Tuesday, August 30, 2011

လုံးဝမပေါ့ဆသင့်သော အစာအိမ်ရောဂါ

ကျွန်ုပ်တို့၏ ခန္ဓာကိုယ်အတွက် အစာအိမ်သည် အရေးပါသော အင်္ဂါအစိတ်အပိုင်း တခုဖြစ်သည်။ ပါးစပ်မှတဆင့် စားလိုက်သောအစာများကို ခေတ္တသိုလှောင်ပေးပြီး ပရိုတိန်းများကို တပိုင်းတစ ချေဖျက်ပေးပါသည်။ ကုဗိုဟိုက်ဒရိတ်နှင့် အဆီများကိုမူ အူနှင့်ပန်ကရိယ(pancreas)တို့က အဓိကချေဖျက်ပေးပါသည်။ အစာအိမ်မှထွက်ရှိသော အစာချေရည်တွင် အက်စစ်နှင့် ပက်(ပ)ဆင် အင်ဇိုင်းတို့ ပါဝင်ပါသည်။

အစာအိမ်အတွင်း အစာအိမ်နံရံ၏ ခုခံအား လျော့နည်းကျဆင်းနေသောအခါ အက်စစ်ဓာတ်များကြောင့် အစာအိမ်တွင် အနာဖြစ်တတ်ပါသည်။ အစာအိမ်မှ အက်စစ်အများအပြား အူသိမ်ထဲသို့ ရောက်ရှိသွားပါက အူသိမ်တွင် အနာဖြစ်တတ်ပါသည်။

ယခင်က အစာအိမ်ရောဂါ ဖြစ်ရခြင်းမှာ အက်စစ်ဓာတ် လွန်ကဲမှုကြောင့် (သို့မဟုတ်) အစာအိမ်နံရံ မျက်နှာပြင် အလွှာ၏ ခုခံအားညံပဖျင်းမှုကြောင့်ဟု ယူဆခဲ့ကြပါသည်။ ယနေ့အချိန်တွင်မူ အစာအိမ်နာနှင့် အူသိမ်နာတို့မှာ Helicobacter pylori ပိုးနှင့် ဆက်နွယ်လျက်ရှိကြောင်း တွေ့ရှိလာရပါသည်။

အူသိမ်အနာ၏ ရောဂါလက္ခဏာမှာ ညဘက်အချိန်နှင့် အစာမရှိချိန်များတွင် ဝမ်းဗိုက်နာကျင်ခြင်း၊ အစာစားလိုက်လျှင် နာကျင်မှု သက်သာသွားခြင်းတို့ဖြစ်သည်။ အစာအိမ်အနာ၏ ရောဂါလက္ခဏာမှာ ဝမ်းဗိုက်နာကျင်ခြင်း၊ အစာစားလျှင် မသက်သာဘဲ နာကျင်မှု ပိုဆိုးခြင်း၊ ပျို့အန်လိုက်မှ နာကျင်မှု သက်သာသွားခြင်းတို့ ဖြစ်သည်။ အူသိမ်အနာနှင့် အစာအိမ်အနာ နှစ်မျိုးစလုံးတွင် အက်စစ်ဓာတ်ချေဖျက်ပေးသော ဆေးများသောက်သုံးပါက နာကျင်မှုကို သက်သာစေလေသည်။ အစာအိမ်အနာနှင့် အူသိမ်နာတို့၏ အခြားသောလက္ခဏာများမှာ ရင်ပူခြင်း၊ ပါးစပ်အတွင်းသို့ အစာပြွန် အောက်ပိုင်းမှ တံတွေး(Saliva) နှင့် အက်စစ် (Acid) တို့ ပြန်ပျို့တက်ခြင်းတို့ဖြစ်သည်။ အူသိမ်အနာရှိသူများတွင် နာကျင်မှုသက်သာစေရန် အစာ ပိုမိုစားသဖြင့် ခန္ဓာကိုယ်အလေးချိန် တက်နိုင်ပါ သည်။ အစာအိမ်အနာရှိသူတွင်မူ အစားအသောက်ပျက်ခြင်းကြောင့် ကိုယ်အလေးချိန် လျော့ကျခြင်း ဖြစ်နိုင်ပါသည်။

အစာအိမ်ရောဂါ၏ ထူးခြားချက်မှာ ဝေဒနာလက္ခဏာများသည် အလိုအလျောက် ပျောက်ကွယ်သွားတတ် သကဲ့သို့ အလိုအလျောက် ပြန်ပေါ်လာတတ်ခြင်းပင် ဖြစ်သည်။ လူတယောက်၌ အစာအိမ်ရောဂါ ရှိ-မရှိကို (Barium Meal)ဓာတ်မှန်ရိုက်ကြည့်ခြင်း၊ အစာအိမ်အား မှန်ပြောင်းဖြင့် ကြည့်ခြင်းတို့ဖြင့် လွယ်ကူစွာ သိရှိနိုင်ပါသည်။ 


အစာအိမ်ရောဂါ ရှိသူများအား ဆရာဝန်များအနေဖြင့် အောက်ပါ ဆေးဝါးများအနက် သင့်လျှော်ကောင်းမွန်မည့် ဆေးဝါးများကို ညွှန်ကြားလေ့ရှိပါသည်။
(၁) အစာအိမ်အတွင်းရှိ အက်စစ်ဓာတ်ကို ချေဖျက်ပေးသည့်ဆေးများ။
(၂) အစာအိမ်မှ အက်စစ်ထွက်မှု လျော့နည်းစေသည့်ဆေးများ။
(၃) အစာအိမ်အတွင်း လေပွလေထခြင်းနှင့် အစာမကြေခြင်းတို့ကို သက်သာစေသည့် ဆေးများ။
(၄) အစာအိမ်နှင့် အူသိမ်ကြွက်သားများ အလွန်အမင်း လှုပ်ရှားမှုကို လျော့ပါးစေသော ဆေးများ။
(၅) အစာအိမ်နံရံ၏ ခုခံစွမ်းအား ပြန်လည်ကောင်းမွန်စေသော ဆေးများ စသည်တို့ ဖြစ်သည်။


အစာအိမ်ရောဂါရှိသူတဦး အနေဖြင့် ဆေးလိပ် လုံးဝ မသောက်သင့်ပေ။ ဆေးဝါးများ မှန်မှန်မှီဝဲနေသော်လည်း ဆေးလိပ်သောက်နေပါက အကျိုးမရှိပေ။ အဘယ့်ကြောင့်ဆိုသော် ဆေးလိပ်သောက်သုံးခြင်းသည် အစာအိမ်နာ ပျောက်ကင်းစေခြင်းကို အဟန့်အတား ဖြစ်စေခြင်းကြောင့် ဖြစ်သည်။


အစာအိမ်ရောဂါကို ကုသနေစဉ်အတွင်း အရက်သေစာ သောက်စားခြင်းကိုလည်း ရှောင်ကြဉ်သင့်ပါသည်။ အရက်သည် အစာအိမ်နှင့် အူလမ်းကြောင်းတလျှေကြ် နံရံများ၏ ခုခံစွမ်းအားကို လျော့နည်းစေသောကြောင့် ဖြစ်ပါသည်။

အစာအိမ်သည် ခန္ဓာကိုယ်အတွက် မည်မျှအရေးကြီးကြောင်း အာလုံးသိရှိပြီးဖြစ်သည်။ ထို့ကြောင့် အစာအိမ်ရောဂါ ဖြစ်ပွားနေသည်ဟု သိရှိပါက လုံးဝမပေါ့ဆဘဲ အလျင်အမြန် ပျောက်ကင်းအောင် ကုသသင့်ပါသည်။ ထိုသို့မဟုတ်ပါက အစာအိမ်ရောဂါ၏ နောက်ဆက်တွဲ ဆိုးကျိုးများဖြစ်သော
သွေးအန်ခြင်း၊ သွေးဝမ်းသွားခြင်း၊ အစာအိမ်ပေါက်ခြင်း၊ အစာအိမ်လမ်းကြောင်း ပိတ်ဆို့ခြင်းနှင့်
နောက်ဆုံးအဆင့်ဖြစ်သော လူသားတို့၏အသက်ကို ရန်ရှာနိုင်သည့် အစာအိမ်ကင်ဆာရောဂါတို့
ဖြစ်ပွားနိုင်သောကြောင့် ဖြစ်သည်။

No comments: