Thursday, March 10, 2011

ရေကုသိုလ် အကျိုး

ကျွန်မနှင့် အတော်လေးခင်သော မိသားစု၌ အရေပြားရောဂါ စွဲကပ်နေသူ အပျိုကြီးတဦး ရှိပါသည်။ သူမသည် စွဲကပ်နေသော အရေပြားရောဂါကို မြန်မာဆေး၊ အင်္ဂလိပ်ဆေး မျိုးစုံဖြင့် ကုသသော်လည်း မပျောက်ပါ။ တကိုယ်လုံး ပျံ့နှံ့နေသဖြင့် စိတ်ဒုက္ခရောက်နေရပါသည်။

ကျွန်မတို့ ရွာသားများသည် မဲဇာချောင်းကို အမှီပြု နေထိုင်ရပါသည်။ ရွာသည် ကုန်းမြင့်နေရာ၌ တည်ရှိသဖြင့် မဲဇာချောင်းသို့ ရေချိုးသွားရန် ရွာထိပ် ပေ ၂၀-ခန့်မြင့်သော ကျောက်ဆောင်ကမ်းပါးကို လှေကားဖြင့် ဆင်း၍ သွားရပါသည်။ ထို့အပြင် တံတားတခုကိုလည်း ဖြတ်သန်းပြီးမှ ချောင်းသို့ ရောက်ပါသည်။  ထိုတံတားအောက်နားရှိ အင်းစပ်၌ ရောဂါသည် အပျိုကြီးသည် ကိုယ်တိုင် ရေတွင်းတတွင်းတူး၍ လှူဒါန်းထားပါသည်။ 

တွင်းအနက် ၁၀-ပေခန့် ရှိပြီး တွင်းအ၀ ငါးပေပတ်လည်ခန့်ရှိ ရေတွင်းလေးကို ပျဉ်ဖြင့် ဘေးပတ်လည် ကာရံထားပါသည်။ ရေတွင်းမှာ ချိုးရေတွင်း ဖြစ်ပါသည်။ အစပိုင်းတွင် ရွာသားများ သိပ်ပြီး မချိုးကြသော်လည်း နောက်ပိုင်းတွင် ရေချိုးသူများ ပေါများလာပါသည်။

မဲဇာချောင်းရေသည် ယခုအခါတွင် အမြဲနောက်ကျိနေသဖြင့် သူမ တူးထားသော ရေတွင်း၌သာ လူအများ ရေချိုးနေကြပါတော့သည်။ စိမ့်ရေတွင်းဖြစ်သဖြင့် အမြဲကြည်လင်နေပြီး လူမည်မျှ ချိုးချိုး ကုန်သည်မရှိ။
ရေတွင်းတူးပြီး တနှစ်လောက် အကြာ၌ သူမ၏ ကိုယ်ရေပြား ရောဂါများမှာလည်း ပျောက်ကင်းသွား ပါတော့သည်။ မည်သည့်ဆေးနှင့် ပျောက်မှန်းပင် မသိတော့ပါ။ သူမ၏ရောဂါ ပျောက်ကင်းသွားသည်မှာ ထိုချိုးရေတွင်းလေး အလှူကြောင့်ပင် ဖြစ်မည်ဟု ယုံကြည်ယူဆမိပါသည်။

မွှေးမွှေး (အင်းတော်-တာပေါ)
(မြတ်မင်္ဂလာ ၂၀၁၀-နိုဝင်ဘာလ) 

No comments: