Tuesday, September 27, 2011

ဒုစရိုက်-သုစရိုက်အတွက် သန်းခေါင်စာရင်း ကောက်ခြင်း-မကောက်ခြင်း

နတ်တို့ လူ့ပြည်သို့ဆင်း၍  လှည့်လည်စုံစမ်းပြီး ဒုစရိုက် သုစရိုက် သန်းခေါင်စာရင်း ကောက်ယူခြင်းမှာ အကြောင်းမဲ့သက်သက် မဟုတ်ချေ။ စုံစမ်းရလောက်အောင် အခြေအနေဖြစ်ပေါ်နေ၍ လူ့ပြည်သို့ ဆင်းရခြင်း ဖြစ်လေသည်။

သိကြားမင်းနှင့်တကွ နတ်ပရိသတ်အပေါင်းတို့သည် တာဝတိံသာနတ်သဘင်၌ စည်းဝေးကြကုန်၏။ နတ်တို့အစည်းအဝေးသဘင်တွင် နတ်သား-နတ်သမီး ပရိသတ်တို့ စည်စည်ကားကားမရှိကြဘဲ ကျိုးတိုကျဲတဲ ဖြစ်နေ၍ သိကြားမင်းမှာ စိတ်မချမ်းမသာ ဖြစ်နေရှာသည်။ နတ်သဘင်အစည်းအဝေးတွင် ဓတရဋ္ဌနတ်မင်းကြီး၊ ဝိရူဠှကနတ်မင်းကြီး၊ ဝိရူပက္ခနတ်မင်းကြီး၊ ကုဝေရနတ်မင်းကြီး စသည့် နတ်မင်းကြီး လေးယောက်တို့လည်း သိကြားမင်းကို ရံ၍ ခစာေးနကြသည်။

ဓတရဋ္ဌနတ်မင်းကြီးနောက်တွင် သူ၏အခြွေအရံဖြစ်သည့် ဂန္ဓဗ္ဗနတ်တို့ ခစားနေကြသည်။
ဝိရူဠှကနတ်မင်းကြီးနောက်တွင် သူ၏အလုပ်အကျွေးနတ်များဖြစ်သည့် ကုမ္ဘဏ်နတ်များ ခြံရံနေကြသည်။
ဝိရူပက္ခနတ်မင်းကြီးနောက်မှ သူ၏အခြံအရံဖြစ်ကုန်သော နတ်နဂါးတို့ ခြံရံနေကြသည်။
ကုဝေရနတ်မင်းကြီးနောက်မှာတော့ သူ၏လက်ပါးစေတွေ ဖြစ်ကြသည့် နတ်ဘီလူးတို့ ခြံရံ၍ နေကြကုန်၏။

သိကြားမင်းက နတ်မင်းကြီးလေးပါးနှင့် နတ်အပေါင်းတို့ကိုကြည့်ပြီး စိတ်မသက်မသာဖြစ်နေ၍ မျက်နှာလည်း မသာမယာ ဖြစ်နေသည်။
အရှင်နတ်မင်းကြီးများနဲ့ အရှင်နတ်သား နတ်သမီးအပေါင်းတို့...ရှေးအခါကဆိုလျှင် ငါတို့နတ်သဘင်သည် လွန်စွာမှ စည်ကားလှ၏။ ဒေဝါ ဒေဝီ အလီလီဖြစ်ကုန်သော နတ်သား နတ်သမီးအပေါင်းတို့သည် အဆင်တန်ဆာ အရောင်အဝါတို့ဖြင့် တဝင်းဝင်းတလျှပ်လျှပ် တင့်တယ်စည်ကားလို့ နေကြသည်မဟုတ်လော။ အခု ငါတို့နတ်သဘင်ကို လာရောက်ကြသည့် နတ်သား နတ်သမီးတို့မှာ ကျဲတိကျဲတောက်နှင့်
ခြောက်ကပ်နေကြပါရော့လား။ နတ်ဘုံနတ်နန်း နတ်ဗိမာန်တို့မှာလည်း နေသူမရှိ ကျီးနှင့်ဖုတ်ဖုတ်ဆိုသလို နေထိုင်သူမရှိဘဲ တိတ်ဆိတ်ကင်းမဲ့နေကြပြီး ကြာလျှင် တို့ရဲ့တာဝတိံသာနတ်ပြည်ကြီးပါ လုံးပါးပါး၍ ပျောက်သွားနိုင်သည်။ နတ်အပေါင်းတို့...လူ့ပြည်မှာ ဘာတွေဖြစ်နေကြသလဲဆိုတာ အသင်နတ်မင်းတို့ ဆင်း၍စုံစမ်းချေမှ သင့်မည်။


သိကြားမင်းက ပြောဆိုပြီး စိတ်မကြည်မလင်ဖြင့် နတ်သဘင်ညီလာခံကို သိမ်းလိုက်လေသည်။
သိကြားမင်း နတ်သဘင်အစည်းအဝေးက ထွက်သွားပေမယ့် နတ်မင်းကြီးလေးပါးနဲ့ နတ်အပေါင်းတို့ မထွက်ခွာနိုင်ကြသေး။ သိကြားမင်း အမိန့်ပေးသွားတဲ့ကိစ္စကို စတုမဟာရာဇ် နတ်မင်းကြီး
လေးယောက်တို့သည် လူ့ပြည်ကိုဆင်း၍ မည်သို့သန်းခေါင်စာရင်းကောက်ယူကြမည်ကို
ဆွေးနွေးတိုင်ပင်ကြလေသည်။
အချင်းနတ်မင်းတို့...ကျွန်ုပ်တို့ နေ့စဉ် လူ့ပြည်ကိုဆင်း၍ သန်းခေါင်စာရင်း ကောက်ကြမလား၊ ဒါမှမဟုတ် ရက်သတ်မှတ်ပြီး ကောက်ကြမလား။ ရက်သတ်မှတ်ပြီး ကောက်မယ်ဆိုရင် မည်သည့်နေ့ရက်တွေမှာ ဆင်းကြမလဲဆိုတာ ဆွေးနွေးတိုင်ပင်ကြပြီး--- 


၁။ လပြည့်နေ့များ၌ စတုမဟာရာဇ် နတ်မင်းကြီးလေးယောက်ကိုယ်တိုင် လူ့ပြည်ဆင်း၍ သန်းခေါင်စာရင်း ကောက်ယူကြရမည်။
၂။ လကွယ်နေ့တိုင်း၌ နတ်မင်းကြီးလေးယောက်တို့၏ သားတော်များက လူ့ပြည်ဆင်းပြီး ကောက်ယူကြရမည်။
၃။ လဆန်း ၈-ရက်နှင့် လဆုတ် ၈-ရက်နေ့များတွင် နတ်မင်းကြီးလေးပါးတို့၏ အလုပ်အကျွေးဖြစ်သော  ယုံကြည်စိတ်ချရသော မှူးကြီးမတ်ရာ သေနာပတိတို့သည် သန်းခေါင်စာရင်းကောက်ယူကြရမည်။ဟု ဆုံးဖြတ်ကြလေသည်။


ထိုသို့ လူ့ပြည်ကို လစဉ်ဆင်းလာပြီး သန်းခေါင်စာရင်း ကောက်ယူနေကြပုံကို ရဟန်းတော်များနှင့် ဒကာ ဒကာမတို့ အကျယ်သိရှိနိုင်ရန် မြတ်စွာဘုရားရှင်က အင်္ဂုတ္တိုရ်ပါဠိတော် တိကနိပါတ် စတုမဟာရာဇသုတ်၌ အတိအလင်း ဟောကြားတော်မူထားပါသည်။


ရဟန်းတို့...လဆန်းတဆယ့်ငါးရက်မြောက် ဥပုသ်နေ့၌ နတ်မင်းကြီးလေးယောက်တို့ကိုယ်တိုင်ပင် ဤလောကကို လှည့်လည်၍ စုံစမ်းကြကုန်၏။
လူ့ပြည်၌ များစွာကုန်သောသူတို့သည် အမိ၌ ကောင်းစွာပြုကျင့်သင့်သော ကျင့်ဝတ်ကို ပြုကြပါကနု၏လော။ အဖ၌ ---လော။ သမဏ၌ ---လော။ ဗြဟ္မဏတို့၌----လော။ အမျိုးထဲ၌ ကြီးသော အဘိုး အဘွား, ဦးကြီး ဦးလေး, အဒေါ် စသည်တို့ကို ရိုသေစွာ ပြုကျင့်ကြပါကုန်၏လော။
အကြိုအပိုနှင့်တကွ ဥပုသ်သီတင်းကို ကျင့်သုံးကြပါကုန်၏လော။ ကောင်းမှုကို ပြုကြပါကုန်၏လော-ဟု လှည့်လည်စုံစမ်းကြကုန်၏။


ရဟန်းတို့ လကွယ်နေ့၌လည်း နတ်မင်းကြီး လေးပါးတို့၏ သားများတို့သည်၎င်း၊
လဆန်း လဆုတ် ရှစ်ရက်နေ့များတွင်လည်း နတ်မင်းကြီးလေးပါးတို့၏ အလုပ်အကျွေးဖြစ်ကုန်သော ယုံကြည်စိတ်ချရသော မှူးကြီးမတ်ရာ သေနာပတိတို့သည်လည်း လူ့ပြည်သို့ဆင်း၍ လှည့်လည်စုံစမ်းကြကုန်၏။ ကောင်းမှု မကောင်းမှုတို့ကို သန်းခေါင်းစာရင်း ကောက်ယူကြကုန်၏။


ဤသို့ကောက်ယူသော ကောင်းမှု-မကောင်းမှု သန်းခေါင်စာရင်း အားလုံးကို ပဉ္စသိခနတ်သားထံသို့ အပ်ကြရသည်။ ပဉ္စသိခနတ်သားမှတဆင့် မာတလိနတ်သားထံသို့ ပေးအပ်ကြရလေသည်။ မာတလိနတ်သားသည် ထိုကောင်းမှု မကောင်းမှုတို့၏ သန်းခေါင်စာရင်းတို့အား သိကြားမင်းထံသို့ ဆက်သရလေသည်။


ဤသို့ လစဉ်ကောက်ယူသည့် သန်းခေါင်စာရင်းပါ လူ့ပြည်က ကောင်းမှု မကောင်းမှုတို့ကို နတ်သို့သိစေခြင်းငှါ သုဓမ္မာမဏ္ဍပ်၌ နတ်တို့ကို စည်းဝေးစေပြီး လူ့ပြည်က ကောင်းမှု မကောင်းမှုလုပ်သူစာရင်းကို
ကြေညာပေးလေသည်။

အကယ်၍ ကုသိုလ်ပြုသူနည်းပါးပြီး အကုသိုလ်ပြုသူ များနေလျှင် သိကြားမင်းသည် နှလုံးမသမယာ ဖြစ်တော်မူ၍ ညည်းတွားလေသည်။


အချင်းတို့...လူ့ပြည်၌ အနည်းငယ်သောသူတို့သည်သာလျှင် အမိ၌ ကောင်းစွာပြုကျင့်အပ်သော အမှုကို ပြုကြကုန်၏။ အဖ၌ --သမဏ၌---ဗြဟ္မဏတို့၌--အမျိုး၌ ကြီးသူ အဘိုးအဘွားတို့၌ ကောင်းစွာ ကျင့်အပ်သောအမှုကို ပြုကြကုန်၏။ အကြိုအပိုနှင့်တကွ ဥပုသ်သီတင်းကို ပြုကျင့်ကြကုန်၏။ 
ဒါကြောင့် အချင်းတို့ ငါတို့နတ်ပြည်၌ ဆိတ်သုဉ်းဆုတ်ယုတ်ကုန်လေပြီး အပါယ်လေးပါးတို့၌သာ စည်ကားကုန်လိမ့်တကား။ 


လူ့ပြည်၌ ကုသိုလ်ပြုသူ များပြားနေလျှင် သိကြားမင်းသည် ဝမ်းမြောက်ဝမ်းသာဖြစ်လေသည်။
အချင်းတို့...လူ့ပြည်၌ အကုသိုလ်ပြုသူ နည်းပါးနေလျှင် တို့နတ်ပြည်သည် စည်ကားကုန်၍ အပါယ်ဘုံတို့မှာ ဆုတ်ယုတ်ကုန်လိမ့်မည်။

မှတ်ချက်။ ။ 
သိကြားမင်း လူ့ပြည်ဆင်းပြီး ကောင်းမှုပြုသူကို ရွှေပုရပိုက်နှင့်, မကောင်းမှုပြုသူကို ခွေးရေပုရပိုက်နှင့် မှတ်တာ, မမှတ်တာတော့ လိုရင်းမဟုတ်။ သိကြားမင်းရဲ့ ယုံကြည်ရတဲ့သူတွေ လူ့ပြည်ကို လပြည့်, လကွယ်, လဆန်း, လဆုတ် ရှစ်ရက်နေ့တွေမှာ လူ့ပြည်ကိုဆင်းပြီး သန်းခေါင်စာရင်းကောက်ယူတာတော့ ဘုရားရှင်ရဲ့ စတုမဟာရာဇ်သုတ်မှာ အတိအလင်း ဟောကြားထားပြီးဖြစ်၍ ရွှေပုရိုက်ပိုင်စာရင်းဝင် ဖြစ်အောင်
ကောင်းမှုကုသိုလ်တရားတွေကို ကြိုးစားလုပ်ကြရပေမည်။ 


မောင်လှယဉ် (မော်လမြိုင်) 
**********
မှတ်ချက်။ 
ကောက်နုတ် တင်ပြသည်။
မော်လူး

No comments: