Sunday, August 21, 2011

ကျန်းမာရေး မေး+ဖြေ

အမှားသိမြင်-အမှန်မြင် ဆိုသောစကားကို ကျွန်မတို့ လက်ကိုင်ထားကြခြင်းဖြင့် ဘဝရဲ့အင်အားကို ရရှိနိုင်ပါတယ်။ အမှန်စင်စစ် ဘဝရဲ့အင်အားဆိုတာ အမှန်တရားပါပဲ။ အမှန်တရားကြောင့်ဖြစ်တဲ့ ပြောင်းလဲမှုက ဘဝရဲပအနာဂတ်ကို လှလှပပ ခေါ်ဆောင်ပေးတာ ဖြစ်ပါတယ်။ အမှားကြောင့်ဆိုရင်တော့ အမှားကပေးတဲ့ သင်ခန်းစာပါပဲ။ အဲဒီသင်ခန်းစာကို သိပြီး ပြင်ဆင်ပေးလို်က်တဲ့အခါ မှန်ကို တွေ့ရှိဖို့နီးလာပါတယ်။ တချို့အမှန်တရားဟာ အမှားဆိုတာနဲ့ ကပ်လျက်ရှိပြီး တချက်မှန်တာနဲ့ တသက်မှားမယ့်အရာတွေ ကွယ်ပျောက်သွားစေပါတယ်။

(မေး) ဆရာမရှင့် သမီးအခု သားဦးမိခင်တယောက် ဖြစ်နေပါပြီ။ ကိုယ့်ကလေးကို အသက်ဘယ်နှစ်နှစ်ကနေ ဘယ်နှစ်နှစ်အထိ မိခင်နို့ တိုက်ရမှာလဲရှင့်။ သမီးရဲ့ ရင်သားတွေ တွဲကျမှာစိုးရိမ်လို့ သမီးရဲ့ကလေးကို မိခင်နို့ မတိုက်ချင်ဘူး ဆရာရယ်။ အဲဒါ ဖြစ်တယ်မဟုတ်လားဟင်၊ ဆရာမ ဖြေပေးပါနော်။

(ဖြေ) ကလေးတွေကို မွေးပြီးပြီးချင်း မိခင်နို့ စ,တိုက်ကျွေးရပါမယ် ညီမငယ်။ ကလေးတွေကို အမေနို့တမျိုးတည်း ၄-လ၊ ဒါမှမဟုတ် ၆-လထိ တိုက်ကျွေးသင့်ပါတယ်။ ကလေးရဲ့အသက် ၆-လကျော်သွားတဲ့အခါ တခြားအစားအစာတွေနဲ့ ဖြည့်စွက်ပြီး မိခင်နို့ကို ၂-နှစ်သားအရွယ်အထိ ဆက်လက်တိုက်ကျွေးရပါတယ်။ ဖြစ်နိုင်ရင် ၂-နှစ်ကျော်လွန်ပြီးလည်း တိုက်နိုင်ပါတယ်။ မိခင်နို့ရည်ဟာ---
(က) ကလေးအတွက် အကောင်းဆုံး အာဟာရ ဖြစ်ပါတယ်။
(ခ) ကလေးများ ဝမ်းလျှောရောဂါ ဖြစ်ပွားခြင်းကို ကာကွယ်ပေးပါတယ်။
(ဂ) ကလေးများအနေနဲ့ မိခင်ကိုပိုပြီး ချစ်ခင်တွယ်တာလာစေပါတယ်။
(ဃ) ကလေးတွေကို မိခင်နို့က ရောဂါမျိုးစုံ ကာကွယ်ပေးနိုင်ပါတယ်။
(င) မိခင်ဟာ ကလေးငယ်ကို နို့တိုက်နေတဲ့ ၆-လတာကာလအတွင်း လိင်ဆက်ဆံမှု ပြုမိရင်တောင်မှ ကိုယ်ဝန်မရှိနိုင်ပါဘူး။
ကလေးငယ်ကို မိခင်နို့ရည် တိုက်ကျွေးခြင်းကြောင့် အကျိုးကျေးဇူးများစွာ ရရှိနိုင်တာမို့ ကိုယ့်ကလေးကို ကိုယ့်ရဲ့နို့ရည်ကိုပဲ ကျေနပ်အားရစွာ တိုက်ကျွေးစေချင်တာပေါ့ကွယ်။
*******************************************************
(မေး) ဆရာမရှင့် သမီးရဲ့အမဟာ သူ့ရဲ့ခင်ပွန်းသည် အေအိုင်ဒီအက်စ် ရောဂါနဲ့ ကွယ်လွန်သွားပြီးကတည်းက သမီးတို့နဲ့ အတူ ပြန်နေပါတယ်။ သူ့မှာလည်း အဲဒီရောဂါပိုး ရှိနေပြီလို့ ပြောပါတယ်။ သမီးတို့ ညီအမတွေဟာ အရင်တုန်းကလိုပဲ သွားပွတ်တံတချောင်းတည်း အတူသုံး၊ တအိပ်ရာတည်း အတူအိပ်၊ အဝတ်အစား အတူဝတ်၊ တပန်းကန်တည်း အတူစား အဲလိုမျိုးနေလို့ ရောဂါပိုး ကူးစက်နိုင်သလားဆိုတာ သမီး ရှင်းရှင်းလင်းလင်း သိထားချင်လို့ ဆရာမ ဖြေကြားပေးပါနော်။

(ဖြေ) အေအိုင်ဒီအက်စ် ရောဂါဖြစ်စေတဲ့ အိတ်ခ်ျအိုင်ဗွီပိုးဟာ လိင်ဆက်ဆံခြင်းနဲ့ သွေးနဲ့သွေးပစ္စည်းတွေက တဆင့် ကူးစက်နိုင်တာကြောင့် တအိပ်ရာတည်း အတူအိပ်၊ အဝတ်အစား အတူတူဝတ်၊ တပန်းကန်တည်း အတူတူစား အဲဒီလို သာမန်နေ့စဉ် အပြုအမူတွေကနေ မကူးစက်နိုင်ဘူးလို့ ဆိုပေမယ့် ရောဂါပိုးရှိသူ အရင်တိုက်ပြီးသား သွေးစတွေ ပေကျံနေတဲ့ သွားတိုက်တံကို ဆက်တိုက်မယ်ဆိုရင် ရောဂါပိုး ကူးစက်နိုင်ပါတယ်။ ဒါကြောင့်မို့ အိတ်ချအိုင်ဗွီပိုး မကူးစက်အောင်၊ အထွေထွေကျန်းမာရေးနဲ့လည်း ညီညွတ်အောင် သွားတိုက်တံတချောင်းတည်း အတူမသုံးဘဲ တချောင်းစီ သီးသန့်ထားပြီး သုံးစွဲတာအကောင်းဆုံးပါပဲကွယ်။
*****************************************************
(မေး) ဆရာမခင်ဗျား အလုပ်ကိစ္စအတွက် ကျန်းမာရေးဆေးစစ်ခံရပါတယ်။ ကျွန်တော့်မှာ ကာလသားရောဂါ ရှိ-မရှိ သွေးစစ်တဲ့အဖြေ ထွက်လာတဲ့အခါ အဖြေမှာ ရှိတယ်ဆိုပြီး (+)ရေးထားတာ တွေ့ရတယ်။ ကျွန်တော်က ကိုယ့်အကြောင်း ကိုယ်အသိဆုံးပါ။ ဒီရောဂါ ရစေတဲ့အပြုအမူ တခုမှ ကျွန်တော်မလုပ်ခဲ့ပါဘူး။ အဲဒါ အဖြေမှားယွင်းနေတာမျိုး ဖြစ်နိုင်ပါသလား။ ဆရာမ ဖြေကြားပေးပါချင်ဗျား။


(ဖြေ) ဆစ်ဖလစ် ကာလသားရောဂါ ရှိတယ်ဆိုတာ အတည်ပြုဖို့ စမ်းသပ်မှု အနည်းဆုံး ၃-ခုလုပ်သင့်ပါတယ်။ VDRL Rest ဆိုတာ ပါကိုပါရမှာ ဖြစ်ပေမယ့် ဒီတခုတည်း အားကိုးလို့မရပါဘူး။ VDRL Test ဆိုတာ ခန္ဓာကိုယ်ကထွက်တဲ့ ပဋိပစ္စည်း (Antibody) ကို ရှာတာပါ။ အခု ကျွန်မတို့နိုင်ငံမှာ VDRL တခုတည်း စစ်တာမို့ မှားယွင်းပြီး (+)ive အဖြေပေးထားတာ တွေ့ရှိနိုင်ပါတယ်။ ကျွမ်းကျင်မှု၊ အတတ်ပညာပိုင်းဆိုင်ရာ စစ်တာမှားတာကြောင့်လည်း ဖြစ်နိုင်တာပဲ။ နောက်တခုက လတ်တလော ပြင်းပြင်းထန်ထန် ဖျားနာပြီးခါစ ငှက်ဖျားရောဂါ အနာကြီးရောဂါ၊ တီဘီရောဂါ အကြာကြီးဖြစ်ထားရင် VDRL Test နဲ့ စမ်းတဲ့အခါ မှားယွင်းပြီး Postive ဖြစ်တတ်ပါတယ်။ မူးယစ်ဆေးဝါး သွေးကြောထဲ ထိုးတဲ့လူတချို့မှာလည်း ဒီလိုမျိုး ဖြစ်တတ်ပါတယ်။


ဒေါက်တာနိုက်တင်ဂေးလ်
(ရုပ်ရှင်အမြုတေ ၂၀၀၆-ခု ဒီဇင်္ဘာလ)

No comments: