Friday, November 11, 2011

ခေါင်းလှည့် ခါးလှည့် ပေါင်လှည့်

လူ့ခန္ဓာကိုယ်သည် စက်ကိရိယာနှင့် တူပေသည်။ ဦးခေါင်း ခါးနှင့် ပေါင်မှာ လူ့ခန္ဓာကိုယ်၏ အဓိက အင်္ဂါ အစိတ်အပိုင်းများ ဖြစ်သည်။ စက်ကိရိယာသည် အစဉ်အမြဲ လည်ပတ်နေမှ သံချေးမတက်နိုင်ပေ။
ထို့အတူ ဦးခေါင်း ခါးနှင့် ပေါင်ကိုလည်း အစဉ်အမြဲ လှည့်၍  လှုပ်ရှားပေးမှသာ အနာရောဂါ ကင်းဝေးပြီး ကျန်းမာ သန်စွမ်းနိုင်မည်ဖြစ်ပေသည်။

ရှေးခေတ်နှင့် ယခုခေတ် ဆေးပညာရှင်တို့၏ သုတေသနပြုချက်အရ ခေါင်းလှည့် ခါးလှည့် ပေါင်လှည့် ကျန်းမာရေး လေ့ကျင့်ခန်းကို အစဉ်အမြဲ ပြုပေးလျှင် ခနကိုယ် ကျန်းမာသန်စွမ်းစေနိုင်သည်။ အင်္ဂါ အစိတ်အပိုင်း မယိုယွင်းအောင် ကြိုတင် ကာကွယ်နိုင်သည်။ သွေးလည်ပတ်မှုကို ကောင်းလာစေနိုင်သည်ဟူ၍ ယူဆကြပေသည်။

ထို့အပြင် ဤကျန်းမာရေး လေ့ကျင်ခန်းသည် လူလတ်ပိုင်းနှင့် သက်ကြီးရွယ်အိုတို့သည် အလွန်အကျိုးရှိစေနိုင်မည့် လေ့ကျင့်ခန်းတမျိုးလည်း ဖြစ်ပေသည်။

၁။ ခေါင်းကို လှည့်ပေးခြင်း။
မတ်တတ်ရပ်အနေအထားနဲ့  မျက်စိကို မှေးထား၍ ရင်ကော့ပြီး ဗိုက်ကိုရှပ်ထားပါ။ ဦးခေါင်းကို လက်ယာရစ် ၁၀-ကြိမ် လှည့်ပေးပြီး၊ လက်ဝဲရစ် ၁၀-ကြိမ် လှည့်ပေးပါ။ 
ဇက်ကြောညောင်းသည့်အခါတိုင်း ထိုနည်းဖြင့် လှည့်၍လေ့ကျင့်ပေးပါ။

ဤလေ့ကျင့်ခန်းနည်းဖြင့် ဦးခေါင်းကို အစဉ်အမြဲ လှည့်ပေးလျှင် လည်ပင်းကြွက်သား လည်ပင်းအရိုးအဆစ်ကို သန်မာစေနိုင်မည်။
ထို့ပြင် ဦးခေါင်းကိုက်ခြင်း၊ အိပ်ရေးပျက်ခြင်း၊ လည်ဆစ်ရိုး ကျီးပေါင်းတက်ခြင်း အစရှိသည့် ဝေဒနာတို့ကို ကြိုတင်ကာကွယ်နိုင်သည်။ ကုသနိုင်သည်။

၂။ ခါးကိုလှည့်ပေးခြင်း။
ပေါင်နှစ်ဖက်ကို ခွါ၍ရပ်ပြီး လက်နှစ်ဖက်ကို ခါးစောင်းနှစ်ဖက်တွင် တင်ထား၍ ခါးကို ရှေ့သို့ အနည်းငယ် ကိုင်းညွတ်ကာ လက်ယာရစ်၍ ၁၀-ကြိမ်လှည့်ပေးပါ။ ထို့နောက် လက်ဝဲရစ်၍ ၁၀-ကြိမ် လှည့်ပေးပါ။
ခါးညောင်းတိုင်း ထိုနည်းဖြင့် လှည့်၍ လေ့ကျင့်ပါ။ ဤကျန်းမာရေး လေ့ကျင့်ခန်းကို အစဉ်အမြဲ လေ့ကျင့်ပေးလျှင် ခါးကြွက်သားနှင့် ခါးရိုးဆစ်ကို သန်မာလာစေနိုင်သည်။

နာတာရှည် ခါးအကြောတင်ခြင်း၊ ခါးအရိုးအဆစ် ကျီးပေါင်းတက်ခြင်း၊ ခါးရိုးဆစ်ကြား ချပ်ပိုင်း ငေါထွက်ခြင်း၊ ရိုမက်တစ် ခါးကိုက်နာ၊ တင်ခံရိုး နာ့ဗ်ကြော ကိုက်ခဲခြင်း စသည်တို့ကို ကြိုတင် ကာကွယ်နိုင်သည်။ အကိုက်အခဲသက်သာအောင် ကုသနိုင်မည် ဖြစ်သည်။

၃။ ပေါင်ကို လှည့်ပေးခြင်း။
မတ်တတ်ရပ်အနေအထားနဲ့ ပေါင်နှင့်ခြေနှစ်ဖက်ကို စေ့ထားပါ။ ထို့နောက် လက်နှစ်ဖက်ကို ဒူးဆစ်နှစ်ဖက်ပေါ် တင်ထား၍ ခြေတံကို ကွေးပြီး လက်ယာရစ်၍ ၁၀-ကြိမ် လှည့်ပေးပါ။ ထို့နောက် လက်ဝဲရစ်၍ ၁၀-ကြိမ် လှည့်ပေးပါ။

ဤလေ့ကျင့်ခန်းကို အစဉ်အမြဲ လေ့ကျင့်ပေးလျှင် ပေါင်ကြွက်သားကို သန်မာလာစေနိုင်မည်။
ဒူးဆစ်ရောင်နာ၊ ကိုယ်အောက်ပိုင်း သွေးပြန်ကြော ဖောင်းကြွ တွန့်လိမ်ခြင်း၊ တင်ခံရိုး နာ့ဗ်ကြော ကိုက်ခဲခြင်း အစရှိသည့် ဝေဒနာတို့ကို ကြိုတင်ကာကွယ်နိုင်မည်။ ကုသနိုင်မည် ဖြစ်လေသည်။


မောင်လှကျော် (သူရဲသမိန်)
စာညွှန်း---Chinese Medecine Journal 2001/2

No comments: