Thursday, March 10, 2011

ဆားလျှော့လိုလျှင် ရှာလကာရည် ခတ်၊ သကြား မခတ်နဲ့။ အိပ်မပျော်ဘူးလား။ အယ်လီဇဘက် ဘုရင်မကြီး၏ ကျန်းမာရေး စည်းမျဉ်း

( ဆားလျှော့လိုလျှင် ရှာလကာရည် ခတ်၊ သကြားမခတ်နဲ့)
သွေးတိုးရောဂါ ကာကွယ်ကုသရန် ဆား လျှော့စားရမည်။
ဟင်းချက်သည့်အခါတွင် ဆားလျှော့ခတ်သော်လည်း အရသာမပျက်စေသော နည်းလမ်းရှိပါသည်။ 
အရသာ သုတေသနပြုမှုအရ သိရသည်မှာ အရသာများ အချင်းချင်း ထူးဆန်းအံ့သြဖွယ် ဆက်စပ်မှု ရှိနေခြင်းဖြစ်သည်။ အချဉ်ဓာတ်သည် အငန်ဓာတ်၏ အားဖြည့်ဓာတ်-ဖြစ်သည်။ စမ်းသပ်မှုအရ ၁-ရာခိုင်နှုန်းမှ ၂-ရာခိုင်နှုန်းရှိသော ဆားပျော်ရည်ထဲတွင် ၀.၁၁ ရာခိုင်နှုန်းရှိသော ရှာလကာရည် ထည့်လိုက်ပါက ပိုမိုငန်သည်ဟု ခံစားရသည်။ ထို့ကြောင့် ဆားအနည်းငယ်သာ သုံးပြီး ဟင်းကို ငန်စေလိုလျှင် ရှာလကာရည် သို့မဟုတ်-သံပုရာ ရှောက်ရည် အနည်းငယ် ထည့်လိုက်ပါ။ ပို၍ လေးပင်သောအရသာကို ရစေပါသည်။

အငန်ဓာတ်ကို အားပျော့စေသော အခြားအရာသည် အချိုဓာတ်ပင် ဖြစ်သည်။ လက်တွေ့စမ်းသပ် သက်သေပြချက်အရ ၁-ရာခိုင်နှုန်းမှ ၂-ရာခိုင်နှုန်း ရှိသော ဆားပျော်ရည်ထဲသို့ ၁၀-ရာခိုင်နှုန်းသော သကြားထည့်လိုက်လျှင် ငန်သောအရသာ လုံးဝပျောက်သွားနိုင်သည်။ များစွာသော ချို-ငန် ဟင်းလျာများထဲတွင် ဆား-ပါဝင်မှုသည် ခံစားရသည်ထက် ပိုမိုများနေတတ်သည်။ ထို့ကြောင့် ဟင်းလျာများစွာတွင် သကြားခတ်ခြင်းသည် အကျိုးမရှိသည့်အပြင် ဆိုးကျိုးကိုသာ ပေးတတ်သည်။ ထို့ပြင် သစ်သီးယိုစုံများတွင်လည်း ဆားများပါတတ်၍ သတိထားရပါမည်။
*********************************************************************
( အိပ်မပျော်ဘုးလား)
ကျွန်ုပ် မကြာခဏ အိပ်မပျော် ဖြစ်တတ်သည်။ မိတ်ဆွေတဦး၏ ဆေးမြီးတိုနည်းအရ ကြက်သွန်နီ တစိတ် ယူပြီး ကျေအောင် ထုထောင်းကာ ပုလင်းတလုံးတွင် ထည့်ပိတ်ထားလိုက်သည်။ ခေါင်းအုံးနံဘေးတွင် ထားပြီး အိပ်ခါနီး ပုလင်းအဖုံးကို အနည်းငယ် ဟပေးကာ အနံ့ကိုရှူပါသည်။ ထို့နောက် ၁၀-မိနစ်ခန့် အတွင်း အိပ်ပျော်သွားပါသည်။

ဤကား တရုတ်တိုင်းရင်း ဆေးတက္ကသိုလ်၊ ပါမောက္ခကျိုကျူရီ၏ ပြောကြားချက်ဖြစ်သည်။ ထိုပြောကြားချက်အရ ယခုခေတ် ဆေးဝါးဗေဒ ပညာရှင်များက သုတေသန ပြုကြည့်ရာ ကြက်သွန်နီတွင် ပါဝင်သော ဓာတ်များသည် လူခန္ဓာကိုယ်၏ နွမ်းနယ်မှုကို ပြေလျော့စေနိုင်သည်။ ကြက်သွန်နီ၏ စူးရှသော အမွှန်အနံ့သည် လူ၏အာရုံကြောစနစ်ကို တည်ငြိမ်စေပြီး အိပ်ချင်အောင် ဆွဲဆောင်နိုင်သည်ကို သိရှိရသည်။

ထို့ပြင် ပါမောက္ခကျိုကျူရီက ကြက်သွန်နီနှင့် ဖျော်စပ်သည့် အိပ်ပျော်စေသော ဖျော်ရည်တမျိုး သောက်ရန်ကိုလည်း တိုက်တွန်းအကြံပြုထားသည်။
ဖျော်ရည်လုပ်နည်းမှာ ၁၀၀-ဂရမ် (၆-မှ ၁၀-ကျပ်သားခန့်) ရှိသော ကြက်သွန်နီများကို လှီးပြီး ၆၀၀-မီလီမီတာ (ရေသန့်ဘူးတ၀က်ကျော်ခန့်) ရှိသော ချက်အရက်တွင် စိမ်ထားလိုက်ပါ။ ရက်သတ္တတပတ် ကြားသောအခါ ကြက်သွန်နီများကို ထုတ်ပစ်လိုက်ပါ။

ထို့နောက် ထိုကြက်သွန်နီစိမ် အရက် ၁၀-မီလီမီတာနှင့် ကြက်ဥတလုံး မွှေထားသော ကျိုချက်ပြီး နွားနို့ ၉၀-မီလီမီတာ၊ အရည်ကြိတ်ထားသော ပန်းသီးတခြမ်းတို့ကို သမအောင် ရောမွှေပါ။ ယင်းကို အိပ်ရာမ၀င်မီ နာရီဝက် ကျို၍ သောက်နိုင်ပါသည်။
********************************************************************

( အယ်လီဇဘက် ဘုရင်မကြီး၏ ကျန်းမာရေး စည်းမျဉ်း)
အင်္ဂလိပ်ဘုရင်မကြီး အယ်လ်ီဇဘက်သည် ၁၉၂၆-ခု ဧပြီလတွင် မွေးဖွားသည်။ ယခု အသက် ၈၄-နှစ်ရှိပြီ။ လှပကျန်းမာသန်စွမ်းစွာဖြင့်  ကမ္ဘာအရပ်ရပ်သို့ သွားလာမြဲဖြစ်သည်။
ဘုရင်မ၏ အတုယူဖွယ် နေထိုင်ပုံစံစနစ်နှင့် နည်းလမ်းများကို တစေ့တေစာင်း လေ့လာကြည့်ပါက---

(၁) အနားယူတတ်ခြင်း---
မည်မျှပင် ကြီးကျယ်ခန်းနားသော ညစာစားပွဲ သို့မဟုတ်-ကပွဲ ဖြစ်ပါစေ ဘုရင်မသည် မိမိ၏ အစီအစဉ် သတ်မှတ်ချက်အတိုင်း အချိန်လွန်အောင် မနေ။ ကြိုတင် ထွက်ခွါသွားတတ်သည်။ ည ၁၁-နာရီတွင် အိပ်စက်အနားယူပြီး နောက်တနေ့ နံနက် ၇-နာရီတွင် အချိန်မှန် အိပ်ရာမှထသည်။ သို့မှသာ အလုပ်တာဝန်များသည့် တနေ့တာကို ကြိုဆိုနိုင်မည်။ ဤကဲ့သို့သော အလေ့အကျင့်ကို နိုင်ငံခြား ရောက်သည့်အခါတွင်လည်း တင်းကျပ်စွာ ကျင့်သုံးတတ်သည်။

ဘုရင်မသည် နေ့စဉ် ထက်သန်တက်ကြွစွာ အလုပ်လုပ်သည့်နည်းတူ အချိန်လုပြီးလည်း အနားယူတတ် သည်။ တိုတောင်းသော ၅-မိနစ်တာကလပင် ဖြစ်စေကာမူ ဖိနပ်ကို ချွတ်ထားပြီး ခြေထောက်များ မ,၍၄င်း၊ ရေနွေးကြမ်းသောက်၍၄င်း၊ စိတ်ကို ဖြေလျှော့တတ်သည်။ ပုခုံး၊ လည်တိုင် လှုပ်ခါ၍ လေ့ကျင့်ခန်းလည်း လုပ်တတ်သည်။

(၂) ခြေထောက်ကို စောင့်ရှောက်ခြင်း---
ဘုရင်မသည် ခြေထောက်၏ သက်သောင့်သက်သာရှိမှုကို အလွန်အလေးထားသည်။ တရုတ်တိုင်းရင်း ဆေးပညာတွင် အဆိုတခု ရှိသည်။ ခြေသည် လူ၏အမြစ်၊ လူအိုလျှင် ခြေထောက်က စပြီး အိုသည်။ ဘုရင်မသည် ထိပ်ချွန်ချွန်၊ ခုံမြင့်မြင့် ခေတ်မီ ဒေါက်မြင့်ဖိနပ်များကို မစီး၊ သက်သောင့်သက်သာ စီးနိုင်သော ထိပ်လုံးလုံး၊ ဒေါက်နိမ့်နိမ့်၊ ၅-စင်တီမီတာ ရှိသော ဒေါက်မြင့်ဖိနပ်ကို စီးလေ့ရှိသည်။ ခြေထောက် သက်သာစေရန် တနေ့လျှင် ၄-၅ ကြိမ်ခန့် ဖိနပ် လှဲလှယ်စီးတတ်သည်။

ခြေထောက်ကို လေ့ကျင့်နိုင်ရန် ၂-နာရီခန့် ဆက်တိုက် မတ်တတ်ရပ်တတ်သည်။ ဤသို့ ပြုခြင်းဖြင့် ခြေထောက်ကို လေ့ကျင့်တတ်သည်။

(၃) ကာယလေ့ကျင့်မှု အလေ့အထ---
တော်ဝင်မိသားစုများတွင် လမ်းလျှောက်သောစည်းမျဉ်း ရှိသည်။ သွက်လက်စွာ လမ်းလျှောက်နည်း ဖြစ်သည်။ ကာယလေ့ကျင့်မှု ဆရာဝန်၏ အဆို ကျန်းမာရေးအတွက် လမ်းလျှောက်ရာတွင် လမ်းလျှောက် ကြာချိန်နှင့် အမြန်နှုန်းကို ဂရုစိုက်ရမည်။ အမြန်နှုန်း မရှိဘဲ နှေးကွေးစွာ ကြာရှည် လမ်းလျှောက်ခြင်းသည် အကျိုးကျေးဇူးနည်းသည်ဟု ဆိုသည်။

သွက်သွက် လမ်းလျှောက်ရာတွင်လည်း ခေါင်းမော့ ရင်ကော့ရမည်။ သို့မှ ခါးကိုင်းခြင်းကို ကာကွယ်နိုင်ပြီး ၀မ်းဗိုက်အဆီများကို လျှော့ချနိုင်မည်။ နှလုံး၊ အဆုတ်တို့၏ စွမ်းဆောင်ချက်ကိုလည်း လေ့ကျင့်ပေးနိုင်မည်။ မိမိကိုယ်ကို ယုံကြည်မှုအတွက်လည်း အားဖြည့်ပေးသည်။

ပါမောက္ခ ဒေါ်ခင်ဖြူ (မြင်းခြံ)
(မြတ်မင်္ဂလာ ၂၀၁၀-နိုဝင်ဘာလ) 
အကိုး။ ။ ၁၂-၇-၂၀၁၀ နေ့ထုတ် တရုတ်ဘာသာဖြင့် ထုတ်ဝေသော ကျန်းမာရေးဂျာနယ်။
           တရုတ်ဘာသာဖြင့် ထုတ်ဝေသော Look Younger, Live Longer စာအုပ်မှ ကောက်နုတ် ဘာသာပြန်ဆိုပါသည်။

No comments: