Tuesday, August 30, 2011

ကျန်းမာရေး မေး+ဖြေ

မိဘတို့သည် သားသမီးများကို မိမိတို့၏အကျိုးစီးပွားအတွက် အသုံးချကိရိယာအဖြစ် ဘယ်တော့မှမမြင်၊ အလုပ်အကျွေးအဖြစ် ကျေးကျွန်များအဖြစ်လည်း ဘယ်သောအခါမှ မမြင်၊ ရတနာတွေအဖြစ်သာ မြင်ကြပါသည်။ ထို့အတွက် ကျွန်မတို့၏ ဗုဒ္ဓဘုရားရှင်က မိဘ၏ချစ်ခြင်းမေတ္တာကို စံနမူနာအဖြစ် ပုံစံထုတ်ပြထားခြင်း ဖြစ်ဟန်တူလေသည်။

ကျွန်မတို့၏ လူသားများသည် လူသားပီသစွာ လူသားအချင်းချင်း စာနာတရား၊ အညှာတာတရားများကို အခြေခံကာ နားလည်မှု၊ ခွင့်လွှတ်သည်းခံ ဖေးမကူညီပေးလိုမှုဖြင့် မျှတစွာစဉ်းစားပေးခြင်းနှင့် မျှဝေသော ခံစားစိတ်များ ထားရှိပေးနိုင်မည်ဆိုလျှင် လောကဓာတ်တခုလုံး အေးမြသောမေတ္တာဓာတ်များ စီးဆင်းလျက် သာယာချမ်းမြေ့နေမှာ မလွဲပါ။

အမှန်အားဖြင့် မေတ္တာဟူသည် ပေးသူဘက်၌ အကန့်အသတ်မရှိ၊ ခံယူသူဘက်မှာသာ အကန့်အသတ် ရှိသည်မဟုတ်လား။ မိုးရေခံယူသကဲ့သို့ အိုးနှင့်ခံလျှင် အိုးအပြည့်ရ၏။ ခွက်နှင့်ခံယူလျှင် ခွက်အပြည့်ရလေ၏။ ကျွန်မတို့ရဲ့ နှလုံးသားမှာ ဖြစ်ထွန်းသမျှသော အကြင်နာချစ်ခြင်းမေတ္တာတို့ကို ရေဖောင်ဖောင် မိုးကြီးကြီး ရွာသွန်းပါလတံ့။


အသင်လူသားတဦးဦးက ကျွန်မတို့လူသားများ၏ လှပသောနှလုံးသားမှ တန်ဖိုးမဖြတ်နိုင်သော အကြင်နာမေတ္တာတရား လိုအပ်နေသည်ဟုဆိုငြားအံ့။
ကျွန်မတို့လူသားများ၏ နွေးထွေးသောအကြင်နာမေတ္တာပေးဝေရန် အသင့်ရှိပါသည်။ 


(မေး) ဒေါက်တာမမရှင့်၊ သမီး အားကိုးတကြီး စာရေးမေးမြန်းလိုက်ခြင်း ဖြစ်ပါတယ်။ သမီးကို နားလည်ခွင့်လွှတ်ပေးပါနော်။ သမီးလေ ဓမ္မတာသွေးထိမ်နေတာ ၃-လရှိပြီး ကိုယ်ဝန်ရှိနေမှာ စိုးရိမ်လို့ ကိုယ်ဝန်ပျက်ကျအောင် ကြားဖူးနာဝ ဆေးမြီးတိုတွေ သောက်ပေမယ့် အလကားပါပဲ။ သမီးရဲ့သူငယ်ချင်းက ဂျင်းနဲ့ထန်းလျက် ပြုတ်သောက်ပေးရင် ဓမ္မတာသွေး ပြန်ပေါ်လာလိမ့်မယ်တဲ့။ အဲဒါ ဟုတ်လားဟင်၊ ဂျင်း ဘယ်လောက်၊ ထန်းလျက်ဘယ်နှစ်ဆ ရောစပ်ရမှာလဲ ဘယ်လိုကျိုရမလဲဆိုတာ ဆရာမညွှန်ပြပေးစေချင်ပါတယ်။ သမီးက ထိရောက်အောင် ကျိုသောက်ချင်လို့ပါနော်။
(ဖြေ) ဘုရားရေ...ဂျင်း ဆိုတာ လူ့အသက်သတ်တဲ့အပင် မဟုတ်ဘူး။ လူ့အသက်ရှင်ရေးမှာ အထောက်အကူပြုတဲ့ ဆေးဖက်ဝင်ပစ္စည်းပါ ညီမငယ်။ သွေးထဲမှာ ကိုလက်စထရော (Cholesterol) များနေမှုကြောင့် ဖြစ်ရတဲ့ သွေးကြောကျဉ်းရောဂါ၊ နှလုံးရောဂါနဲ့ အသည်း အဆီဖုံးရောဂါများအတွက် ဂျင်းကို စားသုံးပေးခြင်းဖြင့် ကိုလက်စထရောများတာ လျော့ကျသွားစေပါတယ်။ အချိုမကြောက်သူများက ဂျင်းကို ပါးပါးလှီးထားတဲ့ ၇-လွှာ၊ ထန်းလျက် ၃-ခဲနဲ့ ကျိုသောက်ပေးနိုင်ပါတယ်။ အချိုမကြိုက်သူများအတွက်ကတော့ ဂျင်းကို ပါးပါးသေးသေး လှီးပြီး ကြက်သွန်နီတလုံး ပါးပါးလှီးလို့ နှမ်းဆီလေးနဲ့ ညတိုင်းသုပ်စားပေးခြင်းဖြင့် တလအကြာမှာ သွေးထဲမှာ ကိုလက်စထရောပါဝင်မှုနှုန်း သိသိသာသာ လျော့နည်းသွားတာ သွေးစစ်ကြည့်ရင် သိနိုင်ပါတယ်။


ရာသီအပြောင်းအလဲကြောင့် ဖြစ်ရတဲ့ တုပ်ကွေးဖျား၊ ချမ်းစိမ့်ဖျားတာ၊ လည်ချောင်းနာခြင်း၊ ချောင်းဆိုးခြင်း စတဲ့ ရောဂါဝေဒနာသည်တွေအတွက် ဂျင်းပါးပါး ၇-လွှာနဲ့ ထန်းလျက် ၃-ခဲကို ရေ သုံးခွက်တခွက်တင် ကျိုသောက်ခြင်း၊ ဟင်းလျာများမှာ ဂျင်းကို အရင်ကထက် အနည်းငယ် ပိုထည့်ချက်စားခြင်းဖြင့်
ရောဂါပျောက်ကင်းစေပါတယ်။ သုတေသနစာတမ်းအချို့မှာ ဂျင်းကိုစားပေးခြင်းဖြင့် ကုရာနတ္ထိ ဆေးမရှိဘူးလို့ ဆိုကြတဲ့ ဗိုင်းရပ်စ်ပိုးကြောင့်ဖြစ်တဲ့ အချို့ရောဂါ တော်တော်များများ ပျောက်ကင်းနိုင်ကြောင်း ဖော်ပြ
ထားပါတယ်။ အမျိုးသမီးတွေ မီးဖွားပြီး သားအိမ်မကျက်ဘဲ ဖျားနေရင်တော့ ဂျင်းတကျပ်သားနဲ့ ထန်းလျက်နှစ်ကျပ်သားကို ရေတပိဿာမှာ တဝက်ခန့်ဖြစ်အောင် ကျိုပြီး တခါသောက် ၂-အောင်စ သောက်ပေးရင် ပျောက်ကင်းတယ်လို့ ဆိုကြပါတယ်။


ညီမငယ်အတွက် အကောင်းဆုံးအကြံဉာဏ်ပေးချင်တာက ကိုယ်ဝန် ရှိ-မရှိ သေချာစစ်ကြည့်လိုက်တာ
ကောင်းပါတယ်။ ကိုယ်ဝန်ရှိရင် မိခင်ကောင်းပီသအောင် ကြိုးစားပေးစေချင်ပါတယ်။ ကိုယ်ဝန်မရှိဘူး ဆိုရင်တော့ ဓမ္မတာသွေးထိမ်ရတဲ့အကြောင်းရင်း သိရဖို့အတွက် နီးစပ်ရာ တတ်ကျွမ်းနားလည်တဲ့ ဆရာဝန်များနဲ့ ပြသစစ်ဆေးပြီး ထိရောက်တဲ့ ဆေးကုသမှု ခံယူသင့်ပါတယ်။ ကိုယ်ဝန်ပျက်ကျစေခြင်းဟာ တရားဥပဒေနဲ့ လူမှုရေးတင်မကဘဲ ကျန်းမာရေးအတွက်လည်း အလွန်အန္တရာယ်များစေတာမို့ အဲဒီစိတ်ကူး အကြံအစည်ကို အမြန်ဖယ်ရှားလိုက်ဖို့ တိုက်တွန်းပါရစေ။ ကိုယ်ဝန်မရှိချင်ဘူးဆိုရင် ကြိုတင်ကာကွယ် တားဆီးနိုင်သားပဲကွယ်၊ ဒေါက်တာနိုက်တင်ဂေးလ် ရေးသားတဲ့ “သန္ဓေကာတာ”ဆိုတဲ့ စာအုပ်မှာ ကိုယ်ဝန်တားဆီးခြင်း နည်းလမ်းမျိုးစုံကို အသုံးပြုသင့်တဲ့ အခြေအနေ၊ ရှောင်ကြဉ်ရမယ့် အနေအထားနဲ့ သုံးစွဲပုံ၊ လုံခြုံစိတ်ချရမှု ရာနှုန်းတို့ကို အပြည့်အစုံ အသေအချာဖော်ပြထားတာမို့ လေ့လာနိုင်ပါတယ်။ မဖြစ်ခင်ကတည်းက ကာကွယ်ထားခြင်းဟာ အန္တရာယ်ကင်းတာပေါ့ ညီမငယ်။
*****
(မေး) ဆရာမရှင့်၊ သမီးတို့အိမ်မှာ အဝတ်လာလျှော်ဖွပ်ပေးတဲ့ အဒေါ်ကြီးရဲ့ ခြေထောက်နှစ်ဖက်စလုံးက
ခြေဖမိုးမှာ နှင်းခူလို့ပြောကြတဲ့ အနာ အကြီးကြီး ဖြစ်နေပါတယ်။ အဲဒီနှင်းခူကြီးဖြစ်နေတာ တနှစ်နီးပါးရှိပြီတဲ့၊ ကြာလှပြီပေါ့ ဆရာမရယ်၊ အဲဒါ ပျောက်ကင်းသက်သာစေချင်မိပါတယ်ရှင်၊ အဒေါ်ကြီးကို ဘာလုပ်ပေးရလဲ ဆိုတာ အကြံပေးစေချင်ပါတယ်ရှင့်။
(ဖြေ) အရေပြား ရောင်ရမ်းတယ်၊ ပူတယ်၊ နာတယ်၊ အရည်ကြည်ဖုထွက်မယ်၊ ပြီးတော့ ပေါက်သွားပြီး သားနံရည် တရွှဲရွှဲထွက်နေမယ်၊ ယင်ကောင်လာနားမယ်၊ ပြည်တည်လာမယ်၊ အဖတ်ဖတ်တွေ ဖြစ်လာတယ်၊ ဒီလိုဖြစ်နေတာကို ဆေးသေသေချာချာ မကုသဘူးဆိုရင် သနံရည်တွေ ခြောက်သွားတဲ့အခါ ခဲသွားတဲ့အခါ အနာဖေးချပ်ကလေးတွေ ဖြစ်လာပြီး အရေပြားကြမ်းတမ်းလာမယ်၊ မာလာမယ်၊ အရပ်အခေါ်အရတော့ ဆင်နှင်းခူ နှင်းခူအစို၊ နှင်းခူအခြောက် စသဖြင့် ခေါ်ကြပါတယ်။ ဒီလိုနာတာရှည်အဆင့်ရောက်လာတဲ့ နှင်းခူကို သက်သာပျောက်ကင်းအောင် စိတ်ရှည်ရှည်ထားပြီး ပြုစုကုသပေးဖို့ လိုအပ်တဲ့အကြောင်း လူနာကိုယ်တိုင် နားလည်လက်ခံလာမှ ထိရောက်မှာပါ။


အဲဒီ နှင်းခူအနာကို ရေနွေးတို့၊ အပူလိမ်းဆေးတို့၊ အရက်ပြန်၊ အိုင်အိုဒင်းတင်ချာတို့ လိမ်းခြင်းမျိုး လုံးဝရှောင်ကြဉ်ရပါမယ်။ ဆပ်ပြာအပြင်စား ဆပ်ပြာကြမ်းတို့နဲ့ ပွတ်တိုက်ဆေးကြောခြင်း လုံးဝမပြုလုပ်ရပါဘူး။ သန့်ရှင်းစင်ကြယ်တဲ့ ရေခဲရေထဲမှာ ပိုတက်ဆီယမ် ပါမင်းဂနိတ်အမှုန်
နှမ်းစေ့တဝက်လောက် ထည့်ဖျော်လို့ရလာတဲ့ ပန်းနုရောင်ဖျော်ရည် အေးအေးသန့်သန့်လေးထဲကို အဲဒီ နှင်းခူအနာရှိတဲ့ ခြေထောက်အပိုင်းကို ထည့်စိမ်ပေးပါ။ ထည့်စိမ်ဖို့မလွယ်ကူရင် အဝတ်သန့်သန့်လေးမှာ ဆွတ်ပြီး အသာအယာ ကပ်ပေးပေါ့။ ပြီးရင် ခြောက်သွေ့သွားအောင် အသာအယာ တို့ထိသုတ်ပေးပါ။ ပိုတက်ဆီယမ်ပါမင်ဂနိတ် မရခဲ့ရင် လက်ဖက်ခြောက်ခပ်ပြီး ဖျော်ထားတဲ့ ရေနွေးကြမ်းအေးအေးသန့်သန့်
လေးကို သုံးနိုင်ပါတယ်။


ပြီးရင် အရေပြားကို လွှာပြီး ပါးအောင်လုပ်ထားတဲ့ဆေး (Keratolytic) လိမ်းရပါမယ်။ အဲဒီ လိမ်းဆေးထဲမှာ ပေါပေါများများရနိုင်ပြီး လူသုံးများတဲ့ဆေးကတော့ Salicylic acid ပါပဲ။ ပြီးတော့ Steroid (စတီးရွိုက်)လိမ်းဆေး သုံးလို့ရပါတယ်။ နာတာရှည်အဆင့်  နှင်းခူဖြစ်နေတဲ့ ခြေထောက်တွေ၊ လက်တွေမှာ အရေပြားရောဂါ အထူးကုဆရာဝန်ကြီးတွေ ညွှန်ကြားပေးလေ့ရှိတာကတော့ အားပြင်းတဲ့ စတီးရွိုက်လိမ်းဆေး အရင်လိမ်းစေပါတယ်။ လိမ်းလို့သက်သာရင် အလယ်အလတ်တန်း စတီးရွိုက်လိမ်းဆေး ပြောင်းသုံးစေ ပါတယ်။ အဲဒါသုံးရင်းနဲ့ ပျောက်ခါနီးပြီဆိုရင် အားအပျော့ဆုံး စတီးရွိုက်လိမ်းဆေး ပြောင်းခိုင်းပြန်ရော၊ စတီးရွိုက်ပြင်းအားကို လျှော့လျှော့ပေးသွားရပါတယ်။ စတီးရွိုက်ထိုးဆေးကို အရေပြားအောက်ထဲ ထိုးတာတို့၊ စတီးရွိုက်သောက်ဆေးစားတာတို့ကို တော်ရုံနဲ့ မညွှန်ကြားကြပါဘူး။ ဘာဖြစ်လို့လဲဆိုတော့ စတီးရွိုက်ဆေးရဲ့ ဘေးထွက်ဆိုးကျိုးတွေကို စိုးရိမ်လို့ပါပဲရှင်။
*****
(မေး) ဒေါက်တာရှင့်၊ ကျွန်မအရင်က အားနည်းလို့ အားဆေးထိုးတဲ့အခါ ဘားပလက်ဇ်ဆေး ထည့်ထိုးလို့ရပါတယ်။ အခု ကျွန်မ အားဆေးထိုးတဲ့အခါ အဖုအပိမ့်တွေ ထွက်လာပြီး ယားလိုက်တာရှင်၊ အဲဒါ ဘားပလက်ဇ်ဆေးနဲ့ မတည့်လို့ ဖြစ်တာလို့ ဆရာဝန်ကပြောပါတယ်၊ ကျွန်မအရင်တုန်းက ထိုးဖူးပါတယ်။ တည့်ပါတယ်လို့ ပြောပါတော့ ဆရာဝန်ကြီးက အခုမတည့်တော့လို့ပဲလို့ ပြောပါတယ်။ အဲဒါဖြစ်နိုင်ပါသလား ဒေါက်တာရှင့်။
(ဖြေ) ဟုတ်ကဲ့၊ ဖြစ်တတ်ပါတယ်ရှင်၊ အစပိုင်းက ဒီဆေးထိုးရင် တည့်တယ်။ ခန္ဓာကိုယ်ကလည်း လက်ခံပါတယ်။ နောက်ပိုင်း ဒီဆေး ခဏခဏထိုးလို့ ထိုးတဲ့အကြိမ် အရေအတွက်များလာတဲ့အခါ ခန္ဓာကိုယ်က မတည့်တဲ့ဓာတ်ဖြစ်လာရော၊ မတည့်တဲ့ဓာတ်ဟာ ပထမပိုင်းတော့ မပြင်းထန်သေးဘဲ ယားယံပြီး အဖုအပိမ့်ဖြစ်ရုံလောက်ပဲ၊ တဖြည်းဖြည်းနဲ့ နောက်ပိုင်းမှာ ပိုဆိုးလာပြီး အသက်အန္တရာယ်ပေးတဲ့အဆင့်ထိ
ဖြစ်လာနိုင်တာမို့ သတိထားသင့်ပါတယ်။


နှလုံးစိတ်ဝမ်း ငြိမ်းချမ်းကြပါစေ
ဒေါက်တာနိုက်တင်ဂေးလ်
(ရုပ်ရှင် အမြုတေ-၂၀၀၇-သြဂုတ်လ)

No comments: