Wednesday, September 28, 2011

တင်ပါးအကြောညပ်သော် ခံရမခက်လော

ဆေးပညာအစိတ်အပိုင်း တရပ်ဖြစ်သည့် အကြောပြင် (အနှိပ်ပညာ)ကို လေ့လာကြည့်လျှင် အကြောဝေဒနာ ဖြစ်ရခြင်းအကြောင်းရင်းများတွင် ထိခိုက်ဒဏ်ရာကြောင့်သော်၎င်း၊ ပတ်ဝန်းကျင် ရာသီဥတုကြောင့်သော်၎င်း၊ အစားအသောက် အနေအထိုင်ကြောင့်သော်၎င်း ခန္ဓာကိုယ်၏ အစိတ်အပိုင်း တနေရာရာတွင် သွေးလည်ပတ်မှု နှေးကွေးလာသည်နှင့်အမျှ တင်းမာမှု လေးလံမှု ကိုက်ခဲမှုနှင့် နာကျင်မှုများ  ဖြစ်ပေါ်စေတတ်ပါသည်။ ယင်းဝေဒနာရှင်များအား ပုံမှန်သွေးလည်ပတ်စေရန် ပြုပြင်ပေးလိုက်သည်နှင့် တပြိုင်နက် ဝေဒနာမှာလည်း ချက်ချင်းဖယ်ရှားပေးလိုက်သလို လျင်မြန်စွာ ပျောက်ကင်းစေနိုင်ပါသည်။

ဤသို့ ပြုပြင်ဖယ်ရှားရာတွင် လက်ရှိ သမားရိုးကျ အကြောပြင်(နှိပ်ကွက်)များမှာ တနေရာတည်းကို ဖိနှိပ်သည့် Static Method ကို အသုံးပြုကြသဖြင့် မလိုလားအပ်သော နာကျင်မှုဝေဒနာများ လူနာတွင် ခံစားရတတ်ပါသည်။ တချို့ရောဂါများအနေဖြင့် ယင်းသို့ဖိနှိပ်ခြင်းကြောင့် ထိရော်ကမှုနည်းပါးပြီး တကြိမ်တည်းနှင့် မသက်သာဘဲ နောက်ထပ် လူနာအား ချိန်းဆိုရသဖြင့် ဝေဒနာရှင်အတွက် ငွေကုန်၊ အချိန်ကုန်၊ လူပင်ပန်းစေသည့် မလိုလားအပ်သော နောက်ဆက်တွဲအကျိုးဆက်များ ခံစားရတတ်ပါသည်။ 

ယခုတင်ပြမည့် အကြောညပ်ခြင်း၊ အခု ခေါ်တွင်သမုတ်သည့် ပေါင်အပြင်ကြောတင်း ဝေဒနာမျိုးမှာလည်း Static နည်းဖြင့် ဖိနှိပ်ပါက တကြိမ်တည်းသက်သာနိုင်မည် မဟုတ်ပါ။

ပေါင်အကြောညပ် (ပေါင်အပြင်ကြောတင်း)ဖြင်း, တင်းတယ်ဆိုတာ ဘယ်လိုလဲ
ထိုင်ရာမှ ထလျှင်သော်၎င်း၊ လမ်းလျှောက်လျှင်သော်၎င်း၊ အိပ်ရာထဲလဲလျောင်းရာ၌ ဟိုဘက်သည်ဘက် စောင်းအိပ်သည့်အခါမျိုးတွင် တင်ပါးဆုံမှ ဒူးဆစ်အထိ အချို့သောသူများတွင် ခြေသလုံးအထိ ပေါင်အပြင်မှ အကြောတင်းနေသည့်အတွက် လှုပ်ရှားရန် အခက်အခဲတွေ့နေတတ်ပါသည်။ ယင်းဝေဒနာမျိုးကို လိမ်းဆေးများ လိမ်ေးသည့်တိုင် သက်သာရန် ခက်ခဲပါသည်။ တခါတရံ တနှစ်ကျော် နှစ်နှစ်အထိ ကြာမြင့်တတ်ပါသည်။ 

ဘာဖြစ်လို့ ဖြစ်တာလဲ--- 
အောက်ပိုင်းအအေးပတ်သည့်လုပ်ငန်းကို လုပ်ကိုင်သူများ၊ Aircon ဖွင့်အိပ်သူမျာါ်နှင့် လေတိုက်တွင် ကြာမြင့်စွာ နေထိုင်သူများအနေဖြင့် ခြေထောက်အောက်ပိုင်း အပူဓာတ်လုံလောက်စွာ မရရှိသဖြင့် အအေးပတ်ရာမှ စတင်၍ ဝေဒနာခံစားရတတ်ပါသည်။

ဝေဒနာမဖြစ်အောင် ဘယ်လိုကာကွယ်မည်နည်း---
ခြေထောက်အအေးမမိစေရန် နွေးနွေးထွေးထွေး နေပါ။ သွေးပူစေရန် ခြေထောက်လေ့ကျင့်ခန်းများ ပြုလုပ်ပါ။ လိုအပ်လျှင် ခြေထောက်ကို မီးလှုံပါ။ လိုအပ်ပါက ခြေဖဝါးမှ ပေါင်အထိ ကြပ်ထုပ်ထိုးပေးပါ။


ဘယ်လိုကုလျှင် ပျောက်မလဲ---
ယင်းဝေဒနာရှင်များဟာ လိမ်းဆေးလူးခြင်းဖြင့် ပျောက်ကင်းရန် မလွယ်ကူသည့်အပြင် တင်းနေသော အကြောကို နှိပ်ရုံမျှနှင့်လည်း လျင်လျင်မြန်မြန် ပျောက်ကင်းမည်မဟုတ်ပါ။ တင်ပါးဆုံမှ တင်းနေသော အကြောကို လက်မနှင့် ဖိထောက်ထားပြီး ဒူးကို အထက်သို့ ကွေးလိုက် ဆန့်လိုက် ၅-ကြိမ်ပြုလုပ်ပေးပါက ချက်ချင်းသိသိသာသာ သက်သာလာပါမည်။ သို့ရာတွင် တကြိမ်တည်းလုပ်ရုံဖြင့် ပျောက်ကင်းနိုင်မည် မဟုတ်ပါ။ တင်းလာတိုင်း အနည်းဆုံး တနေ့ ၄-၅ ကြိမ် ပြုလုပ်မှ ၂-ရက် ၃-ရက်အတွင်း ပျောက်ကင်းမည်ဖြစ်ပါသည်။ 


ဆရာဦးအေးထွန်း
(ဂမ္ဘီရ ၂၀၀၉-ဇူလိုင်လ)

No comments: