိတ်၊ ပဋ္ဌာန်း တရားတော်တို့၏ အကျိုးကျေးဇူးကြောင့်ပင် ဖြစ်သည်ဟု ကျွန်မ ယုံကြည်ယူဆမိပါသည်။
ဆုမြတ်ဝတ်ရည်
(မြတ်မင်္ဂလာ ၂၀၁၀-အောက်တိုဘာလ)

No comments: